Lemeshenu Chifulu Chenu muChipompelu

‘Nzambi nashi mumujimba yidi yejima, hachidi hachidi, mwomwatiyililiyi kuwaha.’—1 AKORINDA 12:18.

1, 2. (a) Chumanyi chamwekeshaña nawu muntu wejima muchipompelu nateli kwikala nachifulu chatela kulemeshayi? (b) Malwihwinyi itukuhanjekahu munichi chibaaba?

 KUFUMA tuhu kumafuku akunyima muIsarela wakushankulu, chipompelu diyi njila mwaloñeshelañayi Yehova antu jindi yakudya yakuspiritu nikuyilombola. Chakutalilahu, chelili aIsarela anashindi dehi musumba waAyi, Yoshuwa ‘watañili mazu anshimbi ejima, nikukiswila nikushiña, mwejima mwasonekeluwu mumukanda wanshimbi. Kuchipompelu chejima chaIsarela.’—Yoshuwa 8:34, 35.

² Muyaaka nkulakaji yakusambila C.E., kapostolu Pawulu walejeli eluda mukwaKristu Timotewu nindi, chipompelu chawakwaKristu ‘dimwitala daNzambi’ nawa “chochishimi nihakolela nsañu yalala.” (1 Timotewu 3:15) Makonu ‘itala’ daNzambi, dinakwimenaku amana kwetu amukaayi kejima akwaKristu alala. Mukapetulu 12 kamukanda windi watachi wonenewa wasonekeleliyi Akorinda, Pawulu wafwanishili chipompelu namujimba wawuntu. Wahosheli nindi hela chakwila chidi chamujimba chejima chikweti nimudimu wachu, yidi yejima yalema. Pawulu wasonekeli nindi, “Nzambi nashi mumujimba yidi yejima, hachidi hachidi, mwomwatiyililiyi kuwaha.” Nawa wahosheli nindi “niyidi yitwatoñojokaña netu yabula kulema chalala, diyi twalemeshaña nankashi.” (1 Akorinda 12:18, 23) Dichi, kwosi chifulu chamukwakuloña mwitala daNzambi chabadika kuwaha hela kutama chamukwaKristu mukwawu washinshika. Yejima yekala yambuka. Hanu dinu, tunateli kwiluka ñahi chifulu chetu mukuloñesha kwaNzambi nikuchilemesha, hela kuchikwata namakasa ayedi? Indi chifulu chetu muchipompelu twatela kuchimona ñahi? Nawa ‘chitukuyilañaku hambidi chikumwekanaña ñahi kudi antu ejima’?—1 Timotewu 4:15.

Munjilanyi Mutwatela Kulemeshela Chifulu Chetu?

3. Njilanyi yimu yakwilukilamu chifulu chetu muchipompelu nikumwekesha netu twachilemesha?

³ Njila yimu yakwilukilamu chifulu chetu muchipompelu nikumwekesha netu twachilemesha yidi yakuzatila hamu chikupu ‘nanduñu wamaana nikashinshi’ niñimenu yindi, Izaza Dalombolaña. (Tañenu Matewu 24:45-47.) Twatela kushinshika chitwovwahilaña wunlomboli wutwatambwilaña kudi izanvu danduñu. Chakutalilahu, yaaka yejimiyi, twatambwilaña kufumba kwakutukonkomwena hanvwalilu kudiwahisha, yisela, nikuzatisha Intaneti munjila yatama. Komana twovwahilaña chikupu iku kufumba kwakuwahi kulonda kutukiñi kuspiritu? Indi hakukonkomwena kwakwikalaña nakudifukula kwachisaka mpinji yejima? Komana twalondelaña iku kufumba nawa twatondahu mpinji yamelela yakudifukulaña? Neyi tudi ajiki, komana twekalaña nampinji yakudiza Bayibolu halwetu? Yehova wukutukiswila hamuntu hamuntu niyisaka neyi tulondelaña wunlomboli wezanvu danduñu.

