Kudifukula kwaChisaka—Kwalema Hakwila Nawu Twakapuluki

“NJITA yefuku odu deneni daNzambi Watwesha yejima” yakekala yakutiyisha woma. (Chimwekeshu 16:14) Kaprofwetu Mika wasonekeli chatiyakana munkinji nindi: “Mapidi akusuñunuka . . . , niyinekineki yikubaluka neyi nsela yidi kukesi, hela neyi meji adi nakupwampumuka mwasweja kukunkumuka.” (Mika 1:4) Yumanyi yatama yikamwekena antu abulaña kumukalakela Yehova? Izu daNzambi dahosha nawu: “Akajahawu kudi Yehova ifuku odu akekala heseki dejima kufumisha kunsa yeseki yimu ndo nikunsa yeseki yikwawu.”—Yeremiya 25:33.

Kwesekeja naniku kubabesha, nyitu yayisaka, amavulu hiyanvwali ajiki, atela kudihula kutalisha hadi anyanawu akula dehi nawa anateli kudifukwilahu, nawu, ‘Komana anyanami amba kapuluka hanjita yaAmagedoni?’ Bayibolu yakoleshaña nawu akapuluka neyi ekala atona nikukola kuspiritu kwesekeja nayaaka yikwetuwu.—Matewu 24:21.

Chichalemena Kwikala naMpinji yaKudifukula kwaChisaka

Hakwikala anvwali, zatenu hakumina ñovu jenu jejima kulonda kulela anyanenu “nakuyibabesha nikuyikonkomwena mudi Mwanta.” (Aefwesesa 6:4) Kudiza Bayibolu nawanyanenu kwalema chikupu. Tunakukeña anyanetu kwikala neyi akwaKristu akuFwilipi, ahamekeliyi Pawulu hamuloña wakumwovwahila Yehova. Wasonekeli nindi: “Dichi enu akwetu nakeña, chimwovwahilaña mafuku ejima, kalakalenu wamwinu wenu aweni nawoma nakuzaala, bayi hinashakamaña nanenu hohuku, chiña musweji nihanu hinidi kwacheñi.”—Afwilipi 2:12.

Komana anyanenu ovwahilaña nshimbi jaYehova neyi himudi nawuku? Komana ovwahilaña nshimbi jaYehova neyi adi kushikola? Munateli kukwasha ñahi anyanenu kwiteja chikupu kuwaha kwekala munshimbi jaYehova kulonda jiyilomboleña hela chakwila himudi nawuku?

Kudifukula kwachisaka kunateli kuyikwasha chikupu kukolesha chikuhwelelu chamwanenu kulonda kumwovwahila Yehova hela chakwila adi nkawawu. Dichi, tuhanjekenu hayuma yisatu yitwatela kwila kulonda kudiza kwaBayibolu kwikali kwakuwahi.

Mudifukuleña Mpinji Yejima Hefuku Dimwatonda daKudifukula kwaChisaka

Bayibolu yahoshaña nawu añelu anyana kaNzambi ayitambikaña kumesu aNzambi hampinji jatoñolañayi. (Yoba 1:6) Anenu nawa mwileña mwomumu nawanyanenu. Tondenu ifuku nimpinji yimukwikalaña naKudifukula kwaChisaka kwamelela nawa mwatela kudizaña mpinji yejima hefuku denidi. Kubombelahu, mwatela kutondahu mpinji yakuzatilamu yuma yikwawu yamwekanaña.

Chimwahita tukweji, bayi mwikala nachaaku chakwila nawu chachiwahi kukilokela kudiza Bayibolu kwachisakaku. Ilukenu nenu, anyanenu diwu atudizi aBayibolu alema chikupu. Hela chochu, Satana wakeñaña kuyilukuka. (1 Petulu 5:8) Neyi chakwila himwekalaña naKudifukula kwaChisaka kwamelalaku, nawa mwazatishaña mpinji yeniyi kukutala TV hela yuma yikwawu yamukunkulwayi, dikwila nawu Satana nayishindi.—Aefwesesa 5:15, 16; 6:12; Afwilipi 1:10.

