Komana akwaKristu Atela Kwanakanaña Ñondu waMuchaaka Chachiha?

CHAAKA nichaaka muJanuary hela muFebruary, kwituña daAsia dikwahwilaña antu amavulu amukaayi. Yihita yawantu amavulu akuAsia afuntaña kuyisaka yawu kulonda kwanakana Ñondu wamuChaaka Chachiha. *

Nsoneki wakuAmerica wahosheli nindi, Kwanakana Ñondu wamuChaaka Chachiha dichawija chasweja kulemeshawu hakalenda yawakaAsia. Chidi neyi Ifuku damuChaaka Chachiha, daJuly 4, ifuku daKusakilila, niKrisimansi jejima ajibomba hamu.” Ichi chawija chatachikaña hakumwekana kwañondu wamuha hakalenda kawaChinese, hela hakachi kaJunuary 21 niFebruary 20 hamakalenda akuMatuña awaNyitooka. Ichi chawija chashimbulaña nakushika kunyilungu yiyedi.

Chuma chacheni chaleñelaña kwanakana Chaaka Chachiha chekala chakuhimpa, dikwila nawu kuleka yuma yayikulu nakuleta yayiha. Hakwila nawu aloñeshi chidika, antu awahishaña yuma nikuloñesha matalawu, alandaña yakuvwala yayiha, aloñeshaña yakudya yidi namajina esekana “namaheta,” afwetaña nyikudi yawu nikumanisha yikonkojola nawakwawu. Hefuku daChaaka Chachiha, kwekalaña kudinka yawana nikudikiswila, sweje hamaheta, adinkaña tumafunda tuchinana twatenañawu nawu kukooleka kwakwikala namali, adyaña yakudya yayiwahi, nikuvumisha yuma yedishaña nzanji yakesi, atalaña nyivwimbimbi yachazañombi hela chahañanaña nyitupa, nikuhema nayisaka yawu niamabwambu.

Itu tushidikilu twalema nankashi. Mukanda waMooncakes niHungry Ghosts: Yawija yamuChina walumbulula nawu: “Yisaka, amabwambu, niantaña aswejaña kusha maana kukukiswila, kulemesha anzambi niaspiritu, nikukiswila maheta amuchaaka chikenza.” Chineli mwadibombela tushidikilu twatuvulu ninsañu jansakililu, indi akwaKristu atela kumona ñahi ichi chidika? Komana atela kulondejaña hohu tushidikilu? AkwaKristu atela kwanakanaña?

“Ilukenu Kwafuma Ichi Chaaku”

Chishimu chawaChinese chahosha nawu: “Chiwanwa menji, ilukaku kunsulu.” Ichi chamwekeshaña nawu akaAsia amavulu alemesha chikupu anvwali niankakulula jawu. Muloña wakwila anvwali diwu ayivwala, dihafumaña anyana kuyilemesha chikupu, chumichi chalema nankashi hakwanakana Chaaka Chachiha.

Chakadi nikujina Mpinji yaChaaka Chachiha yalema nankashi kuyisaka yayivulu yawakaAsia. Nawufuku hampinji yeniyi, yisaka yayivulu yakuñulukilaña kuchawija chachiwahi. Iyi himpinji yanuñañanaña cheñi yisaka nawa antu amunidi ituña azataña nañovu yawu yejima kulonda kubula kushalahu.  Kumesa yayakudya, hiyashañaku hohu yitwamu hakushakama antu amuchisaka anenzuku, ilaña ashiyañaku nihakushakama antu afwili dehi, akuhwelelañawu nawu ekalañaku muspiritu. Mukanda waencyclopedia wahosha nawu, hampinji yakudya “antu amuyisaka ahanjekaña chikupu nawankakulula jawu.” Mukanda wukwawu wahosha nawu, “Chineli amomi anuñañanaña cheñi nawafu, chaaka chejima ankakulula akiñaña chisaka chawu.” Indi akwaKristu atela kumonaña ñahi aka kashidikilu?