4. Yumanyi yitwatela kutoñojokahu neyi hitukufuukula hansañu jetu?

⁴ Amakwawu anateli kutoñojoka nawu muyuma yidi neyi yisela nvwalilu nikudiwahisha mukwaKristu wejima wetala kufuukulahu yomweni. Ilaña, mukwaKristu wadihana walemesha chifulu chindi muchipompelu, kufuukula kwindi hikwashindamenaña hayuma yakeñayuku. Twatela kusha maana chikupu hakwiluka chamonayi Yehova yuma neyi chamwekeshawu  Mwizu dindi, Bayibolu. Nsañu yamuBayibolu yatela yikali ‘inoñu dakunyendu yetu, nichejeji chamunjila yetu.’ (Masamu 119:105) Cheñi chikuwaha neyi tushinshika hayuma yitwafukulaña munsañu jetu chayimonañawu mumudimu wakushimwina nikudi antu amakwawu amuchipompelu niabula kwikala muchipompelu.—Tañenu 2 Akorinda 6:3, 4.

5. Muloñadi wutwatela kutondolwela spiritu yakudimena?

⁵ ‘Spiritu yakoñeshaña katataka mudi akwakujikwa’ yinatandi chikupu, yinekali neyi mpepela yitonaña. (Aefwesesa 2:2) Iyi spiritu yinateli kutuleñela kutoñojoka netu hitunakukeña wunlomboli wakufuma mukuloñesha kwaYehovaku. Mwalala hitunakukeña kufwana Diyotefwesi, wakanineña ‘kutambula chuma chidi chejima chakufuma kudi kapostolu Yowanu nakalemesha.’ (3 Yowanu 9, 10) Twatela kutondolwela kwikala naspiritu yakudimena. Bayi tuhosha hela twila chuma chidi chejima chikumwekesha kubula kwovwahila njila yakutiyañenamu yinakuzatishayi Yehova makonuku. (Kuchinda 16:1-3) Ilaña, twatela kulemesha kukooleka kwakuzatila hamu nezanvu danduñu. Nawa twatela kufwila kwovwahila anakulombola muchipompelu chetu.—Tañenu Aheberu 13:7, 17.

6. Muloñadi wutwatela kushinshika hanshakaminu yetu?

⁶ Njila yikwawu yakumwekesha nawu twalemesha chifulu chetu muchipompelu yidi yakushinshika chikupu nshakaminu yetu nikuzata nañovu kulonda ‘kulemesha mudimu wetu’ nikuleta mpuhu kudi Yehova. (Aroma 11:13) Amakwawu ekalaña apayiniya ampinji yejima. Amakwawu niwena akalakalaña munyidimu yadimena yampinji yejima yidi neyi wumishonali, ankoñi endaña, nimuchisaka chaBeteli mwahita kaayi kejima. Amana kwetu amavulu niahela azataña mumudimu wakutuña Matala aWanta. Antu jaYehova amavulu anakuzata hakumina ñovu jawu kulonda kukwasha yisaka yawu yitwalekuhu nakumukalakela Yehova nikushimwina mumudimu wamwiha mulungu nimulungu. (Tañenu Akolose 3:23, 24.) Tunateli kukuhwelela netu neyi tudihana chikupu mumudimu waNzambi nikudishaku chikupu kulonda kumukalakela nawumi wetu wejima, mpinji yejima tukwikala nachifulu chetu mukuloñesha kwindi.

