Twalekenuhu Kusweja Kukeña Amana Kwenu

‘Endenu nakukeña neyi chatukeñeliyi Kristu.’—AEFWESESA 5:2.

1. Chililwinyi chalema chashimwiniyi Yesu nindi dichakuyilukilaku atumbanji twindi?

 KSHIMWINA nsañu yayiwahi yaWanta waNzambi kwitala nikwitala dikwayilukilañawu aYinsahu jaYehova. Hela chochu, Kristu Yesu washimwini chinjikijilu chacheni chawuKristu chakuyilukilaku atumbanji twindi alala. Wahosheli nindi: “Tiyenu, nukuyileja lushimbi lwalwiha nami, Mukeñañani. Chinayikeñami, ninenu nawa keñañanenu. Neyi mukukeñañana, dihu hakayilukilawu antu ejima nawu mudi atumbanji twami.”—Yowanu 13:34, 35.

2, 3. Indi kukeñañana nawana kwetu kwakwashaña ñahi antu enzaña kukupompa kwetu kwawakwaKristu?

² Kwosi wamwekeshaña kukeña neyi kwamwekeshañawu akwaKristu alala kudi amana kwawu. Kufwana magineti yakokaña chikuñu, kukeña nikwena kwanuñañeshaña ambuña aYehova hamu nawa kwakokolaña antu anyichima yayiwahi kukudifukula kwalala. Talenu chakutalilahu chaMarcelino, iyala wakwituña daCameroon wekalili mputamesu kumudimu. Hanyima yanawa maposu, kwatiyakeni mbonji nawu wapuutili mesu muloña wadiña muloji. Chatela yamukundeji, mukulumpi wachaachi kwayileñayi niantu amakwawu amuchaachi amuhañili muchipompelu. Chamulejeluwu kudi chiNsahu chaYehova nawu yakenzi nakupompa, Marcelino wajinokeli. Hakeñeleña nindi akamukaani cheñi neyi chamukaaninuwuku.

³ Ilaña Marcelino wahayamini hakumona  chamutambwililuwu Hetala daWanta. Amutambwilili chachiwahi, nawa nsañu yamuBayibolu yatiyiliyi yamukundejeli chikupu. Watachikili kuya kukupompa kwejima kwachipompelu, wayililuku hambidi mukudiza kwindi kwaBayibolu, nawa amupapatishili mu 2006. Ichi washimwinaña chalala kudi antaña jindi nikudi antuñi nindi nawa wudi nawatudizi aBayibolu amavulu. Marcelino wakeñaña nindi antu anakudizayinawu Bayibolu ayikeñeña neyi chamukeñeluwu kudi antu jaNzambi.

4. Muloñadi wutwatela kutiyilila kufumba kwaPawulu ‘kwakwenda nakukeña’?

⁴ Iku kukeña kwakokolaña, twatela kuzata nañovu kulonda tukumwekesheña. Toñojokenu hakesi kanakubutuka muchota nampinji yawufuku, iyena dakesi kanakubutuka, dakokolaña antu kuswila kwakwihi nakesi. Hakwila nawu kabuli kujima, anakoota chiña atwalekahu nakushahu nsonsu. Chochimu, mpanda yayiwahi yakukeña muchipompelu yinateli kuzeya neyi akwaKristu muchipompelu akañanya kutwalekahu nakuyikolesha. Tunateli kwila ñahi mwenimu? Kapostolu Pawulu wakwili nindi: “Endenu nakukeña neyi chatukeñeliyi Kristu, hakudihana hansañu jetu ekali mulambu, nichimuna chakuketwila Nzambi, kulonda ekali ivumba dadiwahi.” (Efwesesa 5:2) Lwihu lutukuhanjekahu lunakwila nawu, Munjilanyi mutunateli kwenda mukukeña?

‘Ninenu Nawa Swejenu Kukeñañana’

5, 6. Muloñadi Pawulu chalejeleliyi akwaKristu amuKorinda ‘kusweja kukeñañana’?

