Yesu Chadilumbulwiliyi Yomweni

Nsoneki Herbert Lockyer wahosheli nindi, “Yesu wadilukili chikupu, welukili kwafuminiyi, chenjililiyi hampata yahamaseki, niyuma yadiña nakutalilayi kumbidi.”

HENOHU kanda twiteji nikukuhwelela yuma yatañishileñayi Yesu, twatela kusambila kumwiluka. Indi Yesu wadiñanyi? Wafumini kudihi? Mudimwinyi walemesheliyi muchihandilu? Makonu tunateli kutaña nikutiya chahosheleñayi Yesu, kuhitila munyikanda yaNsañu Yayiwahi, yaMatewu, Maku, Luka, niYowanu.

Wadiña kwoku henohu kanda yavwaliki hamaseki Yesu wahosheli nindi: “Hadiñi Abarahama kanda avwaliki, ami nidi hohu.” (Yowanu 8:58) Kufuma mpinji yadiñaku Abarahama, nahavwalikiliyi Yesu mwahitili yaaka 2,000. Ilaña Yesu wadiña kwoku henohu iwu nkakulula washinshika kanda yasemuki hanu hamaseki. Hanu dinu, Yesu wadiña kudihi? Walumbulwili nindi, ‘Wasulukili mwiwulu.’—Yowanu 6:38.

Mwana kaNzambi Yehova wekala nawanyanindi amavulu añelu. Hela chochu, Yesu wekala wambukaku. Waditeneni yomweni nindi ‘hiMwana kaNzambi wumu hohu.’ (Yowanu 3:18) Awa mazu anakulumbulula nawu Yesu diyi hohu aleñeluwu kudi Yehova yomweni. Nzambi waleñeli yuma yejima kuhitila mudi Mwanindi wumu hohu.—Akolose 1:16.

“Mwana kamuntu” Yesu wazatishili iyi nhoshelu kapampa kakavulu hakuditena yomweni kubadika nhoshelu yidi yejima. (Matewu 8:20) Dichi wamwekesheli nindi hadiña kañelu wadibalumwini hela habalumukili nakwikala chuma chacheñuku. Ilaña wadiña muntu yomweni. Kuhitila muspiritu yindi yajila, Nzambi watuntulwili wumi waMwanindi kufuma mwiwulu nakwinza hamaseki, nakuleñela kankaña wamujiki Mariya kubaaba ivumu. Chafuminumu, Yesu wavwalikili wawanina, muntu wakadi nshidi.—Matewu 1:18; Luka 1:35; Yowanu 8:46.

Mesiya wakaninuwu Mumbanda kaSamariya wamulejeli Yesu nindi: “Neluki nami Mesiya,       wakenza.” Yesu wamwakwili nindi: “Diyi ami nidi nakuhosha naneyi.” (Yowanu 4:25, 26) Izu dakwila nawu “Mesiya,” nizu dakwila nawu “Kristu,” alumbulula nawu “Wawayishewa.” Yesu amuwayishili hela amutondeli kudi Nzambi, kulonda kuzata mudimu weneni wakushikija yikaninu yaNzambi.

Mudimu Wenjililiyi Mpinji yimu Yesu wahosheli nindi: “Chiña nishimwina nsañu yawanta waNzambi yayiwahi nikunyikala yikwawu yinashali nawa, muloña dichi chantemesheleluwu.” (Luka 4:43) Hela chakwila wakoñeleli antu nyidimu yayivulu yayiwahi, watwamijiluku mudimu wakushimwina Wanta waNzambi muchihandilu chindi. Yuma yatañishileñayi kutalisha haWanta tukuyihanjeka kanda.

Chakadi nikujina, Yesu hadiña hohu muntuku. * Neyi chitukuhanjekahu, chihandilu chadiñayi nachu mwiwulu chamwekeshaña mwatalisha mazu ahosheliyi hampinji yadiñayi hamaseki. Komana twatela kuhayama hakwiluka netu Yesu washimwinini nsañu yakwashaña yihita yawantu mwahita kaayi kejima?

[Tumazu twaheshina]