Ambuña aNzambi Atela Kumwekesha Yililu Yayiwahi
Ambuña aNzambi Atela Kumwekesha Yililu Yayiwahi
‘Ikalenu akwakwimbujola Nzambi.’—AEFWESESA 5:1.
1, 2. (a) Muloñadi kumwekesha yililu yayiwahi chikwalemena? (b) Yumanyi yitukudiza muchinu chibaaba?
KUTALISHA hayililu yayiwahi, nsoneki Sue Fox wasonekeli nindi: “Twatela kumwekeshaña yililu yayiwahi mpinji yejima. Yililu yayiwahi yakwashanaña muyuma yejima, nawa mpinji yejima.” Neyi antu ekala nachaaku chakumwekeshaña yililu yayiwahi, yikonkojola nawakwawu yakehaña nawa kakavulu yamanaña. Ilaña neyi abulaña kumwekesha yililu yayiwahi yikonkojola yavulaña. Kubulaña kumwekesha yililu yayiwahi kudi antu amakwawu kwaletaña wufwinda, ndulu, nikuhilashana.
2 Muchipompelu chawakwaKristu mwekala antu akweti yililu yayiwahi chikupu. Hela chochu, twatela kutondolwela kulondela yililu yatama yinenzali mukaayi makonu. Tushinshikenu hakuzatisha nshimbi jamuBayibolu hansañu yakumwekesha yililu yayiwahi chikunateli kutukiña nikukokola antu kukudifukula kwalala. Hakwila nawu twiluki yuma yekala mukumwekesha yililu yayiwahi, tushinshikenu hachakutalilahu chaYehova Nzambi niMwanindi.
Yehova niMwanindi Emika —Chakutalilahu chaYililu Yayiwahi
3. Chakutalilahwinyi chayililu yayiwahi chemikayi Yehova Nzambi?
3 Yehova Nzambi wemika chakutalilahu chachiwahi chayililu yayiwahi. Hela chakwila wukweti chifulu chabadika chakwikala Mwanta wakuleña kwejima, watiyilaña antu luwi chikupu nikuyilemesha. Hampinji yahosheleñayi naAbarahama niMosi, Yehova wazatishili izu dachiHeberu davula kubalumunawu nawu “mwani.” (Kutachika 13:14-NW; Kwidika 4:6) Neyi ambuñindi avulumuna, Yehova wekala ‘wenzala nawushona nikutoña, hazuwaña swayuku, wasweja niluwi ninsañu yalala.’ (Masamu 86:15) Hekala neyi antu amakwawu anyakalaña kuzuwa neyi akwawu akañanya kwila yuma yakeñañawuku.
4. Tunateli kumwimbujola ñahi Yehova neyi antu anakuhosha nanetu?
4 Yililu yayiwahi yaNzambi yamwekenaña cheñi munjila yatiyililañayi kudi antu. Abarahama chehwiliyi malwihu kutalisha hadi antu amuSodoma, Yehova wakwili chachiwahi malwihu ejima. (Kutachika 18:23-32) Hamweni nindi malwihu enhwileñayi Abarahama amumanishilileña mpinjuku. Yehova watiyililaña kukulomba kwawambuñindi nikulomba kwawantu akwanshidi abalumukaña mumuchima. (Tañenu Masamu 51:11, 17.) Komana kwila tumwimbujola Yehova kuhitila mukutiyilila neyi antu anakuhosha nanetu nehi?
5. Indi kwimbujola yililu yayiwahi yaYesu yinateli kutuleñela ñahi kwikala nawubwambu wawuwahi nawantu amakwawu?
5 Yililu yayiwahi yekala hakachi kayuma yayivulu yadiziliyi Yesu Kristu kudi Tata yindi. Hela chakwila mudimu windi wakushimwina wamusendeleleña mpinji yeneni nikuzata nañovu, Yesu wamwekesheleña kuwunda niluwi. Mukudikeñela Yesu wakwashileña akwambumba, niamputamesu adiña nakulomba-lombaña, niantu amakwawu akeñeleña kuyikwasha. Hela chakwila enjileña chakadi kumuleja, Yesu hayidiwileñaku. Kakavulu walekeleña nyidimu yakoñeleñayi kulonda kukwasha muntu wunayandi. Yesu wakwashileña chikupu antu adiña nakumukuhwelela. (Maku 5:30-34; Luka 18:35-41) Etu akwaKristu, twalondelaña chakutalilahu chaYesu kuhitila mukumwekesha luwi nikukwashana. Antaña jetu, atuñi netu, niantu amakwawu amonaña yililu yamuchidiwu. Cheñi, yililu yamuchidiwu yamulemeshaña Yehova nawa yatuzañaleshaña.