⁵ Kapostolu Pawulu wasonekeleli akwaKristu muKorinda wakushankulu nindi: “Enu akwetu aKorinda, hitukuyijinda chumaku, muchima wetu wunasweji kuyikeña. Himunakañenyi mudetuku, munakañenyi mukukeña kwenwenu aweni. Ninenu nawa swejeshenumu; nahoshi neyi chakuhosha nawanyana.” (2 Akorinda. 6:11-13) Muloñadi Pawulu chayilejeleliyi Akorinda kusweja kukeñañana?

⁶ Shinshikenu chatachikili chipompelu chamuKorinda wakushankulu. Pawulu wayili kuKorinda kukumana kwachaaka cha 50 C.E. Hela chakwila hakutachika mudimu windi wakushimwina kwadiña antu amudimbulwileña, iwu kapostolu halekeluku. Mumpinji yantesha, antu amavulu muwuna musumba akuhweleleli nsañu yayiwahi. Hadi “mwaka wumu natukweji tutanu nakamu,” Pawulu wadiheni yomweni nakutañisha nikukolesha chipompelu chachiha. Mwalala, waswejeli kuyikeña akwaKristu amuKorinda. (Yililu 18:5, 6, 9-11) Dichaleñeleli niwena kumukeña nikumulemesha. Hela chochu, amakwawu muchipompelu alekeli kumulondela. Hadaha amakwawu atiyileña kutama chayifumbileñayi chakadi kuhita mumbadi. ( Akorinda 5: 1-5; 6:1-10) Amakwawu atela atiyilileña kumatuñu ‘awapostolu asweja kulema.’ (2 Akorinda 11:5, 6) Pawulu wakeñeleña amana kwindi ejima niahela amukeñi. Dichi wayilembeleli ‘kusweja kukeñañana’ kuhitila mukukundama kudi yena nikudi akwawu akakwitiya.

7. Munjilanyi mutunateli ‘kusweja’ kumwekesha kukeña amana kwetu?

⁷ Indi etu? Tunateli ‘kusweja kukeñañana’ ñahi hakumwekesha kukeña amana kwetu? Antu ayaaka yoyimu hela achisemwa chimu chayipelelaña kudikeña wumu namukwawu. Niantu  akeña yuma yoyimu yakuhema kakavulu ekalaña hamu. Ilaña neyi yuma yitwakeña nawakwaKristu antesha yituleñela kwambuka nawamakwawu, twatela ‘kusweja kukeñañana.’ Chikuwaha neyi tudihula netu: Komana nashimwinaña kazoku kazoku mumudimu wakushimwina indi kwiji hinavulaña kuhema nawamana kwetu niahela abula kwikala mwizanvu mutwahemenaku? Komana Hetala daWanta, hinavulaña kudikunda nawantu amahaku, muloña natoñojokaña nami twakadiluka neyi munahiti dehi mpinji? Komana nemushaña akulumpi niatwansi muchipompelu?’

8, 9. Indi kufumba kwaPawulu kwasonekawu haAroma 15:7 kunateli kutukwasha ñahi kudimushaña wumu namukwawu munjila yinateli kutuleñela kuswejesha kukeñaña?

⁸ Hansañu yakudimushaña wumu namukwawu, mazu aPawulu asonekeleliyi Aroma anateli kutukwasha kwikala nayitoñojoka yayiwahi hadi akwetu akakudifukula. (Tañenu Aroma 15:7.) Izu dachiGreek dazatishawu nawu “ditambulenu” dabalumuna “kutambwila chachiwahi hela nachisambu, kweteja munza kwafumayi muntu nikukwata wubwambu.” Kunyaka neyi muntu wachisambu yatambwila amabwambu mwitala dindi, wayilejeleña nindi natiyi kuwaha chikupu hakuyimona. Muchifwikija Kristu watutambwila muchipompelu chawakwaKristu, nawa atukonkomwena kumwimbujola hakutambwila akwetu akwakudifukula.

⁹ Hampinji yitunakwimusha amana kwetu Hetala daWanta nikumaluña amakwawu, twatela kusha maana kudi antu itunabuli kumona hela kuhanjeka nawu chakatataka. Komana kwila muhanjeka nawu hadi mpinji yantesha nehi? Hakupompa kukahiñahu, tunateli kwila mwomumu kudi antu amakwawu. Mumpinji yantesha, tukadiluñisha kuhanjeka kwakuwahi nawamana kwetu niahela amavulu. Bayi tutiya kukala neyi tukañanya kuhanjeka nawantu ejima mwifuku dimuku. Kwosi watela kuhila neyi tukañanyaña kumwimusha hakupompa kudi kwejima.

