Nsañu Yatañishileñayi Yesu haWanta waNzambi

“Yesu hakuya nakuhitahita nimunyikala yamaneni nimunyikala yanyanya, hakuyishimwina . . . nsañu yawanta waNzambi yayiwahi.”—LUKA 8:1.

TWAKEÑAÑA kuhosha hayuma yitwalemesha, niyuma yitwakeña. Neyi chahosheliyi Yesu nindi, “kanwa kahoshaña yuma yinalumbami mumuchima.” (Matewu 12:34) Neyi tushinshika hayuma yahosheleñayi Yesu hampinji yadiña nakushimwinayi, tunateli kuhosha netu walemesheli chikupu nsañu yaWanta waNzambi.

Indi Wanta waNzambi hichumanyi? Wanta hinfulumendi yayulewaña namwanta. Dichi Wanta waNzambi hinfulumendi yemikawu kudi Nzambi. Yesu wahosheleña chikupu haWanta waNzambi, nawa diwadiña mutu wansañu yashimwineñayi. Iwu wanta awutena kubadika hamapampa 110 munyikanda yiwana yaNsañu Yayiwahi. Ilaña Yesu hatañishileña hohu namazuku. Yililu yindi yamwekesheleña yuma yayivulu kutalisha haWanta waNzambi niyuma yiwukakoña.

Indi Mwanta hinyi? Mwanta waWanta waNzambi hiyamusakulaña kudi antu hakwila nawu yekali hanaka kadiduku. Ilaña, iwu Nyuli amutonda kudi Nzambi. Yesu walumbulwili muntañishilu yindi nindi, amutonda kudi Nzambi kwikala Mwanta.

Yesu welukili nindi wuprofwetu wamuBayibolu washimwineñahu dehi nawu Mesiya akaninuwu wakayula muWanta haya nyaka. (2 Samweli 7:12-14; Danyeli 7:13, 14; Matewu 26:63, 64) Ilukenu nenu Yesu wahosheli hatooka nindi wadiña Mesiya ashimwineñawu dehi. Dichi Yesu wetejeli nindi wadiña Mwanta atondeluwu kudi Nzambi. (Yowanu 4:25, 26) Mwalala, Yesu wavulileña kuzatisha mazu akwila nindi, “Wanta wami.”—Yowanu 18:36.

Yesu watañishileña cheñi nindi kwakekala antu akayulayi nawu muWanta. (Luka 22:28-30) Awa anyuli akayulayi nawu wayiteneni nindi “kamukanka kwawanyikoku antesha,” muloña nambaala yawu yekala yantesha. Wayilejeli nindi: “Tata yenu watiyaña kuwaha kuyinka wanta.” (Luka 12:32) Mukanda wakukumishaku wamuBayibolu wamwekeshaña nawu antu akushika ku 144,000 diwu akekala nakukooleka kwakuyula naKristu.—Chimwekeshu 5:9, 10; 14:1.

Indi Iwu Wanta wekala kudihi? Yesu walejeli nyuli wawaRoma wejina daPontusi Pilatu nindi, “Wanta wami hiwampata yamunu mwishinaku.” (Yowanu 18:36) Wanta waNzambi wudi mumakasa aKristu hiyakawuyula kudi antuku. Yesu wavulileña kutena Wanta waNzambi nindi, “wanta wamwiwulu.” * (Matewu  4:17; 5:3, 10, 19, 20) Dichi Wanta waNzambi, hinfulumendi yamwiwulu.

Yesu welukili chikupu nindi wakafunta mwiwulu hanyima yakushakama mpinji yantesha hamaseki. Wahosheli nindi wukuya “nakuyiloñeshela mwakushakama,” nakwenzulula njila yawantu akayulayi nawu kulonda akekali nindi.—Yowanu 14:2, 3.

Indi Wanta Wakoñaña Chumanyi? Yesu walejeli antiyilili indi kulomba kudi Nzambi nawu: “Wanta weyi winzi. Muchima weyi awili hamaseki neyi chawilañawu mwiwulu.” (Matewu 6:9, 10) Muchima waNzambi anakuwila mwiwulu. Kukeña kwaNzambi hamaseki anakukwila kuhitila muWanta. Hakwila nawu kukeña kwaNzambi akwili hamaseki, Wanta wakahimpa chikupu yuma hamaseki.

