Nsañu Yayiwahi Anakuyishimwina muMadimi 500

HAMPINJI yikwadiña njita yahakachi kawantu amwituña daRwanda, izanvu dawakwakubalumuna nyikanda atemukili hatusanji twaSociety hashakamineñawu nakushiya yuma yawu. Hela chochu, atwesheli kusenda makompyuta awu atenañawu nawu malaputopu, asendeluwu kuchilombu chawatunduka. Muloñadi? Kulonda kutwalekahu kubalumuna nyikanda yashindamena haBayibolu mwidimi daKinyarwanda.

Chañadima wumu wakwituña dakuSoutheast Asia wasonekeleña hakompyuta yindi mukachi kawufuku, hela chakwila wazeyeleña, wadiña nakusulwila nawa kakavulu malayiti adiña nakujima nikuluwañesha mudimu windi wakubalumuna, ilaña womikileña. Chumanyi chafwilileñayi? Wafwilileña kumanisha mumpinji.

Awa akwakubalumuna nyikanda ekala hakachi kamukanka wawantu akushika ku 2,300 adihana kuzatila mumaluña akubadika ha 190 mukaayi kejima. Akweti yaaka yakutachikila ha 20 nakushika ku 90 nawa adikitaña chikupu kulonda antu atambwileña nsañu yamuBayibolu yakukundeja mumadimi 500.—Chimwekeshu 7:9.

Kushimwina Kudi Antu Ahoshaña Madimi Amboka-mboka

Muyaaka yamakonu, mudimu wakubalumuna nyikanda wawaYinsahu jaYehova wunayiluku hambidi chikupu. Chakutalilahu, mu 1985, Kaposhi Kakutalila kadiña nakwidika mpinji yoyimu mumadimi 23, iwu wadiña mudimu weneni chikupu hayina mpinji. Makonu, Kaposhi Kakutalila kadi mumadimi 176, nawa magazini ejima edikaña hampinji yoyimu kulonda antañi mwahita kaayi kejima atwesheña kudiza nsañu yoyimu hampinji yimu.

Kaposhi Kakutalila dimagazini yedishañawu hohu mpinji yejima mumadimi akushika ku 50. Muloñadi? Muloña makampani azataña nyidimu yakulanda nakulandulula hiyakweti chipepa chakusoneka nyikanda mumadimi amwiluña dawuku. Ilaña aYinsahu jaYehova mukaayi kejima ahanaña yawana mukudikeñela kulonda mali avuli hakwila Izu daNzambi ninyikanda yashindamena haBayibolu yishikeña kwejima kudi kukankila.—2 Akorinda 8:14.

Antu alemeshaña chikupu nsañu yamuBayibolu neyi yidi mwidimi dawu. Chakutalilahu, makonu nyikanda yashindamena haBayibolu anayidishi muMiskito, idimi dahoshaña antu akushika ku 200,000 muNicaragua. Mumbanda wumu walombeli mukanda waMukanda Wami waMpanji jamu Bayibolu * mwidimi daMistito, nawa chamuleteleluwu iwu mukanda hadiña nintañishi wamunsakililu yamudina iluña. Chamweniyi iwu mukanda walubanji, ona ntañishi wakeñeli nindi yatambuli. Mumbanda wakaanini kumwinkawu, hela chakwila ona ntañishi welili nindi wukumwinka 22kg yakofi kulonda kuhimpa namukanda.

 Hayaaka ikumi yinahituhu, nyikanda yashindamena haBayibolu anayibalumuni mumadimi akubadika ha 10 amuMexico, kubombelahu niidimi daMaya, Nahuatl, niTzotzil. Muyaaka yakushika kwikumi yipompelu yawaYinsahu jaYehova yamwidimi damunidi ituña nimwidimi dawatumama yavulililuku chikupu kufuma ha 72 nakubadika ha 1,200. A Yinsahu jaYehova anateli kutumba nsañu yamuBayibolu munyichima yawantu, ilaña ashiyaña mudimu wejima mumakasa aYehova kulonda kukulisha mbutu yachalala.—1 Akorinda 3:5-7.

Bayibolu Yakatataka yaBalumunawu muMadimi 80

Muyaaka yamakonu, aYinsahu jaYehova anadikiti chikupu kulonda kwidisha Bayibolu yaNew World Translation of the Holy Scriptures yejima hela nyikanda yachitiyañenu chachiha mumadimi 80. Chumanyi chinafumimu? Chinsahu wumu wakuSouth Africa wahosheli haBayibolu yamwidimi daTswana nindi: “Ichi hichitwa chachiwahi chikupu. Yikukwashaku kwiluka nikulemesha Izu daNzambi chikupu. Ayisoneka mwidimi dapela kutaña nawa dadiwahi.” Ntañi wamwidimi daTsonga wakuMozambique wasonekeli nindi: “Kwikala nanyikanda yashindamena haBayibolu, chakadi kwikala naBayibolu chidi neyi nzaji yinakukenashana chakadi nvula! Hela chochu, nvula yatachikili kunoka chelili Bayibolu yaNew World Translation yidiki mwidimi daTsonga.”

Dichi, antu abalumunaña nikushimuna nsañu yayiwahi yamuBayibolu anakushikija wuprofwetu wasonekeluwu kunyaka. Yesu Kristu wahosheli nindi: “Ninsañu iyi yawanta yayiwahi akayishimwañena mwahita matuña ejima mwashakamawu antu, kulonda yakayilili nyuza yejima wunsahu; henohu dihu hakenza kukumisha.”—Matewu 24:14.

[Tumazu twaheshina]

 [Graph on page 25]

(Neyi munakukeña kumona ntanjikilu yejima talenu mumukanda)

NEW WORLD NYIKANDA

TRANSLATION YIKWAWU

Yamukuma hela nyikanda

yachitiyañenu chachiha

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

NAAMBALA YAMADIMI

[Nyevulu yidi hefu 29, 30]

Antu adihana akushika ku 2,300 abalumunaña nyikanda yashindamena haBayibolu mumadimi 500

BENIN

SLOVENIA

ETHIOPIA

BRITAIN