Indi Nzambi Wamonaña Ñahi Walwa?

NLEÑI yetu wakeñaña nindi tutiyeña kuwaha, hakaanisha kunwa walwa wamwesekaku. * Ilaña, wamwinka muntu “vinyu yakuluñisha nachu muchima wamuntu, nimanji akulezumwisha nachu mesu indi, niyakudya yakoleshaña muntu.” (Masamu 104:15) Mpinji yimu, Yesu Kristu waleñeleli antu kudiluñisha hachawija kuhitila mukubalumuna menji kwikala “vinyu yayiwahi.”—Yowanu 2:3-10.

Chachiwahi kutoñojoka netu Nleñi yetu weluka chikupu walwa chiwaluwañeshaña yitoñojoka nimujimba. Tata yetu wamwiwulu ‘watulejaña mwakutuwahisha,’ kuhitila muBayibolu nawa watusoñamishaña chikupu hakusweja kunwa walwa wazuwa. (Isaya 48:17) Talenu iku kusoñamisha kwakubula kuhita mumbadi:

‘Bayi musheta vinyuku, chaletaña kukisika.’ (Aefwesesa 5:18) “Akwakusheta . . . hiyamba kaswana wanta waNzambuku.” (1 Akorinda 6:9-11) Izu daNzambi dahisha ‘kusheta, yisela yatama, niyuma yidi neyi iyi.’—Aŋalija 5:19-21.

Tushinshikenu hawubanji wekala mukusweja kunwa walwa.

Wubanji Wekala Mukusweja Kunwa Walwa

Hela chakwila walwa wunateli kukwashana chantesha, ilaña mwekala yuma yikweti ñovu yahimpaña nzatilu yayitoñojoka nimujimba. Kusweja kunwa walwa kunateli kuleta kukala kudi neyi ikwe:

Kusweja kunwa walwa kwaluwañeshaña yitoñojoka, nawa kwaleñelaña muntu ‘kutoñojoka yuma yakuluwalala.’ (Yishimu 23:33) Allen, chinwa walwa atenawu muchibaaba chinafumuhu, wahosheli nindi: “Kuteñuka nawalwa bayi neyi himusoñu wamujimba hohuku; ilaña himusoñu wayitoñojoka niyililu. Muntu hatoñojokaña nindi nakuneñesha antu amakwawuku.”

Kusweja kunwa walwa kwaleñelaña muntu kubula nsonyi. Nsona yatusoñamishaña nawu: ‘Vinyu nivinyu yayiha diyafumishaña  kashinshi.’ (Hoseya 4:11) Munjilanyi? Neyi muntu nasheti, yuma yitwamonaña netu yatama yinateli kumwekana neyi yayiwahi, nawa yikuleta ikoku. Tunateli kukañanya kwila yuma yaloña yitwafuukulaña. Walwa wunateli kuluwañesha yililu yetu yayiwahi, nakuleta kukala kuspiritu.

Chakutalilahu, John, watobokeli nañodindi nawa wafundumukili nakuya kwitala dakunwina walwa. Chanwiniyi jinchumpa jantesha nindulu yimana nikuma, mumbanda wumu wamusolomokeli. Hanyima yakunwa jinchumpa jikwawu, John wayili nakwila wuvumbi naniwu wamumbanda. Nkumininaku, John waditoñesheli hakukoña chuma chadi kubula kwilayi neyi chakwila wadiña mumesu achaaña.

Kusweja kunwa walwa kwaleñelaña muntu kwikala nanhoshelu niyililu yatama. Bayibolu yehula nawu: ‘Wamonaña yikonkojola hinyi? Watobokaña nakuzuña hinyi? Wowu ashakamaña shakame-e, nakunwa nchumpa yimu hohu.’ (Yishimu 23:29, 30, Contemporary English Version) Kusweja kunwa walwa kunateli kuyileña “kwikala neyi muntu nakambami mukachi kakaluñalwiji, hela neyi muntu nakami kumutondu wemana muwatu.” (Yishimu 23:34) Muntu wunasweji kusheta nateli kuhinduka wudi ‘nayilonda mumujimba, chakadi kwiluka chadikatishayi.’—Yishimu 23:35.

Kusweja kunwa walwa kwakisañanaña mujimba. “Hakukuminina [walwa] hiwukusumana neyi kapela, hiwukukulawukila neyi kabandayula.” (Yishimu 23:32) Adiza jasayansi eteja maana ekala munichi chishimu chakushankulu. Kusweja kunwa walwa hiwulembi wafwana wunateli kuleta yikatu yakansa yamboka-mboka, chikatu chakunana muchima, chikatu chakisañanaña kalulañandu, chikatu chashuga, kalepa, hela muchima kubula kuzatika chiwahi, iyi hiyikatu yantesha hakachi kayikatu yayivulu yafumañamu. Kusweja kunwa walwa hela tuhu hampinji yimu kunateli kuleñela muntu kuhwidila hela kufwa. Yuma yatama nankashi yafumaña mukusweja kunwa walwa, hiyayishimuna munyikanda yahoshaña hajakuukaku.

Wubanji weneni. Hela chakwila muntu hakushetaku, kusweja kunwa kunateli kukisañana wuspiritu. Bayibolu yashimuna hatooka to-o nawu: ‘Yayo-o, amenekeshaña budidi kulonda akanwi walwa; ashakamaña shakame-e nimukachi kawufuku nichakushetawu  vinyu!’ Muloñadi? Isaya walumbulula yuma yakisañanaña wuspiritu hamuloña wakusweja kunwa walwa nindi: “Ilaña wena kutala mudimu waYehova nehi, hela yelaña makasindi kuyishinshika chachiwahi nehi.”—Isaya 5:11, 12.

Izu daNzambi datusoñamishaña nawu, bayi ‘twikalaña hamu nawakwakunwa nankashi vinyuku.’ (Yishimu 23:20) Akulumpi awambanda ayileja nawu bayi ‘asweja kunwa walwaku.’ (Titusa 2:3) Muloñadi? Antu avula kutachika kunwa walwa wawuvulu chovu-chovu chakadi kwiluka. Nkumininaku, mukwakunwa walwa ‘nateli kuchisha nakutona nindi, nakahinduka mutulu mwakanyi nakawukeñakeñi cheñi?’ (Yishimu 23:35) Muntu wateñuka nawalwa wamonaña kukala nankashi neyi nakukeñesha kunwahu walwa nantentemena kulonda kumanisha chinzeya chawalwa wanwayi nawufuku.

Bayibolu yasoñamishaña nawu antu ‘aswejaña kunwa walwa, nakuhañana yisela, nakusweja kudya . . . amba kashimunamu kudi yena wudi nakuhembela kusompesha amomi niafu.’ (1 Petulu 4:3, 5) Kutalisha munanu mafuku atama itunakushakamamu, Yesu wasoñamishili nindi: ‘Babalenu enu aweni, nyichima yenu yakenda kasweja kwikuta, nakusheta walwa, nikwakama yuma yawumi wunu, ifuku odu [daYehova] dakenda kayikasumwisha neyi muhetu.’—Luka 21:34, 35.

Hanu dinu, chumanyi chatela kwilawu antu eñija mutu muwalwa kulonda atondolweli ‘kusweja kusheta walwa’?

[Tumazu twaheshina]

[Nyevulu yidi hefu 4, 5]

Kusweja kunwa walwa kunateli kuleta kukala kwakuvulu