Muloñadi Antu Chaluwankenañawu—Kutalisha Hadi Spiritu Yajila?

INDI spiritu yajila hichumanyi? Ilu lwihu lunakutiyakana neyi lwapela chikupu, ilaña kuwana ñakwilu yapela chinateli kukala chikupu. Pope Benedict XVI [16] walejeli antu amuAustralia nindi: “Chakala chikupu kwiluka chalumbuluka Spiritu.”

Hela chochu, antu aakulaña munjila yashiyashana nawa yaluwa kutalisha halwihu lwakwila nawu, Indi spiritu yajila hichumanyi? Iyi diyi ñakwilu yavula kwakulawu antu nawu:

• Spiritu yajila himuntu yomweni wekala mudi atumbanji twaKristu.

• Spiritu yajila hinshimbi yaNzambi yazatikaña.

• Spiritu yajila hiñovu yaNzambi yazatikaña mukaayi.

• Spiritu yajila himuntu wamuchisatu hadi anzambi asatu.

Muloñadi antu chaluwankenañawu? Antu achidi aluwankana kutachika tuhu muyaaka nkulakaji yamuchiwana  C.E. hampinji yahosheluwu antu amakwawu adizaña hachekala Nzambi nawu spiritu yajila yadiña muntu wadifwanaku naNzambi. Hela chochu, yitoñojoka yeniyi hiyamuNsonaku, nawa hiyayitañishileña kudi atumbanji twaKristu akusambilaku. The New Catholic Encyclopedia yahosha nawu: “Nyikanda yaChitiyañenu Chachikulu yakaana hatooka nawu spiritu yaNzambi himuntuku . . . Spiritu yaNzambi hiñovu yaNzambi.” Cheñi yahosha nawu: “Nyikanda yayivulu yaChitiyañenu Chachiha yamwekeshaña nawu spiritu yaNzambi hichuma, bayi neyi himuntuku; sweje-e, chumichi chamwekenaña hakudifwana kwekala hakachi kaspiritu nañovu jaNzambi.”

Chakadi nikujina, antu chayikalilaña kutoñojoka nawu ñovu yekala muntu. Dichi, kwesekeja nakusandujola kwadiña muUnited States kwamwekesheli nawu antu amavulu akaanaña yitoñojoka yakwila nawu spiritu yajila himuntu hela ‘hichuma choonaña.’ Komana, ahoshaña mwalala? Komana, twatela kwiteja mwahoshañawu antu adizaña hadi Nzambi nawu “spiritu yajila himuntu wambukaku kudi Tata niMwana”?

Hakwiluka ñakwilu yalala, twatela kutaña Izu daNzambi, Bayibolu, dashimuna chikupu chekala spiritu yajila. Kapostolu Pawulu wasonekeli nindi: “Nyikanda yajila yejima ayonena dehi kudi Nzambi; yawaha kuleja nachu, nikutanyisha nachu, nikwolola nachu, nikufumba nachu mwaloña.”—2 Timotewu 3:16.

Muloñadi chimwatela kwilukila walala hadi spiritu yajila? Muloña kwiluka chekala spiritu yajila chikuyileñela kuyikwasha kudi Nzambi. Komana mpinji jikwawu mwatiyaña neyi himunateli kuumika halwenuku? Yesu wakanini atumbanji twindi nindi: ‘lombenu akuyinka . . . Neyi enu . . . muneluki kwinka anyanenu yamukunkulu yayiwahi, Tata yenu wamwiwulu wukubadika kuyinka awa akumulomba spiritu yajila.’—Luka 11:9, 13.

Nsona jikutuleja chekala spiritu yajila muyibaaba yinahiñuhu. Nawa tukwiluka chiyinateli kutukwasha muchihandilu chetu.

[Mazu ekoku adi hefu 3]

Nsona jatulejaña chekala spiritu yajila