Komana Mwatela Kwikala Ashinshika Mpinji Yejima?

ANTU ejima ekala ashinshika mpinji yikwawu; hadaha amavulu ashinshika mpinji yejima. Hanu dinu mweluka antu añahi afwilaña kwikala ashinshika mpinji yejima?

Makonu, wupwapoki wunatandi muyuma yayivulu mukuhanda kwawantu. Hela chochu, antu eluka chikupu chamonañayi Nzambi kushinshika. Chakutalilahu, antu amavulu eluka lushimbi lwamuchitanu natusatu lwamuNshimbi Ikumi lwakwila nawu: “Kwiya, chinjila.” (Kwidika 20:15) Hela chochu, amavulu atoñojokaña nawu mpinji yikwawu wupwapoki hela kwiya kwakuwahi. Tushinshikenu yakutalilahu yisatu yinakuhosha hawukombi wavula kuhoshawu nawu wawuwahi.

Komana Kwiya Kwakuwahi Neyi Wudi Kazweñi?

Muntu wakuluka yitembi munsañu yamatuña nachiyuulu wakuRoma wahosheli nindi: “Wuzweñi diwu waletaña wukombi.” Kazweñi nateli kutoñojoka nindi chachiwahi kwiya. Akwakutala anateli kwiteja. Indi Yesu wamweneña ñahi atuzweñi? Wayitiyilileña atuzweñi luwi hama. ‘Wayitiyilili wushona.’ (Matewu 9:36) Hela chochu, hetejeli wukombuku. Hanu dinu kazweñi watela kwiladi?

Nzambi watiyilaña wushona antu afwilaña kumwovwahila namuchima wumu nawa wukayikwasha kwikala nayuma yakeñañawu. (Masamu 37:25) Bayibolu yakana nawu: “Yehova hakamwiteja muntu waloña kufwa nanzalaku; antu atama wowu akabondayi yuma yakeñawu.” (Yishimu 10:3) Komana kazweñi nateli kukuhwelela awa mazu? Victorine wakuhwelela awa mazu.

Victorine hinfwila wukweti anyana atanu ayaña kushikola nawa chihandilu chamukalila. Washakamaña mwituña dabula mali amavulu. Wavula kuzatila heluña hekala yuma yayivulu yinateli kwiyayi. Hela chochu, Victorine heyañaku. Ilaña himukwakulandisha mumukwakwa washinshika wazataña nañovu kulonda yawani yuma yakudikwasha nachu. Muloñadi chekalilayi muntu washinshika?

Wahosheli nindi, “Chatachi nakuhwelela nami Nzambi washinshika nawa wukunkwasha neyi nikala washinshika. Chamuchiyedi, anyanami akudiza kwikala ashinshika neyi anmonaña ami nashinshika.”

Wahandaña ñahi? Wahosheli nindi, “Tukweti yakudya, yakuvwala nihakukama. Hela chochu, mpinji yikwawu nakeñaña wukwashu  kudi amabwambu, chakutalilahu nakeñaña mali akufweta kuchipatela. Mpinji yejima natambwilaña yuma yinakeñaña. Muloñadi? Muloña amabwambu jami eluka nawu nayilejaña chalala hakukala kunukweti nawa hinafwilaña kutambula yuma yayivuluku.

“Anyanami anakukula nakashinshi. Ntuñi nami wamweni mali hamesa yetu nawa wañihwili neyi chakwila hinakwakama nami anyanami akunona maluku. Chinamulejeli nami anyanami hiyeyañaku wahayamini chikupu. Wayesekeli chakadi ami kwiluka. Washili mali amawayawaya akufwika ku 100 franc mukuswamujoka heluña datela kuyimonawu anyana swayi. Chafuntiliyi ifuku dikwawu, wahayamini hakuwana mali chochayishiliyi. Kwikala nawanyana ashinshika hichuma chachiwahi kubadika maheta amavulu.”

“Antu Ejima Eyaña”

Antu avula kwiya hanyidimu. Chumichi chinakuleñela antu kuhosha nawu, “Antu ejima eyaña, indi ami nikubuliladi kwiya?” Kwambukaku Bayibolu yahosha nawu: “Bayi wakalondela muchendu chawantu wakakoñi chatamaku.” (Kwidika 23:2) Victoire wovwahilaña iyi nshimbi. Chumanyi chafumamu?

Hampinji yadiñayi nayaaka yakuvwalika 19, Victoire wazatileña mufakitoli yakamunañawu manji anyikoma. Wamweni neyi ambanda 40 azatileñayi nawu eyileña nyisoka yanyikoma nakuyisweka muyimpaya yawu. Kunsa yamulungu wudi wejima, alandishileña nyisoka yamukoma mali akwesakana nawufwetu wamafuku asatu hela awana. Victoire wahosheli nindi: “Mwalala antu ejima eyileña. Anlejeli nawu niyeña, ilaña nakaanini nakuyileja nami nekala muntu wakashinshi muchihandilu chami. Anseheleña nawu inakushalahu yuma yayiwahi.

