Kujahañana Kwamwekeni Mukapeka kaShikola niChayikundejeluwu Hanyima yaMaposu

HEFU datachi dachipapilu chansañu hadiña heyila bwi-i. Asonekeluhu izu dimu munsona jamaneni nawu: “Muloñadi?” Ilu dilwihu lwehwileñawu antu hanyima yakwila mukwenzi wayaaka yakusemuka 17 yayi nakulozañana muWinnenden kukabeta kambwela kaGermany, wajihili antu 15 nawa nkumininaku wadilozeli yomweni. Jimpandelu mwituña dejima daGermany, ajikulwili heshina nawa nsañu yeniyi yakujahañana yatandili mukaayi kejima.

 Winnenden himusumba wenzala maheta nawa wawuwahi, mwenzala nyivinyu nimatempa anyikabu. Hefuku daMarch 11, 2009, kwachiili chachiwahi neyi dikalu haShikola Yeneni yaAlbertville. Neyi mukulabula kwadisu, nampinji yantetemena ya 9:30, kwavwakukili ndombu hamu tuhu nikulundumoka.

Mukwenzi weyala walukukili shikola yatañilileñayi nawuta wanoneliyi mukapeka kawanvwali jindi. Mukulondashana, walozeli akashikola atanu nawana niantañishi asatu mutupeka twashikola tusatu, nawa wakatishili antu amakwawu adiña munjila mwakuhitila. Mumpinji yantesha, akapokola ashikili. Iwu mbanji watemukilili hachipatela chokilañawu antu azaluka. Nawa wajahiluhu iyala wazatileña mudimu wakuwahisha yuma. Kuhiñahu, watambwili motoka nakumwinyika ñendeshi wuta mwikoshi. Chendeluwu hadi makilomita 40, ñendeshi yamotoka waposomokeli nakutemuka. Chashikiliyi halandishilañawu nyotoka, iwu mukwenzi wadiña nawuta wajahili iyala walandishileña nimuntu wenjili nakulanda nawa wakatishili chikupu atupokola ayedi afwilileña kumukwata. Nkumininaku, chashikiluwu akapokola mukamwihi, wadilozeli yomweni kumutu.

Kwesekeja nachahosheli antu amwilukili iwu mukwenzi wadiña nawuta, wadiña mukwenzi walumbuluka wakeñeleña nindi amukeñi kudi antu nikukwata amabwambu. Hanu dinu chumanyi chaluwankeni? Watela wadiña nachineñi, nawa wahemesheleña tumawuta twapepela niyisela yamadombu yahakompyuta. Ilaña antu amakwawu ahoshaña nawu, atwansi amavulu ahemaña yisela yamuchidiwu. Indi antu ajahiliyi? Komana hakulozañana wasakwileña ntahindi, walozeleña hohu? Antu adiña nakufwikija chuma chaleñeleli yalozi anyana awambanda atanu nasatu nakuloza kansi weyala wumu hohu. Kwosi muntu watwesheli kulumbulula chuma chaleñeleli.

Cheliluwu Antu Hakutiya Iyi Nsañu

Heike wahosheli nindi: “Mwanetu weyala chatemesheliyi nshiña nakutuleja kujahañana kwamwekeni hashikola, nahayamini chikupu. Ilaña chinatiyili nyotoka yawakapokola ninyotoka yasendaña antu akata nankashi hiyikusweja kuhitañana, nafwili mutentu.” Hamuloña wakwila akapokola anyakeli kutemukilaku, chakañesheli mukwenzi wadiña nawuta kujaha antu amavulu hashikola. Hanyima yakufumisha antu hashikola, akwakukwasha antu, niakulumpi jansakililu enjili heluña damaposu nawa azatili nañovu kulonda kukwasha akashikola.

Akwakushimuna nsañu ahwilili hashikola, nakwihujola akashikola, amavulu achidiña afwa mutentu. Kadizi wumu wachindili nyotoka 28 yakuyikunzulemba yashiyashana 26 yemeni hanzi yashikola. Akwayikunzulemba kwadiña kudibecha chakala, nawa chumichi chaleñeleli kutachika kushimuna nsañu yakutwamba. Mukwakushimuna nsañu wumu wandeleli chisaka chakansi wamumbanda wajahiluwu hefuku denidi kulonda kuyikwata nyevulu, nawa amakwawu afweteleña akashikola kulonda ayikwati nyevulu. Hamuloña wakusweja kufwa mutentu nakuluwankana kwamwekeni, akwakushimuna nsañu amakwawu chayikalilili kwiluka chakutambula wunsahu walala kubadika akwawu nikutoñojokelaku akwawu nikulemesha antu amweni kukala.

