“Mukwikala Amabwambu Jami”

“Neyi mukwila munukuyileja mukwikala amabwambu jami.”—YOWANU 15:14.

1, 2. (a) Indi amabwambu jaYesu afumini kuyitachinyi yamboka mboka? (b) Muloña chichikuwahila kwikala amabwambu jaYesu?

 AMAYALA ashakamini naYesu mukapeka kahewulu afumini kuyitachi yamboka-mboka. Petulu nimana kwindi Anderi adiña ayibinda anshi. Hakusambila Matewu wazatileña mudimu wakusonkesha, mudimu wadiwiluwu aYudeya. Antu adi neyi Yakoba niYowanu, atela amwilukili Yesu kufuma kuwansi windi. Amakwawu adi neyi Nataneli, atela amwilukili Yesu hadi yaaka yantesha. (Yowanu 1:43-50) Dichi antu ejima apompeli kuPaseka hawuna wufuku muYerusalema, etejeli nawu Yesu wadina Mesiya wakaninuwu, Mwana kaNzambi wamumi. (Yowanu 6:68, 69) Chakadi nikujina atela azañaleli hakutiya Yesu nakuhosha kudi wena nindi: “Nayiteni dehi nami mudi amabwambu, muloña nayileji dehi yuma yejima yinatiyili kudi Tata yami.”—Yowanu 15:15.

² Awa mazu alejeliyi Yesu apostolu indi ashinshika azatikaña kudi akwaKristu ejima awayishewa makonu, nawa nikudi amabwambu jawu “anyikoku acheñi.” (Yowanu 10:16) Hela chakwila twafuma kuyitachi yamboka-mboka, tunateli kwikala naniku kukooleka kwakwikala amabwambu jaYesu. Wubwambu wetu naYesu walema chikupu muloña kwikala amabwambu jaYesu kwatuleñelaña cheñi kwikala amabwambu jaYehova. Kafwampi, hitunateli kukundama kudi Yehova chakadi kusambila kukundama kudi Kristuku. (Tañenu Yowanu 14:6, 21.) Chumanyi chitwatela kwila hakwila nawu twikala amabwambu jaYesu nikutwalekahu nawubwambu wetu? Henohu kanda tuhanjeki haniyi nsañu yalema, tusambilenu kushinshika hachakutalilahu chaYesu chakwikala ibwambu wamuwahi nawa niyuma yitwatela kudizila kuyuma yahosheli nikwila atumbanji hamuloña wawubwambu wawu naYesu.

Chakutalilahu chaYesu Chakwikala Ibwambu Wamuwahi

3. Indi Yesu amwilukilili kukudikunda nawantu amuchidinyi?

³ Mwanta wamaana Solomoni wasonekeli, “Mukwakuheta wukweti amabwambu amavulu.” (Yishimu 14:20) Awa mazu anakuhosha hayililu yekala nawantu abula kuwanina, yakukwata wubwambu washindamena hakutambwilaña yuma chatela kushindamena hayuma yatela kuhanañawu. Yesu hamwekesheli yililu yamuchidiwuku. Hiyamuluwañesheli kudi antu aheta hela aya mpuhuku. Mwalala, Yesu wamukeñeli mukwenzi samaheta nawa nyuuli, wamulejeli kwikala kambanji kindi. Hela chochu, Yesu wamulejeli iwu mukwenzi kulandisha yuma yadiñayi nayu kulonda kwinka atuzweñi. (Maku 10:17-22; Luka 18:18, 23) Yesu hiyamwilukili hamuloña wakudikunda nawantu aheta niantu aya mpuhuku, ilaña hamuloña wakudikunda nawantu adizoza nawa adiwileñawu.—Matewu 11:19.

