Maheta Afumaña Kudi Nzambi

NEYI mwamukuhwelela Nzambi, dikwila nawu wakayinka maheta? Hekwawu, ilaña bayi neyi kwesekeja namaheta imwakeñañaku. Talenu chakutalilahu chaMariya, mama yaYesu. Kañelu Gabireli wenjili kudi yena nakumuleja nindi wadiña ‘wakooleka’ kudi Nzambi nawa nindi wakavwala Mwana kaNzambi. (Luka 1:28, 30-32) Ilaña hadiña wahetaku. Hanyima yakusemuka kwaYesu, Mariya waheni mulambu ‘watutela tuyedi, hela anyana katupompa ayedi,’ iyi diyi nyilambu yahanineñawu atuzweñi kudi Yehova.—Luka 2:24; Alevi 12:8.

Chineli Mariya wadiña kazweñi, dikwila nawu Nzambi hamukiswililuku? Kwambukaku, hampinji Mariya yendeleliyi ntaña yindi Elizabeta, ‘Elizabeta wenzeli naspiritu yajila. Wabidikili nezu dañovu nindi, Yeyi wunakooleki hakachi kawakwenu ambanda, niwakafuma mwivumu deyi nakooleki.’ (Luka 1:41, 42) Mariya wakoolekeli hakwikala mama yaMwana kaNzambi hanu hamaseki.

Yesu hadiñi samahetaku. Bayi neyi Yesu wavwalikilili hohu mwiluña mwabulili maheta nikumukulisha kudi avwali atuzweñuku, ilaña wadiña kazweñi muchihandilu chindi chejima chahanu hamaseki. Hampinji yimu, Yesu walejeli muntu wakeñeleña kwikala kambanji kindi nindi: “Anyumbu akweti menawu, niatujila ahaluzwizu akweti yisakala yawu; hakwila Mwana kamuntu hakweti hakusachila mutu winduku.” (Luka 9:57, 58) Hela chochu, chuma cheliliyi Yesu Kristu hakwinza hamaseki, chayileñeleli atumbanji twindi kwikala namaheta amavulu. Kapostolu Pawulu wasonekeli nindi: ‘Wekalili kazweñi kukoolenu, kulonda kuwuzweñi windi enu mwakekali aheta.’ (2 Akorinda 8:9) Indi Yesu wayinkeli atumbanji twindi maheta amuchidinyi? Nawa maheta amuchidinyi itwekala nawu makonu?

Maheta Amuchidinyi?

Maheta akumujimba aleñelaña kubula kwikala nachikuhwelelu, muloña muntu waheta nateli kusha muchima hamali indi chatela yashi muchima hadi Nzambi. Yesu wahosheli nindi: “Akwamaheta, o chamonañawu kukala kwiñila muwanta waNzambi!” (Maku 10:23) Chakadi nikujina, maheta enkeliyi Yesu atumbanji twindi hiyadiña maluku.

Kafwampi, akwaKristu amavulu amuyaaka nkulakaji yakusambila hiyadiña ahetaku. Hampinji yimu, muntu wavwalikili chifwayi halombeliyi mali, Petulu wamwakwili nindi: “Ami kwami hinikweti hela siliva hela wuruku; chuma chinidi nachu dichi nukukwinka. Nakwili mwijina daYesu Kristu wakuNazareta, nami endaku.”—Yililu 3:6.

Mazu akambanji Yakoba niwena amwekeshaña nawu muchipompelu chawakwaKristu nimwena mwadiña atuzweñi. Wasonekeli nindi: “Tiyenu enu ana kwami nakeña, Nzambi watondeli atuzweñi abula yuma yamunu mwishina kwikala akwakuheta mukukuhwelela, nianswana awanta wakaniniyi antu amukeña.” (Yakoba 2:5) Kubombelahu, kapostolu Pawulu niyena wahosheli nindi bayi neyi antu amavulu “akweti maana awuntu” hela “akwañovu” hela ‘alema’  ayitambikili kwikala muchipompelu chawakwaKristuku.—1 Akorinda 1:26.

