Ntañishilu Yakutwamba niYalala—Kutalisha Hadi Yesu
Ntañishilu Yakutwamba niYalala—Kutalisha Hadi Yesu
MWATOÑOJOKAÑA NENUDI? KOMANA IYI NTAÑISHILU YIDI HESHINA YALALA NTAHINDI YAKUTWAMBA?
Yesu wavwalikili ha 25 December.
Amayala asatu akwamaana ayili nakumuhempula Yesu hampinji yavwalikiliyi.
Yesu hadiña nawamana kwindi hela aheliduku.
Yesu wadina Nzambi, ilaña mumujimba wawuntu.
Yesu hadiña muntu wamuwahi hohuku.
ANTU amavulu anateli kwiteja nawu iyi nyikuku yamazu yinashimunuwu yalala. Amakwawu anateli kuhosha nawu iyi nsañu yakala, hiwukutwesha kwiluka chalalaku. Hadaha atoñojokaña nawu chakala hohu wamukuhwelela Yesu, kwiluka mwatalisha iyi nsañu hikwalemaku.
Ilaña, hidichi chahoshaña Bayiboluku. Yatukoleshaña kushika “mukumwiluka Mwanta wetu Yesu Kristu.” (2 Petulu 1:8) Twamwilukaña kuhitila mukutalatala munyikanda yaNsañu Yayiwahi. Iyi nyikanda yalumbulula chalala kutalisha hadi Yesu, kulonda kutukwasha kwambula ntañishilu yakutwamba nayalala. Ichi dinu tushinshikenu chahosha nyikanda yaNsañu Yayiwahi kutalisha hansañu yakuhwelelawu antu yinashimunuwu hewulu.
YUMA YAKUHWELELAWU: Yesu wavwalikili ha 25 December.
KOMANA IYI NSAÑU YAKUHWELELAWU YALALA NTAHINDI YAKUTWAMBA?
Bayibolu hiyalumbulula jiika kakweji hela ifuku davwalikiliyi Yesuku. Hanu dinu ifuku daDecember 25 dafuma kudihi? Kwesekeja namukanda waThe Encyclopædia Britannica, antu amakwawu aditenaña nawu hiyakwaKristu “atoñojokeli nawu idi ifuku damwekeni hefuku dodimu nadachawija chawaRoma akwanshidi . . . mpinji yabulaña kuhuma itañwa swayi, nawa mafuku ashimbulaña.” Mukanda wowumu wahosha nawu tushidikilu twatuvulu twakwanakanaña Krisimansi twafuma kudi “akwanshidi anakanaña jawundimi niitañwa hakachi kamwela.”
Komana Yesu nateli kwiteja kwanakanaña kuvwalika kwindi hefuku daDecember 25? Toñojokenu hachumiche: Ifuku dakuvwalika kwaYesu hitwadilukaku. Nawa Bayibolu hiyatuleja kwanakanaña kuvwalika kwinduku nawa kwosi wunsahu wamwekeshaña nawu akwaKristu akusambila adiña nakwanakana. Kwambukaku, Bayibolu yatulejaña jiika ifuku dafwiliyi Yesu, nawa walejeli atumbanji twindi kwanakanaña idi ifuku. * (Luka 22:19) Chakadi nikujina, Yesu wakeñeleña kukonkomwena hakulema kwefutu damuloña dakufwa kwindi, bayi hakuvwalika kwinduku.—Matewu 20:28.
YUMA YAKUHWELELAWU: Amayala asatu akwamaana (hela anyanta asatu kwesekeja natushidikilu tukwawu) ayili nakumuhempula Yesu hampinji yavwalikiliyi.
KOMANA IYI NSAÑU YAKUHWELELAWU YALALA NTAHINDI YAKUTWAMBA?
Hadaha mwamonahu dehi nyevulu hela nyivwimbimbi yakuvwalika kwaYesu yinakumwekesha mukeki Yesu nakami mwadishilañawu ayimuna, anamunyeñumuki kudi amayala akwamaana asatu anasendi yawaana. Dichi iwu mwevulu wakulumbisha hohu bayi neyi walalaku.
Mwalala antu afumini kuMusela adifukwili kudi mukeki Yesu. Awa enyi mwalala adiña akwakutala tutumbwa. (Matewu 2:1) Komana mwalala amuwanini Yesu anamukamiki mwadishilañawu ayimuna? Nehi; ayili nakumuhempula mwitala. Chakadi nikujina ashikili henohu mwahita dehi tukweji kufuma havwalikiliyi Yesu.—Matewu 2:9-11.
