Dizishenu Anyanenu

Yeremiya Halekeli Kumukalakela Nzambuku

KOMANA mwaneñahu dehi chakwila mutachika nikutoñojoka jakuleka kumukalakela Nzambi?— * Dichatiyañawu antu amavulu. Dichatiyiliyi mukwenzi weyala Yeremiya. Hela chochu, halekeli mazu ahosheleña antu amakwawu hela yuma yelileñawu yimuleñeli kulekaku. Tushinshikenu chamuleñeleli Yeremiya kwikala muntu walema kudi Nzambi, hela chakwila watoñojokeli jakuleka kumukalakela.

Henohu Yeremiya kanda yasemuki, Nzambi walala, Yehova, wamutondeli kwikala kaprofwetu kulonda kuleja antu nawu hiyamuzañalesheleña Nzambuku. Muneluki mazu ahosheliyi Yeremiya kudi Yehova chimwahitili yaaka?— Wahosheli nindi, “Ami hineluka kuhoshaku, muloña nikansi.”

Munatoñojoki nenu Yehova wamwakwili nindidi Yeremiya?— Wamulejeli munjila yayiwahi nindi: “Bayi wuhosha neyi, Nikansuku. Muloña wakaya kudi antu ejima kunakakutemesha, wakahosha yejima yinakakuleja. Bayi wakayitiyaña womaku.” Muloñadi? “Ami nidi neyi, nakakupulwishaña,” dimu mwanahoshiyi Yehova.—Yeremiya 1:4-8.

Hela chochu, neyi chitwashimuna dehi, mukuhita kwampinji Yeremiya waneñeli. Waneñeli muloña antu adiña nakumudiwula hakumukalakela Nzambi. Wahosheli nindi: “Ami nekali dehi muntu wakusehewa mwaana wejima, hiyakunyiñila kudi antu ejima.” Dichi wafuukwiluhu kuleka. Wahosheli nindi, “Hinukumutenaku [Yehova], hinukuhosha cheñi mwijina dinduku.” Komana mwalala walekeli kumukalakela Nzambi?

Yeremiya wahosheli nindi, ‘Mumuchima wami izu daYehova dadiña neyi kesi kadi nakuñocha kanjikiluwu mumafwahami hinukuzeya nakudilekesha kutwesha kumwena nehi.’ (Yeremiya 20:7-9) Hela chakwila mpinji yikwawu Yeremiya watiyili woma, hamuloña wakumukeña Yehova halekeli kumukalakelaku. Tushinshikenu munjila mwamukiñililuwu Yeremiya hamuloña wakubula kuleka kumukalakela Nzambi.

Yehova wamulejeli Yeremiya kusoñamisha antu nindi Yerusalema akamujilumuna neyi antu abula kuleka njila jawu jatama. Chayilejeliyi Yeremiya antu awa mazu,  antu ahilili nankashi nawa ahosheli nawu: “Muntu iwu nateli kufwa.” Ilaña Yeremiya wayilembeleli nindi ‘ovwahili izu daYehova.’ Cheñi wahosheli nindi: ‘Neyi mwakanjaha mwakadikojeja mashi akadi muloña, muloña Nzambi diyi wunantemeshi kudenu nihoshi mazu awa ejima kumatu enu.’ Komana muneluki chuma chamwekeni?—

Bayibolu yahosha nawu: “Atulamba nawantu ejima hiyakuhosha nawatupristu nawatuprofwetu, nawu, Muntu iwu hanateli kufwaku. Muloña yena nahoshi nanetu mwijina daYehova Nzambi yetu.” Yehova wamukiñili Yeremiya, hampinji yabulili kwitejayi woma wumuleñeli kuleka kumukalakela Nzambi. Tutalenu chuma chamwekeni kudi Uriya, kaprofwetu mukwawu waYehova, wazatili munjila yambukaku.

Bayibolu yahosha nawu, ‘Uriya niyena waprofweteli chakuzuwila Yerusalema mwomunayi mazu aYeremiya ejima.’ Ilaña chelili Mwanta Yahoyakimi yamuhilili Uriya, muneluki chuma cheliliyi Uriya?— Watiyili woma, walekeli kwila kukeña kwaNzambi, nawa watemukilili kuEjipitu. Dichi mwanta watemesheli antu jindi kuya nakumukeña kulonda amufuntishi. Chamufuntishiluwu, muneluki chuma chakoñeliyi iwu mwanta watama?— Wamujahili Uriya nampoku yakabaali!—Yeremiya 26:8-24.

Muloñadi chimukuhoshela nenu Yeremiya amukiñili kudi Yehova ilaña Uriya hamukiñiluku?— Hela chakwila Yeremiya watiyili woma, neyi chatiyiliyi Uriya, ilaña Yeremiya halekeli kumukalakela Yehova nakutemukaku. Halekeluku. Chumanyi chitukudizila kuchakutalilahu chaYeremiya?— Tunakudizilaku netu mpinji yikwawu chinateli kutukalila kwila mwatulejañayi Nzambi, ilaña mpinji yejima twatela kumukuhwelela nikumwovwahila.

[Tumazu twaheshina]

Malwihu:

○ Indi Nzambi wamwinkeli Yeremiya mudimwinyi?

○ Muloñadi Yeremiya chakeñeleleñayi kuleka kumukalakela Nzambi?

○ Muloñadi Yeremiya chamukiñililuwu, ilaña Uriya nehi?

○ Chumanyi chimunadizili kuchakutalilahu chaYeremiya?