Bayibolu Yahimpaña Yihandilu Yawantu

CHUMANYI chaletesheli Mulasita kutewula nsuki jindi nikuleka chaambu chadiñiyi nachu hadi ayindeli? Nawa chumanyi chamukwashili mukwenzi weyala wadiña samadombu nawa wayikwashileña akwakulandisha yitumbu yashetana kutambula mali, kuhimpa chihandilu chindi? Shinshikenu chikuhoshawu aweni.

“Nalekeli chaambu.”—HAFENI NGHAMA

YAAKA: 34

ITUÑA KWAFUMAYI: ZAMBIA

KUHANDA KWINDI: MULASITA

CHIHANDILU CHAMI CHAKUNYIMA: Navwalikilili muchilombu chawamatunduka muZambia. Mama watemukili kuNamibia hampinji yikwadiña njita nawa wekalili membala waSouth West Africa People’s Organization (SWAPO). Ichi chipompelu chadiña nakulwisha nfulumendi yaSouth Africa yayuulileña ituña daNamibia hayina mpinji.

Kufuma hampinji yinavwalikili nichinashikijili yaaka 15, nashakamini muyilombu yawamatunduka yayivulu. Atwansi amavulu muyilombu yaSWAPO ayidizishileña nawu atela kutuña chipompelu chikaleta kukulika. Atudizishili politiki nikuhela ayindeli.

Chinashikijili yaaka 11, nakeñeleña kwikala mukwaKristu muchaachi yadiña muchilombu mwapompeleñawu aKatolika, Lutherans, Anglicans, niamakwawu. Pasita inahanjekeli nindi wankanishili kwitiya. Kufuma tuhu hayina mpinji, nakuhweleleli nami hikwekala Nzambuku. Chinashikijili yaaka 15 nakeñeli tumina twarege nawa mpwila yakukeña kufumishahu makabi amakwawu amweneñawu antu eyila amuAfrica yanleñeleleli kwikala Mulasita. Nahembeli nsuki jajilehi, natachikili kunwa damba, nalekeli kudya mbiji, nikuleja antu hakukulika kwawantu eyila. Hela chochu, hinahimpili yililu yami yatama, hela kuleka kutala mafwilimu amadombuku. Nawa hinalekeli kutukanaku.

BAYIBOLU CHIYAHIMPILI CHIHANDILU CHAMI: Muchaaka cha 1995, hinadiñi nayaaka 20 natachikili kutoñojoka chikupu chinatela kwila muchihandilu chami. Nadizileña nyikanda yejima yinawanineña yawaLasita. Nyikanda yikwawu yakunkileña kunsañu yamuBayibolu, ilaña yuma yadiñamu hiyanlumbulukilileñaku. Dichi nafukwiluhu kutaña Bayibolu halwami.

Kuhiñahu, mukwetu Mulasita wanyinkeli mukanda wakudizamu Bayibolu wasonekawu kudi aYinsahu jaYehova. Natachikili kudiza iwu mukanda nkawami nawa nazatishileña Bayibolu. Kutwala muna, naweni aYinsahu jaYehova  nawa natwalekeluhu kudiza nawu Bayibolu.

Nazatili nañovu hakwila nileki kunwa makanya nikusweja kunwa walwa. (2 Akorinda 7:1) Natachikili kudiwahisha, natewili nsuki, nalekeli kutala mafwilimu anzekesi niamadombu, nalekeli nikutukana. (Aefwesesa 5:3, 4) Nkumininaku nalekeli chaambu chinadiñi nachu hadi ayindeli. (Yililu 10:34, 35) Hakwila nawu nileki yumiyi, chakeñekeleña kuleka kutiyilila tumina twahoshaña hachaambu chekowa, kuleka kudikunda nawamabwambu jami amakulu adi kunleñela kufunta cheñi kuyaaku yami yayikulu.

Chelili nihimpi chihandilu chami, nakeñeli kwadiñi Itala daWanta dawaYinsahu jaYehova nawa nayilejeli nami inakukeña nipompeña nawu. Chinafuukwiluhu kupapatishewa nakwikala Chinsahu chaYehova, antaña jami atiyili kutama. Mama wanlejeli nindi nitonduhu chipompelu chikwawu “chawakwaKristu” bayi chawaYinsahu jaYehovaku. Mandumi yami wumu wadiña muntu waya mpuhu munfulumendi, wadiña nakunhoshola mpinji yejima hamuloña wakudikunda nawaYinsahu.

Hela chochu, chinadizili chazatileñayi Yesu nawantu nikuzatisha kufumba kwindi, chumichi chankwashili kuumika ikañesha nikasekesha. Chinesekejeli yuma yatañishañawu aYinsahu nayuma yahosha Bayibolu, nakuhweleli nami nawani kwitiya kwalala. Chakutalilahu, alondelaña lushimbi lwamuBayibolu lwakushimwina amakwawu. (Matewu 28:19, 20; Yililu 15:14) Nawa hiyadiñijaña mujipolitikuku.—Masamu 146:3, 4; Yowanu 15:17, 18.

CHINAHETELUMU: Kudiza kukakela kunshimbi jamuBayibolu kunankwashi munjila jajivulu. Chakutalilahu, kuleka kunwa damba kunankwashi kubula kukisañana mali amavulu hakakweji. Hinamonaña cheñi lunzuyanzuyaku, natoñojokaña chiwahi nawa nakola kumujimba.