10. Kukoolekanyi kweneni kutukweti wejima wetu muchipompelu, nawa tunateli kukwizatisha ñahi?

¹⁰ Kwimushaña amakwawu diyi njila yatachi yakuyitambwila. Hinjila yinateli kutuleñela kuhanjekaña chachiwahi nikudiluka chikupu. Chakutalilahu, Neyi antu anenzi kukupompa kwankambi nikwanyanya adilumbulula kudi akwawu nawa atachika kuhanjeka, afwilaña nawu akadimoni cheñi. Akwakudihana mukutuña Matala aWanta niazataña mumudimu wakuhana yakudya kudi anakankili, adikwataña wubwambu chikupu muloña elukaña yililu yawu yayiwahi kuhitila muyakuhumañana yadilejañawu. Mukuloñesha kwaYehova mudi kukooleka kweneni kwakukwata wubwambu wahaya nyaka. Neyi ‘tusweja kukeñañana,’ tukwikala nawamabwambu amavulu, nawa tukusweja kwikala nakukeña kwatunuñaña mukudifukula kwalala.

Ikalenu Akasunuka naWantu

11. Neyi chinamwekeshuwu haMaku 10:13-16, chakutalilahwinyi chemikiliyi Yesu?

¹¹ AkwaKristu ejima atela kufwila kwikala akasunuka, neyi chadiñayi Yesu. Shinshikenu cheliliyi Yesu hampinji atumbanji twindi hiyakeñeleña kukanisha anvwali kuleta anyana kudi yena. Wahosheli nindi, “Itejenu anyana anyanya kwinza kudami, bayi muyilekeshaku, muloña wanta waNzambi wawena adi chochichi.” Kuhiñahu “Hakuyakata mumakasindi, hakuyikiswila nkisu, hakuyinañika.” (Maku 10:13-16) Toñojokenu chazañaleluwu anyana hakuyakamena kudi Ntañishi Muneni.

12. Yumanyi yinateli kutuleñela kubula kuhanjekaña nawantu amakwawu?

¹² MukwaKristu wejima watela kudihula nindi, Komana nekalaña wakasunuka nawantu, ntahindi namwekanaña neyi hinekala nampinjiku?’ Yaaku yayiwahi mpinji yikwawu yinateli kutukañesha kuhanjeka nawakwetu. Chakutalilahu neyi twavulaña kuzatisha selufoni hela kusha twakutiyilaku mumatu kunsañu yitwakwatila hachisanji, iku tudi nawakwetu, anateli kutoñojoka nawu tunayidiwuli. Neyi kakavulu antu atumonaña tunakushinshika hohu hakopyuta yamuchikasa, anateli kutoñojoka nawu hitunakukeña kuhosha nawuku. Hela tuhu, kwekala “mpinji yakumwena.” Ilaña neyi  tudi nawantu, kakavulu diyi ‘mpinji yakuhosha.’ (Mukwakutaŋisha 3:7) Amakwawu anateli kuhosha nawu, “Nakeñaña kwikala hohu nkawami” hela nawu “Hinakeñaña kuhosha-hosha nabudiduku.” Hela chochu, kuhanjeka nawakwenu hela hitwenjililaku, kwamwekeshaña nawu tukweti kukeña ‘kwabulaña kukokwela kwetu hohu.’—1 Akorinda 13:5.

13. Indi Pawulu wamukolesheli Timotewu kumonaña ñahi ana kwindi niahela akwaKristu?

¹³ Pawulu wakolesheli Timotewu hadiñayi kansi kulemesha antu ejima muchipompelu. (Tañenu 1 Timotewu 5:1, 2.) Ninetu twatela kulemesha akulumpi akwaKristu neyi hiyamama jetu niatata jetu niatwansi neyi hiyanyikijetu, neyi anyana itwasemukanawu ivumu dimu. Neyi twikala nayililu yamuchidiwu, kwosi amana kwetu niahela akutoñokaña nawu twakasika, ilaña akudikunda nanetu chikupu.

