Ntañishilu Yakutwamba 2: Antu Atama Ayaña Mukaluña Kachinana

Indi iyi ntañishilu yakutwamba yafuma kudihi? “Hakachi kawaGiriki akwamaana akunyaka, Plato diyi waswejeli kutandisha maana achisemwa antañishilu yaKaluña Kachinana.”—mukanda waHistoire des enfers (The History of Hell), wasonekeluwu kudi Georges Minois, ifu 50.

“Kufuma muyaaka nkulakaji yamuchiyedi AD, akwaKristu adizili maana awaGiriki atachikili kutoñojoka nawu ateleleli kumwekesha chikuhwelelu chawu munjila yamwekesheleña yitoñojoka yanawa akwamaana . . . Maana aswejeli kutandishawu adiña aPlatonism [ntañishilu yaPlato].”—The New Encyclopædia Britannica (1988), Volume 25, ifu 890.

“Ntañishilu yamachaachi yetejaña nawu kwekala kaluña kachinana nawa kahaya nyaka. Antu akoñaña yatama chafwawu, hohenohu wumi wawu wayaña mukaluña kachinana, mwayibabeshelañawu, ‘mukesi kahaya nyaka.’ Kubabesha kweniku kwekala kwakuyambula kudi Nzambi haya nyaka.”—Catechism of the Catholic Church, 1994 edition, ifu 270.

Indi Bayibolu yahosha nawudi? “Muloña amomi eluka dehi nawu, twakafwa; hakwila afu hiyeluka chumaku, . . . muloña mwijamu muwukuya mwosi mudimu, mwosi kufuukula, mwosi kwiluka, mwosi maana.”—Mukwakutaŋisha 9:5, 10.

Indi iyi nsona yalumbulula nawudi kutalisha hadi afu? Komana akabakanaña mwijamu kulonda kufweta yiluwa yawu? Inehi, muloña “hiyeluka chumaku.” Dihafumini nkakulula Yoba, hampinji yamweniyi ikezeñi hamuloña wayikatu yasweja, kumulembelela Nzambi nindi: ‘nsweki mwijamu.’ (Yoba 14:13 NW) Kulomba kwindi kwamwekesheli nawu ‘mwijamu’ bayi neyi himwiluña mwakabishilañawu antu haya nyakaku, ilaña hikumajamu kwajikañawu antu ejima, hikwekala kuzata mudimu wudi wejimaku.

Hanu dinu chiluwanyi chatela kuleñela Nzambi wakukeña kuyandisha muntu haya nyaka? (1 Yowanu 4:8) Chineli ntañishilu yakaluña kachinana yakutwamba, dikwila nawu wumi wakushakama mwiwulu niwena hintañishilu yakutwamba?

Esekejenu awa mavasi amuBayibolu: Masamu 146:3, 4; Yililu 2:25-27; Aroma 6:7, 23

NTAÑISHILU YALALA:

Nzambi hababeshaña antu mukaluña kachinanaku

[Mazu aKusakilila eniMwevulu wudi hefu 5]

Barrators—Giampolo/The Doré Illustrations For Dante’s Divine Comedy/Dover Publications Inc