6. Chakutalilahwinyi chemikiliyi Yesu chakumwekesha muzañalu nikudiluka nawantu?
6 Cheñi Yesu walemesheleña antu kuhitila mukuyitena hejina. Komana akulumpi jansakililu yawaYudeya niwena elileña mwomumu? Inehi. Amweneña antu abulili kwiluka Nshimbi nawu “ashiñewa” nawa ayidiwileña. (Yowanu 7:49) Ilaña Mwana kaNzambi hadiwileña antuku. Mata, Mariya, Zakewu, niantu amakwawu amavulu amutiyili chayitambikileñayi hejina. (Luka 10:41, 42; 19:5) Hela chakwila chisemwa ninshakaminu yikwawu diyinateli kumwekesha chitwatela kuhosha nawantu makonu, ambuña aYehova afwilaña kudiluka nawantu. * Hiyetejaña chaambu chiyileñeli kuleka kulemesha akwawu akakwitiya niantu amakwawu atelela kulemeshewaku.—Tañenu Yakoba 2:1-4.
7. Indi nshimbi jamuBayibolu jatukwashaña ñahi hakumwekesha yililu yayiwahi kudi akwetu kudi kwejima?
7 Njila yayiwahi mwalemeshelañayi Nzambi niMwanindi antu akunyunza niyisemwa yejima kwamwekeshaña nawu alemesha antu wenawa nawa antu anyichima yayiwahi ayikokolaña nakwinza kuchalala. Hela chochu, yuma yamonañawu nawu diyi yililu yayiwahi yambuka kwesekeja namaluña kwashakamañawu antu. Dichi, hitwalondelaña nshimbi yatuñawu hakumwekesha yililu yayiwahuku. Ilaña, twalondelaña nshimbi jamuBayibolu jatukwashaña kwikala akasunuka hakulemesha antu kudi kwejima. Tushinshikenu kumwekesha yililu yayiwahi kudi antu chikunateli kutukwasha kuzata chiwahi mumudimu wawakwaKristu wakushimwina.
Kwimusha Antu niKuhosha Nawu
8, 9. Chaakwinyi chitwatela kumona netu hiyililu yatama? (b) Muloñadi wutwatela kwitejela mazu aYesu ekala haMatewu 5:47, 48 kulonda atukwashi kwiluka chakushakama nawantu?
8 Makonu mumaluña amavulu antu akweti yuma yayivulu yakwila muchihandilu, nawa kakavulu antu adihitaña chakubula nikudimusha. Hela chochu, bayi neyi muntu nateli kuhosha nawantu ejima anakuhita munjila munenzali antu amavuluku. Ilaña, mumaluña amakwawu, chachiwahi nankashi kwimusha antu amakwawu. Komana mwekala nachaaku chakwimusha antu? Indi kwiji mwahitaña tuhu chakubula kutumba chimwemweta hakanwa hela kuhosha izu dadiwahi? Muntu nateli kwikala nachaaku chakumwekesha yililu yatama, chakadi kutoñojoka hachuma chidi chejima chatama.
9 Yesu watusoñamishili hampinji yahosheliyi nindi: ‘Neyi mukwimusha ana kwenu hohu munabadikili akwenu hadihi? Hidimu mwelaña aJentiluku?’ (Matewu 5:47, 48) Nkuluñaña wumu wejina daDonald Weiss wasonekeli nindi: “Antu ahilaña neyi amakwawu ayihitakana chakadi kuyimusha. Kwosi watela kushimuna chikupu chuma chatela kuleñela muntu kudiwula mukwawu. Kwimusha antu, nikuhosha nawu diyi njila yayeni yakumanishilamu iku kukala.” Neyi tutondolwela chaaku chakudambula kudi antu hela kudivinya, chikutukwasha chikupu.
10. Indi yililu yayiwahi yinateli kutukwasha ñahi kuzata chiwahi mumudimu wakushimwina? (Talenu chikasha chinakuhosha nawu “Sambilenu Kutumba Chimwemweta Hakanwa.”)
