Yuma Yitwadizilaña Kudi Yesu

Kutalisha haChihandilu chamuChisaka

Yisaka yatela kumonaña ñahi maluwi hakwila nawu yikali yamuzañalu?

Maluwi himpanda yajila. Chamwihwiluwu Yesu hansañu yakudiseña, wahosheli nindi: “Himunatañi nsañu yakwila nawu, wayileñeli hatachi, wayileñeli niiyala nimumbandaku, tahindi? nindi, Dichi muntu ashiyi tata yindi nimama yindi, akakeli iñodindi, niwena ayedi akekali mujimba wumu. Hiyadi cheñi ayeduku, adi mujimba wumu. Dichi anabombuwu kudi Nzambi, bayi ayambula kudi muntuku. . . . Muntu wukuseña iñodindi, chiña namuloña wawuvumbi hohu; neyi wukumuseña chakadi muloña wawuvumbi hakusumbula wacheñi, neli wuvumbi, nimuntu wukusumbula mumbanda anaseñuwu neli wuvumbi niyena.” (Matewu 19:4-6, 9) Neyi adisumbula alondelaña kufumba kwaYesu nawa ekala ashinshika kudi wumu namukwawu, antu ejima amuchisaka akwikala amuzañalu.

Muloñadi kumukeña Nzambi chikwaleñelaña yisaka kwikala namuzañalu?

Yesu wahosheli nindi: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima. Dilu lushimbi lwabadika lwakusambila.” Lushimbinyi lwamuchiyedi lwabadika? Yesu wahosheli nindi: “Keñaku mukwenu [kushilahu niantu mwashakamaña nawu, chisaka chenu] neyi chiwadikeña eyi aweni.” (Matewu 22:37-39) Dichi nsapi yakuleta muzañalu muchisaka yidi yakwikala nawubwambu wawuwahi naNzambi muloña kumukeña Nzambi kwatuleñelaña kudikeña wumu namukwawu.

 Indi eyala namumbanda anateli kudizañalesha ñahi?

Amayala azañaleshaña añodijawu neyi alondelaña chakutalilahu chaYesu. Wadihanineña hakumwekesha kukeña chipompelu chemenañaku ñodindi wachifwikija. (Aefwesesa 5:25) Yesu wahosheli nindi: “Chenjiliyi Mwana kamuntu halondeli nindi akamukalakeluku, ilaña nindi akakalakeli akwawu.” (Matewu 20:28) Yesu hadiña nalukambu kudi antu alombweleñayuku, ilaña wayakameneneña. (Matewu 11:28) Dichi, amayala, atela kuzatisha wumutu wawu munjila yayiwahi kulonda kukwasha antu ejima muchisaka.

Ambanda niwena anateli kudizila kuchakutalilahu chaYesu. Bayibolu yahosha nawu, “mutu waKristu diyi Nzambi.” Yahosha cheñi nawu “mutu wamumbanda diyi iyala.” (1 Akorinda 11:3) Yesu hichamukalilileña kumwovwahila Nzambuku. Wamulemesheleña chikupu Tata yindi. Yesu wahosheli nindi, “Nelaña yuma yamutiyishaña kuwaha mafuku ejima.” (Yowanu 8:29) Mumbanda wovwahilaña wumutu wanfumwindi mukukeña nikumulemesha Nzambi wazañaleshaña chikupu chisaka chindi.

Yumanyi yinateli kudizilawu anvwali kuchamweneñayi Yesu anyana?

Yesu wadiña nampinji yakushakama hamu nawanyana nawa wakeñeleña kutiya yuma yatoñojokeleñawu. Bayibolu yahosha nawu: “Yesu hakuyitambika nindi, Yitejenu anyana anyanya enzi kudami.” (Luka 18:15, 16) Mpinji yimu, antu azuwilili anyana anyanya amwekesheli chikuhwelelu chawu mudi Yesu. Ilaña Yesu wayihamekeli anyana anyanya kuhitila mukuleja antu ayizuwilileña nindi: “Wunawanishi kuhameka kwakufuma mutunwa twawanyikeki, nitwawakwakwamwa; kanda muchitañuhu dehuku?”—Matewu 21:15, 16.

Yumanyi yatela kudizilawu anyana kudi Yesu?

Yesu wemikili chakutalilahu chachiwahi chatela kwimbujolawu atwansi kutalisha hakukeña yuma yakuspiritu. Hampinji yadiñayi nayaaka 12 yakusemuka amuwanini, “mutembeli, nashakami mukachi kawankuluñaña nakutiya nikuyihujola.” Chumanyi chafuminumu? “Ejima adiñi nakumutiya ahayamini kashinshi kindi nimwakuyakulayi.” (Luka 2:42, 46, 47) Ilaña, Yesu hadinkeleña wanta hamuloña wakwikala namaanaku. Ilaña, amuleñeleli kulemesha anvwali jindi. Bayibolu yahosha nawu: ‘Watwalekeluhu kuyovwahila.’—Luka 2:51.

Neyi munakukeña kwilukilaku nsañu yikwawu, talenu kapetulu 14 kamukanda waChumanyi Chacheni Chatañishaña Bayibolu? *

[Tumazu twaheshina]