Chatuleñelaña Kwiluka Chikupu Netu—Nzambi Watwakamenaña

NEYI Nzambi watukeña, muloñadi makabi chinaswejeluwu? Ilu hilwihu lunashimbuli nawa lwalema, lwihu lwatoñojokañahu chikupu antu hadi yaaka yayivulu yinahituhu. Hadaha mukwiteja nenu neyi muntu mwamukeña, himukukeña nenu yakabakaneñaku, nawa neyi yekala mukukala, mukweseka kumukwasha. Mwalala, antu amavulu atoñojokaña nawu chineli makabi anasweji mukaayi, Nzambi hanateli kutwakamenaku. Dichi, chalema kusambila kushinshika hawunsahu wamwekeshaña nawu mwalala Nzambi watukeña, nawa watwakamenaña.

Yileñaleña Yamwekeshaña Kukeña kwaNzambi

Yehova Nzambi diyi “waleñeli niiwulu niiseki nikaluñalwiji, niyuma yejima yidumu.” (Yililu 4:24) Chitukutoñojokaña hayuma yaleñayi Yehova, mwalala tukwiluka netu watwakamenaña. Chakutalilahu, toñojokenu hayuma yayizañaleshaña. Komana mwakeña yakudya yayiwahi? Mutenowu Yehova wadi kutwinka muchidi wayakudya yimu hohu yakuhemba wumi. Ilaña, waleñeli nyichidi yayakudya yayivulu kulonda tuditowejeña. Chochimu, Yehova wabaza iseki nanyitondu  yayiwahi, nkenu, nimpata kulonda tudiluñisheña.

Shinshikenu cheñi chatuleñawu. Yitoñojoka yatuleñelaña kuseha, kudiluñisha tumina, nikuhameka yuma yayiwahi, bayi neyi yatuhandishaña hohuku, ilaña yuma yejimiyi hiyawaana yakufuma kudi Nzambi yawahishaña wumi wetu. Toñojokenu cheñi hawubwambu wenu nawantu amakwawu. Hinyi wabulaña kutiya kuwaha kushakama hamu nawamabwambu amawahi hela kumusambilila kudi muntu akeñeshayi? Muloña wuswa wakumwekesha kukeña hichawana chakufuma kudi Nzambi wakukeña! Chineli Nzambi wayileñeli antu nawuswa wakumwekesha kukeña, kukeña hichililu chaNzambi.

Bayibolu Yatulejaña Chikupu Nawu Nzambi Watukeña

Bayibolu yatulejaña nawu Nzambi diyi kukeña. (1 Yowanu 4:8) Kukeña kwindi hikwamwekenaña hohu muyileñaleñaku, ilaña kwamwekenaña niMwizu dindi, Bayibolu. Chakutalilahu, Bayibolu yashimunaña nshimbi jatukwashaña kuhanda chachiwahi kumujimba, jatukoleshaña kwiluka mwakukumina muyuma yonsu, nawa yatusoñamishaña hakusheta nikufwa hakudya.—1 Akorinda 6:9, 10.

Cheñi Bayibolu yatufumbaña chachiwahi kutalisha hakudikunda nawantu, yatukoleshaña kukeñañana wumu namukwawu nikudinka kalemesha, kudivumbika, niluwi. (Matewu 7:12) Yahishaña yililu niyitoñojoka yaletaña makabi yidi neyi lwisu, matuñu, ichima, wuvumbi, nikujahañana. Neyi muntu wejima yafwilaña kulondela kufumba kwakuwahi kwekala muNsona, mwalala mukaayi kejima himunateli kwikala makabuku.

Hela chochu, njila yayeni yamwekeshelelumu Nzambi kukeña, yadiña yakuhana Mwanindi, Yesu, kulonda kukuula antu. Yowanu 3:16 yahosha nawu: “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.” Dichi Yehova waloñesha dehi njila yakumanishilamu kufwa nimakabi ejima haya nyaka.—1 Yowanu 3:8.

Chakadi nikujina, kudi wunsahu wawuvulu wamwekeshaña nawu Yehova watukeña. Mwalala watiyaña kutama chikupu hakumona chitwakabakanaña. Wakazatilahu kulonda kumanisha makabi. Hitwatela kuboka haniyi nsañuku, Bayibolu yatulejaña jiika Nzambi chakafumishahu makabi.

[Mwevulu wudi hefu 4]

Wuswa wakumwekesha kukeña hichawana chakufuma kudi Nzambi wakukeña