“Shakamenu Chachiwahi Nawantu Ejima”
“Shakamenu Chachiwahi Nawantu Ejima”
‘Neyi chikutwesheka, shakamenu chachiwahi nawantu ejima, mwejima mumukutweshela enu aweni.’—AROMA 12:18.
1, 2. (a) Kusoñamishanyi kwayisoñamishiliyi Yesu atumbanji twindi? (b) Kudihi kutwatela kuwana kufumba hachitwatela kwila neyi anakutukabisha?
YESU wasoñamishili atumbanji twindi nindi akayikabisha kudi nyunza yawantu amukaayi, nawa hawufuku wakwila kanda yafwi, walumbulwili chuma chakaleñela kuyikabisha. Wayilejeli apostolu indi nindi: “Neyi enu mwadiñi ampata yamunu mwishina, akwampata yamunu mwishina adi kukeña antu awu. Enu himudi ampata yamunu mwishinaku, ilaña ami nayitondeli mukachi kawantu ampata yamunu mwishina; dihu hanafumi kuyihela kudi antu ampata yamunu mwishina.”—Yowanu 15:19.
2 Kapostolu Pawulu wetejeli chikupu nindi mazu aYesu adiña alala. Mumukanda windi wamuchiyedi wasonekeleliyi ibwambu dindi Timotewu, Pawulu wasonekeli nindi: “Hakwila eyi Timotewu, weluka dehi kuleja kwami, nikwenda kwami, ninsañu yinata muchima, nikukuhwelela kwami, nikudiwunjika kwami, nikukeña kwami, nikutatakena kwami, nimakabisha namweni, nimakabi ami.” Pawulu cheñi wabombeleluhu nindi: “Eñañi, antu ejima akeña nawu ashakami mudi Kristu Yesu nikwakama Nzambi, akumona makabisha.” (2 Timotewu 3:10-12) Mukapetulu 12 kamukanda windi wasonekeleliyi akwaKristu akuRoma, Pawulu wayilejeli kufumba kwakuwahi hachatela kwilawu namakabisha. Mazu indi anateli kutukwasha munanu mafuku akukuminina.
“Keñenu Kwila Yuma Yalumbwa”
3, 4. Tunateli kuzatisha ñahi kufumba kwekala haAroma 12:17 (a) muchisaka mudi antu ambokelamu munsakililu? (b) hakudikunda nawantuñi netu?
3 Tañenu Aroma 12:17. Pawulu walumbulwili nindi neyi anakutukabisha, bayi tufuntisha katama nakatamaku. Kuzatisha kufumba kwindi kwekala kwalema chikupu sweje-e muyisaka yambokelamu munsakililu. AkwaKristu adisumbula atondolwelaña kweseka kwakufuntisha katama hela kwila katama nakatama. Kwosi yuma yayiwahi yafumaña mukufuntisha ‘katama nakatama.’ Kwambukaku, yililu yamuchidiwu yabutulaña kesi.
4 Pawulu washimwini njila yayiwahi nindi: “Keñenu kwila yuma yalumbwa kumesu awantu ejima.” Mumbanda walemeshaña nfumwindi mwitala neyi chakwila nfumwindi nahoshi yuma yatama kutalisha hayuma yakuhwelelayi wakañeshaña ntadi. (Yishimu 31:12) Carlos wakela haBeteli, nashimuni hadi amama yindi chakañesheleñawu ikañesha dasweja dafumineña kudi atata yindi kuhitila mukwikala chachiwahi nikuhemba chiwahi itala. “Amama atulejeleña kuyilemesha atata mpinji yejima. Akeñeleña nawu nihemeña nawatata chisela chatenañawu muFrench nawu boules hela chakwila nachiheleli. Dichi chisela chenichi chayizañalesheleña atata.” Nkumininaku, atachikili kudiza Bayibolu nawa apapatisheweli. Kutalisha ‘hakukeña kwila yuma yalumbwa kumesu awantu ejima,’ aYinsahu jaYehova kakavulu akañeshaña chaambu kuhitila mukukwasha atuñi nawu neyi kumwekana wubanji wadimwekenaña.
