Ntañishilu Yakutwamba 4: Kwekala Anzambi Asatu

Indi iyi ntañishilu yakutwamba yafuma kudihi? “Antu anateli kutoñojoka nawu ntañishilu yawaNzambi Asatu yatachikili kukuma kwayaaka nkulakaji yamuchiwana. Chumichi chalala . . . Henohu kukuma kwayaaka nkulakaji yamuchiwana kanda yishiki, ntañishilu yakwila nawu ‘kwekala aNzambi Asatu’ hiyayilumbulwili jiika hela kuyiteja chikupu muchihandilu chawakwaKristu nikuyikuhwelelaku.”—New Catholic Encyclopedia (1967), Volume 14, ifu 299.

“Chota chaNicaea chabulakeni haMay 20, 325 [C.E.]. Constantine diwalombweli iku kubulakana, nawa haniku kuhanjeka kwanyiña yena diwetejeli . . . njila yakumwekesha wubwambu wekala hadi Kristu naNzambi hansañu yahosheli Chota yakwila nawu, ‘Kristu wekala wadinuña hamu naTata yindi.’ . . . Hamuloña wakumutiya mwanta woma, akulumpi jansakililu, afwachikili kufumishaku hohu ayedi, nawa amavulu etejeli nawu ntañishilu yawu yakutwamba.”—Encyclopædia Britannica (1970), Volume 6, ifu 386.

Indi Bayibolu yahosha nawudi? ‘Ilaña yena Setefwanu, wenzala dehi Spiritu Yajila, hakutala mwiwulu swi-i, hakumona lubanji lwakulema kwaNzambi, niYesu nemani kuchikasa chaNzambi chachidiilu. Nindi, Talenu, namoni mumawulu munenzuluki, niMwana kamuntu nemani kuchikasa chaNzambi chachidiilu.’—Yililu 7:55, 56.

Indi ichi chimwenu chamwekesheli chumanyi? Setefwanu chenzeliyi nañovu yaNzambi yazatikaña, wamweni Yesu “nemani kuchikasa chaNzambi chachidiilu.” Mwalala, chasañukiliyi Yesu nakuya mwiwulu hekalili Nzambuku, ilaña, wekalili muntu wakuspiritu wambukaku. Muniyi nsañu hiyatenamu muntu wamuchisatu wemeni kuchisaka chaNzambuku. Hela chakwila afwilileña kuwana Nsona yahosha hantañishilu yawaNzambi Asatu, kapristu wawaDominican Marie-Émile Boismard wasonekeli mumukanda windi waÀ l’aube du christianisme—La naissance des dogmes (Kutachika kwawuKristu—Dihatachikili Ntañishilu yawaNzambi Asatu): “Mazu akwila nawu kwekala aNzambi asatu . . . hiyekala muNyikanda yaChitiyañenu Chachihaku.”

Ntañishilu yatandishileñayi Constantine yadiña yakufwila kumanisha ntaadi yadiña muChaachi yamuyaaka nkulakaji yamuchiwana. Hela chochu, yavundumwini cheñi nsañu yikwawu yakwila nawu: Komana Mariya, wavwalili Yesu, diyi “Mama yaNzambi”?

Esekejenu awa mavasi amuBayibolu: Matewu 26:39; Yowanu 14:28; 1 Akorinda 15:27, 28; Akolose 1:15, 16

NTAÑISHILU YALALA:

Ntañishilu yakutwamba yawaNzambi asatu yadiñaku kukumana kwayaaka nkulakaji yamuchiwana

[Mazu aKusakilila eniMwevulu wudi hefu 7]

Museo Bardini, Florence