4. Muloñadi chitunateli kuhoshela netu amabwambu jaYesu adiña abula kuwanina?

⁴ Chakadi nikujina, Yesu wakwatili wubwambu nawantu abula kuwanina. Petulu kakavulu wakañenyeña kumona yuma neyi chayimweneñayi Nzambi. (Matewu 16:21-23) Yakoba niYowanu amwekesheli yililu yakudinyamuna hampinji yamwihwiluwu Yesu kuyinka yifulu yalema muWanta. Yililu yawu yahilishili apostolu amakwawu, nawa nsañu yeniyi yakudinyamuna yaleñeleli ntadi yitwalekuhu. Hela chochu, Yesu wolweli yitoñojoka yawamabwambu jindi mumesu akuwunda nawa hanyakeli kuyihililaku.—Matewu 20:20-28.

5, 6. (a) Muloñadi Yesu chatwalekeluhu kwikala ibwambu nawapostolu indi amakwawu? (b) Muloñadi Yesu chamanishililiyi wubwambu windi naYudasi?

 ⁵ Yesu hatwalekeluhu kwikala ibwambu danawa antu abula kuwaninaku muloña wetejelaña hela helukileña yiluwa yawu. Ilaña, washinshikileña hayililu yawu yayiwahi. Chakutalilahu, Petulu, Yakoba niYowanu akaamini chatela atoneneña hamu naYesu hampinji yadiñayi mukweseka kwasweja. Chakadi nikujina, amuneñesheli Yesu. Hela chochu, welukili nindi yitoñojoka yawu yadiña yayiwahi, hampinji yahosheliyi nindi: “Spiritu chalala yinakeñi, ilaña mujimba wunazeyi.”—Matewu 26:41.

⁶ Kwambukaku, Yesu wamanishili wubwambu naYudasi Isakaroti. Hela chakwila Yudasi wamwekeneña neyi wamukeña chikupu, Yesu welukili nindi iwu wadiña mulundanindi watachikili kwikala nayitoñojoka yatama. Hamuloña wakwila Yudasi wakwatili wubwambu nampata yamunu mwishina, wadibalumwini kwikala mukwankunyi naNzambi. (Yakoba 4:4) Dichi Yesu wadiña wamukupisha dehi Yudasi hampinji Yahosheliyi hawubwambu wawu nawapostolu indi 11 ashinshika.—Yowanu 13:21-35.

7, 8. Indi Yesu wamwekesheli ñahi kukeña kudi amabwambu jindi?

⁷ Yesu wadiwileña yiluwa yawamabwambu jindi ashinshika nawa wayikoñeleleña yuma yayiwahi. Chakutalilahu, walombeli kudi Tata yindi kulonda kuyikiña hampinji yakuyeseka. (Tañenu Yowanu 17:11.) Yesu wayitoñojokeleleñaku nikumujimba. (Maku 6:30-32) Yesu hadiña nakuyileja hohu yuma yatoñojokeleñayuku, ilaña niyena wadiña nakutiyilila mwatoñojokeleñawu nichatiyileñawu.—Matewu 16:13-16; 17:24-26.

⁸ Yesu wazatishili wumi windi nikufwa kwindi kulonda amabwambu jindi ahetelumu. Mwamweni, welukili nindi watela kuhana wumi windi neyi chuma chakeñekeleña kulonda kushika wuñaji waTata yindi waloña. (Matewu 26:27, 28; Aheberu 9:22, 28) Ilaña Yesu waheni wumi windi kulonda kumwekesha kukeña. Yesu wahosheli nindi: “Hikudi kukeña kwabadika kwenikuku, kwakutulayi muntu wumi windi hanyijimba yawamabwambu jindi.”—Yowanu 15:13.

Chumanyi Cheliluwu Atumbanji Nawubwambu Wawu naYesu?

9, 10. Chumanyi cheliluwu antu chelili Yesu wadiña wakasunuka kumakasa?

⁹ Yesu wadiña wakasunuka kumakasa hakuzatisha mpinji yindi, kumwekesha kukeña nikuhana yuma yakumujimba. Chafuminumu, antu aswilileña kwakwihi nayena nawa niwena adiña akasunuka kumakasa. (Luka 8:1-3) Kwesekeja nayuma yadimweneneñayi, Yesu wahosheli nindi: “Hanenuña, kulonda ninenu nawa akayinki; chesekelu chakushikija, chakunyikumuna, chenda chisumpoka, akayinki muwutambwilu wenu. Muloña chesekelu chimukuyesekela akwenu, dichi chakayesekelawu ninenu nawa.”—Luka 6:38.

