Nsañu Yatañishileñayi Yesu Hadi Nzambi

“Hikwekala nawa wamwiluka Tataku, amwiluka kudi Mwana hohu, nimuntu anetejiyi Mwana kumumwekeshelayi.”—LUKA 10:22.

HENOHU kanda yenzi hamaseki, Mwana kaNzambi wawedi washakamini naTata yindi hadi yaaka yayivulu. (Akolose 1:15) Dichi, Mwana welukili yitoñojoka, yaTata yindi, yililu yindi ninjila jindi. Yesu chenjiliyi hamaseki namujimba wawuntu hamu neyi mwana, wakeñeleña kutañisha chalala hadi Tata yindi. Tunateli kudiza nsañu yayivulu hadi Nzambi kuhitila mukutiyilila yuma yahosheliyi iwu Mwana.

Ijina daNzambi Yesu walemesheli nankashi Ijina dabadika daYehova. Iwu Mwana wakeñewa wakeñeleña antu amakwawu kwiluka nikuzatisha ijina daTata yindi. Ijina daYesu dalumbulula nawu “Yehova diyi Chamwinu.” Hawufuku welili kanda yafwi, Yesu walombeli kudi Yehova nindi “Nayileji ijina deyi kulonda adiluki.” (Yowanu 17:26) Hichatuhayamishaña hakwiluka netu Yesu wazatishili ijina daNzambi nikudishimuna kudi antu amakwawuku. Nawa cheñi, indi antiyilili aYesu ateleleli kwiluka ñahi chalala hadi Yehova chakadi kwiluka ijina Dindi nichidalumbuluka? *

Kukeña kwaNzambi kwabadika Mpinji yimu yalombeleñayi Yesu kudi Nzambi wahosheli nindi: “Tata, . . . wankeñeli helili chikuku champata yamunu mwishina chichidi kanda.” (Yowanu 17:24) Chineli wamweni kukeña kwaNzambi hampinji yadiñayi mwiwulu, chenjiliyi hamaseki wakeñeleña kumwekesha iku kukeña munjila jajiwahi jamboka-mboka.

Yesu wamwekesheli nindi kukeña kwaYehova kwabadika. Yesu wahosheli nindi: “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.” (Yowanu 3:16) Izu dachiGriki dakwila nawu, “mpata yamunu mwishina” hidabalumunaña “isekuku.” Neyi chinadizatishuwu haniyi nsona, datalishaña kudi antu ejima. Dichi Nzambi waswejeli kukeña antu nawa waheni Mwanindi walemeshayi chikupu kulonda antu ashinshika ayikuuli kunshidi nikufwa nikwikala nakuchiñeja kwawumi wahaya nyaka. Hitukutwesha kwiluka chikupu hakumina iku kukeña kwabadikaku.—Aroma 8:38, 39.

Yesu wakonkomweneni hachalala chatukoleshaña chikupu chakwila nawu: Yehova wayikeña nankashi akwakudifukula indi hamuntu hamuntu. Yesu watañishileña nindi Yehova wudi neyi kabiña walemeshaña chikupu anyikoku indi. (Matewu 18:12-14) Yesu wahosheli nindi, kwosi kajila kanyanya kaholokaña heseki chakadi kukiluka kudi Yehovaku. Yesu watwalekeluhu nindi: “Ninsuki jakunyitu yenu jajeni ajichinda dehi jejima.” (Matewu 10:29-31) Neyi chakwila Yehova welukaña nindi kajila kamu hikadi muchisakalaku, komana hamonaña nikwakamena akwakudifukula indi hamuntu hamuntuku? Neyi chakwila nsuki jakumutu wetu jejima anateli kujichinda nikujiluka kudi Yehova, kuduhu chuma chidi chejima muchihandilu chetu, chidi neyi yuma yitwakankilaña, yitwakabakanaña, niyatuneñeshaña yinateli kubula kwilukayi?

Tata wamwiwulu Neyi chashimunawu muchibaaba chinafumuhu, Yesu diyi Mwana kaNzambi wumu hohu. Hichakuhayamishaku, iwu Mwana wakeñewa wavulileña kuhosha hadi Yehova nindi “Tata” yindi. Nawa mumazu aYesu atachi asonekawu, ahosheliyi mutembeli hampinji yadiñayi nayaaka 12, wamuteneni Yehova nindi “Tata yami.” (Luka 2:49) Izu dakwila  nawu “Tata” damwekanaña kwakwihi namapampa 190 munyikanda yaNsañu Yayiwahi. Yesu wahosheli munjila jamboka-mboka hadi Yehova nindi “Tata yenu,” “Tata yetu” nawa nindi “Tata yami.” (Matewu 5:16; 6:9; 7:21) Kuhitila mukuzatisha iji nkumbu nankashi, Yesu wamwekesheli nindi antu akwanshidi nawa abula kuwanina anateli kwikala nawubwambu wawuwahi naYehova.

Wawushona nawa wanakenaña Yesu welukili nindi antu abula kuwanina akeñaña kuyanakena chikupu kudi Yehova. Muchishimu chindi chamwana wajimbeli, Yesu wamufwanishili Yehova kudi nvwali wukweti wushona, wanakenaña nikutambwila cheñi mwana wunabalumuki mumuchima. (Luka 15:11-32) Dichi, mazu aYesu atukonkomwenaña nawu Yehova wamona kubalumuka kwamuntu wabula kuwanina nawa dikwaleñelaña yamutiyili luwi. Yehova wakeñaña kwanakena mukwanshidi wunabalumuki mumuchima. Yesu wahosheli nindi, “Nukuyileja nami, mwiwulu, neyi akumona mukwanshidi wumu nabalumuki mumuchima, mukwikala muzañalu wakubadika muzañalu wakuzañalala namakumi atanu nawana natanu nawana awantu aloña anabuli nsañu yakubalumuka mumuchima.” (Luka 15:7) Hinyi wukubula kukeña kukundama kudi Nzambi wamuchidiwu waluwi?

Watiyaña mwalombañawu Hampinji yadiñayi mwiwulu henohu kanda yenzi hamaseki, Yesu wadimweneni namesu kapu nindi Yehova “Watiyaña mwalombañawu” nawa watiyaña kuwaha kulomba kwawakwakudifukula indi ashinshika. (Masamu 65:2) Dichi, hampinji yazatileñayi mudimu windi wakushimwina, Yesu wadizishili antiyilili indi chakulomba niyuma yatela kulombawu. Wayifumbili nindi, ‘Bayi muhituluka nakutenatena chuma chochimuku.’ Wakonkomweneni antiyilili indi kulombaña kukeña kwaNzambi ‘akwili hamaseki neyi chakwilañawu mwiwulu.’ Anetu nawa tunateli kulomba yakudya yitwakeñaña, kutwanakena nshidi jetu, nikushinda kweseka. (Matewu 6:5-13) Yesu watañishili nindi Yehova wakulaña kulomba kwawambuñindi munjila yayiwahi, nikulomba kwawu kwalombañawu muchikuhwelelu.—Matewu 7:7-11.

Hakwila nawu yayishiki hanyichima, Yesu wafwilileña kuyileja chalala hadi Yehova nichekalayi Nzambi. Ilaña kudi chuma chikwawu kutalisha hadi Yehova chafwilileñayi Yesu kuyilejayi, dikwila nawu njila yakazatishayi Yehova hakuleta kuhimpika mukaayi kejima kulonda kushikija kufuukula Kwindi kudinu iseki nikudi antu. Mwalala, iyi nsañu diyadiña mutu washimwineñayi Yesu.

[Tumazu twaheshina]