Kumanisha Ikañesha ‘naMakala Akesi’
5, 6. (a) Munjilanyi ‘makala akesi’ mwayilumbikilañawu hamutu wachilumbu? (b) Shimunenu chakutalilahu chamwiluña denu chinakumwekesha kuzatisha kufumba kwekala haAroma 12:20 chikunateli kuleñela kusoña nyikabu yayiwahi.
5 Tañenu Aroma 12:20. Hakusoneka mazu ekala haniyi vasi, chakadi nikujina, Pawulu watoñojokeleña hamazu itwatañaña haYishimu 25:21, 22 hahosha nawu: “Neyi chilumbu cheyi natiyi nzala mwinki yakudya adyi; neyi natiyi mpwila mwinki meji anwi; muloña wakamulumbikila makala akesi hamutu windi, niYehova wakakwinka wuloku.” Kwesekeja nakufumba kwekala mukapetulu 12 kamukanda waAroma, Pawulu hatalishili mukwila nindi chakutalilahu chamakala chadiña chakumufwisha namuloña hela kumutiyisha nsonyi mukwakukañeshaku. Ilaña, ichi chishimu nimazu adifwanaku akapostolu Pawulu asonekeleliyi aRoma atela ahoshaña hanjila yazatishileñawu kunyaka hakusuñununa chikuñu. Kadizi wamuyaaka nkulakaji 19 wejina daCharles Bridges wahosheli nindi: “Watela kusha chikuñu chakola kwishina dakesi, bayi kuchisha hohu hakesuku, ilaña nikulumbikahu makala akesi. Antu amakwawu ekala nanyichima yachinchika chakwila hiyanateli kuhimpa hela chakwila mutwalekahu kuyikwasha, kudihana nikumwekesha kukeña chikupu.”
6 Kufwana ‘makala akesi,’ kumwekesha luwi kunateli kuleñela akwakukañesha kuhimpa yililu yawu hadaha nikuleka kukabisha antu jaNzambi. Kwikala nayililu yayiwahi kunateli kuleñela antu kwikala nanyichima yayiwahi kudi antu jaYehova nikutiyilila kunsañu yamuBayibolu yashimwinañawu. Kapostolu Pawulu wasonekeli nindi: “Hela aJentili ayituñulaña nawu mwelaña chatama, shakamenu chalumbuluka mukachi kawu; kulonda chakumonawu nyidimu yenu yayiwahi akamulemeshi Nzambi mwifuku dakumona kukala.”—1 Petulu 2:12.
“Shakamenu Chachiwahi naWantu Ejima”
7. Kuwundanyi kwashililiyi Kristu atumbanji twindi, nawa kukutuleñela kwiladi?
7 Tañenu Aroma 12:18. Hawufuku wakukumishaku kwikala nawatumbanji twindi, Yesu wayilejeli nindi: “Kuwunda nayishiyili; kuwunda kunawundañami nayinki.” (Yowanu 14:27) Kuwunda kwashililiyi Kristu atumbanji twindi himuzañalu watiyañawu neyi eluka nawu ayikeña nikwikala nawuselewa waYehova Nzambi niMwanindi akeñayi. Kuwunda kweniku kwatuleñelaña kushakama chachiwahi nawantu. AkwaKristu alala aletaña kuwunda.—Matewu 5:9.
8. Tunateli kwikala ñahi akwakuleta kuwunda hetala nimuchipompelu chetu?
8 Njila yimu mutwatela kuletela kuwunda muchisaka hikunyakala kumanisha ntadi kubadika kwiteja kukala kutwalekuhu. (Yishimu 15:18; Aefwesesa 4:26) Njila yeniyi yazatikaña cheñi nimukachi kachipompelu chawakwaKristu. Kapostolu Petulu wafwanisha kufwila kuwunda nakuyuula idimi. (1 Petulu 3:10, 11) Yakoba niyena, hanyima yakuhana kufumba kwakuwahi kutalisha hakuzatisha idimi chiwahi nichawahila kutondolwela ichima nintadi, wasonekeli nindi: “Maana afumaña mwiwulu, kusambila amawahi, nkumininaku awunda, ovwaha, anyakala kutiya, enzala luwi nanyikabu yayiwahi, hiyaheta ntadi hela wufwikijuku. Antu awunda akuwaña kuwunda, aañulaña kuloña.”—Yakoba 3:17, 18.
