Twalekenuhu Kwikala Amuzañalu Mumpinji Yamakabi

‘Ejima akubatama mudeyi [Yehova] azañalali, adikuwi kwawu namuzañalu mafuku ejima nanochu chiwayihembaña.’—MASAMU 5:11.

1, 2. (a) Yumanyi yaletaña kukala makonu? (b) Kubombela hakukala kwamonañawu antu ejima, yumanyi yatela kuumikawu akwaKristu alala?

 AYINSAHU JAYEHOVA amonaña kukala kwamonañawu antu ejima. Antu jaNzambi amavulu amonaña kukala kwawubanji, njita, nikukala kukwawu kwatama. Wubanji wadinjilaña waweni, wuzweñi, yikatu, nikufwa kwaletaña chineñi chikupu. Kapostolu Pawulu wasonekeli nindi: “Tuneluki netu kuleña kwejima kwaabaña nakufunyisha hamu, nikulelu.” (Aroma 8:22) Anetu nawa twamonaña kukala muloña wakubula kuwanina. Kufwana Mwanta Davidi wakushankulu, tunateli kuhosha netu: “Kuluwaluwa kwami kunabadiki nihamutu wami; kuneli neyi chiteli chalema, kunabadiki nimuñovu jami.”—Masamu 38:4.

² Kubombela hakukala kwamonañawu antu ejima, akwaKristu alala asendaña mutondu wakuyandishila wachifwikija. (Luka 14:27) Eñañi, kufwana Yesu, atumbanji twindi ayihelaña nikuyikabisha. (Matewu 10:22, 23; Yowanu 15:20; 16:2) Dichi, kumulondela Kristu chakeñekaña kushaku ñovu chikupu nikuumika hampinji yitunakutalila nkisu jakekala mwituña dadiha.—Matewu 7:13, 14; Luka 13:24.

3. Tuneluki ñahi netu akwaKristu hiyatela kusambila kukabakana hakwila nawu amuzañaleshi Nzambuku?

³ Komana ichi chinakulumbulula nawu  akwaKristu akeñaña kwikala nachihandilu chakadi kuzañalala? Komana chihandilu chetu chatela kwikala chakuneña hohu kushika nimpinji yakakuma kanu kaayi? Chakadi nikujina, Yehova wakeñaña nindi twikali amuzañalu hampinji yitunakutalila mpinji yakashikijayi yikaninu yindi. Kakavulu, Bayibolu yalumbulula chikupu nawu akwakudifukula alala ekalaña amuzañalu. (Tañenu Isaya 65:13, 14.) Masamu 5:11 yahosha nawu: “Ejima akubatama mudeyi [Yehova] azañalali, adikuwi kwawu namuzañalu mafuku ejima nanochu chiwayihembaña.” Eñañi, muntu nateli kwikala wamuzañalu, nikushakama kumatelu kwawunda, nikuzañalala nayuma yikwetiyi mumpinji yakukala. Tutalenu Bayibolu chiyatela kutukwasha kutwalekahu kwikala amuzañalu hampinji yitunakuhita mukweseka.

Yehova—‘hiNzambi waMuzañalu’

4. Indi Nzambi watiyaña ñahi neyi antu akaana kwila mwaya kukeña kwindi?

⁴ Chakutalilahu, toñojokenu hadi Yehova. Hakwikala Nzambi Wabadika, wayulaña yuma yejima. Kwosi chuma chakankilañayi nawa kwosi watela kumukwashaku. Hela chakwila wukweti ñovu jabadika, Yehova watela waneñeli chelili mwanindi wakuspiritu yadikaña nakwikala Satana. Cheñi, Nzambi watiyili kutama chelili añelu amakwawu niwena adikañi. Toñojokenu cheñi, chatiyiliyi Nzambi chelili Adama naEvu, yileñaleña yindi yayiwahi yahamaseki, yidikaañi. Kufuma tuhu hayina mpinji, anyana kaAdama naEvu amavulu akaanaña wunlomboli waYehova.—Aroma 3:23.

5. Yumanyi yamuneñeshaña Yehova chikupu?

⁵ Kudikaña kwatachikiliyi Satana kuchidi kutwalekahu. Hayaaka 6,000 yinahituhu, Yehova wamonaña antu chakoñañawu yililu yakupesha, madombu, kudijaha, niwuvumbi. (Kutachika 6:5, 6, 11, 12) Kubombelahu, watiyaña antu chashimunañawu makudi ahamesu bwi-i nikasawuntu. Hela tuhu akwakudifukula aNzambi alala, mpinji jikwawu akoñaña yuma yamuneñeshaña. Bayibolu yahosha hansañu yamuchidiwu mumazu akwila nawu: “O mapampa adikañiluwu nindi mwisaña o kuvula! O chamuvulokeluwu mumakuna! Abalumukili cheñi hiyakumweseka Nzambi, amukañesheli wambala waIsarela Wajila.” (Masamu 78:40, 41) Yehova waneñaña chikupu neyi antu jindi adikaaña. (Yeremiya 3:1-10) Chakadi nikujina, yuma yatama yamwekanaña, nawa chamuneñeshaña chikupu Yehova neyi yimwekana.—Tañenu Isaya 63:9, 10.

