Komana Afu Anateli Kukwasha Amomi?

TAMBA mukwenzi weyala wakuWest Africa, wadiña kwakwihi nakusoneka kweseka hashikola. * Mama yindi wamulejeli nindi hakwila nawu yahiti chiwahi watela kukeña wukwashu wawankakulula afwa dehi. Mwituña daPalermo, Sicily, antu ayaña nakutala majamu aheseki kwahembelawu chiwahi yibimbi yayivulu yashawu hatooka. Amakwawu akuhwelela nawu iyi yibimbi yahembawu, yakiñaña amomi. Chaaka nichaaka, antu ahempulaña musumba waLily Dale, wekala kukabeta kakumujika kaNew York State, U.S.A., iluña denidi adiluka nawu kwashakamaña akwakuzakuka akishi amavulu hama. Enyi ayaña kuniwu musumba akuhwelelaña nawu anateli kuhanjeka nawantaña jawu afwa dehi hela amabwambu jawu nikuyikwasha.

Mukaayi kejima, antu atwalekahu kukuhwelela nawu afu anateli kukwasha amomi. Indenu mwatoñojokañahu nenudi? Hadaha ayidizisha iyi nsañu indi kwiji mwashakamaña nawantu alemesha yitoñojoka yeniyi. Muntu wejima wakeñeshaña kumona antaña afwa dehi. Akwakuzakuka akishi alejaña antu nawu anateli kuyikwasha muniyi nsañu. Mumagazini yaTime asombolwelumu mazu ahosheliyi mukwakuzakuka akishi nindi “kala mpinji yimunakukeña wukwashu anateli kuyikwasha” muwanta wawaspiritu. Komana dimu? Chalala afu anateli kukwasha amomi? Munateli kuhayama hakwiluka ñakwilu yamuBayibolu yatiyakana.

Komana Afu Ekala Amomi Kwiluña Dikwawu?

Bayibolu yalumbulula munjila yapela, nawa yaswayi kutiya chekalawu afu. Talenu chahosha mukanda waMukwakutaŋisha 9:5: “Amomi eluka dehi nawu, Twakafwa; hakwila afu hiyeluka chumaku.” Komana chalala afu atiyaña? Vasi 6 yakulaña nawu: “Nimwakeñelañawu, nimwahelelañawu, nimwatiyilañawu ichima mwajiya dehi; hiyamba kamona nawa cheñi iseka dawu dakudya kuyuma yelañawu mwishina detañwaku chahaya nyaka.” Talenu cheñi chahosha vasi 10 yakapetulu kokamu “mwijamu muwukuya mwosi mudimu, mwosi kufuukula, mwosi kwiluka, mwosi maana.” Izu dakwila nawu “Ijamu” adituntulula kufuma kwiizu dachiHeberu “Shelu.” Kafwampi, izu dachiGriki desekana nanidi izu, ‘hiHadesi,’ adizatishaña munsona kulonda kushimuna mwiluña mwadiñayi Yesu Kristu hakapinji kantesha chafwiliyi.—Yililu 2:31.

Yesu wakwashili antu amavulu hampinji yadiñayi wamumi, nawa welukili nindi wukafwa. Komana wakuhweleleli nindi wakatwalekahu kukwasha antu henohu wudi mwijamu? Inehi. Kufwa kwindi wakwesekejeli nampinji yawufuku yabulaña kukalakalawu nyidimu. (Yowanu 9:4) Yesu welukili nindi neyi antu afwa, “anoña dehi.”—Isaya 26:14.

Yesu wesekejeli chuma chikwawu chadifwana nakufwa. Chelili ibwambu dindi Lazaru yafwi, Yesu wafwanishili kufwa natulu. (Yowanu 11:11-13) Hitunateli kukuhwelela muntu wunakami mutulu kutukwashaku, netuku? Satulu hatoñojokañaku, nawa hanateli kukwasha muntu wudi wejimaku.

Komana Wumi Hiwafwañaku?

Antu amavulu ayidizisha nawu wumi hiwafwañaku. Ilaña Bayibolu hiyatañishaña chumichuku. Mukanda watachi wamuBayibolu  waKutachika, walumbulula chekala wumi. Hamukanda waKutachika 2:7 hahosha nawu muntu watachi kuleña, ‘wekalili mumi.’ Muntu yomweni hiwumi; atunyama niwena himawumi. (Kutachika 1:20-25) Dichi, neyi muntu hela kanyama yafwa, dikwila nawu wumi wunafwi. Ichi dichahoshaña Bayibolu.—Ezekeli 18:4.