9. Chumanyi chitwatela kwanukaña hampinji yitunakufwila ‘kushakama chachiwahi nawantu ejima’?
9 Mumazu indi ekala haAroma 12:18, Pawulu washimwini cheñi hayuma yikwawu yabadika hakuleta kuwunda muchisaka nimuchipompelu. Wahosheli nindi twatela ‘kushakama chachiwahi nawantu ejima.’ Chumichi chabombelamu antuñi netu, akwetu itwazataña nawu, akwetu akashikola, niantu itwawanaña mumudimu wetu wakushimwina. Hela chochu, kapostolu wabombeleluhu nindi: “Neyi chikutwesheka, . . . mwejima mumukutweshela enu aweni.” Chumichi chinayi mukwila nawu twatela kuzata nañovu kulonda ‘kushakama chachiwahi nawantu ejima,’ ilaña bayi neyi kufumpa nshimbi jaNzambi jaloñaku.
Yehova Diyi Watendaña
10, 11. Munjilanyi ‘mutwashilaña iluña dakuzuwa,’ nawa muloñadi chichawahila kwila mwenimu?
10 Tañenu Aroma 12:19. Hela chakwila ‘antu ahela’ mudimu wetu ninsañu yitwashimwinaña, kushilahu niakwankunyi netu, twatela kwikala ‘akwakutiyilila akwetu [kudiyuula kuyuma yatama]’ nikwikala ‘amwovu.’ (2 Timotewu 2:23-25) Pawulu wafumbili akwaKristu kubula kuditenda, ilaña wayilejeli nindi atela ‘kushiya iluña dakuzuwa.’ Ichi chinayi mukwila nawu twatela kumushila Nzambi iluña dakuzuwa. Etu akwaKristu tweluka netu hitukweti wuswa wakutendaku. Ñimbi yamasamu wasonekeli nindi: “Lekaku kuzuwa, shiyaku ndombu; muchima weyi bayi wubimbañaku, chaleta[ña] kwila yuma yatama.” (Masamu 37:8) Solomoni wafumbili nindi: “Bayi wakela neyi, Ami nakayifuntishila yatama yaneluwuku; muchiñeji kweyi Yehova, yena diyi wakakwamwina.”—Yishimu 20:22.
11 Neyi akwankunyi atwila katama, twatela kulondela njila yayiwahi yakushiya yuma mumakasa aYehova kulonda kuyibabesha neyi namoni nindi chinateleli. Hakumwekesha nawu Pawulu watoñojokeleña hakuzuwa kwaYehova, wabombeleluhu nindi: “Nikutenda, yami; nikufweta, yami; hohamba kaselumukila nyendu yawu; muloña ifuku dawu dakumona kukala didi kwakwihi, niyuma yakamonawu yakayinyakela.” (Esekejenu Kuhituluka 32:35) Neyi tukukeña netu tutendi, dikwila nawu tunakudinka wanta, nawa tunakwila chuma chatela kukoñayi Yehova. Kubombelahu, chikumwekesha nawu hitwakuhwelela mukukana kwaYehova kwakwila nawu: “Yami nukufweta.”