Kukeña nikulemesha anvwali kwalema chikupu kudi akwaKristu. Atiyililaña kufumba kwaNzambi kwakwila nawu: “Mutiyilili tata yeyi wakuvweli, bayi wakadiwula mama yeyi neyi nakuli dehuku.” (Yishimu 23:22) Cheñi ovwahilaña kufumba kwaBayibolu kwakwila nawu: “Lemeshaku tata yeyi nimama yeyi; dilu lushimbi lukweti chikaninu lwakusambila; kulonda wumoni kuwaha, wuhandi nyaka yayivulu hanu hamaseki.” (Aefwesesa 6:2, 3) Eñañi, akwaKristu alala afwilaña kukeña nikulemesha anvwali jawu!

Bayibolu yahamekaña cheñi kudikunda kwakuwahi kwachisaka neyi akuñulukila hamu nakuzañalala. (Yoba 1:4; Luka 15:22-24) Ilaña, Yehova watukonkomwena nindi: “Kudeyi bayi kwakamwekana muntu . . . mukwakupesha, hela katepa, hela kadañuku.” (Kuhituluka 18:10, 11) Muloñadi chahishilawu yumiyi? Muloña Bayibolu yashimunaña chekalawu afu. Yahosha nawu: “Amomi eluka dehi nawu, Twakafwa; hakwila afu hiyeluka chumaku.” Chineli afu hiyeluka nichumaku, hiyanateli kukoña nyidimu yakoñañawu amomuku; hiyanateli kutukwasha hela kutukatishaku. (Mukwakutaŋisha 9:5, 6, 10) Yesu Kristu, Mwana kaNzambi, wafwanishili kufwa nakukaama tulu twatweni, nawa afu akahinduka hohu hampinji yakusañuka kudi kumbidi.—Yowanu 5:28, 29; 11:11, 14.

Kubombelahu, Bayibolu yashimunaña nawu ‘musalu’ ‘ninyijimu’ yawafu hiyileñaleña yatama yakuspiritu yadimwekeshaña neyi diwu ana antu afwa. Muloñadi chadimwekeshelañawu muniyi njila? Kulonda kudimba antu nikuyikokela muñovu yawu yatama. (2 Atesalonika 2:9, 10) Nshimbi jaNzambi jatukiñaña kuyuma yatama. Dichi hamuloña wakumukeña Yehova nikukeña kwikala akiñewa, akwaKristu atondolwelaña tushindikilu twamuchisaka twabombelamu kudifukula kudi ‘andemoni’ hela kuyikuhwelela netu atukiñi.—Isaya 8:19, 20; 1 Akorinda 10:20-22.

Munjila yikwawu, akwaKristu akeñaña cheñi kulemesha, “Tata, kwatambwila yisaka yejima ijina daTata niyamwiwulu niyahamaseki.” (Aefwesesa 3:14, 15) Indi iwu Tata hinyi? Diyi Nleñi yetu, Wahanaña Wumi, Yehova Nzambi. (Yililu 17:26) Dichi, neyi hitukutoñojoka hatushidikilu twaÑondu waChaaka Chachiha, twatela kudihula netu: Indi Yehova wamonaña ñahi itu tushindikilu? Komana watwiteja itu tushidikilu?—1 Yowanu 5:3.

Kulemesha Anzambi amuChisaka

Kwanakana Ñondu waChaaka Chachiha mwadibombela tushidikilu twatuvulu twakulemesha anzambi amuchisaka ninzambi wamumbanda, chidi neyi nzambi wepitu, nzambi wamaseki hela spiritu yayikiñaña, nzambi wamaheta, ninzambi wakuchisambu hela wakwijiku. Talenu kashidikilu kasweja nankashi kakulemesha nzambi wakuchisambu. * Akuhwelela nawu chikwashala mafuku antesha henohu Chaaka Chachiha kanda, iwu nzambi wayaña kwiwulu kulonda kuleta nsañu kuchisaka nikudi Mwanta waMalola, wabadika chikupu mudi anzambi awaChinese. Hamuloña wakukuhwelela nawu nzambi wakuchisambu wukuleta wunsahu wawuwahi, chisaka chamutemeshaña nayakudya yayiwahi, nikumulambula yatowala nimakendi. Hakwila nawu yashiki swayi, chisaka chakwataña mwevulu windi, mpinji yikwawu alambwijaña nyivumbu yindi nayakudya yatowala, nikuyocha hanzi. Hefuku daChaaka Chachiha, ashaña  mwevulu wanzambi yeniwu kuchisambu, kulonda kumutambika mwitala muchaaka chikuhiñahu.