Komana ana enyi adiña 2? 3? indi kwiji 30? Bayibolu hiyashimunaku. Hadaha wunsahu wakwila nawu adiña asatu wafuma hayawana yanyichidi yisatu yamuleteleluwu Yesu. * (Matewu 2:11) Antu amakwawu atoñojokaña nawu awa amayala atenañawu nawu akwamaana wejima wawu emenañaku nyuza yamboka-mboka. Ntañishilu yamuchidiwu hiyekala muBayiboluku. Ilaña, neyi chahosheliyi mukwakusoneka Nsañu Yayiwahi wumu, iyi ntañishilu yakutwamba yafuma kudi “mukwakusoneka nsañu wamuyaaka nkulakaji yamuchitanu nachisatu yakufwikija chakufwikija.”
YUMA YAKUHWELELAWU: Yesu hadiña nawamana kwindi hela aheliduku.
KOMANA IYI NSAÑU YAKUHWELELAWU YALALA NTAHINDI YAKUTWAMBA?
Wunsahu wakwila nawu Yesu wadiña nawamana kwindi niahelindi awulumbulula jiika muNsañu Yayiwahi. Nsañu Yayiwahi yaLuka yashimuna nawu Yesu wadiña ‘Wedi,’ waMariya, wunsahu wunakumwekesha nawu wavweli anyana amakwawu. * (Luka 2:7) Nsañu Yayiwahi yaMaku yashimuna nawu antu amakwawu amumusumba waNazareta amufwanishili Yesu nawamana kwindi, nawa yena hiyamumweni kusweja kulemaku. Ehwili nawu: “Hidiyi mana kwaYakoba naYosesi naYuda niShimonaku? Ahelindi hitudi nawu kunuku?”—Maku 6:3, Matewu 12:46; Yowanu 7:5.
Hela chakwila nyikanda yaNsañu Yayiwahi yashimuna mwenimu, akwakusandujola hadi Nzambi atwalekahu kuhosha nawu Yesu hadiña nawamana kwindi niahelinduku. Amakwawu ahoshaña nawu amana kwindi niahelindi atenañawu adiña asonyindi. * Amakwawu niwena abokaña nawu awa anyana adiña anyana kaMariya akuwanamu. Ilaña toñojokenu: Neyi Yesu hohu diyi wadiña mwana kaMariya, komana aNazareta adi kuhosha mazu ahosheluwu? Kwambukaku, amakwawu amumweni Mariya hampinji yemitileñayi namesu awu kapu. Elukili chikupu nawu Yesu wadina hakachi kawanyana kaMariya amavulu avweliyi.
YUMA YAKUHWELELAWU: Yesu wadina Nzambi, ilaña mumujimba wawuntu.
KOMANA IYI NSAÑU YAKUHWELELAWU YALALA NTAHINDI YAKUTWAMBA?
Yitoñojoka yakwila nawu Nzambi wenjili hamaseki nawa diyi wadiña Yesu, dihu hashindamena kashidikilu kakwila nawu kwekala Anzambi Asatu, nawa yitoñojoka yeniyi yinashimbuli nankashi, ilaña hampinji yadiñayi Yesu hamaseki kwadiña kwosi. Nawa mukanda waThe Encyclopædia Britannica wahosha nawu: “Izu dakwila nawu Anzambi Asatu hela aka kashidikilu hikamwekanaña munyikanda yaChitiyañenu Chachihaku . . . Chimwahitili yaaka yayivulu aka kashidikilu katachikili kutanda chovu-chovu nawa kuhitila mukusweja kutadeka.”
Nsakililu yamusawulaña Yesu hakutañisha nawu wadiña Nzambi mumujimba wawuntu. * Munjilanyi? Talenu ichi chakutalilahu. Akwanyidimu ehulaña wukwashu kudi mukwakutala nyidimu, ilaña wukuhosha nindi hakweti wuswa wakuyitejaku. Neyi munahoshiyi mwalala, dikwila nawu mukwakutala nyidimu namwekeshi nindi weluka mwatela kukuminayi. Neyi hidimuku, nawa neyi chakwila wukweti wuswa wakuyiteja, ilaña yakaana dikwila nawu hisakutwamba.
