“Nukudila Dile-e Kushika Kumwakanyi?”

Jayne hakudila wahosheli nindi: “Inakukeña hohu jinakukata jileki!” Wadiña nachikatu chakansa, nawa chadiña nakusambukila mujimba wejima. Chisaka chindi niamabwambu jindi atoñojokeleña nawu mutenowu adi kumanisha musoñu nihuñu damweneñayi. Alombeleña kudi Nzambi nawu yamukwashi. Komana Nzambi watiyileña kulomba kwawu? Wamukwashili?

NZAMBI wamonaña chahandañawu antu. Izu dindi Bayibolu, dahosha nawu: “Kuleña kwejima kwaabaña nakufunyisha hamu, nikulelu.” (Aroma 8:22) Nzambi weluka nindi yihita yawantu amavulu, adi neyi Jayne, ifuku nifuku anakumona ihuñu, kumujimba, nimuyitoñojoka. Nzambi wamonaña yihita yawantu 800 akamaña nanzala mpinji yejima, niyihita yikwawu ahumpulañawu muyisaka, nianvwali amavulu akamenaña hachihandilu chakumbidi nihachihandilu chawanyanawu. Komana mwatoñojokaña nenu Nzambi wamba kamanisha awa makabi? Eñañi, chineli twakeñaña kukwasha antu itwakeña, komana Nzambi hakeñaña kukwasha antu, aleñayuku?

Neyi mwehulahu dehi malwihu amuchidawa, hiyenu hohu mwehulañaku. Kubadika hadi yaaka 2,600 yinahituhu, Habakuki, muntu washinshika, watiyili neyi chatiyañawu antu amavulu makonu, nawa wamwihwili Nzambi nindi: ‘Eyi Yehova, nukudila dile e kushika kumwakanyi chakadi eyi kutiya? Nabidiki kudeyi jamadombu, eyi kwamwina nehi. Wanmwekeshelañadi kuluwa? Wantalishilañadi kuyuma yakala? Muloña kumesu ami kudi nakumwekana nikukisañana nimadombu, kudi nakunyamuka nikuzuñazuña niyikonkojola.’ (Habakuki 1:2, 3) Habakuki, kaprofwetu wachiHeberu, wamweni yuma yomisha mbaña yamadombu nikuzuwa mumpinji yindi. Makonu, yuma yamuchidiwu diyi yinakumwekana mafuku ejima yaneñeshaña antu akweti wushona.

Komana Nzambi wamudiwili Habakuki hamalwihu enhwiliyi? Hamudiwiluku. Watiyilili kumalwihu aHabakuki nawa wamukundejeli nikumukolesha iwu iyala waneñeli. Yehova Nzambi wakolesheli chikuhwelelu chaHabakuki kuhitila mukumukana nindi wakamanisha makabi. Mazu aNzambi akuchiñeja anateli kuyikolesha ninenu, neyi chiyamukolesheluwu Jayne nichisaka chindi. Nyitu yinalondeluhu yikwakula awa malwihu akwila nawu: Tunateli kwiluka ñahi netu mwalala Nzambi watwakamenaña? Chumanyi chakakoñayi Nzambi hakumanisha makabi, nawa mpinjinyi?