14. Yumanyi yitwahetelañamu neyi tuhanjekaña chachiwahi nawantu amakwawu?

¹⁴ Chitukuhanjekaña chachiwahi nawakwetu, tukuyileñelaña kwikala akola kuspiritu nimuyitoñojoka. Mana kwetu wazatilaña hamutayi wanukaña chikupu akulumpi amavulu ahaBeteli avulileña kuhanjeka nindi hampinji yashikiliyi haBeteli. Mazwawu akumukolesha amuleñeleli kutoñojoka nindi amukeñeli chikupu kudi chisaka chaBeteli. Ichi wesekaña chikupu kuyimbujola kuhitila mukuhanjeka nawakwawu akaBeteli.

Kudizoza Kwatuleñelaña Kuleta Kuwunda

15. Chumanyi chamwekeshaña nawu kubula kutiyañana kunateli kumwekana hakachi ketu?

¹⁵ Ahela ayedi akwaKristu mumusumba waFwilipi wakushankulu, Eyodiya niSintiki, hadaha chayikalilili kumanisha kukala kwadiña hakachi kawu. (Afwilipi 4:2, 3) Ntadi yayeni yavulumukili hakachi kaPawulu naBaranaba ayilukili kudi antu amavulu nawa yayileñeleli kwambokelamu hadi kapinji kantesha. (Yililu 15:37-39) Iyi nsañu yamwekeshaña nawu mpinji yikwawu akakudifukula alala hiyanateli kutiyañanaku. Yehova watuloñeshelaña wukwashu watuleñelaña kumanisha kukala nikufuntisha wubwambu wetu. Ilaña kudi chuma chakeñañayi nindi twili.

16, 17. (a) Indi kudizoza kwalema ñahi hakumanisha kubula kutiyañana? (b) Indi nsañu yahoshaña hanjila yazatishiliyi Yakoba hakudibulakana naEsawu yamwekeshaña ñahi kulema kwakudizoza?

¹⁶ Fwikijenu nenu munakukeña kuya halwendu nebwambu denu namotoka. Henohu kanda munyamuki, mwatela kusambila kwiñija nsapi mumotoka kulonda wutachiki kuvuma. Njila yakumanishilamu kubula kutiyaña niyena  yatachikaña nansapi. Nsapi yeniyi hikudizoza. (Tañenu Yakoba 4:10.) Neyi chinamwekeshi chakutalilahu chamuNsona, iyi nsapi yakwashaña antu anadihilili kutachika kuzatisha nshimbi jamuBayibolu.

¹⁷ Hahitili yaaka makumi ayedi kufuma hahililiyi chikupu Esawu hamuloña wakuhana wukulumpi windi kudi mana kwindi, Yakoba, nawa wakeñeleña kumujaha. Chimwahitili mpinji awa ampamba akeñeleña kubulakana cheñi, “Yakoba watiyili woma waweni, nimuchima mwivumu la-ku.” Watoñojokeli nindi hadaha Esawu wukumujaha. Ilaña chadibulakenuwu, Yakoba wakoñeli chuma chabulili kukuhwelelayi Esawu. Chashikiliyi kwakwihi namana kwindi, “wabandamini nihamaseki.” Kuhiñahu chumanyi chamwekeni? “Esawu wayili lufuchi nakumubulakana, wamukumbatili, yomunoñamina nihanshiñu yindi, yomupwepujola nikumupwepujola; hiyakudila.” Ndulu yakukeña kuzuña ayikañesheli. Kudizoza kwaYakoba kwaleñeleli kukañesha ndulu yadiña naEsawu.—Kutachika 27:41; 32:3-8; 33:3, 4.

18, 19. (a) Neyi kwikala kubula kutiyañana, muloñadi chichalemena kutachika kuzatisha kufumba kwamuNsona? (b) Muloñadi chitwatela kubulila kuleka neyi muntu hakusambila yakaana kuleta kuwunda?

