Malwihu Ehulañawu Antañi . . .

Komana Yesu Diyi Mikeli Mukulumpi Wawañelu?

▪ Chakadi nikujina diyi. Muyisemwa yayivulu, mwekala kashidikilu kakutumba muntu majina ayedi hela asatu. Nimajina amuBayibolu niwena chochimu. Chakutalilahu, nkakulula Yakoba niyena amutumbili nawu Isarela. (Kutachika 35:10) Kapostolu Petulu amutumba majina amboka-mboka atanu mwidimi datachi, Shimona, Simeyona, Petulu, Kefwasi, niShimona Petulu. (Matewu 10:2; 16:16; Yowanu 1:42; Yililu 15:7, 14) Tunateli kwiluka ñahi netu Mikeli didi ijina dikwawu daYesu? Talenu wunsahu wamuBayibolu.

Ijina daMikeli damwekanaña mapampa katanu muBayibolu. Mumukanda waDanyeli damwekana mapampa kasatu. HaDanyeli 10:13, 21, twatañañahu netu kañelu atuminuwu, amupulwishili kudi Mikeli, atenawu nawu “kalamba wumu wahadi atulamba abadika” nawa “kalamba kenu.” Cheñi, haDanyeli 12:1, twatañañahu netu hamafuku akukuminina, “Mikeli wakemana, yowu kalamba muneni wemenaña akwamuza wenu.”

Mikeli amutena cheñi haChimwekeshu 12:7 hamulumbululawu nawu “Mikeli nawañelu jindi,” anakwasa njita yeneni nawa chafuminumu, Satana Diyabolu niañelu jindi atama ayihañili mwiwulu.

Ilukenu nenu munsañu yejima yinashimunuwu hewulu, Mikeli anamulumbululi neyi hikañelu wunakulwa njita nikukiña antu jaNzambi, hamu tuhu nikushinda Satana chilumbu muneni waYehova.

HaYuda vasi 9 amutena Mikeli nawu “mukulumpi wawañelu.” Hamukanda wa 1 Atesalonika 4:16 dihu hamutenawu mukulumpi wawañelu, Pawulu wamuteneni Yesu wasañukili nindi: “Mwanta wakasuluka kwiwulu nakabobobu, nezu damukulumpi wawañelu, nampuña yaNzambi.” Dichi Yesu Kristu anamulumbululi nawu mukulumpi wawañelu, hela mwanta wawañelu.

Kwesekeja naniyi nsañu, tunateli kukunkulula netudi? Netu Yesu Kristu diyi Mikeli mukulumpi wawañelu. Majina ejima ayedi—Mikeli (datalisha mukwila nawu (“Hinyi Wesekana naNzambi?”) niYesu (datalisha mukwila nawu Yehova Diyi Chamwinu) amwekeshaña mudimu wukwetiyi wakwimenaku wanta waNzambi. Afwilipi 2:9 hahosha nawu: “Nzambi nawa namutuumbakeshi chakubadika, [Yesu walemeshewa] namwinki ijina dabadika majina ejima.”

Chalema kwiluka netu hampinji yavwalikiliyi Yesu mumujimba wawuntu, hidihu hatachikili wumi winduku. Henohu Yesu kanda yavwaliki, kañelu wamuhempwili Mariya nakumuleja nindi wakabaaba ivumu nikuvwala mwana kuhitila muspiritu yajila nawa wakamutumba ijina nindi Yesu. (Luka 1:31) Hampinji yakalakeleñayi mudimu windi wakushimwina, Yesu wavulileña kuhosha hakuhanda kwindi kwamwiwulu.—Yowanu 3:13; 8:23, 58.

Dichi, Mikeli mukulumpi wawañelu diyi Yesu muwumi windi wamwiwulu. Chiyamusañwiluwu nakufunta mwiwulu, Yesu watwalekeluhu namudimu windi neyi Mikeli, mwanta wawañelu, “kulonda kulemesha Nzambi Tata.”—Afwilipi 2:11.