Kwesekeja nachavulaña kumwekana munsañu jamuchidiwu, antu azanzili mesu kunsakililu kulonda ayikundeji nikuyilumbulwila chuma chaleñeleli. Hefuku dajahañenuwu, antu amunsakililu jamboka-mboka apompeleli hamu. Antu amavulu ahamekeli hakuyikwasha. Ilaña antu akeñeleña kuyikundeja Nezu daNzambi hela kuwana ñakwilu yamalwihu awu ayinyeñumwineña  mutu aneñeli hama. Chisaka chimu chayili kuchipenji chakansi wamumbanda watañileña namwanawu weyala. Mama yawantu wahosheli nindi: “Kabiña wumu wamunsakililu wahosheli hakukabakana kwaYoba. Natiyilileña nami wukulumbulula chuma chitwatela kudizilaku hela yashimuni nsañu yakukundeja—ilaña halumbulwiluku. Kwosi niizu dahosheliyi hachaleñeleli Yoba yakabakaneña hela chuma chafuminumu.”

Iyala wumu wahilili chikupu namazu akubula kushikilamu ahosheliyi kabiña wamunsakililu. Iwu iyala wadiña nakudiza Bayibolu nawaYinsahu jaYehova ilaña walekeli kudiza, nawa mwahitili yaaka 30 kufuma halekeliyi. Dichi watachikili cheñi kupompaña nawaYinsahu.

Valisa, kansi wamumbanda wayaaka 14 wadizileña Bayibolu mpinji yejima nawaYinsahu, wadiña mushikola kukamwihi namukapeka mwajahañenenuwu. Chatiyiliyi wuta wunavumi, watachikili kulomba kudi Yehova. Chimwahitili mpinji, amwihwili chatiyileñayi, wahosheli nindi chuma chamwekeni chashikijeweli nsañu yadiziliyi muBayibolu kutalisha hananu mafuku akala akukuminina. (2 Timotewu 3:1-5) A Yinsahu ayedi awambanda adiña nakushimwina mazu akukundeja kudi antuñi nawu. Mumbanda wakashinakaji wayisolomokeli nakuyileja nindi, “Antu amavulu atela ashimwineña neyi chimunakwilenu.” Hamuloña wanichi chuma chakuhayamisha chamwekeni, chaleñeleli antu amakwawu kutiyilila kumazu akuchiñeja nikukundeja kufuma Mwizu daNzambi.

Antu Ashalili naChikela chikupu Munyichima Hanyima Yakujahañana

Kwosi mazu akukundeja atwesheli kumanisha kuhayama nichikela chatiyiluwu antu adiña muniku kukala. Kwosi mazu atwesheli kuwundisha muchima wanvwali wajimbesheli mwana hela kutama kwatiyiliyi kapokola watemukilili kushikola nakuwana hohu ñodindi wudi hadi antu ajahiluwu.

Atudizi apulukili muniwu wubanji, kushilahu niyisaka yawu, ashalili nalumbajibaji chikupu munjila jamboka-mboka. Vassilios wakilukili nakwidikila hanjanina chelili mukwenzi weyala yatachiki kulozañana. Wahosheli nindi, “chinakilukili hanjanina, nalombeli kudi Yehova. Natoñojokeli nami inakufwa. Nelukili chikupu nami dikwadiña kulomba kwami kwakukumishaku.” Munyilungu yalondeleluhu, waloteleña yuma yamutiyishileña woma, nawa hakeñeleña kuhosha namuntuku. Chamuneñesheleña nankashi hakumona akwayikunzulemba chadibecheleñawu hakushimuna nsañu yakujahañana kweniku niantu abula wushona chashiluwu hohu maana hakukeñakeña nsañu. Chimwahitili mpinji, watwesheli kutwalekahu nawumi windi neyi chinakuhandayi chayinu mpinji.

Jonas wadiña mukapeka kashikola kokamu naVassilios nawa wamweni chayijahiluwu akwawu atanu mwatañilileñawu. Wahosheli nindi: “Hayina mpinji natwesheleña kulumbulula chuma chamwekeni; chadiña neyi kwiji muvwimbimbi wakutiyisha woma. Ilaña chayinu mpinji, chankalilaña kulumbulula chikupu chinatiyaña. Nelaña aha nihila aha nehi. Mpinji yikwawu hinakeñaña kuhosha haniyi nsañuku; ilaña mpinji yikwawu, nahoshañahu hama.” Niyena walotaña yuma yamutiyishaña woma nawa hakamaña chachiwahiku.

