Spiritu Yajila—Hiñovu Yakeñekaña muChihandilu Chenu

‘BAYI wuñumbila kwakulehi nanoku kuwekalaku; bayi wuntambula spiritu yeyi yajilaku.’ (Masamu 51:11) Iku dikulomba kwalombeliyi Mwanta Davidi hanyima yakwila navulumuni chikupu.

Kakavulu, spiritu yajila yamukwashileña Davidi. Hampinji yadiñayi muyaaka yawukampululu, spiritu yajila yamukwashili kushindi Goliyati, ishidika watiyishileña woma. (1 Samweli 17:45-50) Spiritu yajila yamukwashili kusoneka masamu amakwawu amavulu amawahi. Davidi walumbulwili nindi: ‘Spiritu yaYehova yahosheleli mudami, izu dindi dadiñi kwidimi dami.’—2 Samweli 23:2.

Yesu Kristu yomweni, wetejeli mudimu wazatileña spiritu yajila muchihandilu chaDavidi. Hampinji yimu, Yesu walejeli antiyilili indi nindi: “Yomweni Davidi welili mudi spiritu yajila nindi, Yehova wamwilili Mwanta wami nindi, Shakamaku kuchikasa chami chachidiilu, nichinamba kayila ayilumbu jeyi hiyadi itanda dakunyendu yeyi.” (Maku 12:36; Masamu 110:1) Yesu welukili nindi hampinji yasonekeleñayi Davidi masamu indi, amulombweleña kudi spiritu yajila. Komana spiritu yeniyi yekala kwoku kulonda kutukwashaña?

‘Lombenuña Akuyinka’

Himwamba kasonekahu isamuku. Hela chochu, munateli kumona kukala kunateli kuyitiyisha woma neyi Goliyati. Chakutalilahu, shinshikenu hadi Isabel. * Mfumwindi  wamuhayikili nakuya kudi kansi wamumbanda. Wamushili namukudi weneni chikupu, nawa hamukwashileña kulonda kwakamena anyanawu ayedi awambandaku. Wahosheli nindi: “Natiyili neyi anamfukejeli nawa neyi nidi wamukunkulwayi. Hela chochu, chineli wanshiyili, neluki nami spiritu yajila yaNzambi yinankoleshi.”

Komana Isabel wakuhweleleli kutambwila spiritu yajila chakadi kuzata nañovu? Inehi, wamulombeleña Nzambi mafuku ejima kulonda kumwinka spiritu yindi. Welukili nindi wakeñeleña spiritu yaNzambi kulonda yimukwasha kutwalekahu kuumika, kulonda kwakamena anyanindi chiwahi, nikwikala cheñi nayililu yayiwahi. Wazatishili mazu aYesu akwila nawu: “Lombenu akuyinka; keñakeñenu mukuwana; dondomwenenu akuyenzulwila.”—Matewu 7:7.

Roberto niyena welukili nindi wakeñeleña spiritu yaNzambi, ilaña muyuma yambukaku. Wadiña wateñuka namakanya niyitumbu yashetana yatenañawu nawu hashish, yanwineñayi mpinji yejima. Wesekeli kuleka makanya hadi yaaka yiyedi ilaña wafuntileña muchaaku chindi mapampa kakavulu. Roberto walumbulwili nindi: “Neyi wuleka kunwa yitumbu yashetana wukwakamaña chikupu. Wukukeñaña chikupu kunwa makanya mafuku ejima.”

Roberto watwalekeluhu nindi: “Nafwilileña kuhimpa chihandilu chami kulonda kumukalakela Nzambi namuchima wumu. Nesekeli kutoñojokaña hayuma yayiwahi yamuBayibolu. Nalombeleña kudi Nzambi mafuku ejima kulonda yanyinki ñovu, nikuleka yililu yatama. Muloña nelukili nami hinateli kuleka kunwa makanya kankawamuku. Dichi namweni Yehova chakwiliyi kulomba kwami, sweje-e hampinji yinatiyileña kumuchima kutama hanyima yakufunta muchaaku chochimu. Nakuhweleli nami spiritu yajila yaNzambi diyi yanyinkeli ñovu, chakadi spiritu yindi hinadi kuleka chaaku chakunwa makanyaku.”—Afwilipi 4:6-8.

