Indi Kulomba Kwenu Kwamwekeshañadi haWubwambu Wenu naYehova?

‘Yeyi  watiyaña mwalombañawu antu, antu ejima akwinza kudeyi.’—MASAMU 65:2.

1, 2. Muloñadi ambuña aYehova chatela kulombelawu kudi Yehova nachikuhwelelu?

 YEHOVA mpinji yejima watiyaña kulomba kwawambuñindi ashinshika. Tunateli kukuhwelela netu watiyaña kulomba kwetu. Hela chakwila aYinsahu jaYehova akulomba hampinji yoyimu, Yehova wukutwesha kutiya kulomba kwamuntu wudi wejima.

² Hakwiluka chikupu nindi Nzambi watiyili kulomba kwindi, ñimbi yamasamu Davidi wembili nindi: “Yeyi watiyaña mwalombañawu antu, antu ejima akwinza kudeyi.” (Masamu 65:2) Nzambi watiyili kulomba kwaDavidi hamuloña wakwila wadiña mukwakudifukula waYehova washinshika. Dichi tunateli kudihula netu: ‘Komana kulomba kwami kwamwekeshaña nawu namukuhwelela Yehova nawa nalemesha kudifukula kwalala? Indi kulomba kwami kwamwekeshañadi hadami?’

Ikalenu Adizoza Hakulomba Kudi Yehova

3, 4. (a) Chililwinyi chitwatela kwikala nachu neyi tunakulomba kudi Nzambi? (b) Chumanyi chitwatela kwila neyi tudi ‘nayitoñojoka yayivulu’ kutalisha hanshidi yeneni?

³ Hakwila nawu kulomba kwetu akwakuli, twatela kulomba kudi Nzambi mukudizoza. (Masamu 138:6) Twatela kumulomba Yehova kulonda kutushinshika, neyi cheliliyi Davidi hampinji yahosheliyi nindi: “Ntali chachiwahi, eyi Nzambi, wiluki muchima wami; ñeseki, wiluki yitoñojoka yami; Wumoni neyi mudami mwekala kwenda kwakuluwa, wunlomboli munjila yahaya nyaka.” (Masamu 139:23, 24) Hitwatela kulomba hohuku, ilaña nikumwovwahila Nzambi neyi nakutweseka nikwiteja kufumba kwaMwiizu dindi. Yehova nateli kutulombola “munjila yahaya nyaka,” nakutukwasha kulonda kulondela njila yalombolaña kuwumi wahaya nyaka.

⁴ Chumanyi chitwatela kwila neyi tudi ‘nayitoñojoka yayivulu’ kutalisha hanshidi yeneni? (Tañenu Masamu 32:1-5.) Neyi tweseka kudiwula chinleji chamuchima chamajilu tunateli kuzeya neyi choomaña mutondu mumpinji yanooña neyi kunasweji nkanza. Hamuloña wakuvulumuna, Davidi waneñeli nawa watela wakatili. Dichi chetejeliyi nindi navulumuni kudi Nzambi wazañaleli chikupu. Davidi wazañaleli chikupu chelukiliyi nindi Yehova ‘namwanakeni muloña windi.’ Kwiteja nshidi jetu kudi Nzambi chinateli kutuletela muzañalu, nawa aeluda akwaKristu niwena anateli kumukwasha mukwakuvulumuna kulonda kukola cheñi kuspiritu.—Yishimu 28:13; Yakoba 5:13-16.

Kumulembelela Nzambi niKumusakilila

5. Chumanyi chitwatela kwila neyi tudi mukukala hela anakutukabisha?

⁵ Neyi tunakameni chikupu hayuma yimu, twatela kuzatisha kufumba kwaPawulu kwakwila nawu: “Bayi mwakama chumaku; ilaña mulejenu Nzambi yuma yejima yimunakeñi nakulomba, nakulembelela, nakusakilila.” (Afwilipi 4:6). Twatela kumulomba Yehova kulonda yatukwashi nikutulombola sweje-e neyi tudi mukukala hela anakutukabisha.