12. Indi kuzuwa kwaYehova akakumwekesha mpinjinyi, nawa munjilanyi?
12 Kumatachikilu amukanda windi wasonekeleliyi aRoma, Pawulu wahosheli nindi: “Muloña kuzuwa kwaNzambi kunamwekani kwiwulu, kwakuzuwila kasekesha kakusekesha Nzambi kejima, nikuheña kwawantu awa alabishaña nsañu yalala nakuheña kwawu.” (Aroma 1:18) Kuzuwa kwaYehova kwakamwekena mwiwulu kuhitila mudi Mwanindi hampinji ‘yayihuñu yeneni.’ (Chimwekeshu 7:14) Chumichi chikekala “nsañu yakumwekesha nachu kusompesha kwaNzambi kwaloña,” neyi chalumbulwiliyi Pawulu mumukanda windi wonenewa wukwawu nindi: “Nzambi namoni nindi chaloña kuhiñishila antu lukadi, nalukadi lwanayimweshuwu enu; ninenu mwamonaña lukadi kuyihiñishila kunooka hamu nanetu, hakamwekanayi Mwanta Yesu hakafumayi kwiwulu mukesi kakubidima, hamu nawañelu jañovu jindi, nakuditenda hadi antu abula kwiluka Nzambi, nihadi antu abula kwovwahila nsañu yaMwanta wetu Yesu yayiwahi.”—2 Atesalonika 1:5-8.
Kufwomona Yatama naYayiwahi
13, 14. (a) Muloñadi wutwabulilaña kuhayama neyi anakutukabisha? (b) Tunateli kukiswila ñahi antu atukabishaña?
13 Tañenu Aroma 12:14, 21. Neyi tukuhwelela chikupu netu Yehova wakashikija yuma yakanayi, chikutuleñela kuzata nañovu jetu jejima mumudimu wunatwinkiyi, wakushimwina ‘nsañu yawanta yayiwahi mwahita matuña ejima mwashakamawu antu.’ (Matewu 24:14) Tweluka netu iwu mudimu wawakwaKristu wakaleñela ayilumbu jetu kuzuwa, muloña Yesu watubabesheli nindi: “Akayihela kudi nyuza yejima kukoola ijina dami.” (Matewu 24:9) Dichi, hitwahayamaña hela kuneña neyi tumona makabishaku. Kapostolu Petulu wasonekeli nindi: “Enu akwetu twakeña, bayi muhayama chakuyesekawu nakesi kanenzi mukachi kenu nakuyikabisha, nenu kunatuwani chuma chacheñuku. Chiña kuzañalala nanochu chimuneli akwakutambwila makabi chimu naKristu.”—1 Petulu 4:12, 13.
14 Chatela tuyiheleña antu atukabishaña, twafwilaña kuyidizisha, muloña tweluka netu amakwawu atwikabishaña hamuloña wakubula kwiluka. (2 Akorinda 4:4) Twafwilaña kulondela kufumba kwaPawulu kwakwila nawu: “Kiswilenu ayikabishaña nkisu; kumina dakukisula nkisu, bayi kushiñanaku.” (Aroma 12:14) Njila yimu yakukiswilamu antu atukabishaña hikuyilombelaku. Yesu wahosheli muMpanji yindi yahaMpidi nindi: “Keñenu ayilumbu jenu, koñenu chachiwahi antu akuyihela. Antu akuyishiña yikiswilenu nkisu; akuyikoña chatama yilombelenu.” (Luka 6:27, 28) Chineli kapostolu Pawulu wadiña mukwakukabisha, welukili nindi mukwakukabisha nateli kwikala kambanji waKristu washinshika nawa kambuña aYehova wadikita. (Aŋalija 1:13-16, 23) Mumukanda wukwawu, Pawulu wahosheli nindi: “Chatutukañawu twayikiswilaña nkisu; chatukabishañawu twakuminaña dakwiteja; chatutuñulañawu twakuminaña dakulemba.”—1 Akorinda 4:12, 13.
