Dizishenu Anyanenu

Yesu Wadizili Kwovwahila

KOMANA mpinji yikwawu chayikalilaña kwovwahila?— * Neyi chayikalilaña hichakuhayamaku. Muntu wejima mpinji yikwawu chamukalilaña kwovwahila. Komana mweluka nenu Yesu niyena wadizili kwovwahila?—

Komana muneluki muntu watela kwovwahilawu anyana ejima?— Eña, atata niamama. Bayibolu yahosha nawu: “Ovwahilenuña anvwali jenu mudi Mwanta, dichi chuma chachiwahi.” (Aefwesesa 6:1) Indi tata yaYesu hinyi?— Yehova Nzambi, nawa diyi Tata yetu. (Matewu 6:9, 10) Ilaña neyi wuhosha neyi Yosefu diyi tata yaYesu nawa Mariya diyi mama yindi, nimwena tuhu dimu. Komana mweluka chiyekalili anvwali jindi?—

Kañelu Gabireli wamulejeli Mariya chakavwalayi mwana hela chakwila wadiña kanda yadimoneñahu dehi neyala. Yehova wakoñeli chihayamisha cheneni hakwila nawu yemiti. Gabireli wamulejeli Mariya nindi: “Ñovu jaMukwakubadika Mwiwulu jakakuzeñamina; dichi chuma chiwakavwala akachitena nawu chajila, hiMwana kaNzambi weyala.”—Luka 1:30-35.

Nzambi watuntulwili wumi wamwanindi kufuma mwiwulu nakuwisha mwivumu daMariya. Dichi iwu wumi wakulilili mwivumu neyi chochakulaña nyana yejima mumavumu awa mama jawu. Chimwahitili tukweji tutanu natuwana, Yesu wavwalikili. Haniyi mpinji, Yosefu wamusumbwili Mariya, nawa antu amavulu akuhweleleli nawu Yosefu diyi tata yaYesu wamuvweli. Ilaña Yosefu wadiña tata yindi wakuwanamu. Dichi kwesekeja naniyi nsañu, tunateli kuhosha netu Yesu wadiña nawatata jindi ayedi!

Hampinji yadiñayi Yesu nayaaka 12, wakoñeli chuma chamwekesheli nawu wamukeñeli Tata yindi wamwiwulu Yehova. Hayina mpinji, chisaka chaYesu, kwesekeja nachisemwa chawu, endeli lwendu lwalulehi lwakuya kuYerusalema kuPaseka. Nkumininaku, hampinji yafuntileñawu kumukala wawu kuNazareta, Yosefu niMariya akañenyi kwiluka neyi Yesu wudi hamu nawena. Komana mwatela kuhayama chuma chaleñeleli abuli kwiluka?—

Hayina mpinji, Yosefu niMariya adiña nawanyana amakwawu. (Matewu 13:55, 56) Cheñi nawa hadaha adiña nawantaña endeleñawu nawu, chidi neyi Yakoba niYowanu hamu tuhu nitata yawu Zebedewu, nimama yawu Salomi, watela wadiña yaya yaMariya. Dichi Mariya watela watoñojokeli nindi Yesu wadiña nawantaña amakwawu adiña mudina izanvu.—Matewu 27:56; Maku 15:40; Yowanu 19:25.

Chelukiliyi Yosefu niMariya nawu Yesu hadiña nawenaku, afuntili cheñi kuYerusalema. Amutondeli chikupu mwanawu weyala. Hefuku damuchisatu, amuwanini mutembeli. Mariya wamwilili nindi: “Mwanami wunatukoñelidi mwenimu? Nitata yeyi ninami tunakukeñakeñi nawushona.” Ilaña Yesu wayakwili nindi: “Mwankeñelañadi? Munabulilidi kwiluka nenu ami chiña niikalaña mwitala daTata yami?”—Luka 2:45-50.

Komana chadiña chatama Yesu kumwakula mama yindi muniyi njila?—Anvwali jindi elukili nawu wakeñeli kudifukwila  mwitala daNzambi. Komana chadiña chalema Yesu kutoñojoka nindi mutembeli yaNzambi didi iluña mwakasambila kumukeñelawu kudi anvwali jindi?—Nkumininaku, Mariya watwalekeluhu kutoñojoka hamazu ahosheliyi Yesu.

Chumanyi cheliliyi Yesu kudi Yosefu naMariya?— Bayibolu yahosha nawu: “[Yesu] hakukunkumuka nawu, hakushika nawu kuNazareta; hakuyovwahilaña.” (Luka 2:51, 52) Chumanyi chitukudizila kuchakutalilahu chaYesu?— Eñañi, ninetu twatela kwovwahila avwali jetu.

Hela chochu, hichadiña chaswayi Yesu kwovwahilaku—hela tuhu Tata yindi wamwiwulu.

Hawufuku welili kanda yafwi, Yesu wamwihwili Yehova neyi chakwila wukuhimpa yitoñojoka Yindi kutalisha hachuma chakeñeleñayi nindi Yesu yakoñi. (Luka 22:42) Ilaña Yesu wamwovwahilili Nzambi hela chakwila chadiña chakala. Bayibolu yahosha nawu “wadizili kwovwahila nayuma yakabiliyi.” (Aheberu 5:8) Komana munatoñojoki nenu anetu nawa twatela kudizilaku?—

[Tumazu twaheshina]

MALWIHU:

▪ Indi Mariya wekalili ñahi mama yaYesu, nawa Yesu wekalili ñahi nawatata jindi ayedi?

▪ Muloñadi avwali jaYesu chabuliluwu kwiluka nawu Yesu hadiña nawenaku?

▪ Kudihi kwakuhweleleliyi Yesu nindi diku kwatela kumukeñelawu anvwali jindi?

▪ Chumanyi chimwatela kudizila kuchakutalilahu chaYesu?

[Mwevulu wudi hefu 31]

Muloñadi chimukutoñojokela nenu Yosefu niMariya ateleleli kusambila kumukeñela Yesu mutembeli?