Ntañishilu Yakutwamba 3: Antu Amawahi Ejima Ayaña Mwiwulu

Indi iyi ntañishilu yakutwamba yafuma kudihi? Chafwiluwu apostolu aYesu, kukutachika kwayaaka nkulakaji yamuchiyedi C.E., nsakililu yatachi yateneneñawu nawu Church Fathers yatandili chikupu. Hakulumbulula ntañishilu yawu, mukanda waNew Catholic Encyclopedia (2003), Volume 6, ifu 687, wahosha nawu: “Ntañishilu yaswejeli kutanda yadiña yakwila nawu, muntu chafwayi wumi wafumañamu hayoyenoyu mpinji wayaña nakuluña mwiwulu.”

Indi Bayibolu yahosha nawudi? “Ovwaha anakooleki, muloña akaswana mpata.”—Matewu 5:5.

Hela chakwila Yesu wakanini atumbanji twindi nindi wakaya “nakuyiloñeshela mwakushakama” mwiwulu, hahosheli nindi antu aloña ejima hiyayaña mwiwuluku. (Yowanu 3:13; 14:2, 3) Komana Yesu halombeli nindi muchima waNzambi ‘awili hamaseki neyi chawilañawu mwiwuluku’? (Matewu 6:9, 10) Mwalala, kudi wuloku watalilañawu antu aloña. Antu antesha hohu diwu akayula naKristu mwiwulu, ilaña amavulu akashakama haya nyaka hamaseki.—Chimwekeshu 5:10.

Chimwahitili mpinji, chaachi yakusambila yahimpili yitoñojoka yawu kutalisha hamudimu wawu wahamaseki. Chumanyi chafuminumu? Mukanda waThe New Encyclopædia Britannica wahosha nawu: “Iyi chaachi yalekeli chikupu kuhosha haWanta waNzambi.” Atachikili kukolesha ñovu jawu kuhitila mukudibomba munsañu jamatuña nachiyulu, nakudiwula mazu atiyakana aYesu alejeliyi atumbanji twindi nindi hiyatela kwikala ‘ampata yamunu mwishinaku.’ (Yowanu 15:19; 17:14-16; 18:36) Muchiyulu chaMwanta wawaRoma wejina daConstantine, iyi chaachi yatachikili kudiwula yuma yakuhweleleluwu, kubombelahu nikukuhwelela mudi Nzambi.

Esekejenu awa mavasi amuBayibolu: Masamu 37:10, 11, 29; Yowanu 17:3; 2 Timotewu 2:11, 12

NTAÑISHILU YALALA:

Antu amavulu aloña akashakama hamaseki haya nyaka—bayi mwiwuluku

[Mazu aKusakilila eniMwevulu wudi hefu 6]

Art Resource, NY