Komana Mweluka?

Kuchinda Kwamuchidinyi Kwaleñeleli Yesu Yavwalikili muBetelemi?

Kwesekeja naNsañu Yayiwahi yasonekeliyi Luka, chelili Kesari Agusitusi yahani lushimbi lwakuchinda antu muWanta waRoma wejima, “antu ejima hiyakuya nakuyisoneka, iwu hamukala wawu, iwu hamukala wawu.” (Luka 2:1-3) Yosefu, tata yaYesu wakuwanamu, wafumini mumusumba waBetelemi, nawa lwendu lwakasiluwu aYosefu naMariya lwakulondela lushimbi lwahenuwu, lwaleñeleli Yesu kuvwalikila kuBetelemi. Kusoneka kweniku kwayikwashileña hakutambula nyisoku nikwiñija antu mudimu wawushidika.

Chelili aRoma ashindi Ejipitu mu 30 B.C.E, mudimu wakuchinda adiña awutachikili dehi kuyaaka yakunyima. Atudizi eteja nawu aRoma atachikili kulondela maana awaEjipitu akuchindaña antu nawa azatishileña njila yoyimu muwanta wawu.

Wunsahu wakusonekesha kwamuchidiwu wekala mulushimbi lwaheniyi nguvulu wamuRoma wakuEjipitu muchaaka cha 104 C.E. Chipapilu chanilu lushimbi, achihembela muLayibulali yakuBritain, ilu lushimbi lwahosha nawu: “Gaius Vibius Maximus, Mukulumpi wamuEjipitu (wahosheli nindi): Chineli mpinji yakuchinda kwitala nikwitala yinashiki dehi, chidi chachiwahi kuleja antu ejima ashakamineña kumaluña acheñi kufunta kunyikala yawu, kulonda akayichindiluku nawa akayinki maha mwakudimina.”

Muloñadi Yosefu chatoñojokeleleñayi kumwinka Mariya mukanda wakumuseña nachu henohu adiña adotela hohu?

Kwesekeja naNsañu Yayiwahi yasonekeliyi Matewu, Yosefu welukili nindi Mariya walema hamujimba henohu ‘wamwota dehi’ iku kanda adisokeji. Hamuloña wakubula kwiluka nindi Mariya wadiña nevumu ‘dakudi spiritu yajila,’ Yosefu watoñojokeli nindi Mariya hadihembeluku, nawa wafuukwiluhu kumuseña.—Matewu 1:18-20.

Kwesekeja nachisemwa chawaYudeya, antu adota ayimweneña neyi adisumbula dehi. Hela chochu, antu adota hiyadiña nakushakama hamu neyi antu adisumbulaku, sampu chidika chamawija chinamani. Kwota kwadiña kwalema chikupu, ilaña neyi kalemba yahimpa yitoñojoka yindi hela muloña wayuma yikwawu yinateli kumwekana, abula kudisumbula, mumbanda hadiña wakasunuka kusumbukaku, sampu anamwinki mukanda wakumuseña nachu. Neyi nfumwa mumbanda otawu yafwa henohu chawija kanda, amumweneña nawu hintuluwa. Cheñi nawa, neyi yela wuvumbi iku amwota dehi, amumweneña nawu hichivumbi nawa amujahileña.—Kuhituluka 22:23, 24.

Yosefu watoñojokeli hakukala kwadi kumonayi Mariya neyi chakwila wamushimwini kudi antu kutalisha hansañu yakwikala nevumu. Hela chakwila wakeñeleña kuleta iyi nsañu kudi akulumpi, wakeñeleña kumukiña nikutondolwela kumutiyisha nsonyi. Dichi, wafuukwiluhu kumuseñela kumbadi. Neyi mama yawantu mujiki amwinka mukanda wakumuseña nachu, chikumwekeshaña nawu wasumbukahu dehi.

[Mwevulu wudi hefu 16]

Lushimbi lwakuchinda lwaheniyi nguvulu wamuEjipitu mu 104 C.E.

[Mazu aKusakilila]

© The British Library Board, all rights reserved (P.904)