¹⁸ MuBayibolu mwekala kufumba kwakuwahi kutwatela kulondela hakumanisha kubula kutiyañana. (Matewu 5:23, 24; 18:15-17; Aefwesesa 4:26, 27) * Chiña neyi tuzatisha iku kufumba, neyi nehi, tukukañanya kuleta kuwunda. Kuhembelela netu mukwetu yamwekeshi kudizoza hidiyi njila yakuletelamu kuwundaku, muloña ninetu tunateli kumwekesha kudizoza.

¹⁹ Neyi hakusambila tukañanya kuleta kuwunda hamuloña wayuma yimu, bayi tuzeyaku. Muntu mukwawu watela kwikala nampinji yakuwundisha yitoñojoka yindi. Amana kwaYosefu amufutukilili mana kwawu. Hahitili mpinji yeneni hakwila adibulakani nindi, nawa chamubulakenuwu wadiña diyi mukulumpi wamuEjipitu. Nkumininaku, haniyi mpinji, amana kwindi adiña ahimpa dehi muchima nawa amulembeleli nawu yayanakeni. Yosefu wayanakeneni, nawa anyana kaYakoba ekalili munza wadiña nakukooleka kwakwimenaku ijina daYehova. (Kutachika 50:15-21) Kuhitila mukushakama mukuwunda nawana kwetu niahela, ninetu twaletaña kunuñañana nimuzañalu muchipompelu.—Tañenu Akolosi 3:12-14.

Tudikeñenu “Chalala naKwila Mutwahoshaña”

20, 21. Chumanyi chitukudizila kumudimu wakoñeliyi Yesu wakuwelesha nyendu yawapostolu indi?

²⁰ Henohu wudi kwakwihi nakufwa, Yesu walejeli apostolu indi nindi: “Ami nayileji chuma chakwimbujola, kulonda ninenu nawa mwilaña neyi munayilenu.” (Yowanu 13:15) Dihakumishiliyi kuweleshayi nyendu yawatumbanji 12. Chuma chakoñeliyi Yesu hichadiña neyi hikashidikilu hohu hela kumwekesha luwuku. Henohu kanda yashimuni nsañu yakuwelesha nyendu, Yowanu wasonekeli nindi: ‘Chakeñeliyi antu indi adiñi mumpata yamunu mwishina, wayikeñeli chikupu ndo nikunsa.’ (Yowanu 13:1) Hamuloña wakukeña atumbanji twindi, dihafumini Yesu kuzata mudimu wateleleli kuzata nduñu. Dichi mukudizoza ateleleli kudiilila yuma yayiwahi. Eñañi, kukeña chikupu ana kwetu kwatela kutuleñela kwakamena nikusha maana kudi amana kwetu akwaKristu niahela.

²¹ Kapostolu Petulu, awelesheluwu kunyendu kudi Mwana kaNzambi, welukili mwatalishili chuma chakoñeliyi Yesu. Wasonekeli nindi: “Keñañanenu chakumuchima chacheni, muloña munatookeshi dehi nyichima yenu nakwovwahila nsañu yalala; kulonda mukeñi ana kwenu chakadi kudimbana.” (1 Petulu 1:22) Kapostolu Yowanu, niyena awelesheluwu kunyendu kudi Mwanta, wasonekeli nindi: “Enu anyanami anyanya, bayi tukeña akwetu chamukanwa, hela chamukuhosha hohuku; chiña tuyikeñi chalala nakwila mutwahoshaña.” (1 Yowanu 3:18) Dichi, twatela kukeña amana kwetu niahela nikuyilila mutwahoshaña.

[Litaluso za kwatasi]

Munakwanuka?

• Munjilanyi mutunateli ‘kusweja’ kukeñañana wumu namukwawu?

• Chumanyi chinateli kutukwasha kuwana mpinji yakwikala nawantu amakwawu?

• Indi kudizoza kwatuleñelaña ñahi kuleta kuwunda?

• Chumanyi chatela kutuleñela kwakamena akwetu akakwitiya?

[Malwihu aKuzatisha haKudiza]

[Mwevulu wudi hefu 24]

Tambwilenuña chachiwahi akwenu akakwitiya

[Mwevulu wudi hefu 26]

Ikalenuña nampinji yakwikala nawantu amakwawu