Hela chakwila tushidikilu twatuvulu tunateli kumwekana neyi twatuwahi, akwaKristu atela kulombolewa Nezu daNzambi kutalisha hakudifukula. Dihafumini Yesu Kristu kuhosha nindi: “Kadifukulaña kudi Yehova Nzambi yeyi, wakakalakelaña yena hohu kanka windi.” (Matewu 4:10) Mwalala, Nzambi nakukeña tudifukuleña kudi yena hohu. Muloñadi? Toñojokenu hachumiche: Yehova diyi Tata yetu wamwiwulu. Indi tata yawantu wudi wejima nateli kutiya ñahi neyi anyanindi amudiwula nakutiyilila tata yawantu wacheñi? Komana hanateli kutiya kutamaku?

Yesu walemesheleña Tata yindi wamwiwulu neyi “Nzambi walala wumu hohu,” nawa Yehova walejeli akwakudifukula indi nindi bayi ‘ekela nawakishi akulunjika’ kudi yenaku. (Yowanu 17:3; Kwidika 20:3) Dichi, akwaKristu alala, akeñaña kumuzañalesha Yehova, bayi kumuneñesha hela kumutiyisha kumuchima kutama kuhitila mukuzatila anzambi amakwawuku.—1 Akorinda 8:4-6.

Kuhoña niKupesha

Ñondu waChaaka Chachiha amufwanisha chikupu kukudiza hayuma yamwiwulu. Chaaka nichaaka kalenda yañondu wamuha ayinkaña ijina dakanyama wumu hakachi kawatunyama 12 ekala hamwevulu wawaChina—chazañombi, chisumpa, mpombu, kalulu, nianyama amakwawu. Yililu yawantu avwalikaña munochu chaaka atela ayilukaña kudi kanyama hela diwamwekeshaña nyidimu yatela kuzatawu munochu chaaka. Antu alondela tushidikilu tukwawu twatuha, tudi neyi twakulemesha nzambi wamaheta, kulonda kuleta kukooleka. Indi akwaKristu atela kumona ñahi tushidikilu twamuchidiwu?

Mwizu dindi Bayibolu, Yehova watanyishaña ‘akwakwambula mawulu, niakwakutala tutumbwa, nieluka yamukakweji mukakweji, anyamuki ayamwini kuyuma yikukeña [kuyiwana].’ Wasawili cheñi kudifukula kudi ‘nzambi waKukooleka’ ‘ninzambi Wakuhalwa.’ (Isaya 47:13; 65:11, 12) Chatela akuhweleli muyuma yakubula kwiluka hela kumona yakundama kuwanta wawaspiritu hela tutumbwa, akwakudifukula alala ayileja nawu: “Mukuhweleli Yehova namuchima weyi wejima, bayi wushindamena kukashinshi keyeyi awenuku. Mwitijaña Yehova mwejima muwukwilaña, niyena wakakwolwelaña njila jeyi.” (Yishimu 3:5, 6) Eñañi, kuhoña kweñijaña antu muwuduñu, ilaña chalala chamuBayibolu chayifumishaña muwuduñu.—Yowanu 8:32.

Mwekeshenu Kukeña Kwenu Kudi Nzambi

Kwiluka yuma yekala mutushidikilu nikukuhwelela mukwanakana Ñondu wamuChaaka Chachiha chapela; ilaña kufuukulahu kubula kudiñija mukwanakana kwakala. Neyi mwashakamaña muchituñilu mwekala kashidikilu kakwanakana Ñondu wamuChaaka Chachiha hela neyi chisaka chenu chanakanaña tushidikilu twaChaaka Chachiha neyi dichisemwa, mwatela kufuukulahu chiwahi nankashi.