10 Talenu chakutalilahu chaTom naCarol akwaKristu adisumbula, ashakamaña mumusumba weneni wakukabeta kaluwunda kakuUnited States. Kuhanjeka chiwahi nawantuñi nawu akwimonaña nawu himbadi yamudimu wawu wakushimwina. Ahanjekaña nawu ñahi? Kuhosha hamazu ekala haYakoba 3:18, Tom wahosheli nindi: “Twafwilaña kuhosha nawantu nikushakama nawu mukuwunda. Twasolomokaña antu itwamonaña hamatalawu niazatilaña mwiluña. Twatumbaña chimwemweta hakanwa nikuyimusha. Twahoshaña hayuma yayitiyishaña kuwaha yidi neyi anyanawu, tuwa twawu, matalawu, ninyidimu yazatañawu. Chimwahita mafuku, atumonaña nawu tudi amabwambu jawu.” Carol wahosheli nindi: “Chitwayihempula cheñi, twayilejaña majina etu nikuyihula majinawu. Twayilejaña mudimu wutunakwila muchituñilu nikuhanjeka nawu mumpinji yantesha. Nkumininaku, twayishimwinaña.” Tom niCarol ayikuhwelela chikupu kudi antuñinawu amavulu. Antu amavulu atambulaña nyikanda yashindamena haBayibolu, nawa antesha anamwekeshi chikupu mpwila yakukeña kudiza chalala.
Kumwekesha Yililu Yayiwahi Mumpinji Yakala
11, 12. Muloñadi chitunateli kukuhwelela netu hampinji yakushimwina nsañu yayiwahi anateli kutwila katama, nawa chumanyi chitwatela kwila?
11 Mpinji yikwawu, atwilaña katama hampinji yitwashimwinaña nsañu yayiwahi. Chumichi hichakuyambaku, muloña Kristu Yesu wasoñamishili atumbanji twindi chadimu nindi: “Chankabishiluwu ami, ninenu nawa akayikabisha.” (Yowanu 15:20) Ilaña antu anakutuhosha mazu akasawuntu neyi tuyakula munjila yoyimu, himwafumaña yuma yayiwahuku. Hanu dinu twatela kuyakula ñahi? Kapostolu Petulu wasonekeli nindi: “Mujiliki Kristu munyichima yenu nenu diyi Mwanta, mutweshi kwakula mafuku ejima antu ejima akuyihula nsañu yakuchiñeja kumwachiñejaña; nakudizoza nawoma.” (1 Petulu 3:15) Kumwekesha yililu yayiwahi, kuyakula mukuwunda nawa nakalemesha, kunateli kuleñela atutukaña kutambwila nsañu yayiwahi.—Titusa 2:7, 8.
12 Komana kwila tudiloñesha kwakula mazu akasawuntu kwesekeja nachakeñañayi Nzambi nehi? Twatela tudiloñeshi. Pawulu wahosheli nindi: “Kuhosha kwenu kwikali naluwi, kwakutoweja namuñwa mafuku ejima, kulonda mwiluki mwakwakwila antu ejima.” (Akolosi 4:6) Neyi twikala nachaaku chakumwekesha yililu yayiwahi kudi antu amuchisaka, akwetu atudizi, itwazataña nawu, antu amuchipompelu, niantu amuchituñilu, dikwila nawu tunadiloñeshi kwakula antu atusawulaña nikututuka munjila yayiwahi yamukwaKristu.—Tañenu Aroma 12:17-21.
13. Shimunenu chakutalilahu chinakumwekesha nawu yililu yayiwahi yinateli kufwomona yililu yawakwakudimbulula.
13 Kumwekesha yililu yayiwahi mumpinji yakala mwafumaña yuma yayiwahi. Chakutalilahu, muJapan, chinsahu wumu amuseheli kudi mwiniitala nikudi mwenyi windi. Mana kwetu wafuminuku mumesu akuwunda. Chatwalekeluhu nakushimwina mwiluña dodimu, wamweni nindi ona mwenyi wadiña nakumusumbila hahalehi. Mana kwetu chamuwaniniyi, ona iyala wahosheli nindi: “Muñanakenuku hayuma yamwekana. Hela chakwila twayihosha mazu atama, nayimona saña mwatumbila chimwemweta hakanwa. Chumanyi chinatela kwila kulonda nikali neyenu?” Muloña ona iyala mudimu windi wamanini nawa wafwishili mama yindi, watoñojokeli nindi hakekalahu cheñi wamuzañaluku. Chinsahu wamulejeli nindi yadizeña nindi Bayibolu, nawa ona iyala wetejeli. Chakadi nikumba mpinji wadizileña kayedi mumulungu.
