Ntañishilu Yakutwamba 6: Nzambi Wetejaña Kuzatisha Ankishi Niyifwikija Hakudifukula

Indi iyi ntañishilu yakutwamba yafuma kudihi? “AkwaKristu akusambila hiyazatishileña ankishi hakudifukula kwawuku . . . Kuzatisha ankishi muchaachi muyaaka nkulakaji yamuchiwana niyamuchitanu kwashindameneni hayitoñojoka yakwila nawu antu abula kutaña anateli kudiza chikupu nsañu jawuKristu kubadika kudizila mumpanji hela munyikanda.”—Cyclopedia of Biblical, Theological, and Ecclesiastical Literature, by McClintock and Strong, Volume 4, mafu 503 ni 504.

Indi Bayibolu yahosha nawudi? “Kudilila mukishi wakusoña, hela kufwikija chuma chamwiwulu, hela chuma chahamaseki munu mwishina, hela chuma chamumeji mwishina damaseki, chinjila. Kuyifukamina hela kuyipesha chinjila.” (Kwidika 20:4, 5) Kapostolu Yowanu wasonekeleli akwaKristu amuyaaka nkulakaji yakusambila nindi: “Enu anyanami anyanya, dihembenu kunsañu jawakishi.”—1 Yowanu 5:21.

Komana, ankishi neyi chahoshaña machaachi, diyi njila hohu yakudifukwilamu nikulemesha yuma yemenañaku ankishi? Mukanda waThe Encyclopedia of Religion wahosha nawu, “ankishi ayizatishileña hohu kulonda [kutañisha] antu chiwahi nikumwekesha wunyonji; dichi, mwenimu dimwadikañilileñawu. Ilaña, atachikili kuyizatisha mukudifukula. Kudifukula kudi ankishi kwatandili chikupu kunsakililu yawa Eastern Orthodoxy.” Hela chochu, kaprofwetu Isaya wenhwili nindi: “Ochu Nzambi mukumufwikija neyinyi? Chifwikijanyi chimukumwesekeja nachu?”—Isaya 40:18.

Esekejenu awa mavasi amuBayibolu: Isaya 44:13-19; Yililu 10:25, 26; 17:29; 2 Akorinda 5:7

NTAÑISHILU YALALA:

Nzambi wakaana kuzatisha yifwikija niankishi hakudifukula

KANENU NTAÑISHILU YAKUTWAMBA, KAKELENU KUCHALALA

Tunateli kuhosha netudi haniyi ntañishilu yakutwamba yitunahitulukumu yichidi kutañishawu mumachaachi amavulu? Itu ‘tuheka [muchiGriki, myʹthos] twakufuukula namaana,’ hitunateli kumwekesha chalala chamuBayibolu choloka nawa chatukundejañaku.—2 Petulu 1:16.

Dichi, nayitoñojoka yakukeña kudiza, mwatela kwesekeja yuma yayilejawu nayekala Mwizu daNzambi, nsulu yalala chakadi kujinoka. (Yowanu 17:17) Kwila mwenimu, kukuyileñela iku kukana kwikala kwalala kudenu: “Mukwiluka nsañu yalala, ninsañu yalala yikuyifumisha muwuduñu.”—Yowanu 8:32.

[Mazu aKusakilila eniMwevulu wudi hefu 9]

Pictorial Archive (Near Eastern History) Est.