Ntañishilu Yakutwamba 1: Wumi Hiwafwañaku

Indi iyi ntañishilu yakutwamba yafuma kudihi? “AkwaKristu akusambila akwamaana, atachikili kwiteja ntañishilu yawaGiriki yakwila nawu wumi hiwafwañaku, nawa atoñojokeleña nawu Nzambi waleñaña wumi nakuwisha mumujimba hampinji yabaabañayi muntu.”—The New Encyclopædia Britannica (1988), Volume 11, mafu 25.

Indi Bayibolu yahosha nawudi? “Yowu muntu [wumi] wukuvulumuna diyi wakafwa.”—Ezekeli 18:4.

Kutalisha hakuleña wumi wamuntu watachi, Bayibolu yahosha nawu: “Yehova Nzambi wawumbili muntu nalunkuñu lwamaseki, woneni mumazulu indi muuya wawumi, muntu hakwikala mumi [muchiHeberu neʹphesh].”—Kutachika 2:7.

Izu dachiHeberu daneʹphesh, dabalumunawu nawu “wumi,” datalisha mukwila nawu ‘chileñaleña chonaña.’ Nzambi chaleñeliyi Adama iyala watachi, Hamwinkeli wumi wabulaña kufwaku, ilaña wamwinkeli muuya wawumi watwalekañahu kuhitila mukoona. Dichi, wumi muBayibolu watalishaña kuchileñaleña chejima choonaña. Neyi wumi waheniyi Nzambi awufumishamu, wumi wafwaña.—Kutachika 3:19; Ezekeli 18:20.

Ntañishilu yakwila nawu wumi hiwafwañaku yaleñelaña antu kwihula nawu: Indi wumi wayaña kudihi neyi muntu nafwi? Indi wumi wawantu atama wayaña kudihi? Awa akwaKristu chetejeluwu iyi ntañishilu yakutwamba nawu wumi hiwafwañaku, yayilombweli kuntañishilu yikwawu yakutwamba—yakaluña kachinana.

Esekejenu awa mavasi: Mukwakutaŋisha 3:19; Matewu 10:28; Yililu 3:23

NTAÑISHILU YALALA:

Muntu chafwayi hatwalekañahu kwikala wamumiku