Chumanyi chakakoña Wanta hamaseki? Yesu watañishili nindi Wanta waNzambi wakamanisha kutama kuhitila mukufumishahu antu akoñaña yuma yatama. (Matewu 25:31-34, 46) Dihamba kamana majika kanwa ejima nikutama. Yesu watañishili nindi, iseki dakenzala nawantu “ovwaha,” aloña, awushona, “atooka munyichima,” niakwakuleta kuwunda.—Matewu 5:5-9.

Komana antu aloña akashakama heseki datamishawu? Inehi! Yesu wakanini nindi iseki akadibalumuna chikupu muchiyulu chaWanta waNzambi. Iyala apopeleluwu hamu naYesu wahosheli nindi: “Eyi Yesu, kañanukaña chiwakenza muwanta weyi.” Yesu wamwakwili nindi: ‘Chalala nukuleja lelu nami, wukekala nanami muparadisa.’ (Luka 23:42, 43) Eñañi, Wanta waNzambi wakabalumuna dinu iseki kwikala paradisa neyi chochadiña itempa daEdeni.

Yumanyi yikwawu yakakoñelawu antu kudiwu Wanta? Kudi yuma yayivulu yakoñeliyi Yesu kubadika kukana hohu yuma yakakoña Wanta waNzambi. Walumbulwili cheñi yuma yakakoña iwu Wanta. Yesu wokili  muchihayamisha, nakumwekesha yuma yayivulu yakakoñayi kumpinji yakumbidi hampinji yakayulañayi muWanta. Nsañu Yayiwahi yonenawu yahosha hadi Yesu nawu: “Hakwendujola mwahita Ñaliliya yejima nakuyilejaleja mumashikolawu, nikushimuna nsañu yawanta yayiwahi, nikuuka nyisoñu yeñi nayeñi, niyikatu yeñi nayeñi yadiñi nawantu.”—Matewu 4:23.

Yesu wokili nyisoñu yayivulu. ‘Watonesheli mesu amuntu wavwalikili mputamesu.’ (Yowanu 9:1-7, 32, 33) Yesu wamukunkili iyala wadiña wakata mbumba nakumuuka. (Maku 1:40-42) Chamuleteleluwu “muntu wajika matu wakukumaña,” Yesu wamwekesheli nindi ‘wajika matu nateli kumutiyisha; nikamama nateli kumuhoshesha.’—Maku 7:31-37.

Mwanta watondawu kudi Nzambi wadiña nañovu jakusañula afu. Kapampa kasatu, Yesu wasañwili afu. Wasañwili mwana kamumbanda nfwila, wadiña nayaaka 12, wasemukili kanka windi, niibwambu dindi Lazaru.—Luka 7:11-15; 8:41-55; Yowanu 11:38-44.

Hakulumbulula yuma yayiwahi yakadiluñishawu antu akayulawu kudi Wanta waNzambi kumpinji yakumbidi, Yesu washimwineñahu dehi kuhitila mudi kapostolu Yowanu nindi: “Tiya, tabanaka yaNzambi hiyidi nawantu; yena wakashakama nawu, niwena akekala antu indi; Nzambi yomweni wakekala nawu, wakekala Nzambi yawu. Wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.” (Chimwekeshu 1:1; 21:3, 4) Toñojokenu, okuwaha kwakushakama mwituña mwakabula kwikala kudila, kukata, nikufwa! Nawa kulomba kwakwila nawu muchima waNzambi awili hamaseki neyi chawilañawu mwiwulu kwakashikijewa.

Indi Wanta waNzambi wakenza mpinjinyi? Yesu watañishili nindi kutachika kwachiyulu chindi chawanta, kwakamwekana hampinji yambukaku, yateneniyi nindi ‘kwinza kwindi.’ Yesu walumbulwili wuprofwetu wamwekesheleña mpinji yakatachika kwinza kwindi muñovu jawanta. Iyi mpinji yakatachika nakukala mukaayi kejima, kushilahu nimajita, nzala yakapwelendendi, nyitentanshi, yipupu, nikuswejelaku kuluwalala. (Matewu 24:3, 7-12; Luka 21:10, 11) Iyi yuma niyuma yikwawu yayivulu yashimwineñahu dehi Yesu hiyuma yinakumwekana kufuma tuhu mu 1914, chaaka chatachikili Njita yatachi yaMukaayi kejima. Dichi, Yesu nakuyula neyi Mwanta. Katataka mpinji yakwinza kwaWanta yishiki nawa wakaleñela muchima waNzambi akawili hamaseki. *

Indi kwinza kwaWanta waNzambi kwakabalumuna chumanyi kudenu? Ichi chinashindameni hachimwatambwilaña nsañu yaYesu.

[Tumazu twaheshina]