Yuma Yakundama Kuchifulu Chetu Muchipompelu

7. Lumbululenu nshakaminu yetu chiyakundamaña kuchifulu chetu muchipompelu.

⁷ Chalema kushinshika hachihandilu chetu muloña, munjila yikwawu, chifulu chetu chamuchipompelu chashindamena hayuma yitunateli kwila hela yitukutwesha kuzata. Chakutalilahu, chifulu chikwetiyi mana kwetu muchipompelu chambukaña munjila jikwawu nachamuhela. Yaaka, kukola kwakumujimba, niyuma yikwawu niyena yakañeshaña kuzata mumudimu waYehova. Yishimu 20:29 yahosha nawu, “Kuwaha kwawanyikwenzi jojiñovu jawu; lubanji lwawatushinakaji jojinvu jawu.” Atwansi amuchipompelu anateli kuzata nyidimu yayivulu muloña achidi nañovu yawukwenzi, ilaña akulumpi akwashaña chikupu chipompelu muloña wamaana niyuma yamonawu. Cheñi twatela kwiluka netu yuma yidi yejima yitwatela kwila mukuloñesha kwaYehova yashindamena haluwi lwaNzambi.—Yililu 14:26; Aroma 12:6-8.

8. Indi mpwila yatukwashaña ñahi muyuma yitwelaña muchipompelu?

⁸ Chakutalilahu chawahela ayedi akansi namukulumpi  chinakumwekesha chuma chikwawu chakundamaña kuchifulu chetu muchipompelu. Wonsu wawu amanishili shikola. Adiña nachihandilu chochimu. Anvwali jawu azatili nañovu kulonda kuyikolesha wejima wawu awanishi yuma yakeñekaña hakuzata mudimu wawupayiniya wampinji yejima hanyima yakumanisha shikola. Chamanishiluwu shikola, wumu watachikili mudimu wawupayiniya, ilaña mukwawu watachikili kuzata mudimu wakumujimba. Chumanyi chaleñeleli kwambuka? Himpwila. Chafuminumu, wejima wawu elili chuma chakeñeleñawu. Komana chumichi dichatumwekenaña wejima wetuku? Twatela tutoñojokeña chikupu hayuma yitunakukeña kwila mumudimu waNzambi. Komana kwila tusweja kukalakala mumudimu waNzambi nehi, hela neyi hakwila mwenimu chinakukeñaka kuhimpa chihandilu chetu?—2 Akorinda 9:7.

9, 10. Twatela kwila ñahi neyi kwosi chuma chakutusañumuna kulonda kukalakala chikupu mumudimu waYehova?

⁹ Indi neyi kwosi chuma chakutukolesha hakwila nawu tuzateña chikupu mumudimu waYehova nawa tunakoleli hohu hakuzata kwesekeja nachakeñekaña muchipompelu? Mumukanda wayisonekeleliyi Afwilipi, Pawulu wahosheli nindi: “Nzambi diyi wakoñaña mudenu nimuchima wakukeña kwila, nikwila kwakweni, mwakutiyayi yena kuwaha.” Eñañi, Yehova nateli kukoña mudetu nakutusañumuna kukeña kwila, hela kwikala nampwila.—Afwilipi 2:13; 4:13.

¹⁰ Komana kwila tumulomba Yehova kulonda yatukwashi kwila mwaya kukeña kwindi nehi? Mwanta Davidi wamuIsarela wakushankulu walombeli. Walombeli nindi: “Ñilukishi muwendelaña, eyi Yehova; nleji njila jeyi. Nlomboli mwaya nsañu yeyi yalala, nleji; muloña eyi yeyi Nzambi yawamwinu wami; yeyi nachiñejaña mwaana wonsu.” (Masamu 25:4, 5) Anetu nawa twatela kwila mwomumu kuhitila mukulomba netu Yehova yatukwashi kulonda kukeña kwila yuma yamuzañaleshaña. Neyi tutoñojoka chikupu chatiyañayi Yehova Nzambi niMwanindi hanyidimu yitwayikalakelaña, twayihamekaña chikupu. (Matewu 26:6-10; Luka 21:1-4) Iku kuyihameka kunateli kutuleñela kumulembelela Yehova kulonda yatukwashi kukalakala chikupu mumudimu windi. Kaprofwetu Isaya watwimikila chakutalilahu chayililu yitwatela kwikala nayu. Chatiyili izu daYehova nindi: “Nukutemeshanyi? Wukutuyila hinyi?” kaprofwetu wakwili nindi: “Ami nami, Yamonu, ntemeshami.”—Isaya 6:8.