6, 7. Yumanyi yinateli kutuleñela kusakilila hakulomba?

 ⁶ Neyi tulombaña hohu hampinji yitunakankili, tunakumwekeshadi hawubwambu wetu naYehova? Pawulu wahosheli nindi twatela kumuleja Nzambi yuma yejima yitunakukeña “nakusakilila.” Chakadi nikujina, kudi chuma chinateli kutuleñela kusakilila chikupu neyi Davidi, wahosheli nindi: “Nikutoha, niñovu, nilubanji, nimushindu, nimpuhu, yiikali yeyeyi eyi Yehova; muloña yuma yejima, niyidi mwiwulu, niyidi heseki yeyeyi hohu; eyi Yehova wanta weyeyi, yeyi wunatuumbakani, wunekali mutu wahewulu dayuma yejima. . . . Tunakusakilili eyi Nzambi yetu, tunahameki ijina deyi dampuhu.”—1 Kushindulula 29:11-13.

⁷ Yesu wamusakililili Nzambi hayakudya, mankendi navinyu yazatishiliyi haKudya kwaMwanta kwaMelela. (Matewu 15:36; Luka 22:18, 19) Kubombelahu, twatela “kumusakilila Yehova” ‘hanyidimu yindi yakuhayamisha yakoñelañayi anyana kawantu,’ ‘niwuñanji windi waloña,’ niizu dindi, hela hansañu yekala muBayibolu.—Masamu 107:15; 119:62, 105.

Lombelenuñaku Antu Amakwawu

8, 9. Muloñadi chitwatela kulombelañaku akwetu akwaKristu?

⁸ Chakadi nikujina, twadilombelañaku hohu etwaweni, ilaña twatela kulombelañaku niantu amakwawu, kubombelaku niakwaKristu itwabula kwiluka majina. Hela chakwila kapostolu Pawulu hayilukili akwakwitiya akuKolosuku, wasonekeli nindi: “Chitwayilombelaña mafuku ejima, twamusakililaña Nzambi, Tata yaMwanta wetu Yesu Kristu, nanochu chitwatiyili nsañu yakukuhwelela nachu akwakujila ejima.” (Akolosi 1:3, 4) Cheñi Pawulu walombeleleñaku akwaKristu akuTesalonika. (2 Atesalonika 1:11, 12) Neyi tuyilombelañaku amana kwetu niahela akwaKristu, dikwila nawu tunakumwekesha yuma yayivulu nichitwayimonaña.

⁹ Neyi tuyilombelañaku akwaKristu awayishewa nialundanawu “anyikoku acheñi” tukumwekeshaña netu twakamenaña kuloñesha kwaNzambi. (Yowanu 10:16) Pawulu wayilejeli akwawu akwakudifukula kumulombelañaku kulonda ‘amukwashi kushimuna nsañu yayiwahi yajindiluwu.’ (Aefwesesa 6:17-20) Komana, twayilombelañaku akwetu akwaKristu muniyi njila?

10. Yumanyi yinateli kufumamu neyi tulombelañaku antu amakwawu?

¹⁰ Kulombelaku antu amakwawu kunateli kuhimpa yililu yetu hachitwayimonaña. Neyi tumulombelañaku muntu itwahela, chinateli kutuleñela kuhimpa yililu yetu hachitwamutoñojokelaña. (1 Yowanu 4:20, 21) Kulomba kwamuchidiwu kwatukoleshaña nikudinuña nawamana kwetu. Kubombelahu, kulomba kwamuchidiwu kwamwekeshaña nawu tukweti kukeña neyi kwamwekeshañayi Kristu. (Yowanu 13:34, 35) Chililu chenichi chekala mbadi yamukabu waspiritu yaNzambi. Komana twalombaña spiritu yajila hamuntu hamuntu, nakumulomba Yehova kulonda yatukwashi kumwekesha mukabu waspiritu yajila wekala kukeña, muzañalu, kuwunda, kukaba kabe-e, luwi, kuwaha, kushinshika, kwovwaha, kudihemba? (Luka 11:13; Aŋalija 5:22, 23) Neyi dimu, nhoshelu yetu niyililu yetu  yikumwekeshaña nawu tukweti spiritu nawa yatulombolaña.—Tañenu Aŋalija 5:16, 25.