Bombelenumu Nsañu Yinateli Kuzatika muChihandilu chaMpinji Yejima

Kudifukula kwaChisaka kwamelela bayi neyi kwakudiza hohu nsañu yalalaku. Fwilenu kuhanjeka hansañu yinateli kuyikwasha muchihandilu. Munjilanyi? Mpinji jikwawu, tondenu nyitu yansañu yinakundami kuyuma yinateli kumumwekena mwanenu kumafuku  hela nyilungu yakumbidi. Chakutalilahu, komana kwila mubombelahu nsañu yakuzatisha mumudimu wamwiha nehi? Atwansi adiluñishaña yuma yakoñañawu chiwahi. Kuhituluka munsañu yakuzatisha mumudimu wamwiha nikutoñojoka hanjila mwakumanishila yuma yakañeshaña chikuyikwasha kwikala akola neyi anakukalakala munjila jashiyashana jamudimu wakushimwina Wanta.—2 Timotewu 2:15.

Munateli cheñi kuhituluka munsañu yinateli kukwasha anyanenu kushinda ikañesha dawakwawu. Esekenu kuhanjeka hansañu yikuleñela mwanenu kwakula yuma yinateli kumupelela kwakula. Kwila mwenimu chinateli kubombelamu kuyihula anyanenu kutalisha hakukala kunakumonawu. Kukala kweniku akwimwenaña kudihi? Chumanyi chikumwekana neyi akañanya kukwishinda? Chumanyi chikumwekana neyi akwishinda? Komana kwila muhitulukañamu muñakwilu yinateli kwakulawu kutalisha hakukala kunakumonawu nehi?

Kudifukula kwachisaka kwakwashaña anvwali kukonkomwena hakuwaha kwafumaña mukwimika yikonkwanyi yakuspiritu. Yihandilu yawantu ashinshika yasonekañawu mumagazini etu yahoshaña hansañu yayiwahi yinateli kukwasha mwanenu kwiluka nindi kusha maana hakumuzatila Yehova dichuma chachiwahi chatela kwilayi. Mukwashenu mwanenu kufwila kuzataku mudimu wawupayiniya, kuzatila haBeteli, kuya kuShikola yaKudiza Mudimu waWunkoñi, hela kufwila nyidimu yikwawu yamudimu wampinji yejima.

Chachiwahi kwiluka netu anvwali amakwawu akeñaña nawu anyanawu akoñeña yuma yayiwahi hohu, aluwañeshaña hakusha maana kunyidimu yakeñañawu nawu anyanawu akakalakaleña chakwila aleka nikuyihameka hayuma yayiwahi yinakwilawu. Kafwampi, chachiwahi kukolesha anyanenu kwimika yikonkwanyi yidi neyi kuzatila haBeteli, nimudimu wawumishonali niyikonkwanyi yikwawu. Hela chochu, neyi mukwila mwenimu, babalenu kulonda mubuli kumuhilisha nikumuneñesha mwanenu nayuma yimunakukuhwelela. (Akolosi 3:21) Mpinji yejima mwatela kwanuka nenu mwanenu watela kumukeña Yehova namuchima windi, bayi namuchima wenuku. (Matewu 22:37) Dichi, keñenu njila jakumuhamekelamu mwanenu hayuma yayiwahi yinakwilayi nikutondolwela chaaku chakusha maana hayuma yinakubula kwilayi. Mwatela kuhameka hayuma yejima yinayikoñeliyi Yehova. Kuhiñahu, mukoleshenu mwanenu kumuhameka Yehova hakuwaha kwindi.

Ilishenu kudiza kwaChisaka Kwikali Kwakuwahi

Chuma chamuchisatu chalema chaleñelaña Kudifukula kwaChisaka kwamelela kwikala kwakuwahi hikwilisha kudifukula kwachisaka kwikala kwakuwahi. Munateli kwila ñahi mwenimu? Hadaha, mpinji jikwawu munateli kutiyilila kuyimwenu yakwatawu hajitepu hela kutala nikuhanjeka hajividiyo jatuñewa nawaYinsahu jaYehova. Hela munateli kutañila hamu Bayibolu, kuhitila mukudanzañena yibalu yamuBayibolu.