 ¹⁰ Kafwampi, amakwawu esekeleña kudikunda naYesu hamuloña wakukeña kuyinka yuma. Awa amabwambu jaYesu akutwamba amutemukili hampinji yabuliliwu kutiyisha yuma yahosheliyi. Chatela amukuhweleli Yesu hampinji yabuliliwu kutiyisha yuma yahosheliyi, anyakeli kukunkulula mwaluwa nakumukaana. Kwambukaku, apostolu adiña ashinshika. Kakavulu wubwambu wawu naKristu awesekeleña, ilaña azatileña nañovu kulonda kuzatila nindi hamu mumpinji yayiwahi niyatama. (Tañenu Yowanu 6:26, 56, 60, 66-68.) Hawufuku windi wakukumishaku hanu hamaseki neyi muntu, Yesu wamwekesheli kusakilila kudi amabwambu jindi hampinji yahosheliyi nindi: “Enu munakakeli kushakama nanami mwanañesekuwu.”—Luka 22:28.

11, 12. Indi Yesu wayikolesheli ñahi atumbanji twindi, nawa chumanyi cheliluwu?

¹¹ Hanyima yakwila Yesu nahameki atumbanji twindi hakwikala ashinshika, antu wowamu amukaanini. Hamuloña wakuchiina antu, amuheleli Yesu hakapinji kantesha. Yesu wayanakeneni cheñi. Hanyima yakusañuka, wamwekeni kudi wena nakukolesha wubwambu wawu. Kubombelahu, wayinkeli mudimu wajila, wakwilisha atumbanji “munyuza yejima,” nikwikala ayinsahu jindi ‘kwakumina maseki.’ (Matewu 28:19; Yililu 1:8) Chumanyi cheliluwu atumbanji?

¹² Atumbanji azatili nañovu hakushimwina nsañu yaWanta. Hamuloña wakuyikwasha naspiritu yajila yaYehova, atumbanji awanishili ntañishilu yawu muYerusalema neyi mukulabula kwadisu. (Yililu 5:27-29) Hela ayitiyishileña woma nawu akuyijaha, hichayileñeleli kubula kwovwahila nshimbi yaYesu yakwilisha atumbanjuku. Mwahitili hohu yaaka yantesha kufuma hampinji yatambwililuwu nshimbi yaYesu, kapostolu Pawulu wasonekeli nindi nsañu yayiwahi anayishimwañeni “mwahita kuleña kwejima kwekala mwishina dewulu.” (Akolosi 1:23) Chakadi nikujina, awa atumbanji amwekesheli chalemesheluwu mpanda yawubwambu wadiñawu nawu naYesu.

13. Indi atumbanji twaYesu etejeli ntañishilu yindi kuhimpa chihandilu chawu munjilanyi?

¹³ Antu ekalili atumbanji niwena etejeli ntañishilu yaYesu kuhimpa chihandilu chawu. Ntañishilu yeniyi yaleñeleli atumbanji amavulu kuhimpa chikupu yililu yawu. Atumbanji amakwawu amaha hakusambila adiñi akwawutumwa, ayivumbi, akwakusheta walwa hela amakombi.” (1 Akorinda 6:9-11) Antu amakwawu ateleleli kuhimpa yililu yawu kutalisha hadi antu amuza wacheñi. (Yililu 10:25-28) Hela chochu, amwovwahilili Yesu. Avuulili wuntu wawu wamukulu nakudivwika wawuha. (Aefwesesa 4:20-24) Elukili chikupu “yitoñojoka yaKristu,” nikuyitiyisha, nikumwimbujola chatoñojokeleñayi nichakoñeleñayi yuma.—1 Akorinda 2:16.