Njila Yayiwahi Yakwikalilamu naYililu Yayiwahi
14, 15. Indi ambuña aYehova kunyaka adizishileña ñahi anyanawu?
14 Anvwali amwakamineña Nzambi kunyaka adizishileña anyanawu mwitala chakumwekesha yililu yayiwahi. Talenu njila yayiwahi yaditambikilileñamu Abarahama nimwanindi Isaka yasonekawu haKutachika 22:7. Yosefu niyena wamwekesheli nawu amudizishili chiwahi kudi anvwali jindi. Chamumbililuwu mukaleya, wamwekesheleña yililu yayiwahi kudi akwawu atuyili. (Kutachika 40:8, 14) Mazu ahosheliyi kudi Fwaro amwekeshaña nawu wadizili chakuhosha namuntu wudi hachifulu chawunlomboli.—Kutachika 41:16, 33, 34
15 HaNshimbi Ikumi yayinkeluwu anyana kaIsarela hadiña ilu lushimbi lwakwila nawu: “Lemeshaku tata yeyi namama yeyi, kulonda mafuku eyi akavuli mwituña dakukwinkayi Yehova Nzambi yeyi.” (Kwidika 20:12) Kumwekesha yililu yayiwahi hetala diyi njila yimu anyana mwatela kulemeshelawu anvwali jawu. Mwana kaYefwata wamumbanda wamwekesheli kalemesha chikupu kudi tata yindi kuhitila mukwiteja kudishiilamu kwatata yindi kwadiña kwakala.—Ansompeshi 11:35-40.
16-18. (a) Chumanyi chitwatela kwila kulonda kudizisha anyana yililu yayiwahi? (b) Kuwahanyi kwekala mukudizisha anyana yililu yayiwahi?
16 Kudizisha anyanetu kwikala nayililu yayiwahi kwalema chikupu. Hakwila nawu akashakameña chachiwahi neyi anakuli, anyana atela kudiza njila yayiwahi yakwimushilamu enyi, kwakula nshiña, nikudya hamu nawakwawu. Mwatela kuyikwasha kulonda eluki muloña watela kushilawu mukulumpi chitwamu, kumwekesha luwi kudi atushinakaji niakata, nikukwasha antu anasendi yiteli yalema. Atela kwiluka kulema kwakuhosha nawu “mwani,” “kusakililaku mwani,” “chachiwahi mwani,” “niyikwashiku mwani?,” nikuhosha nawu “añanakenuku mwani.”
17 Kudizisha anyana kwikala nayililu yayiwahi bayi kwikala kwakalaku. Njila yayiwahi yidi yakuyimikila chakutalilahu chachiwahi. Kurt wudi nayaaka 25 washimwini chadiziliyi nawana kwindi kwikala nayililu yayiwahi, wahosheli nindi: “Twashinshikileña nikutiyilila aMama niAtata chiyadakwileñawu namazu amawahi nikumwekesha kuwunda nikwakamena antu amakwawu. Hetala daWanta, henohu kupompa kanda nihanyima yakupompa, aTata asendeleña kulonda kuhosha nawamana kwetu niahela akulumpi. Natiyileña atata chiyemushileña nikumona chalemesheleñawu akulumpi.” Kurt watwalekeluhu nakuhosha nindi: “Chimwahitili mpinji, natachikili kwimbujola yililu yawatata. Kumwekesha yililu yayiwahi kudi antu kwadinjilaña kwakweni. Bayi neyi chashindamena hachiwatela kwilaku, ilaña hachiwunakukeña kwila.”
18 Chumanyi chatela kumwekana neyi anvwali adizisha anyanawu yililu yayiwahi? Anyana akukwata wubwambu nawakwawu nikushakama mukuwunda nawantu. Akwikala adiloñesha kuzata nawantu ayiñija nyidimu niakwawu muyazatilañawu. Kubombelahu, anyana amwekeshaña yililu yayiwahi, nawa aloña, azañaleshaña anvwali jawu nikuyitiyisha kuwaha.—Tañenu Yishimu 23:24, 25.
Yililu Yayiwahi Yatuleñelaña Kwikala Ambukaku naWantu aMukaayi
19, 20. Muloñadi wutwatela kufwila kwimbujola Nzambi yetu wekala nayililu yayiwahi niMwanindi?
