Chihandilu Chawakwakristu amuYaaka Nkulakaji Yakusambila

“Akwakukalakala Kumatalawu”

‘Hadiñi nakuyawu munjila yawu, hakushika hamukala wumu; mumbanda wumu, ijina dindi Mata, hakumutambula mwitala dindi. Yenowu nawa wadiñi namwanyikindi wamumbanda, ijina dindi Mariya; yena Mariya hakwinza nakushakama kunyendu yaMwanta nakutiyilila mazu adiñi nakuhoshayi. Ilaña Mata wadiñi nakukalakala nyidimu yayivulu; hakwinza kudi yena nindi, Mwanta, chananlekeliyi mwanyikami nyidimu kanka wami, hiwunashuku muchima weyuku? Mwili enzi ankwashuku. Mwanta hakumwakula nindi, Mata, Mata, yuma yayivulu wudi nakwakama, wudi nakudikabisha tuhu kweyi; ilaña kudi chuma chimu hohu chikukeñeka. Chuma chanatondiyi Mariya, dichi chuma chasweja kuwaha, hiyakamutambulachuku.’—LUKA 10:38-42.

CHAKADI nikujina Mata wadiña nyamadikita. Nawa antu amakwawu amulemesheli. Kwesekeja nachisemwa chawaYudeya amuyaaka nkulakaji yakusambila, mumbanda amumweneña nawu walumbwa kuhitila mukudikita nyidimu yahetala niwuswa windi wakukalakela akwetala dindi.

AkwaKristu awambanda amuyaaka nkulakaji niwena ayikolesheli kwikala “akwakukalakala kumatalawu.” (Titusa 2:5) Adiña cheñi nakukooleka kukwawu kwakudizisha amakwawu kutalisha hayuma yakuhweleleluwu hakwikala akwaKristu.  (Matewu 28:19, 20; Yililu 2:18) ‘Nyidimwinyi yayivulu’ yakalakeleña ambanda aYudeya amuyaaka nkulakaji yakusambila? Chumanyi chitunateli kudizila kumazu amulejeluwu Mariya kudi Yesu?

‘Kukalakala Nyidimu Yayivulu’ Mumbanda wasumbuka wamuYudeya watachikileña kuzata nyidimu yahetala hadaha nabudidi. (Yishimu 31:15) Hanyima yakutelekela chisaka chindi nseña, watwalileña anyanindi awamayala kushikola yasinagogi. Anyanindi awambanda ashalileña hetala kulonda kuyidizisha nyidimu yakeñekeleña hakwikala ambanda adikita.

Mama yawantu nianyanindi awambanda atachikileña kuzata nyidimu yahetala kuhitila mukusha manji mumanoñu (1), kukomba mwitala (2), nikukamwina chisaka mayeli ampembi (3). Kuhiñahu akocha makendi akudya hanodu ifuku. Anyana awambanda asambilileña kupepa tidiku (4), kufumahu akuhala tidiku (5). Mama yawantu wukuvuba wuña neluñi. Wukuhonda wuña wunavubiyi kulonda wovwahi (6), kufumahu wukushiya wuña wunavubiyi neluñi kulonda wututumuki iku nakuzata nyidimu yikwawu. Anyana awambanda akutuña chizi namayeli atuta ampembi (7).

Nantentemena mama yawantu nianyanindi awambanda ayileña kuchisankanu. Chakushikawu akwepula mavumba amawahi, akutiya mapumba awatunyama anakukaloka niakwakulanda anakukankana wuseya, wukulanda yakudya yanakukeñawu hanodu ifuku (8). Anateli kulanda mafu niinshi yoma. Neyi himukwaKristu, nateli kuzatisha iyi mpinji kulonda kulejaku amakwawu hachisankanu yuma yakuhwelelayi.—Yililu 17:17.