Wubwambu Wetu naKristu makonu

14. Indi Yesu wakanini kwila chumanyi mumpinji ‘yakukuma kwanyaka yamakonu’?

¹⁴ AkwaKristu amavulu amuyaaka nkulakaji yakusambila amwilukili Yesu hela amumweni hanyima yakusañuka kwindi. Chakadi nikujina, etu hitwadiña naniku kukooleka kwakumumona Yesuku. Hanu dinu, tunateli kwikala ñahi amabwambu aKristu? Njila yimu yekala yakwovwahila wunlomboli wahanañawu kudi izanvu danduñu wamaana nikashinshi, datuñewa nawamana kwaYesu awayishewa naspiritu achidi hanu hamaseki. Yesu wakanini nindi mumpinji ‘yakukuma kwanyaka yamakonu,’ wakamwinka yeniwu nduñu mudimu “wakuhemba yuma yindi yahetayi yejima.” (Matewu 24:3, 45-47) Makonu, antu amavulu akeñaña kwikala amabwambu jaKristu hiyekala amunidi izanvuku. Indi nshimbi yatambwilañawu kufuma kudi izanvu  danduñu wakashinshi yaleñelaña wubwambu wawu naKristu kwikala wamuchidinyi?

15. Chumanyi chaleñelaña kwiluka neyi muntu wakekala mukoku hela mpembi?

¹⁵ Tañenu Matewu 25:31-40. Yesu wateneni owu ekalili izanvu danduñu wakashinshi nindi ana kwindi. Muchishimu chahosheleña hakwambula nyikoku nawampembi, Yesu wahosheli hatooka nindi wamonaña chitwakalakelaña amana kwindi neyi dichi twamukalakelaña. Kafwampi, wahosheli nindi chuma chakaleñela kwiluka chaambu chekala hakachi kamukoku nampembi, hinjila yakalakelañamu muntu ‘awa amana kwindi akehelamu.’ Dichi, njila yabadika kulema yamwekeshelañamu antu achiñejaña kushakama hamaseki nawu hiyamabwambu jaKristu, hikuhitila mukukwasha izanvu danduñu wakashinshi.

16, 17. Tunateli kumwekesha ñahi wubwambu wetu nawamana kwaKristu?

¹⁶ Neyi mwachiñejaña kushakama hamaseki nakuyuulewa naWanta waNzambi, munateli kumwekesha ñahi wubwambu wenu kudi nawamana kwaKristu? Tushinshikenu hanjila jisatu. Chatachi, kuhitila mukukalakala namuchima wejima mumudimu wakushimwina. Kristu walejeli amana kwindi kushimwina nsañu yayiwahi mukaayi kejima. (Matewu 24:14) Hela chochu, amana kwaKristu ashalahu hanu hamaseki kachi chayikalila kukalakala iwu mudimu chakubula kuyikwashaku kudi alundanawu anyikoku acheñi. Chalala, mpinji yejima antu amwizaza dawanyikoku acheñi akalakalaña mudimu wakushimwina, akwashaña amana kwaKristu kulonda kukalakala mudimu wawu wajila. Kristu nizanvu danduñu wamaana nikashinshi ahamekaña hawubwambu wamuchidiwu.

¹⁷ Njila yamuchiyedi anyikoku acheñi yatela kukwashilamu amana kwaKristu yekala yakukwasha mudimu wakushimwina kuhitila mukuhana mali. Yesu wakolesheli atumbanji twindi kukwata wubwambu kuhitila ‘mumaheta amunu mwishina.’ (Luka 16:9) Bayi neyi tunateli kulanda wubwambu naYesu hela Yehovaku. Neyi tuzatisha mahetetu kulonda kukwasha Wanta waYehova ninyidimu yamuchipompelu chahanu hamaseki, dikwila nawu tunakumwekesha wubwambu wetu nikukeña bayi neyi mumazu hohu, ilaña “nikwila mutwahoshaña.” (1 Yowanu 3:16-18) Twahanaña yawaana yeniyi neyi tukalakala mumudimu wakushimwina, neyi tuhana mali kumudimu wakutuña nikuwahisha matala itwapompelañamu, nikuhana mali kulonda kukwasha mudimu wakushimwina wamukaayi kejima. Chili twahaninaña hantesha chili heneni, Yehova niYesu ahamekaña neyi tuhana namuzañalu.—2 Akorinda 9:7.