Hela chochu, antu amakwawu anateli kwihula nawu, ‘Indi nsañu jajivulu jitwatiyaña nawu antu amomi ahanjekaña nawafu, kutiya mazu awu, hela kuyimona, yalala?’ Nsañu jamuchidiwu ajihoshaña mumatuña amavulu mukaayi. Iyi nsañu yaleteshaña antu anafwishi antaña hela amabwambu jawu kukuhwelela nawu amomi, nawa ayaña kudi akwakuzakuka akishi atwambaña nawu ahanjikaña nawafu.

Komana nsañu jamuchidiwu jalala? Neyi dimu, hijatadikishaña mazu adi hewulu amuBayiboluku? Kristu Yesu washimwini nindi Izu daNzambi hinsañu yalala. (Yowanu 17:17) Nsañu yalala hiyaditadikishañaku. Kafwampi, muBayibolu mwekala wunsahu watiyakana watela kutukwasha kwiluka nsañu yakwila nawu afu anateli kukwasha amomi. Bayibolu yatulejaña muntu wakeñeleña nindi amukwashi kudi afu. Kutaña nakanañachima iyi nsañu kukutukwasha kwiluka chalala.

Mwanta Wakeñeli Nindi Amukwashi Kudi Afu

Chuma chenichi chamwekeneni kwiluña dazuñilileñawu njita kukabeta kaluwunda kaIsarela. Mwanta Sawulu nimukanka windi wawamashidika ayilukukili kudi amashidika awaFwilistinu añovu. Sawulu chamweniyi luntu lwawaFwilistinu, “muchima windi mwivumu hiwudi kwandu-ndu.” Haniyi mpinji yadiñayi mwanta, Sawulu walekeli kudifukula kwalala. Chafuminumu, Yehova hakwili kulomba kwinduku. Indi Sawulu adi kumukwasha kudinyi? Muloña Samweli kaprofwetu kaNzambi wadiña wafwa dehi.—1 Samweli 28:3, 5, 6.

Sawulu wayili kudi mukwakuzakuka akishi wamuEndori kulonda amukwashi. Wamulembeleli mukwakuzakuka kulonda ‘amuleteli Samweli’ kufuma kudi afu. Mukwakuzakuka watambikili muntu wakulumbisha. Iwu “Samweli” wamulejeli Sawulu nindi aFwilistinu akashinda ilaña Sawulu nianyanindi akafwila munjita. (1 Samweli 28:7-19) Komana mwalala wadiña diyi Samweli wafumini kudi afu?

Toñojokenuhu ntahi. Bayibolu yashimunaña nawu muntu chafwayi ‘wafuntaña cheñi kwindi hamaseki indi’ nawa “mwafuukulayi munakisiki dehi.” (Masamu 146:4) Sawulu niSamweli wonsu wawu elukili nawu Nzambi wahiisha kutiyañana nawakwakuzakuka akishi. Muloña Sawulu hakusambila wahañili mukanka wawakwakuhoña.—Alevi 19:31.

Toñojokenu haniyi nsañu. Neyi chakwila Samweli washinshika wadiña kwoku muspiritu, komana wadi kufumpa nshimbi yaNzambi nikutiyañana namukwakuzakuka akishi kulonda adimoni naSawulu? Yehova wakaanini kuhosha naSawulu. Komana chalala mukwakuzakuka wadi kumukanjikija Nzambi Wabadika ñovu kulonda Sawulu atiyañani naSamweli wafwili? Inehi. Chakadi nikujina, iwu “Samweli” hadiña kaprofwetu washinshika waNzambuku. Wadiña spiritu, ndemoni watama wadifwikijili kwikala Samweli wafwili.

Andemoni hiyañelu adikañili nachiyuulu chaNzambi muntachikilu yansañu yawantu.  (Kutachika 6:1-4; Yuda 6) Awa andemoni anateli kushinshika nankashi antu henohu achidi amomi; elukaña chahoshañawu antu ejima; chamwekanañawu, niyuma yelañawu. Afwilaña kutandisha yuma yashimunaña Bayibolu nawu yakutwamba. Dihafuma Bayibolu kutusoñamisha nawu bayi tutiyañanaña nawaspiritu atamaku. (Kuhituluka 18:10-12) Awa aspiritu atama achidi kuzata nikulelu.