6. Indi Nzambi wamonaña ñahi yuma yamuneñeshaña?

⁶ Hela chochu, chineñi hichamukañeshaña  Yehova kukoñahu chumaku. Neyi kukala kumwekana, Yehova wanyakalaña kuleta njila yakukañeshelamu yuma yatama yinamwekani. Cheñi, Yehova wakoña yuma yikaleñela kufuukula kwindi kukashikijewi. Kwesekeja naniyi yuma yayiwahi yakoñayi, Yehova watalilaña chikupu mpinji yakuyiñisha wanta windi nikukiswila akwakudifukula indi aloña. (Masamu 104:31) Eñañi, hela chakwila amusawulaña chikupu, Yehova watwalekahu kwikala ‘Nzambi wamuzañalu.’—1 Timotewu 1:11; Masamu 16:11.

7, 8. Neyi yuma yiluwankana, tunateli kumwimbujola ñahi Yehova?

⁷ Hela chochu, hitunateli kudesekeja naYehova kutalisha hañovu jitukweti jakumanisha kukalaku. Dichi, twatela kumwimbujola Yehova hampinji yitunakumika nakukala. Muntu wejima waneñaña neyi yuma yiluwankana, ilaña bayi tutwalekahu kwikala nachineñuku. Muloña atuleñeli muchifwikija chaYehova, twatoñojokaña nawa tukweti maana, atuleñelaña kushinshika chiwahi hakukala nikukeña njila yayiwahi yakumanishilamu kukala neyi chinatwesheki.

⁸ Chuma chalema chikupu chinateli kutukwasha kuumika nakukala kwamuchihandilu chidi chakwiluka netu yuma yikwawu hitunateli kuyimanishaku. Kusweja kutoñojoka hakukala kwamuchidiwu kunateli kutuneñesha chikupu nikutumanishila muzañalu wutwadiluñishaña mukudifukula kwalala. Neyi mweseka hakumina ñovu jenu kumanisha kukala, chachiwahi kuleka kutoñojokahu chikupu nikusha maana hakwila yuma yikuyizañalesha. Nsañu yamuBayibolu yinalondeluhu yikulumbulula chikupu ichi chikuma.

Kwovwaha Kwalema

9. Indi Hana wamwekesheli ñahi kwovwaha?

⁹ Talenu chakutalilahu chaHana, mama yaSamweli kaprofwetu. Watiyileña kutama chikupu hakwiluka nindi hakuvwala anyanaku. Amuseheleña chikupu hamuloña wakwikala nshinta. Mpinji yikwawu, Hana waneñeleña nankashi nawa wadilileña chikupu nikubula kudya. (1 Samweli 1:2-7) Hampinji yayiliyi kwitala daYehova, Hana “watiyili kumuchima bwi chikupu, walombeli kudi Yehova hakudila nankashi.” (1 Samweli 1:10) Chelili Hana yashimuni kudi Yehova yuma yadiña kumuchima windi, Eli kapristu muneni wamuwanini nawa wamwilili nindi: “Yaña kweyi chachiwahi, Nzambi yaIsarela akwinki chuma chiwunamulombi.” (1 Samweli 1:17) Haniyi mpinji, Hana welukili nindi wazatili chikupu hakumina ñovu jindi. Welukili nindi hanateli kukwata kuñojuku. Hana wamwekesheli kwovwaha. Kuhiñahu “hakudiyila kwindi, hakudya, nikuneña nawa cheñi kumesu indi nehi.”—1 Samweli 1:18.

10. Chililwinyi chamwekesheliyi Pawulu hampinji yamweniyi kukala kwakañenyiyi kumanisha?

¹⁰ Kapostolu Pawulu niyena wamwekesheli kwovwaha hampinji yamweniyi kukala. Wadiña nakukala kwadiña nakumuneñesha chikupu. Wakwiteneni nindi “mwiña mumujimba.” (2 Akorinda 12:7) Hela chakwila wadiña nakukala kweniku, Pawulu wazatili hakuminini ñovu jindi kulonda kukwimanisha, nawa walombeli wukwashu waYehova. Indi Pawulu wamulombeli Yehova kapampa kañahi kutalisha hakukala kwadiñayi naku? Wamulombeli kapampa kasatu. Hanyima yakulomba kamuchisatu, Nzambi wamulejeli Pawulu nindi “mwiña mumujimba” hiyakawufumisha muchihayamishaku. Pawulu wetejeli nawa washili maana hakumukalakela Yehova chikupu.—Tañenu 2 Akorinda 12:8-10.