18. Muloñadi chitwatela kwovwahila nshimbi jamuBayibolu jahanañawu aeluda amuchipompelu?

¹⁸ Njila yamuchisatu yitwamwekeshelañamu netu tudi amabwambu jaKristu yekala yakwovwahila nshimbi yahanañawu aeluda amuchipompelu. Amayala wenawa ayitondaña kudi spiritu yajila kuhitila muwunlomboli waKristu. (Aefwesesa 5:23) Kapostolu Pawulu nindi: “Ovwahilenu anlomboli jenu nakuyitiyilila.” (Aheberu 13:17) Mpinji jikwawu, chinateli kutukalila kwovwahila nshimbi jamuBayibolu jinateli kutwinkawu kudi aeluda. Neyi tweluka yiluwa yawu, chumichi chinateli kutwileñela kudiwula kufumba kwawu. Hela chochu, Kristu, Mutu wachipompelu,  watiyaña kuwaha kuzatisha amayala wenawa abula kuwanina. Dichi, wubwambu wetu naKristu washindamena hachitwazataña nawunlomboli wahanañawu aeluda. Neyi tudiwula yiluwa yawaeluda nikulondela wunlomboli wawu, dikwila nawu twamukeña Kristu.

Kutwatela Kuwana Amabwambu Amawahi

19, 20. Yumanyi yitunateli kuwana muchipompelu, nawa chumanyi chitwakadiza muchibaba chinahiñuhu?

¹⁹ Yesu hatwakamenaña hohu kuhitila mudi aeludaku, ilaña watwalekahu kutwakamena kuhitila mukutwinka amama jetu, amana kwetu niaheletu akuspiritu ekala muchipompelu. (Tañenu Maku 10:29, 30.) Hampinji yimwatachikili kudikunda nakuloñesha kwaYehova, chumanyi cheliluwu antaña jenu? Hadaha etejeli kufuukulahu kwenu kwakuswila kwakwihi naNzambi niKristu. Hela chochu Yesu wasoñamishili nindi mpinji jikwawu “akwankunyi namuntu akekala wowu amwitala dindi yomweni.” (Matewu 10:36.) Twazañalala chikupu hakwiluka netu muchipompelu tunateli kuwanamu antu anateli kuswila chikupu kwakwihi nanetu kubadika nimana kwetu wutwavwalika nindi.—Yishimu 18:24.

²⁰ Neyi chamwekeshaña kwimusha kwaPawulu hakukunkulula mukanda windi wasonekeleliyi chipompelu chamuRoma, wadikwatili wubwambu nawantu amavulu. (Aroma 16:8-16) Kapostolu Yowanu wakunkulwili mukanda windi namazu akwila nawu: “Ñimwishili akwetu ejima hejina hejina.” (3 Yowanu 14) Chakadi nikujina, niyena wakwatili amabwambu ahaya nyaka. Tunateli kwimbujola ñahi chakutalilahu chaYesu niatumbanji akusambila kuhitila mukwikala nikutwalekahu nawubwambu wakola nawamana kwetu niahela muchipompelu? Ilu lwihu akalwakula muchibaba chinahiñuhu.

Mukwakula Nenudi?

• Chakutalilahwinyi chaheniyi Yesu chakwikala ibwambu wamuwahi?

• Chumanyi cheliluwu atumbanji nawubwambu wawu naYesu?

• Tunateli kumwekesha ñahi netu tudi amabwambu jaKristu?

[Malwihu aKuzatisha haKudiza]

[Mwevulu wudi hefu 21]

Yesu wadiña nakutiyilila mwatoñojokeleñawu amabwambu jindi nichatiyileñawu

[Nyevulu yidi hefu 23]

Tunateli kumwekesha ñahi netu tudi amabwambu jaKristu?