Chumanyi cheliliyi Yesu hampinji yadiña nakukeñeshawu apostolu indi ayedi kadidi kahewulu? Wayilejeli nindi: “Hakwila kushakama kuchikasa chami chachidiilu, hela kuchikasa chachimunswa, hichuma chakuhana amuku, chambala chawaloñeshelawu dehi kudi Tata yami.” (Matewu 20:23) Neyi mwalala Yesu wadiña Nzambi, komana awa mazu hiyadi kwikala akutwambaku? Ilaña kuhitila mukutiyilila kudi Wabadika ñovu, Yesu wemikili chakutalilahu chachiwahi chakudizoza nawa wamwekesheli nindi hadiña wesekana naNzambuku.
YUMA YAKUHWELELAWU: Yesu hadiña muntu wamuwahi hohuku.
KOMANA IYI NSAÑU YAKUHWELELAWU YALALA NTAHINDI YAKUTWAMBA?
Yesu wahosheli hatooka nindi hadiña muntu wamuwahi hohuku. Wahosheli nindi: “NiMwana kaNzambi.” (Yowanu 10:36) Hela chochu, muntu wudi wejima nateli kuhosha nindi hiMwana kaNzambi. Ilaña neyi mazu ahosheliyi Yesu adiña akutwamba, wadi kwikala muntu wamuchidinyi? Chakadi nikujina, hadi kwikala muntu wamuwahuku, ilaña wadi kwikala sakutwamba!
Mazu alala afumini kudi Nzambi yomweni. Nzambi wahosheli kapampa kayedi kutalisha hadi Yesu nindi: “Diyi Mwanami.” (Matewu 3:17; 17:5) Chitoñojokenu: Bayibolu yashimunaña kapampa kantesha katiyakeni izu daNzambi heseki nawa kapampa kayedi wahosheli chikupu nindi Yesu hiMwanindi! Iwu hiwunsahu wunakumwekesha chikupu nawu Yesu wadiña Mwana kaNzambi.
Komana ichi chibaaba chinalumbululi nsañu yalala kutalisha hadi Yesu yimwabulili kwiluka? Neyi dimu, komana kwila mutwalekahu kudiza chikupu Nsañu Yayiwahi yonenewa nehi? Kudiza kwamuchidiwu kunateli kuyizañalesha nikuyihetesha. Nawa Yesu wahosheli nindi kudiza chalala hadi yena nihadi Tata yindi kwalombolaña ‘kuwumi wahaya nyaka.’—Yowanu 17:3.
[Tumazu twaheshina]
^ Kwesekeja nakalenda yawaYudeya, Yesu wafwili Hefuku daPaseka, hela haNisani 14.—Matewu 26:2.
^ Matewu walumbulula nindi enyi “hiyakujikula mwadiña yuma yawu yalema” nawa amwinkeli Yesu wuru, nilibona nimora. Chakuhayamisha, iyi yawaana yalema wuseya ayileteli hampinji yatelela, muloña chisaka chaYesu chadiña chahutwa, nawa adiña kwakwihi nakutemuka neyi antunduka.—Matewu 2:11-15.
^ Hela chakwila Yesu amubaabili muchihayamisha, anyana kaMariya alondeleluhu wayivweli neyi chochakwatañawu kuñoji antu ejima nanfumwindi Yosefu.—Matewu 1:25.
^ Iyi nsañu yahosheli Jerome muchaaka cha 383 C.E., yatanda nankashi hadi antu akuhwelela nawu Mariya watwelekeluhu kwikala mujiki muchihandilu chidi chejima. Nkumininaku, Jerome wetejeli nsañu yahosheliyi nindi yakutwamba, ilaña antu amavulu niakulumpi jaChaachi yawaKatolika, atwalekeluhu nakukuhwelela mwahosheliyi hatachi.
^ Neyi munakukeña nsañu yayivulu kutalisha hakashidikilu kakwila nawu kwekala Anzambi Asatu, talenu buloshuwa yinakuhosha nawu, Should You Believe in the Trinity? yasonekawu kudi aYinsahu jaYehova.
[Chikasha/Mwevulu wudi hefu 14]
Wunsahu Wukwawu Walala Wunateli Kuyihayamisha
Indi Yesu wadiña muntu wamuchidinyi? Komana wadiña muntu wakalisha, wamwena nikudambula kudi akwawu, chakwila hanateli kudikunda nawantuku? Antu amakwawu anateli kwiteja. Hadaha dimuloña wahayaminañawu hakwiluka nawu Yesu:
• wayileña kuyawija.—Yowanu 2:1-11.
• wahamekeleña.—Maku 14:6-9.
• wadiluñishileña kudikunda nawanyana anyanya. —Maku 10:13, 14.
• wadilili chakadi kutiya nsonyi.—Yowanu 11:35.
• watiyili wushona.—Maku 1:40, 41.