11. Muloñadi chimunateli kuhoshela nenu chachiwahi kulomba kulonda antu amakwawu atulombeleñaku?

¹¹ Neyi twiluka netu anyanetu adi mukweseka kwakutwambaña neyi anakusoneka kweseka hashikola, twatela kuyilombelañaku nikuzatisha Nsona hakuyikwasha kulonda ekali ashinshika nikubula kwila yuma yatama. Pawulu walejeli akwaKristu akuKorinda nindi: “Twalombaña kudi Nzambi netu mubuli kwila chatama.” (2 Akorinda 13:7) Kulomba kwamuchidiwu kwakudizoza kwamuzañaleshaña Yehova, nikumwekesha yuma yayiwahi hadetu. (Tañenu Yishimu 15:8.) Twatela kulomba kulonda antu amakwawu atulombeleñaku neyi chelileñayi Pawulu. Wasonekeli nindi: ‘Tulombelenuñaku. Tuneluki chalala netu tukweti chinleji chamuchima chachiwahi, tunakeñi kushakama chakashinshi muyuma yejima.’—Aheberu 13:18.

Kulomba Kwetu Kwamwekeshaña Yuma Yayivulu

12. Yumanyi yalema yitwatela kulombaña?

¹² Komana kulomba kwetu kwamwekeshaña nawu twekala aYinsahu jaYehova adikita nawa amuzañalu? Komana kulomba kwetu kwashindamenaña chikupu hakwila yuma yakeñañayi Nzambi, kushimwina nsañu yaWanta, kuhakwilaku wanta waYehova nikujilika ijina dindi? Iyi diyi yuma yalema yitwatela kulombaña, neyi chamwekeshaña kulomba kwaYesu kwakutalilahu, kwatachika namazu akwila nawu: “Tata yetu wekala mwiwulu, ijina deyi dijili. Wanta weyi winzi. Muchima weyi awili hamaseki neyi chawilañawu mwiwulu.”—Matewu 6:9, 10.

13, 14. Indi kulomba kwetu kwamwekeshañadi hadi etu?

¹³ Kulomba kwetu kudi Nzambi kwatela kumwekeshaña yililu yetu niyuma yitwafwilaña. Yehova weluka chitwekala. Yishimu 17:3, yahosha nawu: “Inuñu yakutookeshela siliva, luteñu lwakuzakasila wuru, ilaña Yehova diyi wesekaña nyichima yawantu.” Nzambi weluka yuma yekala munyichima yetu. (1 Samweli 16:7) Weluka chitwatiyaña hansañu yakupompa, mudimu wetu wakushimwina, hadi amana kwetu nahela akuspiritu. Yehova weluka chitwatoñojokaña hadi ‘amana kwaKristu.’ (Matewu 25:40) Welukaña neyi tunakukeña chikupu yuma yitunakulomba hela tunakutena hohu mazu mukulomba kwetu. Yesu wahosheli nindi: “Chimukulomba, bayi muhituluka nakutenatena mwamukunkulwayi, neyi chelañawu aJentiluku; muloña wena atoñojokaña nawu akuyitiya nanochu chakuvulishawu mazu.”—Matewu 6:7.