Chimwahitili mafuku, akashikola ayifuntishilili yuma yawu yashalili mutupeka twashikola. Akwakuuka antu alotaña yuma yakutiya woma ahosheli nawu akashikola chamonawu yuma yawu akutachika kwanuka chuma chamwekeni. Hakusambila, Jonas hakeñeleña nikukwata kukahuma kindi, fuuba yanyikanda, nikwitepa dakuvwala hakatukutuku kinduku. Cheñi nawa watiyileña woma chamonayi muntu wafwana mukwenzi wajahañeni hela wunasendi fuuba yakweleka munyima neyi yadiña namukwenzi wajahañeni. Neyi  anvwali jindi anakutala muvwimbimbi nawa kuvuma wuta, watiyileña woma nankashi. Andotolu esekeli kukwasha antu amweni iku kukala kulonda aleki kwanuka chuma chamwekeni chayishilili chikela.

Jürgen, tata yaJonas, wazatilaña muchipatela mwajahiluwu mukwanyidimu wumu. Wahosheli nindi anvwali amavulu niakwawu mwazatilañawu amweneña kukala nakudihula malwihu akwila nawu muloñadi? cheñi nawu indi neyi? Chakutalilahu, mumbanda wumu wazatilaña hachipatela, wamumweni mukwenzi wajahañeni nakuhita, wayandileña nayitoñojoka yakwila nindi mutenowu chiña walonzeli chakwila niyena wakeñekeleña kumwinka yitumbu yenkañawu antu azaluka.

Antu Amakwawu Chayikwashiluwu Hakwila Nawu Omiki

Chumanyi chayikwasha amakwawu kuumika nachuma chatama chamwekeni? Jürgen wahosheli nindi: “Hela chakwila mpinji yikwawu chakalaña, chachiwahi kushakama hamu nawakwenu. Chiweluka neyi antu amakwawu akwakamenaña, nawa hiwudi nkaweyuku, chakwashanaña.”

Jonas niyena wasakililaña nindi antu amakwawu amwakamenaña nawa wahosheli nindi: “Amavulu antuminaña makaadi nimazu akunkundeja. Amakwawu anlejaña nsona yamuBayibolu, nawa najitañaña. Ichi chachiwahi hama.” Chumanyi chikwawu chamukwashaña? “Neyi nibazumuka nawufuku nawa nikañanya kuumika, nalombaña. Mpinji yikwawu natiyililaña kutumina hela kuAwake! yakukwatila hatepu.” * Watwalekeluhu nindi: Bayibolu yatulejaña chamwekenaña yuma yejimiyi: muloña Satana diwayulaña kaayi, nawa tunakushakama mumafuku akukuminina. Tata yindi wahosheli nindi kwiluka iyi nsañu kwayikwashaña kuumika.

Katata Makabi Amani

Mumafuku antesha hohu, kumbidi yashikola ashiluku jinsela, jinkenu, ninyikanda. Kerstin wamweni nindi antu amavulu asonekeli mazu akwihula muloñadi chuma chamuchidiwu chichamwekeneni nimuloña Nzambi walekeleliyi nindi chimwekani. Chelukiliyi nindi awa malwihu anakukeñeka kuyakula, Kerstin niaYinsahu amakwawu ayedi asonekeli mukanda nakuwisha hanyikanda yikwawu.

Chashikili mpinji yakwanakana antu afwili, chikunzulemba chimu chamwekesheli mukanda windi nawa atañili mazu adiña hewulu akwila nawu: “Muloñadi? Munanu mafuku akukuminina, ilu lwihu alwihulaña nankashi, sweje-e lwihu lwakwila nawu: Indi Nzambi wadiña kudihi? Nawa muloñadi chetejeleliyi chuma chamuchidiwu?” Chawushona, mazu akuminini hohenaha.

Muloñadi chitunadishoneni? Muloña iwu mukanda watwalekeluhu nakulumbulula kwafumini makabi ejima nawa washimwini nawu Nzambi “wukamona chikupu nindi yuma yatama yejima yinakoñi antu anayifumishuhu.” Cheñi watwalekeluhu nawu: “Mumukanda wakukumishaku muBayibolu, Nzambi wahosha nindi wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.” Yehova Nzambi wakasañula afu. Muchiyulu chaWanta windi wunakwinza katataka, himwakekala makabi, kujahañana, hela kukabakanaku. Nzambi wakana nindi: “Tiya, hinukubalumuna yuma yejima yiikali yayiha.”—Chimwekeshu 21:4, 5.

[Tumazu twaheshina]

[Mwevulu wudi hefu 12]

Jonas watambwili kaadi hadiña mazu akwila nawu, “Twakwanukaña”

[Mazu aKusakilila eniMwevulu wudi hefu 9]

Focus Agency/WPN

[Mazu aKusakilila eniMwevulu wudi hefu 9]

© imagebroker/Alamy

[Mazu aKusakilila eniMwevulu wudi hefu 10]

Foto: picture alliance

[Mazu aKusakilila eniMwevulu wudi hefu 11]

Foto: picture alliance