Indi Spiritu Yajila hiChumanyi?

HAMPINJI yimu, Yesu wayihwili atumbanji twindi nindi: “Mwinenwinyi wukwila neyi hitata yawantu, amulomba dinkendi kudi mwanindi weyala, amwinki ilola? Hela nalombi inshi amwinka kapela? Hela nalombi iteta amwinki kanjimbu?” (Luka 11:11, 12) Anyana amuÑaliliyi akeñeli chikupu mateta niinshi; dichi elukili yakudya yakeñeleñawu.

Yesu wahosheli nindi twatela kutwalekahu chikupu kulomba spiritu yajila, neyi chalombañayi mwana wunafwi nzala yakudya. (Luka 11:9, 13) Neyi twiluka chekala spiritu yajila chikutuleñela kwiluka chichalemena kwikala naspiritu yajila muchihandilu. Dichi tushinshikenu chatudizishaña Bayibolu kutalisha hadi spiritu yajila.

“Ñovu jaMukwakubadika”

Nsona jahosha nawu spiritu yajila hiñovu yazatishañayi Nzambi hakukalakala munafuukuliyi. Kañelu Gabireli hampinji yamulejeliyi Maliya nindi wakavwala mwana weyala hela wadiñi mujiki, wamulejeli nindi: ‘Spiritu yajila yakenza hadeyi; ñovu jaMukwakubadika Mwiwulu jakakuzeñamina; dichi chuma chiwakavwala akachitena nawu chajila, hiMwana kaNzambi weyala.’ (Luka 1:35) Kwesekeja namazu aGabireli, hekala kudifwana hakachi kaspiritu yajila ‘nañovu jaMukwakubadika.’

Mazu adifwanaku ekala mumavasi amakwawu muBayibolu. Kaprofwetu Mika wahosheli nindi: ‘Ilaña ami kwami chalala nenzali mbe-e nañovu yakudi spiritu yaYehova.’ (Mika 3:8) Yesu wakanini atumbanji twindi nindi: ‘Chakenza spiritu yajila hadenu, mwakatambula ñovu.’ (Yililu 1:8) Kapostolu Pawulu niyena wahosheli ‘hañovu yaspiritu yajila.’—Aroma 15:13, 19.

Hanu dinu tukuhoshahu netudi kutalisha hayuma yitunahoshuhu? Dichi hadi kudifwana chikupu hakachi kaspiritu yajila niñovu yaNzambi. Spiritu yajila hinjila mwazatishilañayi Yehova ñovu jindi. Dichi, tunateli kuhosha netu spiritu yajila hiñovu yazatishañayi Nzambi. Yekala ñovu yakuhayamisha. Hitunateli kwiluka ñovu jakeñekeleña hakuleña kaayi kejimaku. Kuhitila mudi kaprofwetu Isaya, Yehova watuleja kutoñojokaña hayuma yinalondeluhu nindi: “Fumbulenu mesu enu kwiwulu mumoni waleñeli yumiyi, wedishaña yileñaleña yawu chakuchinda. Wayitenaña yejima hejina hejina; chaswejayi kunyiña nichatakalalayi nañovu hikwakabula nichimuku.”—Isaya 40:26.

Dichi Bayibolu yamwekeshaña nawu kaayi kejima chakileñawu chiwahi himuloña ‘wañovu [jabadika]’ hela ñovu jaNzambi waÑovu jejima. Chakadi nikujina, ñovu jaNzambi jabadika chikupu, nawa chikweti  ñovu jindi mwaka tutwalekuhu kuhanda.—Talenu chikasha chinakwila nawu “Spiritu Yajila Yazatikili.”

Yehova nateli kuzatisha spiritu yindi yajila munjila jashiyashana, neyi chaleñeliyi kaayi kejima. Cheñi nateli kuyizatisha nikudi antu jindi. Bayibolu yikweti yakutalilahu yayivulu yamwekeshaña ñovu yaNzambi yazatikaña chiyakolesheli ambuñindi.

‘Spiritu yaYehova Yidi Hadami’

Mudimu waYesu watuleñelaña kwiluka chikupu ochu spiritu yajila yaNzambi chiyinateli kukolesha ambuñindi. Yesu walejeli antu akuNazareta nindi, ‘spiritu yaYehova yidi hadami.’ (Luka 4:18) Indi Yesu wakoñeli yumanyi ‘nañovu yaspiritu’? (Luka 4:14) Wokili antu adiñi nayikatu yashiyashana, wawundishili mankanda ahakaluñalwiji,  wadyishili makombakaji awantu namankendi antesha niinshi, nawa wasañwili afu. Kapostolu Petulu wamuteneni Yesu nindi “iyala etejeluwu kudi Nzambi nanyidimu yañovu, niyihayamisha, niyinjikijilu yeliliyi Nzambi nayena.”—Yililu 2:22.

Makonu, spiritu yajila hiyakoñaña yihayamisha yamuchidiwuku. Hela chochu, yinateli kutukoñela yuma yakuhayamisha. Yehova wenkaña akwakudifukula indi spiritu yindi yajila namuchima wumu, neyi chakaniniyi Yesu atumbanji twindi. (Luka 11:13) Dihafumini kapostolu Pawulu kuhosha nindi: “Natweshi kwila yuma yejima mudi Kristu wankoleshaña.” (Afwilipi 4:13) Komana spiritu yajila yinateli kukoña mwenimu muchihandilu chenu? Ilu lwihu akulwakula muchibaaba chinalondeluhu.

[Chikasha/Mwevulu wudi hefu 5]

Spiritu yajila chiyabulila kwikala muntu

Bayibolu yesekeja spiritu yajila namenji. Hampinji yakanineñayi antu jindi nkisu yakumbidi, Nzambi wahosheli nindi: “Nakechila meji hadi wudi nampwila, niheseki dawuma nakechilahu tuloña twameji. Nakechila [spiritu] yami hadi anyaneyi, ninkisu yami nakayichila hadi iwakavwala”—Isaya 44:3.

Nzambi chechilayi spiritu yindi hadi ambuñindi, ‘enzalaña naspiritu yajila.’ Yesu, Yowanu Mpapatishu, Petulu, Pawulu, Baranaba, niatumbanji ampompeli hefuku daPentekosta 33 C.E. ejima wawu ayitena nawu enzeli naspiritu yajila.—Luka 1:15; 4:1; Yililu 4:8; 9:17; 11:22, 24; 13:9.

Toñojokenu hachumichi: Komana muntu anateli ‘kumwichila’ hadi antu amavulu? Komana munateli kuhosha nenu izanvu dawantu dinateli ‘kwinzala’ namuntu wumu? Hichinateli kuzatikaku. Bayibolu yahosha nawu antu enzalaña namaana, kashinshi, hela kwiluka kwalala, ilaña kanda yishimuneñahu dehi nawu muntu nenzali namuntu mukwawu.—Kwidika 28:3; 1 Anyanta 7:14; Luka 2:40; Akolosi 1:9.

Izu dachiGreek dabalumunawu nawu “spiritu” hizu dapneuʹma, datalisha cheñi mukwila nawu ñovu yabulaña kumwekana. Kwesekeja naVine’s Expository Dictionary of New Testament Words, izu dapneuʹma “datalisha nankashi kumpepela . . . muuya; sweje-e, spiritu, kufwana neyi mpepela, hiyamwekanañaku, hichuma wanyi ilaña hiñovu.”

Mwalala, spiritu yajila himuntu wanyi. *

[Tumazu twaheshina]

[Mazu aKusakilila]

Photodisc/SuperStock