¹⁴ Cheñi, mazu itwazatishaña hakulomba amwekeshaña chitwamukuhwelela Nzambi. Davidi wahosheli nindi: “Eyi [Yehova] wunekali chiswamu chami, yeyi kaposhi kakola kakutemukila kuchina chilumbu. Nukushakama mwitenti deyi haya nyaka; nukubatama mumpuula jeyi mwawunda.” (Masamu 61:3, 4) Neyi Nzambi ‘yalemena itenti dindi’ dachifwikija ‘hadi etu,’ twakiñewaña. (Chimwekeshu 7:15) Twakoleshewaña neyi tuswila kwakwihi naYehova mukulomba nakukuhwelela chikupu netu ‘wadikumaña nanetu’ neyi chikuhwelelu chetu anacheseki munjila yidi yejima.—Tañenu Masamu 118:5-9.

15, 16. Kulomba kunateli kutukwasha kwilukadi hakufwila kuyilaku hambidi munyidimu yikwawu yamuchipompelu?

¹⁵ Kulomba kudi Yehova chakufuma hamuchima kutalisha hayuma yitunakutoñojoka kunateli kutukwasha kwiluka walala hayitoñojoka yeniyi. Chakutalilahu, komana twakalakalaña hachifulu chawunkoñi hakachi kawantu jaNzambi kulonda kufwila kukwasha antu nikukalakala chikupu mumudimu wakushimwina nimuchipompelu? Tahindi twakeñaña “kwikala muneni” hela ‘kuyuula’ antu amakwawu? Antu jaYehova hiyelaña  mwenimuku. (Tañenu 3 Yowanu 9, 10; Luka 22:24-27.) Neyi tukweti yitoñojoka yatama, kulomba kudi Yehova Nzambi namuchima wumu, kunateli kutukwasha kuleka yitoñojoka yeniyi nikuhimpa henohu kanda yisweji.

¹⁶ Ambanda akwaKristu anateli kukeña chikupu nawu amfumujawu akalakaleña neyi ankoñi akuzatila hela aeluda. Ahela wenawa azataña kwesekeja nakulomba kwawu nikufwila kwikala nayililu yayiwahi. Chumichi chalema, muloña nhoshelu niyililu yachisaka cheyala yinateli kumuleñela iyala kuyilaku hambidi hela kufunta hanyima muchipompelu.

Kwimenaku Antu Amavulu muKulomba

17. Muloñadi chichawahila kulomba kwakankawetu?

¹⁷ Kakavulu, Yesu wafumineña hezaza kulonda kuya nakulomba kudi Tata yindi kwakankawindi. (Matewu 14:13; Luka 5:16; 6:12) Anetu nawa twatela kwila chochimu. Neyi tulomba mukuwunda, tunateli kulomba yuma yinateli kumuzañalesha Yehova nikutukwasha kwikala akola hakudifukula kudi yena. Hela chochu, Yesu walombeleña cheñi hadi antu amavulu, nawa tunateli kwila mwenimu munjila yayiwahi.

18. Yumanyi yatela kwanukañawu amana kwetu neyi anakwimenaku chipompelu mukulomba kwawantu amavulu?

¹⁸ Hakupompa kwetu, amana kwetu ashinshika atwimenañaku mukulomba. (1 Timotewu 2:8) Akwetu akwakwitiya atela kwakula nawu “amena,” dikwila nawu ‘chikali chochenochu’ hakukumisha kulomba. Hela chochu, hakwila nawu akuli mwenimu, atela kwiteja yuma yinalombuwu. Kwosi chuma chatama hela chakutiyisha kumuchima kutama, kutalisha hachakutalilahu chakulomba kwaYesu. (Luka 11:2-4) Hela chochu, halumbulwili kukankila hela kukala kwamuntu wudi wejima wamwizaza dinduku. Yuma yitunakankili twatela kuyitena mukulomba kwakankawetu, bayi neyi mukulomba kwawantu amavuluku. Nawa neyi tunakwimenaku izaza mukulomba, twatela kutondolwela kubombelamu nsañu yakujinda.