Neyi Yesu hayinkeli atumbanji twindi maheta akumujimbaku, hanu dinu maheta amuchidinyi ayinkeliyi? Mumukanda watemesheleliyi chipompelu chakuSimirina, Yesu wahosheli nindi: “Neluki yihuñu yeyi niwuzweñi weyi.” (Chimwekeshu 2:8, 9) Hela chakwila akwaKristu akuSimirina adiña atuzweñi, aheteli maheta abadika Siliva hela wuru. Adiña aheta hamuloña wachikuhwelelu chawu nikwikala ashinshika kudi Nzambi. Chikuhwelelu chalema nankashi muloña ‘antu amakwawu hiyakweti chikuhweleluku.’ (2 Atesalonika 3:2) Kafwampi, Antu abula chikuhwelelu hiyatuzweñi kumesu aNzambi.—Chimwekeshu 3:17, 18.

Maheta Afumaña muKwikala naChikuhwelelu

Hanu dinu, munjilanyi chikuhwelelu muchalemena? Antu amukuhwelela Nzambi ahetelaña ‘mumaheta akuwaha kwindi, nichabulañayi kuzuwa swayi nanichi chetejañayi kudiwunjika.’ (Aroma 2:4) Cheñi ‘ayanakenaña nyiloña yawu’ hamuloña wakukuhwelela mulambu wefutu danyiloña waYesu. (Aefwesesa 1:7) Kubombelahu, akweti maana owu aletaña ‘izu daKristu’ kudi antu akweti chikuhwelelu. (Akolosi 3:16) Hampinji yalombañawu kudi Nzambi nachikuhwelelu, “kuwunda kwaNzambi kwabadika maana ejima” kwakiñaña nyichima yawu niyitoñojoka, nakuyileñela kuzañalala chikupu.—Afwilipi 4:7.

Kubombela hamaheta ejima awa, antu amukuhwelelaña Nzambi kuhitila mudi Mwanindi, Yesu Kristu, akweti kuchiñeja kwakuwahi kwawumi wahaya nyaka. Mazu aYesu Kristu elukewa chikupu ahoshaña nawu: “Chaswejeliyi Nzambi kukeña mpata yamunu mwishina, waheni Mwanindi  wumu hohu, kulonda muntu wukumukuhwelela aheti wumi wahaya nyaka, akabuli kunoña.” (Yowanu 3:16) Iku kuchiñeja kwakuwahi kwakolaña chikupu neyi muntu yeluka kwiluka kwalala kwaMwana niTata yindi, muloña Yesu wahosheli cheñi nindi: “Wumi wahaya nyaka woweniwu, wakukwiluka eyi Nzambi walala wumu hohu, niYesu Kristu watemesheli.”—Yowanu 17:3.

Hela chakwila nkisu jaNzambi jakundama kuwubwambu wetu nayena, cheñi twahetelañamu kumujimba nimuyitoñojoka. Talenu chakutalilahu chaDalídio wamwituña daBrazil. Henohu kanda yadizi kwiluka kwalala kwayuma yakeñañayi Nzambi, wadiña nakukala kwakunwa walwa. Chumichi chamuleñeleli kubula kutiyañanaña nachisaka chindi. Kubombelahu, wadiña nakukala kwamali. Kufumahu, watachikili kudiza Bayibolu nawaYinsahu jaYehova nawa wahimpili chikupu.

Yuma yadiziliyi Dalidio kufuma muBayibolu yamuleñeleli kuleka yililu yindi yatama. Wayililuku hambidi kuspiritu chakwila wahosheli nindi, “Nayileña kumatala ejima akunwina walwa; ilaña ichi nayaña kwitala nikwitala nakushimwina.” Wekalili mukwakushimwina Wezu daNzambi wampinji yejima. Iku kuhimpika hikwamukwashili hohu kwikala wakola kumujimbaku, ilaña nimunsañu jamali. Dalídio wahosheli nindi: “Mali inakisilileña kuwalwa, ichi nayizatishaña kukukwasha antu adi mukukankila hela kulanda yuma yiinakukeña.” Wukweti cheñi amabwambu alala amavulu hamuloña wakudikunda nawantu akweti yitoñojoka yoyimu kutalisha hadi Nzambi chamonañayi yuma. Chayinu mpinji, Dalídio nakushakama chiwahi nawa wukweti muzañalu kubadika chashakamineñayi henohu kanda yadizi hadi Nzambi.