Munjilanyi Mutwatela Kuyilaku Hambidi?

11. (a) Kukankilanyi kudiku kunakukeñeka amana kwetu kushikahu hanyidimu yamukuloñesha? (b) Indi mana kwetu nateli kushikahu ñahi hakukalakala nyidimu muchipompelu?

¹¹ Amana kwetu atela kulombola anakukeñeka chikupu, muloña muchaaka chamudimu cha 2008 antu 289,678 ayipapatishili mukaayi kejima. Indi mana kwetu watela kwiladi hakutiya  iku kukankila? Watela kufwila kushikahu, kuhitila mukufwila kuwanisha yuma yakeñekaña yashimunawu muNsona yawanishañawu ankoñi akuzatila niaeluda. (1 Timotewu 3:1-10, 12, 13; Titusa 1:5-9) Indi mana kwetu nateli kufwila ñahi kuwanisha yuma yashimunawu muNsona? Kuhitila mukudikita chikupu mumudimu wakushimwina, kukalakala chikupu nyidimu yamuchipompelu, kuzata nañovu kulonda kwakulañahu chachiwahi hakupompa kwawakwaKristu, nikuhitila mukwakamena akwawu akakwitiya. Dikwila nawu wamwekeshaña nindi walemesha chikupu chifulu chindi muchipompelu.

12. Indi atwansi anateli kumwekesha ñahi muzañalu wakukeña chalala?

¹² Chumanyi chatela kwilawu amana kwetu atwansi, sweje-e adi nayaaka 13 nakushika ku 19, kulonda kukalakala chikupu nyidimu yamuchipompelu? Atela kuzata nañovu kulonda kusweja kwikala ‘namaana akuspiritu nikashinshi;’ kuhitila mukudiza Nsona. (Akolosi 1:9) Kudiza chikupu Izu daNzambi nikudikita chikupu munyidimu yakupompa kwachipompelu yikutuleñela kwikala namaana nikashinshi. Cheñi atwansi anateli kushikahu hakukalakala kuhitila mukwiñila ‘muchenzelu chanyidimu cheneni’ mumbadi jamboka-mboka jamudimu wampinji yejima. (1 Akorinda 16:9) Mwalala kufwila kukalakala mudimu waYehova dichihandilu chachiwahi nawa mwafumaña nkisu jajivulu.—Tañenu Mukwakutaŋisha 12:1.

13, 14. Munjilanyi ahela mwatela kumwekeshelawu nawu alemesha chifulu chawu muchipompelu?

¹³ Ahela niwena anateli kumwekesha nawu alemesha chikupu mudimu wawu washimunawu haMasamu 68:11. Twatañañahu nawu: “Mwanta [Yehova] wahanaña izu: niambanda ashimunaña nsañu hinjita yayeni.” Njila yayeni mwatela kumwekeshelawu ahela nawu alemesha chifulu chawu muchipompelu yidi yakudikita chikupu mumudimu wakwilisha atumbanji. (Matewu 28:19, 20) Dichi, kuhitila mukuzata chikupu mumudimu wakushimwina nikudihana mukudikeñela muniwu mudimu, ahela amwekeshaña nawu alemesha chikupu chifulu chawu muchipompelu.

¹⁴ Hakumusonekela Titusa, Pawulu wahosheli nindi: “Akulumpi awambanda niwena chiña endi mwendelañawu akwakujila; . . . ekali akwakuleja akwawu yuma yayiwahi, afumbi ansanda kukeña anfumu jawu nikukeña anyanawu; ekali awundisha mumesu, akadi kubajama, akwakukalakala kumatalawu, akwaluwi, akwakwovwahila anfumu jawu aweni, kulonda mazu aNzambi abuli kutukewa.” (Titusa 2:3-5) Ahela apama anateli kukwasha chikupu chipompelu. Kuhitila mukulemesha amana kwetu alombolaña nikufuukula chachiwahi muyuma yamuchihandilu yidi neyi nvwalilu nikudiwahisha niyisela, emikilaña amakwawu chakutalilahu chachiwahi nikulemesha chikupu chifulu chawu muchipompelu.