15. Njilanyi yayiwahi yakushindilamu yuma yatama nayayiwahi?
15 Dichi mukwaKristu walala walondelaña kufumba kwekala muvasi yaAroma kapetulu 12: “Kutama bayi kuyimika mushinduku; fwomonenu yatama nayayiwahi.” Satana Diyabolu diyi waletaña yuma yatama yejima. (Yowanu8:44; 1 Yowanu 5:19) Muchimwenu chamumwekesheleluwu kapostolu Yowanu, Yesu walumbulwili nindi ana kwindi awayishewa ‘anamwimiki [Satana] mushindu namashi aKana kamukoku, namazu ashimwinuwu.’ (Chimwekeshu 12:11) Ichi chinakumwekesha nawu njila yayiwahi yakumushindilamu Satana niyuma yatama yakoñañayi mukaayi kamakonu hikwila yuma yayiwahi kuhitila mukuzata mudimu wetu wakushimwina nsañu yayiwahi yaWanta.
Zañalalenu muKuchiñeja
16, 17. Indi mukanda waAroma kapetulu 12 wunatudizishi ñahi (a) chakuzatisha wumi wetu? (b) chitwatela kushakama nawantu amuchipompelu? (c) chitwatela kwila nawantu adimbululaña chikuhwelela chetu?
16 Yuma yantesha yitunadizi mukapetulu 12 kamukanda waPawulu wasonekeleliyi akwaKristu akuRoma yinatwanukishi yuma yayivulu. Tunadizi netu hakwikala ambuña aYehova adihana, twatela kuhanaña nyilambu mukudikeñela. Spiritu yaNzambi yatuleñelaña kuhana nyilambu mukudikeñela muloña yitoñojoka yetu yinatushinjili chikupu netu Nzambi wakeñaña nindi twileña mwenimu. Spiritu yatusañumunaña nawa twazatishaña yawaana yetu chiwahi. Twakalakalaña mudimu wetu mukudizoza nakudikita kulonda kunuñañana kwetu kwawakwaKristu kutwalekuhu. Twalondelaña njila yakumwekeshelamu chisambu nikumwekesha chikupu luwi.
17 Mukanda waAroma kapetulu 12 niwena watufumbaña chikupu chitwatela kwila neyi anakutukabisha. Bayi tufuntisha katama nakatama munjila yinakumwekana neyi yayiwahuku. Twatela kushinda ikabisha kuhitila mukwila yuma yayiwahi. Neyi chinatwesheki, twatela kushakama nawantu ejima chachiwahi chakadi kufumpa nshimbi jamuBayibolu. Kushakama chachiwahi nawantu ejima kwamwekanaña muchisaka, muchipompelu, kudi antuñi netu, kumudimu, kushikola, nimumudimu wetu wakushimwina. Hela chakwila anakutukabisha chikupu, twafwilaña kufwomona yatama nayayiwahi, muloña tweluka netu Yehova diyi watendaña.
18. Yumanyi yisatu yinashimunuwu haAroma 12:12?
18 Tañenu Aroma 12:12. Kubombela haniku kufumba kwakuwahi kutunadizi, Pawulu wateneni cheñi hayuma yisatu. Chineli hitukutwesha kukoña yuma yejimiyi chakadi wukwashu waYehovaku, kapostolu natukoleshi nindi twatela ‘kukakela mukulomba.’ Kwila mwenimu kukutukwashaku kulondela kufumba kwindi kukwawu ‘kwakutatakena hakumona yihuñu.’ Dichi twatela kutoñojokaña hayuma yakamwekana kumbidi yatukanayi Yehova ‘nikuzañalala mukuchiñeja’ kwawumi wahaya nyaka, chili mwiwulu chili hamaseki.
Kuhitulukamu
• Chumanyi chitwatela kwila neyi anakutukabisha?
• Muyumanyi mutwatela kwikala akwakuleta kuwunda, nawa munjilanyi?
• Muloñadi wutwatela kubulila kufuntisha katama nakatama?
[Malwihu aKuzatisha haKudiza]
[Mwevulu wudi hefu 16]
Kukwasha chikupu atuñi netu kunateli kutukwasha kushinda chaambu
[Mwevulu wudi hefu 17]
Komana mwafwilaña kwikala mukwakuleta kuwunda muchipompelu?