Malwihu Kufuma Kudi Antañi

Yumanyi Yitunateli Kudizila haYishimu 24:27?

Hakufumba mukwenzi weyala, nsoneki waYishimu wahosheli nindi: “Mudimu weyi wuloñeshañahu dehi mumpata, kadiwahishilañahu dehi kumpata, nkumininaku dinu hiwukutuña itala deyi.” Indi ichi chishimu chonenawu chinakuhosha hachikumanyi? Chinakuhosha nawu iyala watela kudiloñesha chikupu henohu kanda yakeñi nyanseki nikwikala nachisaka chindi, nawa watela kwiluka nyidimu yekala mukudihana kweniku.

Kumafuku akunyima iyi vasi ayilumbulwileña nawu iyala wasumbula hela tata yawantu watela kwakamena mudimu windi wakumujimba nikuzata cheñi nañovu kulonda kukolesha chisaka chindi, chakutalilahu kuhitila mukuyidizisha yuma yakuspiritu. Hela chikwila awa mazu alala nawa dichahosha Nsona, hichinayi mukwila nawu dichikuma chacheni chaniyi vasuku. Muloñadi? Tushinshikenu hayikuma yiyedi yinalondeluhu.

Chatachi, iyi vasi hiyinakuhosha hakutuña munjila yakukolesha chisaka cheyalaku. Ilaña yinakuhosha hakutuña itala dadeni. Izu dabalumunawu nawu ‘kutuña’ anateli cheñi kudizatisha muchifwikija munjila yakwila nawu kutuña, hela kwikala nachisaka, dikwila nawu kusumbula nikuvwala nyana.

Chamuchiyedi, iyi vasi yakonkomwenaña hakwila yuma mundonda, dikwila nawu “Wusambila kwila chuma chimu, kuhiñahu hiwukwila chikwawu.” Komana ichi chishimu chinakuhosha nawu twatela kusambila kuzata nyidimu yetu yakumujimba henohu kanda tuzati nyidimu yakuspiritu? Inehi.

Mumpinji yakunyima, neyi iyala nakukeña ‘kutuña chisaka [chindi],’ hela kwikala nachisaka kuhitila mukusumbula, wateleleli kudihu nindi, ‘Komana nadiloñeshi kwakamena nikukwasha mumbanda ninyana yitunateli kuvwala kumbidi?’ Henohu kanda yekali nachisaka, wateleleli kwikala wadikita, nakwakamena mahindi nimbutu. Dichi, muBayibolu yaToday’s English Version iyi vasi ayibalumuna nawu: “Bayi wutuña itala deyi nakwikala nachisakaku sampu maheyi anahi dehi, nikwiluka neyi wakahandaña chiwahi.” Komana iyi nshimbi yazatikaña nimakonu?

Eña. Iyala wunakukeña kusumbula watela kudiloñesha chikupu kuzata iwu mudimu. Neyi chakwila wakola kumujimba, watela kuzata. Kafwampi, iyala wazataña nañovu hakwakamena chisaka chindi hatela kuyakamenaña hohu kumujimbaku. Izu daNzambi dahosha nawu iyala wabulaña kwakamena akwetala dindi kumujimba, muyitoñojoka nikuspiritu nabadiki wabula kwitiya kutama. (1 Timotewu 5:8) Dichi, neyi mukwenzi weyala nakukeña kusumbula nikwikala nachisaka, watela kudihula malwihu adi neyi awa: ‘Komana nadiloñeshi chikupu kwakamena chisaka chami nayuma yakumujimba? Komana nadiloñeshi kulombola chisaka muyuma yakundama kukudifukula? Komana nakazataña mudimu wakulombola kudiza kwaBayibolu mpinji yejima nañodami nianyanami?’ Chakadi nikujina, Izu daNzambi dakonkomwena haniyi nyidimu.—Kuhituluka 6:6-8; Aefwesesa 6:4.

Dichi mukwenzi weyala wunakukeña nyanseki watela kutoñojoka chikupu hanilu lushimbi lwekala haYishimu 24:27. Munjila yoyimu, kankaña wamumbanda wunakukeña kusumbuka watela kudihula neyi chakwila nadiloñeshi kuzata nyidimu yazataña mumbanda wasumbuka hela mama yawantu. Atwansi adisumbula niwena atela kudihula malwihu wowamu neyi hiyakutoñojoka hakwikala nanyana. (Luka 14:28) Kulondela iku kufumba kunateli kukwasha antu jaNzambi kutondolwela yikatu yenzaña hamuloña wamakabi nakudiluñisha wumi wawuwahi muchisaka.

[Mazu ekoku adi hefu 10]

Malwihwinyi atela kudihula mukwenzi weyala kutalisha hamaluwi?