Nzambi Wakapulwisha Antu Kuhitila Mudi Mesiya!

‘Muloña chafwañawu antu ejima mudi Adama, dichi nawa antu ejima akayihandishila mudi Kristu.’—1 AKORINDA 15:22.

1, 2. (a) Indi Anderi naFwilipu ahosheli nawudi chamumwenuwu Yesu? (b) Muloñadi wutukuhoshela netu tukweti wunsahu wawuvulu wunakumwekesha nawu Yesu hiMesiya kubadika chelukiluwu akwaKristu akusambila?

 ANDERI wamulejeli mana kwindi Petulu nindi: “Tunawani dehi Mesiya” nawa welukili chikupu nindi Yesu wakuNazareta wadiña diyi Wawayishewa waNzambi. Fwilipu welukili chikupu nawa wayili nakumukeñakeña ibwambu dindi Nataneli nakumuleja nindi: “Tunawani muntu atenenuwu kudi Mosi munshimbi, nikudi atuprofwetu, diyi Yesu wakuNazareta, mwana kaYosefu.”—Yowanu 1:40, 41, 45.

² Komana muneluki chikupu nenu Yesu diyi Mesiya akaninuwu, ‘Nlomboli yawamwinu’ waYehova? (Aheberu 2:10) Makonu, tukweti wunsahu wawuvulu wamwekeshaña nawu diyi watondewa waNzambi kubadika chelukiluwu atumbanji twindi amunkulakaji yakusambila. Kufuma hasemukili Yesu nakushika nimpinji yafwiliyi, Izu daNzambi dalumbulula jiika nawu diyi Mesiya. (Tañenu Yowanu 20:30, 31.) Cheñi Bayibolu yashimuna nawu Yesu wakatwalekahu kuzata mwiwulu mudimu windi wawuMesiya. (Yowanu 6:40; tañenu 1 Akorinda 15:22.) Makonu, kwesekeja nayuma yimunadizi muBayibolu, anenu nawa munateli kuhosha nenu ‘munawani dehi Mesiya.’ Ilaña tusambilenu kushinshika chuma chaleñeleli atumbanji akusambila kuhosha nawu amuwanini Mesiya.

“Nsañu Yakujinda” yaMesiya Ayimwekesheleña Chovu-chovu

3, 4. (a) Indi atumbanji amuyaaka nkulakaji yakusambila ‘amuwanini ñahi Mesiya’? (b) Muloñadi chimukuhoshela nenu Yesu hohu diyi washikijili wuprofwetu wejima wawuMesiya?

³ Chumanyi chaleñeleli atumbanji twaYesu akusambila kwiluka chikupu nawu diyi Mesiya? Kuhitila mudi atuprofwetu, Yehova wamwekesheli chovu-chovu yinjikijilu yakwilukilaku kwinza kwaMesiya. Kadizi waBayibolu wumu wesekejeli kwinza kwaMesiya nachiwumbeka wamalola atooka anahumonuwu muyikunku yikunku. Toñojokenu hadi antu amavulu anabuli kutiyañana wumu namukwawu ilaña wejima wawu aleta chikunku chachiwumbeka mukapeka. Neyi yikunku ayinuña hamu nakutuña cheñi chiwumbeka wamukuma, munateli kutoñojoka nenu kudi muntu wayifunjekeli nakutemeshela muntu wejima chikunku chindi. Kufwana chikunku chachiwumbeka, wuprofwetu wudi wejima wahosha hadi Mesiya walumbululaña nsañu yalema kutalisha hadi Mesiya.

⁴ Komana wuprofwetu wejima wahosha hadi Mesiya wunateli kushikijewa chakuluwukila hadi muntu wumu? Mukwakusandujola nsañu wumu wahosheli nindi, “wunsahu wakwila nawu wuprofwetu wejima wahosha hadi Mesiya washikijeweli hadi Yesu chakuluwukila, wakutwamba muloña hichinateli kutweshekaku.” Dichi, iwu kadizi wahosheli nindi, “mukuhanda kwawantu kwejima Yesu hohu diyi watwesheli kushikija wuprofwetu wejima.”

5, 6. (a) Indi Satana akamusompesha ñahi? (b) Indi Nzambi watachikili ñahi kumwekesha chovu-chovu mutaña ‘walubutu’ lwakaninuwu?