MuKaposhi Kakutalila niAwake! mwekalaña yibaba yashiyashana yimunateli kuzatisha hakuhanjeka nachisaka. Chakutalilahu, munateli kuzatisha chibaba chahefu 31 mumagazini yejima yaAwake!, chamutu wakwila nawu “How  Would You Answer?” Mumagazini yejima yaKaposhi Kakutalila kawantu amavulu mwekalaña chibaba chahoshaña nawu “For Our Young People.” Yibaba yeniyi yadihimpaña nayibaba yawatwansi awamayala niambanda yahoshaña nawu “Teach Your Children.”

Yibaba yakulondashana yekalaña muAwake! yahoshaña nawu “Young People Ask” yinateli kukwasha anvwali akweti anyana adi muyaaka yawukwenzi. Kubombelahu, bayi mushiyahu kutaña chikasha chahoshaña nawu “To think about.” Chikasha chenichi munateli kuchizatisha kulonda kuhanjekahu nachisaka.

Hela chochu, babalenu, hampinji yakudiza kwachisaka bayi muswejesha kwihula malwihuku. Chakutalilahu, anvwali anayileji kukolesha anyanawu kusoneka nikushimuna yuma yinakutoñojokawu hansañu yinahanjekuwu nachisaka nawa nichinateli kuyizatishawu muchihandilu. Hela chochu, bayi mumukanjikija mwanenu kutañila hewulu nsañu yinasonekiyi mukamukanda kakusonekamu nsañu yinduku. Neyi nehi mukumuneñesha mwanenu kubula kusoneka nsañu yinakufuma kumuchima. Mwatela kumulemesha mwanenu. Nkumininaku, anateli kuyileja yuma yinasonekuwu.”

Neyi kudifukula kwachisaka kwikala kwakadi kukilokela, nawa kwakuwahi, Yehova wakayikiswila chikupu hakuzata nañovu. Iyi mpinji yayiwahi yakudiza nachisaka yikuleñela antu imwakeña kwikala atona nawa akola kuspiritu.

[Chikasha chidi hefu 31]

Zatishenu Njila Jashiyashana

“Hakudiza nawanyanetu awambanda atwansi, ami nimfumwami twahanjekeleña hansañu yitukudiza hakupompa kulonda kuloñeshela chadimu, nkumininaku twalejeleña anyanetu awambanda kusoneka yikuma yamaneni hayuma yitunadizi. Mpinji jikwawu, twahemeneña hela kuhituluka munsañu yakushimwina mumudimu wamwiha. Nsañu yitwadizileña yadiña kwesekeja nayaaka yikwetuwu, yadiñi yayiwahi nawa yakusehesha.”—J.M., United States.

“Hakukwasha mwana kakadizi wami waBayibolu kwiluka chazatishileñawu nyivuñilu mumpinji yakunyima, twapulintili mukanda waIsaya hanyima yakujima kapetulu nijinaambala jamavasi. Twabombeli mafu hamu nikulamika chilamiku kwishina dayipapilu. Kuhiñahu, kansi yeniwu wesekeli kwila chuma cheliliyi Yesu musinagogi muNazareta. Nsañu yekala haLuka 4:16-21 yashimunaña nawu Yesu ‘wabakwili mukanda [waIsaya] hakuwana’ hasonekawu nsañu yakeñeleñayi. (Isaya 61:1, 2) Hela chochu, kansi yeniwu chesekeliyi kwila mwomumu, chamukalilili kuwana mukanda waIsaya 61 hakuzatisha muvuñilu wawulehi nawa wakadi kapetulu nijinaambala jamavasi. Hamuloña wakuzañalala nanjila jajiwahi jazatishiliyi Yesu hakutaña nyivuñilu, kansi yeniwu wahosheli nañovu nindi: ‘Yesu wadiña wababala’”—Y.T., Japan.

[Mwevulu wudi hefu 30]

Kuloñeshela chadimu kunateli kukwasha anyanenu kushinda ikañesha dawakwawu

[Mwevulu wudi hefu 31]

Fwilenu kwilisha Kudifukula kwaChisaka kwamelela kwikala kwakuwahi