Renato, hichakutalilahu chikwawu chamuntu wekalili nachihandilu chachiwahi hamuloña wakumukuhwelela Yehova Nzambi. Renato hayinu mpinji wekala wamuzañalu, neyi mumumona, munateli kukaana nenu hidiyi muntu ayandishiluwu muchihandiluku. Chavwalikiliyi, mama yindi wamunatili. Wamushili mufuba yashiliyi mwishina dabenchi, nayilonda nimukwa windi mumukovu. Ambanda ayedi ahitileña kukamwihi amweni fuba yinakunyinkesha mwishina dabenchi. Hatachi, atoñojokeli nawu kudi muntu wunashiyi kana kakamesha mufuba. Chelukiluwu nawu mwadiña mukeki, amutemwishilili kuchipatela chadiña kukamwihi kulonda kumuuka.

Hakachi kanawa ambanda, wumu wadiña Chinsahu chaYehova, nawa walejeluku Chinsahu mukwawu wejina daRita hansañu yamukeki yeniwu. Rita wamweni ihuñu hamuloña wamavumu asulumukileña, dichi wavweli hohu mwana wumu wamumbanda. Wakeñeleña chikupu mwana weyala, dichi wafuukwiluhu kumulela Renato.

Rita wamulejeli Renato hampinji yachidiñayi kansi nindi hidiyi mama yindi wamuvwalaku. Ilaña wamukeñeli chikupu nawa wazatili nañovu kulonda kumudizisha nshimbi jamuBayibolu. Chakuliliyi, watachikili kukeñesha nsañu yamuBayibolu. Wahamekeli chikupu hanjila yamupulwishililumu.  Mpinji yejima wadilaña chatañayi mazu aDavidi ñimbi yamasamu akwila nawu: “Neyi tata namama akunshiya, Yehova wukuntambula.”—Masamu 27:10.

Hakumwekesha kusakilila hayuma yejima yinamukoñeliyi Yehova, Renato wapapatisheweli mu 2002 nawa chaka chahiñiluhu watachikili kuzata mudimu wawakwaKristu wakushimwina mpinji yejima. Nihanu kanda yeluki anvwali jindi amuvwala, nawa hadaha hamba kayilukaku. Hela chochu, Renato weluka nindi chawaana chalema chinatambwiliyi hikumwiluka nikumukuhwelela Yehova neyi Tata yindi wamukeña nawa wamwakamenaña.

Hadaha mwakeñaña kwikala nawubwambu wawuwahi naNzambi wunateli kuyileñela mwikali nachihandilu chachiwahi. Antu ejima, aheta niatuzweñi akweti kukooleka kwakwikala nawubwambu wamuchidiwu naYehova Nzambi niMwanindi, Yesu Kristu. Wubwambu weniwu hiwunateli kuyileñela kuheta kumujimbaku, ilaña wukuyileñela kushakama chachiwahi nikwikala namuzañalu wakadi kutwesha kuwulanda namali ejima amukaayi. Mazu ekala haYishimu 10:12 ekala alala, ahosha nawu: “Nkisu yaYehova yaheteshaña muntu, habombelañaku kukalaku.”

Yehova Nzambi wakeñaña chikupu antu amutiyililaña, wahosheli nindi: “Yowe! Neyi watiyilili munakulejeli! Mutenowu kuwunda kweyi kwadi kwinzala neyi kaloña, nikuloña kweyi kwadi kwikala neyi mankanda akukaluñalwiji.” (Isaya 48:18) Nawa wakana nindi antu enzaña kudi yena nayitoñojoka yayiwahi nawa akweti yililu yayiwahi wakayikiswila chikupu: “Wuloku wakudizoza niwakumwakama Yehova himaheta nikulema niwumi.”—Yishimu 22:4.

[Mazu ekoku adi hefu 6]

Kumukuhwelela Nzambi kwaleñelaña kushakama chiwahi nikwikala namuzañalu

[Mwevulu wudi hefu 5]

Hela chakwila chisaka chaYesu chahamaseki adiña atuzweñi kumujimba, ayikiswilili chikupu kudi Nzambi