⁵ Wuprofwetu wahoshaña hadi Mesiya ‘hinsañu yakujinda’ yalema chikupu kuyileñaleña yejima. (Akolose 1:26, 27; Kutachika 3:15) Munsañu yakujinda mwabombela cheñi nsañu yakusompesha Satana Diyabolu, “kapela mukulu,” waleñeleli muchidi wamuntu kwiñila munshidi nikufwa. (Chimwekeshu 12:9) Indi wunsompeshi weniwu akawusompesha ñahi? Yehova washimwineñahu dehi nindi ‘lubutu’ lwakavwalawu  kudi “mumbanda” lwakamuchika Satana kumutu. ‘Lubutu’ lwashimwineñawu dehi lwakamuchika kapela kumutu, nakufumishahu yuma yaletaña kudikaña, yikatu nikufwa. Hela chochu, kuhitila mukumwiteja kudi Nzambi, muchifwikija Satana wakasambila kusuma kukatutu ‘kalubutu’ lwamumbanda.

⁶ Yehova wamwekesheli chovu-chovu wakekala ‘lubutu’ lwakaninuwu. Nzambi wasanyikili kudi Abarahama nindi: “Kudi anyaneyi nyuza yejima yahamaseki yakawenaku kukooleka.” (Kutachika 22:18) Mosi washimwineñahu dehi nindi, Muntu yeniwu wakekala “kaprofwetu” wabadika Mosi. (Kuhituluka 18:18, 19) Davidi amulejeli, nawa nkumininaku atuprofwetu ashimwini momumu, nawu Mesiya wakafuma mumutaña windi nawa wakaswana wanta waDavidi haya nyaka.—2 Samweli 7:12, 16; Yeremiya 23:5, 6.

Yinjikijilu Yamwekeshaña Nawu Yesu Diyi Mesiya

7. Indi Yesu wavwalikili ñahi mukuloñesha kwaNzambi kudi neyi “mumbanda”?

⁷ Nzambi watemesheli Mwanindi, watachikiliyi kuleña, kufuma mukuloñesha Kwindi kudi neyi mumbanda kwayileñaleña yakuspiritu yamwiwulu kwikala ‘lubutu’ lwakaninuwu. Ichi chakeñekeleña Mwana kaNzambi wumu hohu ‘kudibalumuna nakwikala wakadi kulema’ nikushiya wumi wamwiwulu kulonda kuvwalika neyi muntu wawanina. (Afwilipi 2:5-7; Yowanu 1:14) Spiritu yajila ‘chiyamuzeñaminini’ Mariya chamwekesheli chikupu nawu wakavwalika ‘akamutena nawu wajila, Mwana kaNzambi weyala.’—Luka 1:35.

8. Indi Yesu washikijili ñahi wuprofwetu wawuMesiya hampinji yayiliyi nindi amupapatishi mumenji?

⁸ Wuprofwetu wawuMesiya washimwini iluña nimpinji yakamwekanayi Yesu. Yesu wavwalikilili muBetelemi neyi chashimwineñawu dehi. (Mika 5:2) Muyaaka nkulakaji yakusambila, antu adiña nakuchiñeja chikupu kwinza kwaMesiya. Hamuloña wakuchiñeja kumwekana kwaMesiya, antu amakwawu ajinokeleña hadi Yowanu Mpapatishu nawu: “kwiji diyi Kristu.” Ilaña Yowanu wakwili nindi: “Kudi nakwinza wambadika ñovu.” (Luka 3:15, 16) Kuhitila mukwinza kudi Yowanu muchaaka cha 29 C.E. kulonda amupapatishi hadiñayi nayaaka 30, Yesu wadilumbulwili hampinji yatelela nindi diyi Mesiya. (Danyeli 9:25) Kuhiñahu watachikili mudimu windi wawuwahi wakushimwina, nindi: “Mwaka wunashiki dehi, wanta waNzambi wudi kwakwihi.”—Maku 1:14, 15.