11. Indi kulomba nikulembelela kwatukwashaña ñahi kuumika nakukala kutwamonaña?

¹¹ Iyi yakutalilahu hiyinatalishi mukwila nawu twatela kuleka kulomba kudi Yehova kutalisha hayuma yatuneñeshañaku. (Masamu 86:7) Kwambukaku, Izu daNzambi dakonkomwenaña nawu: “Bayi mwakama chumaku; ilaña mulejenu Nzambi yuma yejima yimunakeñi nakulomba, nakulembelela, nakusakilila.” Indi Yehova natela kwakula ñahi kulomba nikulembelela kwamuchidiwu? Bayibolu yabombelahu nawu: “Kuwunda kwaNzambi kwabadika maana ejima kwakahemba nyichima yenu niyitoñojoka yenu mudi Kristu Yesu.” (Afwilipi 4:6, 7) Mwalala, Yehova hanateli kumanisha kukala kwetuku, ilaña nateli  kutiya kulomba kwetu kuhitila mukuhemba yitoñojoka yetu. Hanyima yakulomba hakukala kutukweti, tunateli kwiluka wubanji wafumaña mukusweja kwakama.

Zañalalenu Hakwila Mwaya Kukeña kwaNzambi

12. Muloñadi kutwalekahu nachineñi chikunateli kuleta kukala?

¹² Yishimu 24:10 yahosha nawu: “Neyi wakazeya hefuku dakala ñovu jeyi jakeha.” Yahosha cheñi nawu: “Ilaña kuneña kwakumuchima kwabalulaña muchima wamuntu.” (Yishimu 15:13) AkwaKristu amakwawu aneñaña chikupu chakwila alekaña nikutaña Bayibolu nikutoñojoka chikupu Hezu daNzambi. Hiyashaña maana kukulomba kwawuku, nawa adambulaña kudi akwawu akwakudifuukula. Mwalala, kutwalekahu nachineñi kunateli kuleta kukala.—Yishimu 18:1, 14.

13. Nyidimwinyi yikwawu yinateli kutukwasha kumanisha chineñi nikutuzañalesha?

¹³ Munjila yikwawu, kwikala nayitoñojoka yayiwahi kukutukwasha kusha maana kuyuma yalema muchihandilu chetu yatela kututiyisha kuwaha nikutuletela muzañalu. Davidi wasonekeli nindi: “Natiyi kuwaha nakwila muchima weyi, eyi Nzambi yami.” (Masamu 40:8) Neyi tumona kukala muchihandilu chetu, bayi tuleka kudifukulaku. Njila yayiwahi yakumanishilamu chineñi, yidi yakukalakala nyidimu yatuzañaleshaña. Yehova watulejaña nindi tunateli kwikala amuzañalu kuhitila mukutañaña Izu dindi nikutalañamu chikupu mpinji yejima. (Masamu 1:1, 2; Yakoba 1:25) Twatambwilaña “mazu amawahi” muNyikanda Yajila nikukupompa kwawakwaKristu, kwatukoleshaña nikutuzañalesha.—Yishimu 12:25; 16:24.

14. Chumanyi chatukanayi Yehova chatuzañaleshaña?

¹⁴ Nzambi watwinka yuma yayivulu yatuzañaleshaña. Mwalala chikaninu chindi chawamwinu chatuzañaleshaña chikupu. (Masamu 13:5) Tweluka netu hichidi namuloña nayuma yinakutumwekenaku, Nzambi wakalambula antu amukeñakeñaña. (Tañenu Mukwakutaŋisha 8:12.) Kaprofwetu Habakuki wamwekesheli chikupu nindi wakuhweleleli munichi chikaninu hampinji yasonekeliyi nindi: “Muloña hela chikuyu chikubula kukenuka, hela nyivinyu yikubula  kusoña, hela nyiolive yikucheluka, nimaha akubula kwidisha yakudya yawu, niyimuna yikumana mwiyinda, niañombi akubula mumataña, Ami kwami nukuluñila mudi Yehova, nukutiya kuwaha mudi Nzambi yawamwinu wami.”—Habakuki 3:17, 18.

“Antu Akweti Nzambi Yawu Yehova Anakooleki”

15, 16. Shimunenu yuma yatwinkayi Nzambi yitwatela kudiluñisha hampinji yitunakutalila yuma yakumbidi.