Kujindama Hewulu ‘Nampuula Neyi Ambuulu’

Kufwana Isabel naRoberto, aYinsahu jaYehova amavulu ayikwashaña kudi spiritu yajila muchihandilu chawu. Ñovu jaYehova jazatikaña, ñovu jakuleña kwejima, munateli kwikala naju neyi munakeñi. Nzambi wakeñeshaña kuyinka spiritu yindi neyi mumulomba namuchima wumu. Ilaña hakutambula spiritu yeniyi, mwatela kudiza chalala hadi yena nikufwila kwila mwakeñañayi.—Isaya 55:6; Aheberu 11:6.

Neyi munatambwili ñovu yaspiritu yajila, munateli kwikala nañovu jakumukalakela Nzambi chikupu nikushinda kukala kudi kwejima kumunateli kumona muchihandilu chenu. Bayibolu yatukana nawu: “[Yehova] wamwinkaña muntu wazeya wuswa, wabula ñovu wamuvulishilaña ñovu. . . . Achiñililaña Yehova, ñovu jawu jakabalumuka jajiha; akajindama nampuula hewulu jinda-a neyi ambuulu: akenda lufuchi chakubula kuyihwa, akenda chakubula kuzeya.”—Isaya 40:28-31.

[Tumazu twaheshina]

[Mazu ekoku adi hefu 8]

‘Nalombeleña kudi Nzambi mafuku ejima kulonda yanyinki ñovu, nikuleka yililu yatama. Muloña nelukili nami hinateli kuleka kunwa makanya kankawamuku. Dichi namweni Yehova chakwiliyi kulomba kwami’

 [Chikasha/Nyevulu yidi hefu 7]

SPIRITU YAJILA YAZATIKILI

Nzambi wazatishili spiritu yajila hakuleña iseki niyuma yejima. Ñimbi yamasamu wahosheli nindi: “Eyi Yehova, o nyidimu yeyi o kuvula! Wunayili yejima namaana; iseki dinenzali to-o namaheteyi.” “Hiwukutemesha spiritu yeyi, hiyakuleñewa.”—Masamu 104:24, 30; Kutachika 1:2; Yoba 33:4.

Hakusoneka Bayibolu amayala amwakamineña Nzambi ayoneneni naspiritu yajila. Kapostolu Pawulu wasonekeli nindi: ‘Nyikanda yajila yejima ayonena dehi kudi Nzambi nawa yayiwahi.’ (2 Timotewu 3:16) Muuya waYehova, hela spiritu, yalombweleña yitoñojoka yawansoneki aBayibolu, hakwila nawu asoneki “izu daNzambi.” —1 Atesalonika 2:13.

Spiritu yajila yakwashili ambuña aNzambi kushimunañahu dehi mpinji yakumbidi nakashinshi. Kapostolu Petulu washimwini nindi: “Kwosi wuprofwetu wahamukanda wajila wukweti kuwulumbulula kwakanka wawuku. Muloña kwosi wuprofwetu wenzahu dehi chakufuma kumuchima wamuntuku; ilaña antu ahosheli chakufuma kudi Nzambi, chakuyihoshesha kudi [spiritu yajila.]”—2 Petulu 1:20, 21; Yoweli 2:28.

Spiritu yajila yakwashili Yesu niamayala achikuhwelelu kushimwina nsañu yayiwahi yaWanta waNzambi nikwila yihayamisha. Yesu wahosheli nindi: “Spiritu yaYehova [yidi] hadami, muloña wanwayisha dehi manji nishimwini atuzweñi nsañu yayiwahi; nantemeshi kulonda nibidiki ankoli nsañu yakuyisubula, niamputamesu atoni.”—Luka 4:18; Matewu 12:28.

 [Chikasha/Nyevulu yidi hefu 9]

NJILA MWATELA KUTUKWASHILA SPIRITU YAJILA

Spiritu yajila yinateli kutukwasha kushinda kweseka nikumanisha yililu yatama. Kapostolu Pawulu wahosheli nindi: “Nzambi washinshika, hakwiteja kuyeseka chabadika muñovu jenuku; chakuyesekawu wukubuzilaku njila yakupulukila, kulonda mutweshi kukakela.”—1 Akorinda 10:13.

Spiritu yajila yinateli kuyileñela kwikala nayililu yamuzañaleshaña Nzambi. ‘Mukabu waspiritu yowu kukeña, muzañalu, kuwunda, kukaba kabe-e, luwi, kuwaha, kushinshika, kwovwaha, kudihemba.’—Aŋalija 5:22, 23.

Spiritu yajila yinateli kuyikolesha kulonda kuumika kweseka. “Natweshi kwila yuma yejima mudi Kristu wankoleshaña.” —Afwilipi 4:13.