9. Hela chakwila hiyelukili wunsahu wejimaku, yumanyi yelukiluwu chikupu atumbanji twaYesu?

⁹ Hela chochu, antu akeñekeleña kuhimpa yitoñojoka yawu kutalisha hayuma yachiñejeleñawu. Kudi yuma yayiwahi yaleñeleli Yesu amubideki nawu hiMwanta, ilaña antu hayina mpinji hiyelukili chikupu nawu chiyulu chindi chakumbidi nawa wakayululila mwiwuluku. (Yowanu 12:12-16; 16:12, 13; Yililu 2:32-36) Ilaña, Yesu chehwiliyi nindi, “Indi enu aweni mwelaña nenu yaminyi?” Petulu washikeneni kwakula nindi: “Yeyi Kristu, Mwana kaNzambi wamumi.” (Matewu 16:13-16) Petulu wakwili chochimu hampinji yamushiluwu Yesu kudi atumbanji twindi, hamuloña wakubula kutiyisha ntañishilu yindi yimu.—Tañenu Yowanu 6:68, 69.

Mwovwahilenuña Mesiya

10. Muloñadi Yehova chakonkomwenañayi hakumwovwahila Mwanindi?

¹⁰ Hampinji yadiñayi Mwana kaNzambi wumu hohu mwiwulu, wadiña muntu wakuspiritu wabadika. Chenjiliyi hamaseki, Yesu ‘wadiña nakwimenaku Tata yindi.’ (Yowanu 16:27, 28) Wahosheli nindi: “Kuleja kwami hikwamami awenuku, kwambala kwayena wantemesheli.” (Yowanu 7:16) Hakwiteja nindi Yesu diyi Mesiya hampinji yakudibalumuna, Yehova wahosheli nindi: “Mutiyililenu yena.” (Luka 9:35) Eñañi, mutiyililenu, hela mwovwahilenu, Iwu Watondewa. Kwila mwenimu kwakeñekaña chikuhwelelu nikuzata nyidimu yayiwahi, yuma yejimiyi yalema chikupu hakumuzañalesha Nzambi nihakuheta wumi wahaya nyaka.—Yowanu 3:16, 35, 36.

11, 12. (a) Yumanyi yaleñeleli aYudeya amuyaaka nkulakaji yakusambila kumukaana Yesu nawu hidiyi Mesiyaku? (b) Anyi amukuhweleleli Yesu?

¹¹ Hela chakwila kwadiña yinjikijilu yayivulu yamwekesheleña nawu Yesu diyi wadiña Mesiya,  aYudeya amavulu amuyaaka nkulakaji yakusambila hiyamwitejiluku. Muloñadi? Muloña adiña dehi nayitoñojoka yawu kutalisha hadi Mesiya, kubombelahu niyitoñojoka yakwila nawu wukekala nlomboli wukayikuula kukuyandisha kwawaRoma. (Tañenu Yowanu 12:34.) Dichi, akaanini kumwiteja Mesiya washikijili wuprofwetu wahosheleña nawu akamudiwula, nakumuumbila kudi antu neyi muntu wayihuñu wenjilili yakala, nkumininaku akamujaha. (Isaya 53:3, 5) Niatumbanji twaYesu amakwawu ashinshika aneñeli hakubula kuyikuula munsañu jamatuña nachiyulu. Ilaña atwalekeluhu kwikala ashinshika, nawa nkumininaku, elukili walala hadi Mesiya.—Luka 24:21.

¹² Chuma chikwawu chaleñeleli Yesu amukaani kudi antu nawu hidiyi Mesiya wakaninuwuku, hintañishilu yindi yadiña nakukaanawu antu amavulu. Hakwila nawu tukeñili muWanta chakeñekaña ‘kudibonda,’ ‘kudya’ musunyi waYesu nikunwa mashindi, ‘nikuvwalika chachiha,’ ‘nikubula kwikala ampata yamunu mwishina.’ (Maku 8:34; Yowanu 3:3; 6:53; 17:14, 16) Antu adinka wanta, asamaheta, nianfukeji amweneña iyi nshimbi nawu yakala kulondela. Hela chochu, aYudeya adizoza amwitejeli Yesu nawu diyi Mesiya, neyi cheliluwu aSamariya amakwawu ahosheli nawu: “Diyi Chamwinu champata yamunu mwishina.”—Yowanu 4:25, 26, 41, 42; 7:31.

