Ntañishilu Yakutwamba 5: Mariya Diyi Mama Yanzambi

Indi iyi ntañishilu yakutwamba yafuma kudihi? “Ntañishilu yakwila nawu Mariya diyi mama yaNzambi aswejeli kuyilemesha nankashi chelili . . . antu akuhweleleli mudi anzambi akutwamba ahwiilili muchaachi yeniyi. . . . Kusweja kukuhwelela nikusha maana kunsakililu [kwawantu abula kwitiya ekalili akwaKristu] kwashimbwili hadi yaaka yayivulu kuhitila munsakililu yanyanya yanzambi wamumbanda ‘wabadika’ nawa ‘mujiki wajila.’”—The New Encyclopædia Britannica (1988), Volume 16, mafu 326 ni 327.

Indi Bayibolu yahosha nawudi? “Tiya, wakabaaba ivumu, wakavwala mwana weyala, wakamutumba ijina dindi neyi YESU. Yena wakekala muneni, akamutena nawu Mwana kaMukwakubadika Mwiwulu. . . . Dichi chuma chiwakavwala akachitena nawu chajila, hiMwana kaNzambi weyala.”—Luka 1:31-35.

Iyi nsañu yinashimunuwu muNsona yinalumbululi chikupu nawu Mariya diwadiña mama ‘yaMwana kaNzambi,’ bayi neyi mama yaNzambuku. Komana Mariya wadi kutwesha kubaaba Muntu ‘wakañanyaña kuwanina iwulu’? (1 Anyanta 8:27) Mariya hatoñojokeli muniyi njilaku. Ntañishilu yawaNzambi Asatu diyaleta kuluwañesha kutalisha hadi Mariya. Kuhitila mukutena izu dachiGriki daTheotokos datalisha mukwila nawu “ñimenu yaNzambi”, hela “Mama yaNzambi,” chota chamuEfwesesa, mu 431 C.E., chenzunwini njila yakutachika kudifukula kudi Mariya. Mumusumba waEfwesesa dimwadiñileña chota chaniyi chaachi hadi yaaka yayivulu, mwadiña nakudifukwilawu kudi ankishi nikwanakana nzambi wamumbanda walusemu wejina daArtemis.

Dichi yuma yayivulu yabombelawu mukudifukula kumukishi waArtemis “waholokeli kwiwulu,” chidi neyi izanvu dawantu, ayibombeleli mukudifukula kudi Mariya. (Yililu 19:35) Chaaku chikwawu cheñilili muntañishilu yawakwaKristu chadiña chakuzatishaña nyevulu yaMariya ninyevulu yikwawu mukudifukula.

Esekejenu awa vasi amuBayibolu: Matewu 13:53-56; Maku 3:31-35; Luka 11:27, 28

NTAÑISHILU YALALA:

Mariya wadiña mama yaMwana kaNzambi, bayi neyi mama yaNzambuku. Iyi ntañishilu yakutwamba yawaNzambi asatu yaleñeleli antu kutachika kudifukula kudi Mariya nawu diyi Mama yaNzambi