Wakeñaña Nindi Tushakameña Chachiwahi
Kundamenu Kwakwihi naNzambi
Wakeñaña Nindi Tushakameña Chachiwahi
ANVWALI akamenaña akeñaña nawu anyanawu akashakameña chachiwahi, akekali nachihandilu chachiwahi. Yehova, Tata yetu wamwiwulu niyena wakeñaña nindi anyanindi ahamaseki ashakameña chachiwahi. Hamuloña wakutwakamena, Yehova watulejaña njila yakushakaminamu chachiwahi. Chakutalilahu, talenu mazu ahosheliyi Yehova kudi Yoshuwa, asonekawu haYoshuwa 1:6-9.
Talenu haniwu mwevulu. Chafwiliyi Mosi, Yoshuwa wekalili nlomboli yawaIsarela, nawa antu wenawa adiña amavulu chikupu. A Isarela adiña nakudiloñesha kulonda kwiñila mwituña dakaniniyi Nzambi kwinka ankakulula jawu. Nzambi wamwinkeli Yoshuwa nshimbi. Kushakama chachiwahi kwashindameneni hakujilondela. Ilaña nshimbi yeniyi hiyadiña yakumukwasha Yoshuwa hohuku. Neyi tuzatisha iku kufumba, anetu nawa tunateli kushakama chachiwahi.—Aroma 15:4.
Yehova wamulejeli Yoshuwa kudikwatisha nikumika chacheni bayi neyi kamu hohuku ilaña kapampa kasatu. (Mavasi 6, 7, 9) Chakadi nikujina, Yoshuwa wateleleli kuumika nikudikwatisha kulonda kulombola munza chachiwahi nakwiñila Mwituña daChikaninu. Hanu dinu, wateleleli kwikala ñahi womika nikudikwatisha?
Nyikanda yonenawu diyi yamukwashili Yoshuwa kuumika nikudikwatisha. Yehova wahosheli nindi: “Wakashuku muchima wakwila mwaya nshimbi jakulejeliyi kambuñami Mosi mwejima.” (Vasi 7) Haniyi mpinji, Yoshuwa wadiña hohu nanyikanda yantesha yamuBayibolu yasonekeluwu. * Hela chochu, kwikala hohu Nezu daNzambi hikwadi kumukwasha kushakama chachiwahuku. Hakwila nawu yahetelumu, Yoshuwa wateleleli kwila yuma yiyedi.
Chatachi, Yoshuwa wateleleli kudizaña mpinji yejima izu daNzambi. Yehova wahosheli nindi: “Wakatoñojokañamu nimwaana niwufuku.” (Vasi 8) Mukanda wumu wahosha nawu: “Nzambi wamulejeli Yoshuwa kwanukaña Nshimbi Jindi kuhitila ‘mukuhoshela mumuchima,’ ‘kutoñojokahu chikupu,’ hela ‘kusoneka yuma yadizileñayi.’” Kutaña nikutoñojoka Hezu daNzambi ifuku nifuku kwamukwashili Yoshuwa kwiluka mwakumanishila kukala kwadiña hambidi.
Chamuchiyedi, Yoshuwa wateleleli kuzatisha yuma yadizileñayi Mwizu daNzambi. Yehova wamulejeli nindi: “Wakashuku muchima wakwila mwejima mwanasonekuwu, dichi wakakooleka munjila yeyi.” (Vasi 8) Kwila mwaya kukeña kwaNzambi kwamukwashili Yoshuwa kushakama chachiwahi. Indi wadi kukañanya ñahi? Kukeña kwaNzambi mpinji yejima kwashikijewaña.—Isaya 55:10, 11.
Yoshuwa walondeleleña kufumba kwaYehova. Chafuminumu, wadiña nachihandilu chachiwahi nankashi hakwikala mukwakudifukula waYehova washinshika.—Yoshuwa 23:14; 24:15.
Komana ninenu munakukeña kushakama chachiwahi neyi chashakaminiyi Yoshuwa? Yehova nakukeña nindi mushakameña chachiwahi. Ilaña kwikala hohu Nezu dindi Bayibolu, hichakwashanañaku. MukwaKristu wumu washinshika hadi yaaka yayivulu wahosheli nindi: “Twatela kutaña Bayibolu nikuzatisha yuma yitunakudiza.” Neyi mukudizaña izu daNzambi mpinji yejima nikuzatisha yuma yimwadizaña muchihandilu chenu, kufwana Yoshuwa, ‘mwakakooleka munjila jenu.’
[Tumazu twaheshina]
^ Nyikanda yonenewa yadiña naYoshuwa hadaha yabombelelumu nyikanda yitanu yasonekeliyi Mosi (Kutachika, Kwidika, Alevi, Kuchinda, niKuhituluka), mukanda waYoba kushilahu nimukanda wumu hela yiyedi yamasamu.