13. Indi Yesu amuchikili ñahi kukatutu muchifwikija?

¹³ Yesu washimwineñahu dehi nindi akamwinka muloña kudi akulumpi jawatupristu nawa akamujaha kudi aJentili, ilaña mwifuku damuchisatu, wakasañuka. (Matewu 20:17-19) Kuditejela yomweni kumesu achota chaSanihedilini nindi wadiña diyi “Kristu, Mwana kaNzambi” akumweni nawu himatuka. (Matewu 26:63-66) Pilatu hamumweni ‘nachuma chakutela kufwaku,’ Ilaña hamuloña wakwila aYudeya amuwanini namuloña wakuluwañesha antu, Pilatu ‘wamuhanini nindi amwili mwomwaya muchima wawu.’ (Luka 23:13-15, 25) Dichi ‘amulekeli’ nawa atiyañeni nawu ajahi “Mwiniwumi,” hela chakwila kwadiña yinjikijilu yayivulu yamwekesheleña nawu amutemesheli kudi Nzambi. (Yililu 3:13-15) Neyi chashimwineñawu dehi, Mesiya ‘amufumishiluhu’ nawa amupopeleli hamutondu wakuyandishila Hefuku daPaseka 33 C.E. (Danyeli 9:26, 27; Yililu 2:22, 23) Kuhitila mukufwa muniyi njila yatama, amuchikili “kukatutu” neyi chashimwineñawu dehi haKutachika 3:15.

Muloña Wafwililiyi Mesiya

14, 15. (a) Yumanyi yiyedi yetejeleliyi Yehova nindi Yesu yafwi? (b) Chumanyi cheliliyi Yesu hanyima yakumusañula?

¹⁴ Kudi nyiloña yiyedi yalema yaleñeleli Yehova yeteji Yesu kufwa. Chatachi, chashinshikiliyi Yesu nakushika nikukufwa chamanishili muloña wumu ‘wansañu yakujinda.’ Wamwekesheli chikupu nawu muntu wawanina nateli kutwalekahu ‘kwakama Nzambi’ nikukakela kuwanta waNzambi hichidi namuloña nakweseka kwasweja kwaSatanaku. (1 Timotewu 3:16) Chamuchiyedi, chinesekani nachahosheliyi Yesu nindi, ‘chenjiliyi Mwana kamuntu walondeli nindi . . . akahani wumi windi wakukuula nachu antu amavulu.’ (Matewu 20:28) Iwu “wakukuula nachu [watelela]” waheni mulambu wakukuula nshidi yaswaninuwu anyana kaAdama nawa washinkwili njila yakuhana wumi wahaya nyaka kudi antu ejima etejaña nawu Nzambi wapulwishaña antu kuhitila mudi Yesu.—1 Timotewu 2:5, 6.

¹⁵ Hanyima yakujiñila mwijamu mafuku asatu, Kristu amusañwili, nawa wamwekeni kudi atumbanji twindi hadi mafuku 40, nakumwekesha nindi wadiña wamumi nikuyileja nshimbi jikwawu. (Yililu 1:3-5) Kufumahu wayili mwiwulu nakuhana mulambu windi walema kudi Yehova nikuhembelela mpinji yatoñolawu yakatachikayi kuyuula neyi Mwanta wawuMesiya. Chayinu mpinji, wudi nanyidimu yayivulu yakalakalañayi.

Kumanisha Mudimu Windi wawuMesiya

16, 17. Shimunenu mudimu wazatiliyi Yesu hamu neyi Mesiya chayiliyi mwiwulu.

¹⁶ Yaaka yejima yinahituhu kufuma hamusañwiluwu, Yesu walombolaña nakashinshi nyidimu yamuchipompelu chawakwaKristu mwayulañayi neyi Mwanta. (Akolose 1:13) Mpinji yatoñolawu chiyakashika, wakatachika kuzatisha ñovu yindi neyi Mwanta waWanta waNzambi. Wuprofwetu  wamuBayibolu niyuma yinakumwekana mukaayi yamwekeshaña nawu kwinza kwindi neyi Mwanta kwatachikili mu 1914, neyi chochatachikili ‘kukuma kwanyaka yamakonu.’ (Matewu 24:3; Chimwekeshu 11:15) Chimwahitili mpinji yantesha, walombweli añelu ajila hakumuhaña Satana niandemoni jindi mwiwulu.—Chimwekeshu 12:7-10.