19. Yililu yamuchidinyi yitwatela kwikala nayu hampinji yakulomba kwawantu amavulu?

¹⁹ Neyi anakutwimenaku mukulomba kwawantu amavulu, twatela ‘kumutiya Nzambi woma’ chikupu. (1 Petulu 2:17) Kudi yuma yitunateli kwila kwakankawetu yitunateli kubula kukoña hakupompa kwawakwaKristu. (Mukwakutaŋisha 3:1) Chakutalilahu, muntu wumu nateli kufuukulahu nindi adikwati kumakasa hamu neyi izaza hampinji yakulomba. Chumichi, chinateli kuneñesha hela kuluwañesha antu amakwawu, kubombelaku nienyi abula kukuhwelela yuma yitwakuhwelela. Adisumbula amakwawu anateli kudikwata kumakasa munjila yakalemesha, ilaña neyi adikumbata hampinji yakulomba, anateli kudimbwisha antu akuyikewukila hampinji yinadikumbatuwu. Anateli kutoñojoka nawu adisumbula wenawa aasha maana hawubwambu  wawu chatela kusha maana hakumutiya Yehova woma. Hamuloña wakukeña kumulemesha Yehova chikupu, twatela ‘kwila yuma yejima kulonda kulemesha Nzambi’ nikutondolwela yililu yinateli kuluwañesha, kuhayamisha hela kudimbwisha antu.—1 Akorinda 10:31, 32; 2 Akorinda 6:3.

Yumanyi Yitwatela Kulomba?

20. Munateli kulumbulula ñahi mukanda waAroma 8:26, 27?

²⁰ Mpinji jikwawu hitunateli kwiluka yuma yakulomba neyi tunakulomba kwakankawetuku. Pawulu wahosheli nindi: ‘Muloña hituneluki [kukala] kutwatela kulombaku, ilaña spiritu yajila yayeni yatulembelelaña nakwaba kwakweni kwakukañanya kushimuna. Niyena Nzambi washinshikaña munyichima yawantu, weluka chalumbuluka kulomba kwonenewa naspiritu.’ (Aroma 8:26, 27) Yehova waleñeleli kulomba kwashiyashana akwisoneki muBayibolu. Wetejaña kulomba kweniku kwonenewa wukwila neyi yetu tunakulomba nawa wakwakulaña. Nzambi watwiluka nawa weluka chalumbuluka yuma yasonekeli ansoneki aBayibolu kuhitila mudi spiritu yindi. Yehova wakulaña kulomba kwetu neyi spiritu ‘hiyikutulembelelaku.’ Ilaña neyi twiluka chikupu Izu daNzambi, tunateli kwiluka yuma yitwatela kulombaña.

21. Yumanyi yitwakashinshikahu muchibaaba chinahiñuhu?

²¹ Kwesekeja nachitunadizi, kulomba kwetu kwamwekeshaña yuma yayivulu hadetu. Chakutalilahu, kulomba kwetu kunateli kumwekesha chitunaswili kwakwihi naYehova chikupu nichitweluka Izu dindi. (Yakoba 4:8) Muchibaaba chinahiñuhu, twakashinshika hakulomba kukwawu nimazu azatishawu asonekawu muBayibolu. Indi kushinshika muNyikanda yeniyi kunateli kutukwasha ñahi hakulomba kudi Nzambi?

Mukwakula Nenudi?

• Chililwinyi chitwatela kwikala nachu neyi tunakulomba kudi Yehova?

• Muloñadi chitwatela kulombelañaku akwetu akwakwitiya?

• Indi kulomba kwetu kwamwekeshañadi hadetu niyililu yetu?

• Yililu yamuchidinyi yitwatela kwikala nayu hampinji yakulomba kwawantu amavulu?

[Malwihu aKuzatisha haKudiza]

[Mwevulu wudi hefu 11]

Komana mwamuhamekaña Yehova nikumusakilila mpinji yejima?

[Mwevulu wudi hefu 13]

Twatela kumulemesha Yehova mpinji yejima neyi tunakulomba