Eñañi, chakeñekaña kwikala nawulobu nikutatakena hakwila nawu mukoli neyi anakuyikanjikija. Mumbanda wumu mukwaKristu washakamaña mwituña daAsia wahosheli nindi, “Natiyileña woma chikupu muloña antaña ejima adiña nakwanakana chawija chaChaaka Chachiha, ilaña ami hinadiña nakwanakanaku.” Chumanyi chamukwashili? “Natwesheli kwimana chakola kuhitila mukumukeña chikupu Nzambi.”—Matewu 10:32-38.

Komana ninenu mwamukeña Yehova chikupu? Kwosi chuma chatela kuyikañesha kumukeña. Wumi wenu hiwafuma kudi nzambi wakadi kwilukaku, ilaña wafuma kudi Yehova Nzambi, washimunawu muBayibolu nawu: “Kudeyi kwokudi kaseloki kawumi; muchejeji cheyeyi dimu twakamwena chejeji.” (Masamu 36:9) Yehova diyi wayinkaña yakudya nichihandilu chamuzañalu, bayi neyi nzambi wamaheta hela nzambi wakuchisambuku. (Yililu 14:17; 17:28) Komana mukumukeñaña? Ilukenu nenu neyi mukumukeñaña, Yehova wukuyikiswilaña chikupu.—Maku 10:29, 30.

[Tumazu twaheshina]

 [Chikasha/Mwevulu wudi hefu 23]

Kukundeja Amabwambu niAntaña

Chalala, neyi muntu wamuchisaka yaleka kwanakana Ñondu wamuChaaka Chachiha, amabwambu jindi niantaña anateli kuhayama chikupu. Anateli kuhila, nikuneña nankashi. Hela chochu, kudi yuma yimwatela kwila kulonda kutwalekahu kwikala amuzañalu muchisaka. Talenu mazu ahosheli akwaKristu ashakamaña mumaluña ashiyashana muAsia:

Jiang: “Henohu Chaaka Chachiha kanda chishiki, nayili nakuhempula antaña jami nawa nayilumbulwilili chachiwahi muloña wunukubulila kudibomba mukwanakana tushidikilu twachisemwa. Hinadiwili yuma yakuhwelelawuku nawa malwihu enhwileñawu nayakwili nakalemesha kufuma muBayibolu. Ichi chaleñeleli kutachika kuhanjeka chachiwahi hansañu jakuspiritu.”

Li: “Kukamwihi naÑondu wamuChaaka Chachiha, mukubabala nawa nakalemesha nalejeli nfumwami nami natela kutiyilila chinleji chami hakwila nawu nikali wamuzañalu chikupu. Chitwahempwili chisaka chindi hampinji yakunooka, namulejeli cheñi nami hinukumutiyisha nsonyuku. Hefuku dadifukwileña chisaka chindi kudi ankakulula jawu, nadikomokeleli muloña nfumwami wantwalili kwiluña dacheñi kulonda kuya kukupompa kwawakwaKristu.”

Xie: “Nalejeli chisaka chami chinayikeña nawa nayilejeli nami yuma yinakuhwelela yikunkwasha kwikala muntu wamuwahi. Dichi nashileñaku kashinshi kakumwekesha yililu yawakwaKristu yidi neyi kuwunda, nhoshelu yayiwahi, nikukeña. Mukuhita kwampinji, atachikili kulemesha yuma yinakuhwelela. Nkumininaku, nfumwami watachikili kudiza Bayibolu nawa wekalili mukwaKristu walala.”

Min: “Nahosheli nawanvwali jami mukuwunda nawa nakalemesha. Chatela niyileji ‘mazu akukooleka,’ nayilejeli nami mpinji yejima nayilombelañaku kudi Yehova, Nleñi yetu, nami yayikiswili nawa ashakameña mukuwunda nawa mumuzañalu.”

Fuong: “Nalejeli anvwali jami nami hinateli kuhembelela mpinji yaChaaka Chachiha kulonda nakahempuli chisaka chamiku. Navulileña kuyihempula. Ichi chazañaleshileña anvwali jami hama, nawa alekeli kunsawula. Mwanyikami weyala niyena watachikili kudiza chalala chamuBayibolu.”

[Mazu aKusakilila eniMwevulu wudi hefu 20]

Panorama Stock/age Fotostock