¹⁷ Mudimu wakushimwina nikutañisha watachikiliyi Yesu mu 29 C.E. katataka wumani. Keña yasompeshi antu ejima amomi. Kuhiñahu wukaleja antu adi neyi anyikoku amwitejaña nawu diyi chamwinu chaYehova ‘kuswana wanta wawu wayiloñesheleluwu kufumisha haaliluwu chikuku champata yamunu mwishina.’ (Matewu 25:31-34, 41) Antu amukaanaña Yesu nawu hiMwantaku, akayijilumuna hampinji yakalombolayi amashidika amwiwulu nakufumishahu kutama kwejima. Kuhiñahu Yesu wakamukasa Satana nawandemoni jindi nakuyumbila “mwikela.”—Chimwekeshu 19:11-14; 20:1-3.

18, 19. Chumanyi chakakoñayi Yesu hakushikija mudimu windi wawuMesiya, nawa chumanyi chakamwekena antu ovwahila?

¹⁸ Mukuyula kwindi kweKombakaji daYaaka, Yesu wakazatisha chikupu nkumbu jindi jejima, jidi neyi “Wakuhayama, Mukwakuleja akwawu maana, Nzambi wañovu, Tata wahaya nyaka, Kalamba wakuwunda.” (Isaya 9:6, 7) Antu akekala awanina muchiyulu chaWanta windi, kushilahu niakasañulawu. (Yowanu 5:26-29) Mesiya wakalombola antu mukudikeñela “kutuseloki twameji awumi,” kulonda antu ovwahila akadiluñishi wubwambu wawuwahi naYehova. (Tañenu Chimwekeshu 7:16, 17.) Hanyima yakweseka kwakukumishaku, akwakudikaña ejima, kubombelahu Satana niandemoni jindi, ‘akayumbila mwijiya dakesi,’ dikwila nawu akamuchika “kapela” kumutu.—Chimwekeshu 20:10.

¹⁹ Yesu wakalakalaña mudimu windi wawuMesiya munjila yayiwahi nawa chakadi kuluwañesha! Muparadisa heseki mwakenzala antu akakuulawu akashakama haya nyaka nawumi wawanina nawa amuzañalu. Kasawuntu kejima kalumbikawu hejina daYehova dajila akakifumishahu, nawa akajilika chikupu wanta windi wakuyula kwejima. Owu wuswana okuwaha wudi kumbidi wakatambwilawu antu ejima ovwahilaña waWayishewa waNzambi!

Komana Munamuwani Mesiya?

20, 21. Yumanyi yikuyileñela kulejaku amakwawu hadi Mesiya?

²⁰ Kufuma tuhu mu 1914 tunakushakama mumpinji yapa·rou·siʹa hela yakwinza kwaKristu. Hela chakwila kwinza kwindi hamu neyi Mwanta waWanta waNzambi hikwamwekanañaku, kwamwekenaña mukushikijewa kwawuprofwetu. (Chimwekeshu 6:2-8) Ilaña, kufwana aYudeya amuyaaka nkulakaji yakusambila, antu amavulu makonu anakudiwula yinjikijilu yakwinza kwaMesiya. Niwena anakukeña nlomboli hela muntu watela kuzata munsañu jamatuña nachiyulu. Ilaña enu, mweluka nenu Yesu nakuyula neyi Mwanta waWanta waNzambi. Komana himwatiyili kuwaha hakwiluka mwenimuku? Kufwana atumbanji amuyaaka nkulakaji yakusambila, anenu nawa mwahosheli nenu: “Tunawani dehi Mesiya.”

²¹ Makonu, neyi munakuhosha hachalala, komana mwakonkomwenaña hamudimu waYesu wawuMesiya? Neyi mwilaña mwenimu mukusweja kuhameka hayuma yayikoñelayi, yinakuyikoñelayi, niyikayikoñelayi kumpinji yakumbidi. Kufwana Anderi niFwilipu, chakadi kujina ninenu mwalejañaku antaña jenu niamabwambu jenu hadi Mesiya. Komana kwila muyileja cheñi namuzañalu nenu Yesu Kristu diyi Mesiya wakaninuwu, chamwinu chaNzambi nehi?

Munateli Kulumbulula?

• Indi atumbanji amuyaaka nkulakaji yakusambila amuwanini ñahi Mesiya?

• Nyiloñanyi yiyedi yalema yafwililiyi Yesu?

• Yumanyi yikakoñayi Yesu hakushikija mudimu windi wawuMesiya?

[Malwihu aKuzatisha haKudiza]