19 Pawulu wasonekeli nindi: “Ikalenu akwakwimbujola Nzambi, neyi anyana akeñewa.” (Aefwesesa 5:1) Kumwimbujola Yehova Nzambi niMwanindi kwabombelamu kuzatisha nshimbi jamuBayibolu, jidi neyi jitunadizi muchinu chibaaba. Kuhitila mukwila mwenimu, tukutondolwela wunfwikiji wakumwekesha yililu yayiwahi kulonda kutiyañana namuntu wudi hachifulu chawunlomboli hela kulonda kudiilahu yuma.—Yuda 16.
20 Munanu mafuku akukumishaku achiyuulu chindi chatama, Satana nemakeni hakujiyisha yililu yakalemesha yashimunayi Yehova. Ilaña Diyabolu hakatwesha kumanisha yililu yayiwahi yawakwaKristu alalaku. Wejima wetu tufwilenu kulondela chakutalilahu chayililu yayiwahi yaNzambi niMwanindi. Mpinji yejima nhoshelu niyililu yetu yikwikalaña yambukaku nayililu yawantu akeñaña kumwekesha yililu yazonda. Tukuhamekaña ijina daNzambi yetu wekala nayililu yayiwahi, Yehova, wemika chakutalilahu chayililu yayiwahi, nawa tukukokola antu akweti nyichima yayiwahi kukudifukula kwindi kwalala.
[Tumazu twaheshina]
^ Muyisemwa yikwawu, kutena mukulumpi hejina akwimonaña nawu hikasawuntu, chiña neyi yakuleja kumutena hejina. AkwaKristu atela kulemesha tushidikilu twamuchidiwu.
Munakwanuka?
• Chumanyi chitwadizilaña kudi Yehova niMwanindi hakumwekesha yililu yayiwahi?
• Muloñadi kwimusha antu namuzañalu chikwamwekeshelaña yililu yayiwahi hadi etu akwaKristu?
• Indi kwikala nayililu yayiwahi kwaleñelaña ñahi kuzata chiwahi mudimu wakushimwina?
• Mudimwinyi wazatañawu anvwali hakudizisha anyanawu yililu yayiwahi?
[Malwihu aKuzatisha haKudiza]
[Chikasha chidi hefu 30]
Sambilenu Kutumba Chimwemweta Hakanwa
Antu amavulu ajinookaña kutachika kuhanjeka namuntu wabula kwilukawu. Hela chochu, hamuloña wakumukeña Nzambi niakwawu, aYinsahu jaYehova azataña nañovu hakudiza chakuhanjeka kulonda kulejaku antu nsañu yalala yamuBayibolu. Chumanyi chatela kuyikwasha kwiluka mwakuhanjekela?
HaAfwilipi 2:4 hekala lushimbi lwaluwahi, lwahosha nawu: “Bayi muntu atoñojokaña nsañu yindi hohuku, chiña nsañu yawakwawu nawa.” Toñojokenu hanawa mazu muniyi njila: Neyi muwana muntu imwabulahu dehi kumona, wukuyimona nindi mudi enyi. Chumanyi chimwatela kwila kulonda yekali wakasunuka? Mwatela kutumba chimwemweta hakanwa nikumwimusha namuzañalu. Hela chochu, kudi yuma yikwawu yimwatela kwila.
Kuhitila mukufwila kutachika kuhanjeka namuntu, hadaha munaleñeli yitoñojoka yindi yinaluwankani. Neyi mweseka nenu mutachiki kuhanjeka hayuma yimunakutoñojoka chakadi kuta maana kuyuma yadiña nakutoñojokayi, hanateli kwiteja chachiwahuku. Dichi, neyi mweseka kwiluka jadiña nakutoñojokayi, komana kwila muyizatisha nehi kulonda kutachika kuhanjeka nindi? Dicheliliyi Yesu hampinji yawaniniyi mumbanda heshima damenji muSamariya. (Yowanu 4:7-26) Iwu mumbanda washili maana hakutaha menji. Yesu watachikili kuhanjeka nindi kuhitila mukuhosha hamenji, kuhiñahu watachikili kuhanjeka nindi hansañu yakuspiritu.
[Nyevulu yidi hefu 29]
Kwikala akasunuka nawantu kunateli kutuleñela kushimwina wunsahu wawuwahi
[Mwevulu wudi hefu 31]
Yililu yayiwahi mpinji yejima yekala yalema