Dimuloña wutwatiyilaña antu amavulu kuhosha nawu “anatiyi” hela “anamoni” antu akeñawu afwa dehi. Hela chakwila iyi nyijimu mpinji yikwawu yinateli kumwekana neyi yakwashaña, aspiritu atama afwilaña kudimba antu. * (Aefwesesa 6:12) Toñojokenu cheñi hachumiche: Yehova hiNzambi wakukeña watwakamenaña. Neyi chakwila afu ekala amomi kwiluña dikwawu nawa anateli kukwasha amabwambu nichisaka chawu, komana Nleñi yetu wakukeña nateli kukaanisha kuhanjeka nawafu nakuhosha nindi ‘hichishimashima’? Inehi! (1 Petulu 5:7) Komana kudihu kutunateli kuwana wukwashu walala?

Wukwashu Wukwetuwu Amomi niWukatambwilawu Afu

Kwesekeja nansañu yindi hewulu, tuneluki netu afu hiyanateli kukwasha amomuku. Kubombelahu, kukeña wukwashu kudi afu hichuma chatama nawa hiyanateli kutukwashaku; afwana chikupu chineli afumpaña nshimbi jaNzambi, nawa afwilaña kutwiluwañesha nawufwinda wawandemoni.

Bayibolu yatulejaña Kwafumaña wukwashu wawuwahi, Nleñi yetu, Yehova. Nateli kutupulwisha kukufwa. (Masamu 33:19, 20) Watukwashaña nimakonu. Watwinka kuchiñeja kwalala, kubadika kukuhwelela yuma yakutwamba yashimunañawu akwakuzakuka akishi.

Tamba, atenawu hakutachika, welukili chikupu chaambu chekala hakuchiñeja kwakutwamba kwashimunañawu akwakuzakuka akishi ninsañu yalala yatulejañayi Yehova. Ayimbuki amulejeli nawu, neyi yabula kuhana mulambu kudi ankakulula jindi afwa dehi, wukufweluka kweseka. Tamba watachikili kudiza Bayibolu nawaYinsahu jaYehova. Wadizili chekalawu afu ninsulu yawandemoni adifwikijaña kwikala ankakulula afwa dehi. Hela chakwila mama yindi wamukanjikijili nindi yakeñi wukwashu wawaspiritu, Tamba wakaanini, nakumuleja mama yindi nindi, “Neyi nikañanya kuhita kweseka, nikazata nañovu chaaka chikwawu.”

Chumanyi chafuminumu? Wahitili kweseka nakushiyamu akwawu ejima. Mama yindi wahayamini, walekeli kukuhwelela aspiritu, nawa hahosheluhu cheñi nsañu yakuhana nyilambu yamuchidiwuku. Tamba wadizili nindi Yehova watusoñamishaña kutondolwela ‘kwihula afu nsañu jawamomi.’ (Isaya 8:19) Kudiza Bayibolu kwamuleñeleli Tamba kwiluka nindi neyi yatiya kuwaha nanshimbi jaNzambi, wukutwesha muyuma yikwilayi.—Masamu 1:1-3.

Chumanyi chikamwekena antu itwakeña afwa dehi? Komana kuduhu kuchiñeja kudi kwejima kwawafu? Kubombela hakutukwasha etu amomi, Yehova wakana kusañula antu ejima adi mumajamu. Hanyima yakulumbulula nawu afu hiyakweti wuswaku, talenu kaprofwetu Isaya chahosheliyi mukapetulu 26, vasi 19: “Afu eyi akahanda; . . . Enu mwashakama mulunkuñu tonenu mwimbi tumina.” Wuprofwetu watwalekahu kuhosha nawu ‘afu’ akahanda cheñi.

Toñojokenu chumichi! Mabiliyoni awafu adi mumajamu akayisañula! Kafwampi Bayibolu yashimuna nawu Yehova ‘wafwilaña’ kusañula afu. (Yoba 14:14, 15) Komana iyi yikaninu yalala tahindi? Yesu Kristu wakuhweleleli chikupu ichi chikaninu, dihafumini kuhosha hadi afu nindi amomi kudi Yehova.—Luka 20:37, 38.

Komana munakukeña kukuhwelela iku kuchiñeja? * Twalekenuhu kudiza chalala chamuBayibolu. Chimukudizaña, mukwiluka chikupu nenu Yehova nateli kukwasha amomi niafu nawa twatela “kwitiya” yikaninu yindi nawa ‘yalala.’—Chimwekeshi 21:4, 5.

[Tumazu twaheshina]

[Mazu ekoku adi hefu 21]

Wejima wetu twakeñaña kumona antu itwakeña afwa dehi

[Mwevulu wudi hefu 22]

Komana kaprofwetu Samweli wasañukili nakuhanjeka naMwanta Sawulu?