15. Chumanyi chatela kwilawu ahela ajiki kulonda kumanisha wuudi?

¹⁵ Mpinji yikwawu, muhela wabula kusumbuka chinateli kumukalila kwiluka chifulu chindi muchipompelu. Muhela wamweni kukala kweniku wahosheli nindi: “Chihandilu chawujiki kakavulu chaletaña wuudi.” Chamwihwiluwu kulonda kushimuna chomikañayi, wahosheli nindi: “Kulomba nikudiza kwankwashaña kwiluka chifulu chami. Nadizaña hansañu  yanleñelaña niluki chamonañayi Yehova. Kuhiñahu nafwilaña kukwasha amakwawu muchipompelu. Ichi chankwashaña kutoñojokaña hadi antu amakwawu chatela nitoñojokeña hohu hadi amaweni.” Kwesekeja namukanda waMasamu 32:8, Yehova wamulejeli Davidi nindi: “Nukukulombola nadisu dami.” Eñañi, Yehova wakamenaña ambuñindi ejima, kushilahu niahela ajiki, nawa wukuyikwashaña ejima kwiluka chifulu chawu muchipompelu.

Hembenu Chifulu Chenu

16, 17. (a) Muloñadi kufuukula kwetu kwakwiteja mutambi waYehova wakwikala mukuloñesha kwindi chikwabadikila kuwaha? (b) Tunateli kuhemba ñahi chifulu chetu mukuloñesha kwaYehova?

¹⁶ Yehova nakokoli ambuñindi ejima kulonda kukwata wubwambu nayena. Yesu wahosheli nindi: “Kwosi muntu natweshi kwinza kudami chakadi kumukoka kudi Tata wantemesheluku.” (Yowanu 6:44) Hakachi kayihita yawantu ejima hamaseki, Yehova natukokoli kulonda kwikala mukuloñesha kwindi makonu. Kwiteja iwu mutambi dichuma chachiwahi chitwafuukwili. Chinaleñeli chihandilu chetu kwikala chachiwahi. Nawa wenowu muzañalu wutukweti hakwiluka netu tukweti chifulu muchipompelu!

¹⁷ Ñimbi yamasamu wahosheli nindi: “Eyi Yehova, ami nakeñi kushakama kwitala deyi.” Wembili cheñi nindi: “Mwendu wami wunashimati heseki hesekana; muyipompelu nukumukiswila Yehova nkisu.” (Masamu 26:8, 12) Nzambi walala watwinka wonsu wetu chifulu mukuloñesha kwindi. Kuhitila mukutwalekahu kulondela wunlomboli wateokalatiki nikudikita chikupu mumudimu waNzambi, tunateli kuhemba chifulu chetu chalema mukuloñesha kwaYehova.

Munakwanuka?

• Muloñadi chitunateli kuhosha netu akwaKristu ejima akweti chifulu muchipompelu?

• Twamwekeshaña ñahi netu twalemesha chifulu chetu muchipompelu?

• Yumanyi yinateli kukundama kuchifulu chetu muchipompelu?

• Indi akwaKristu atwansi niakulumpi anateli kumwekesha ñahi nawu alemesha chifulu chawu mukuloñesha kwaNzambi?

[Malwihu aKuzatisha haKudiza]

[Nyevulu yidi hefu 21]

Indi amana kwetu anateli kushikahu ñahi hakukalakala nyidimu muchipompelu?

[Mwevulu wudi hefu 22]

Ahela anateli kumwekesha ñahi nawu alemesha chifulu chawu muchipompelu?