¹⁵ Hampinji yitunakutalila yuma yayiwahi yidi kumbidi, Yehova wakeñaña nindi tudiluñisheña yuma yayiwahi yatwinkañayi. Bayibolu yahosha nawu: “Neluki dehi kwami nami, hikudi chuma chacheñi chikuyiwahilaku [antu], chiña yowu kuzañalala nakwila yayiwahi hiyachiduwu amomi. Mwalala, antu ejima adyi, anwi, kunyidimu yejima yakukabakanawu amwenuku kuwaha; hichamukunkulu chakudi Nzambi.” (Mukwakutaŋisha 3:12, 13) ‘Kwila yayiwahi’ kwabombelamu kuzatila antu amakwawu yuma yayiwahi. Yesu wahosheli nindi kuhana kwaletaña muzañalu weneni kubadika kutambwila. Kwilila eni kwetu kakawahi, anyana, anvwali, niantaña kwaletaña muzañalu chikupu. (Yishimu 3:27) Kwikala amwovu, achisambu, nikwanakena amana kwetu niahela akakwitiya nikwena kwaletaña muzañalu, nawa kwamuzañaleshaña Yehova. (Aŋalija 6:10; Akolose 3:12-14; 1 Petulu 4:8, 9) Nawa kukalakala chikupu mudimu wetu wakushimwina naspiritu yakudihana kwatuzañaleshaña chikupu.

¹⁶ Mazu anasonekuwu hewulu amumukanda waMukwakutañisha anateni yuma yapela yitwadiluñishaña muchihandilu, yidi neyi kudya nikunwa. Eñañi, hela neyi tudi mukweseka, tunateli kwikala amuzañalu nayuma yejima yakumujimba yitwatambwilaña kudi Yehova. Kubombelahu, hitwafwetaña hakushinshika lubanji lwamwekanaña hakuhuma kwetañwa, lubanji lwampata, anyana kawanyama chakilokañawu, niyuma yikwawu yakuhayamisha yaleñawuku, ilaña yinateli kutuhayamisha nikutuzañalesha chikupu. Chitukutoñojokaña hayuma yeniyi, tukuswejaña kumukeña Yehova, muloña yena diyi Wahanaña yuma yejima yayiwahi.

17. Yumanyi yakatwamuna kuyihuñu yitwamonaña, nawa hayinu mpinji, yumanyi yatukundejaña?

¹⁷ Dichi, kumukeña Nzambi, kwovwahila nshimbi jindi, nikukuhwelela ifutu danyiloña, kwakatwamuna chikupu mukukala kutwamonaña hamuloña wakubula kuwanina nawa kwakatuletela muzañalu wahaya nyaka. (1 Yowanu 5:3) Hayinu mpinji, twakundejewaña hakwiluka netu Yehova wamonaña yihuñu yejima yatumwekenaña. Davidi wasonekeli nindi: “Nukutiya kuwaha, nukuzañalala naluwi lweyi; muloña wamweni yihuñu yami; welukili munamwenaña kukala.” (Masamu 31:7) Hamuloña wakutukeña, Yehova wakatupulwisha kuyihuñu.—Masamu 34:19.

18. Muloñadi muzañalu chiwatela kuswejela hadi antu jaNzambi?

¹⁸ Hampinji yitunakutalila kushikijewa kwayikaninu yindi, twatela tumwimbujoleña Yehova, Nzambi wamuzañalu. Bayi tuleka yitoñojoka yatama yitukañeshi kutwalekahu kumukalakela Nzambuku. Neyi kumwekana kukala, yitoñojoka yakashinshi nimaana alala atela atulomboleña. Yehova wukutukwasha kulonda kuyula yitoñojoka yetu nikuzatisha njila yayiwahi yakukañeshelamu kukala kwafumaña muyuma yatama yamwekanaña. Twatela kuzañalala nayuma yayiwahi yafumaña kudi Nzambi, yakumujimba niyakuspiritu. Kuhitila mukukundama kwakwihi naNzambi, tukwikala amuzañalu muloña “antu akweti Nzambi yawu Yehova anakooleki.”—Masamu 144:15.

Yumanyi Yimunadizi?

• Tunateli kumwimbujola ñahi Yehova hampinji yitwamonaña kukala?

• Indi kwovwaha kunateli kutukwasha ñahi kuumika kukala?

• Mumpinji yakukala, tunateli kwikala ñahi amuzañalu hakwila mwaya kukeña kwaNzambi?

[Malwihu aKuzatisha haKudiza]

[Nyevulu yidi hefu 16]

Yuma yatama yamwekanaña yamuneñeshaña chikupu Yehova

[Mazu aKusakilila]

© G.M.B. Mwevulu waAkash/Panos

[Nyevulu yidi hefu 18]

Yehova watwinka yuma yayivulu yikutuleñela kutwalekahu kwikala amuzañalu