Mama yawantu wukweti kashinshi wazatishileña mpinji yakuya hela yakufuma kuchisankanu kulonda kudizisha anyanindi nshimbi jamuNsona. (Kuhituluka 6:6, 7) Nateli cheñi kuhanjeka nawanyanindi awambanda nshimbi jinateli kuyikwasha kwikala akwakulanda abula lukisa.—Yishimu 31:14, 18.

Mudimu wukwawu wazatileña ambanda hikutaha menji (9). Atahileña menji akuzatisha muchisaka chawu, hadaha nikuhanjeka nawambanda atahileña menji. Chafuntawu hetala mama yawantu nawanyanindi awambanda ocheleña mankendi. Asambilileña kuyipapalesha, kuhiñahu hiyakuyisha mufwolonyi yatatishilawu dehi chadimu (10) kakavulu ayituñilileña hanzi. Adiña nakutala makendi chinakuhawu iku anakuhanjeka nakudiluñisha ivumba dadiwahi depukileña kumankendi.

Kufumahu ayileña nakukosa yakuvwala kukaloña (11). Ambanda asambilileña kukosa chachiwahi yikowelu namulola watuñileñawu namawuti amutondu  wumu. Hanyima yakukosolola yakuvwala nikuyikamuna, adiña nakuyanyika hayiputa hela hamalola.

Chiyafumawu nakukosa, mama yawantu nianyanindi awambanda eñilileña mwitala nakuchima (12) yakuvwala yatabuka henohu kanda ayishi mukapeka kashileñawu yakuvwala. Kufumahu anyana awambanda ayidizishileña kutuña mahina (13). Kuhiñahu akutachika kuteleka yakudya yamelela (14). Chisaka chaloñesheleña yakudya yidi neyi makendi, yisakola, chizi, inshi yoma, nimenji atuta muloña adiña nachaaku chakutambwila enyi.

Chiyashika mpinji yakamineñawu anyana, ayilambilela manji hayilonda. Kuhiñahu abutwileña manoñu, anvwali ahanjekeleña mpanji yamuNsona nikulomba hamu nawanyanawu. Mwitala chimwawunda nzo-o, iyala wadiñi nakumuhameka ñodindi nakusombolola mazu aya mpuhu akwila nawu: “Mumbanda washinshika akutwesha kumuwana kudinyi? Muloña wuseya windi wabadika nankashi marubi.”—Yishimu 31:10.

Kutonda ‘Chuma Chasweja Kuwaha’ Chakadi nikujina, ambanda ashinshika amuyaaka nkulakaji yakusambila ‘akalakeleña nyidimu yayivulu’ yayileñeleleña kudikita chikupu. (Luka 10:40) Nimakonu ambanda adikitaña chikupu, sweje-e amama jawantu. Yakutuñatuña yamakonu yinapeleshuku nyidimu yikwawu yahetala. Hela chochu, amama jawantu amavulu hiyazataña nyidimu yakwakamena chisaka chawu hohuku, ilaña azataña nyidimu yikwawu yakukeñelamu mali.

Hela chakwila amonaña kukala, ambanda akwaKristu amavulu makonu embujolaña chakutalilahu chaMariya atenawu mumazu akutachikilahu. Alemesha chikupu yuma yakuspiritu. (Matewu 5:3) Akamenaña chiwahi yisaka yawu nawa Nsona jayikoleshaña kwila mwenimu. (Yishimu 31:11-31) Ilaña alemesha cheñi nshimbi yamulejeluwu Mata kudi Yesu. Hakwikala mumbanda walemesha wulunda windi naNzambi, washili muchima chikupu kuyuma yamufumbiluwu. Ambanda akwaKristu hiyetejaña nyidimu yahetala kuyikañesha kudiza hadi Nzambi (15) hela kuleja amakwawu yuma yakuhwelelawuku. (Matewu 24:14; Aheberu 10:24, 25) Dikwila nawu atondaña “chuma chasweja kuwaha.” (Luka 10:42) Dichi ayilemeshaña chikupu kudi Nzambi, Kristu niyisaka yawu.—Yishimu 18:22.