Ichi neluki chinatela kwila muchihandilu chami, chuma chinafwilileña henohu nichidi kansi. Chuma chasweja kulema, neluka nami nakundama kwakwihi naNzambi.—Yakoba 4:8.

“Nadizi chakufwomona ndulu.”—MARTINO PEDRETTI

YAAKA: 43

ITUÑA KWAFUMAYI: AUSTRALIA

KUHANDA KWINDI: MUKWAKULANDISHA YITUMBU YASHETANA

CHIHANDILU CHAMI CHAKUNYIMA: Chisaka chami chadiña nakutuntuka nankashi hampinji yinadiña kansi. Nashakamini mujimbaka janyanya, musumba weneni, nawa nashakaminuku hamishoni yawaProtestanti yadiña mumukala. Inakwanuka chiwahi mpinji yinadiña nawasonyi jami, niamandumi—twajahileña inshi, kuzomba, nikusoña yuma yikwawu.

Tata wadiña mukwakwansa jinkonyi nawa watachikili  kundizisha kuzuña hinachidiñi kansi. Nadiña samadombu mukuhanda kwami. Hinachidiñi kampululu, namanishileña mpinji yeneni nakunwa walwa kumatala akunwina. Twadiña nakuvuloka antu nawamabwambu jami kulonda tuzuñi nawu. Twazatishileña jimpoku, nitupomposhi kulonda kulukuka nachu izanvu dawantu 20 hela kubadikahu.

Nawanineña mali kuhitila mukulandisha yitumbu yashetana niyuma yeyileñawu akwakuzatila kumatu. Nadiña cheñi nakutambwilaku akwakulandisha yitumbu yashetana mali kudi antu asondamineña kuhitila mukuyitiyisha woma namata. Chikokwanyi chami chadiña chakwikala mukwakujahana. Nashindameneni Hakujahana hela kunjaha.

BAYIBOLU CHIYAHIMPILI CHIHANDILU CHAMI: Chinakulileña natiyileña nawu kwekala aYinsahu jaYehova. Inakwanuka mpinji yinadiña nayaaka yamuma 20 namwihwili mama neyi welukili kwekalawu aYinsahu. Chimwahitili mafuku ayedi, Chinsahu wejina daDixon wenjili kwitala dami. Chitwahanjekeli hakapinji kantesha, wantambikili nindi nakayi kukupompa kwawaYinsahu jaYehova. Nayili nakupompa nawa munahiti dehi yaaka 20 kufuma hinatachikili kupompa. Malwihu ejima inehwileña, aYinsahu ayakwileña kuzatisha Bayibolu.

Nazañaleli hakwiluka nami Yehova wakeña antu ejima hela abula kumwiluka. (2 Petulu 3:9) Nelukili nami hiTata wakukeña watela kunñakamena, hela kwosi muntu wakunhemba. Cheñi nanzañaleli hakudiza nami Nzambi nateli kunñanakena nshidi neyi nihimpa yililu yami. Mavasi amumukanda wamuBayibolu waAefwesesa 4:22-24 ankwashili chikupu. Iyi nsañu yankolesheli ‘kuvuula muntu wamukulu nakuvwala muntu wamwiha aleñeluwu mwekalilayi Nzambi.’

Hahitili mpinji hakwila nawu nihimpi yililu yami. Mukachi kamulungu nanwineña wanyi yitumbu yashetana, ilaña neyi nindi nawamabwambu jami kunsa yamulungu nanwineña muloña wekakeja. Nafuukwiluhu kushiya amabwambu jami hakwila nawu nihimpi chihandilu chami, dichi nayili nakushakama kwiluña dacheñi. Amabwambu jami anshinjikijiluku halwendu lwami. Chitwayileña munjila atachikili kunwa damba nawa anyinkeluhu ninami. Nayilejeli nami inakukeña kuleka kunwa damba, nawa chitwashikili hañinza yamusumba twaambukili. Nkumininaku natiyili nawu amabwambu jami anabuwi kunyambawulu nawuta wakesi.

CHINAHETELUMU: Chinalekeli kudikunda nanana akwetu, champeleleli kuhimpa yuma yayivulu muwumi wami. Nekalili Chinsahu wapapatishewa mu 1989. Hanyima yakupapatishewa, muhelami, mama nitata atachikili kumukalakela Yehova hamu nanami.

Munahiti dehi yaaka 17 kufuma hinasumbwili, nawa nikweti nyana yisatu. Nadizi chakufwomona ndulu, chili ananvuloki. Nawa nadizi kukeña antu ‘akumadimi ejima, akunyunza yejima ninyichidi yejima.’ (Chimwekeshu 7:9) Muwumi wami, namoni nami mazu ahosheliyi Yesu alala. Welili nindi: ‘Neyi mukushakama mwizu dami, mukwikala atumbanji twami chalala; mukwiluka walala, walala wukuyifumisha muwuduñu.’—Yowanu 8:31, 32.

[Mazu ekoku adi hefu 15]

Hakwila nawu nihimpi chakeñekeleña kuleka kutiyilila tumina twahoshaña hachaambu chekowa

[Mazu ekoku adi hefu 16]

Twadiña nakuvuloka antu nawamabwambu jami kulonda tuzuñi nawu. Twazatishileña jimpoku, nitupomposhi kulonda kulukuka nachu izanvu dawantu 20 hela kubadikahu