“Ifuku dimu chitwafumineña mufakitoli mukulumpi wamudimu wasolomokeli. Wasandujoleli muyimpaya yawantu ejima nawa wawaninumu nyisoka yanyikoma muyimpaya yawu shalahu ami. Ejima akwatiluwu adi kuyihaña nyidimu hohenohu hela kuzata nyilungu yiyedi chakadi kuyifweta. Muniyi nyilungu yiyedi ana ambanda elukili chikupu nawu hinashalileñahu yuma yayiwahuku.”

“Neyi Wunona Chuma Diswekeli”

Mwatoñojokaña ñahi neyi munona chuma chalema wuseya chinajimbeshiyi muntu? Antu amavulu atoñojokaña nawu chawu, nawa hiyatoñojokaña kuchifuntishaku. Ekala nayitoñojoka yakwila nawu “neyi wunona chuma diswekeli.” Amakwawu atoñojokaña nawu kwosi chuma chatama chineluwu. Kafwampi, atoñojokaña nawu mwini chuma hanakuhweleli nindi wukuchiwana cheñuku. Amakwawu ahoshaña nawu hiyakweti mpinji yakukeñakeña mwini chumaku, nawa chumichi chakeñekaña kushaku ñovu chikupu.

Indi Nzambi wamonaña ñahi iyi nsañu? Mukanda waKuhituluka 22:1-3 wahosha nawu neyi muntu nanoni chuma hatela kuchihemba hohuku, ilaña watela kuchihemba ‘ninichi chakatondayi yomweni chuma nakumufuntishilachu.’ Neyi chakwila muntu wanoneli chuma kushimuna nehi, amwinkeleña muloña wawukombi. (Kwidika 22:9) Komana iyi nshimbi yazatikaña makonu? Christine weluka nindi yazatikaña.

Christine himukulumpi washikola. Ifuku dimu haChisatu watambwili nfwetu yindi yahakakweji. Neyi chelañawu antu amavulu kuWest Africa, wakasili ifunda damali nakudisha mufuuba yindi. Wemikili katukutuku kamusendeli nakutemukila kukupompa. Chashikiliyi wanoneli mali mufuuba yindi nakumufweta ñendeshi. Ifunda damali daholokeli chakadi kudimona nsañu yamwidima.

Chimwahitili jiminiti jantesha Blaise wadiña nayaaka yakuvwalika 19 nawa mwenyi kunidi iluña wahitilili muniyi njila. Walejeli ibwambu dindi kwinza nakupompa kuchipompelu kwayiliyi Christine. Wawanini ifunda damali nakudisha mwitumba dindi. Chamanishiluwu  kupompa wamulejili ibwambu dindi nindi nanoni mali hanzi nawa neyi kudi muntu wunajimbeshi watela kumutemeshela nshiña kulonda yatambuli.

Chashikiliyi Christine kwitala, wahayamini hakumona nfwetu yindi yahakakweji yinajimbali. Chimwahitili mulungu, wamulejeli mukwawu Josephine nindi najimbeshi mali. Josephine wamulejeli nindi mwenyi wenjili nakupompa wanoneli mali. Christine wamutemesheleli Blaise nshiña nakushimuna mali ajimbesheliyi. Watiyili kuwaha chelili Blaise yamufuntishili mali. Indi Blaise watiyili ñahi? Hela chakwila wahembeli mali hadi mulungu wumu wahosheli nindi, “Natiyili muzañalu chikupu hakufuntisha mali kubadika muzañalu wunatiyili hakuyihemba.”

Chayileñelaña Kwikala Ashinshika Mpinji Yejima

Victorine, Victoire, niBlaise ashakamaña kumaluña ashiyashana nawa hiyadilukaku. Hela chochu, awa antu akweti chililu chadifwana. Wejima wawu hiyaYinsahu jaYehova, akakelaña kuyuma yatañishaña Bayibolu kutalisha hakashinshi. Ahembelelaña kushikijewa kwachikaninu chaNzambi chetuña dadiha. “Twatalilaña mawulu amaha niiseki dadiha, mwakekala kuloña neyi chakaniniyi.” Antu ejima akekala mwituña dadiha akekala aloña nawa ashinshika.—2 Petulu 3:13.

Victorine wakuhwelela nindi hanateli kwikala namali ashikilaku, sampu Nzambi nahimpi yuma. Ilaña waheta kuspiritu, chuma chakadi kulanda namali. Anyanindi ashinshika nawa akweti kavumbi. Hamulungu wudi wejima ‘atiyaña kuwaha’ kulejaku antuñi nawu hakuwaha kwaNzambi nikulumbulula chakazañaleshayi ‘antu ejima amutambikaña chalala’ nawa wakahemba “antu ejima amukeña.”—Masamu 145:7, 18, 20.

Chimwahitili mafuku Victoire walekeli kuzata kufakitoli yakamunaña manji amukoma. Watachikili kulandisha yakudya yatenañawu nawu garri (ayituñaña nanyikamba) hachisankanu. Hamuloña wakwikala nakashinshi yakudya yindi ayilandileña hama. Kafwampi watachikili kuzata mpinji yantesha hachisankanu kulonda yazateña mpinji yeneni mumudimu wakushimwina antu hachikaninu chakushakama mwituña mwakadi wupwapoki. Nkumininaku wasumbukili, chayinu mpinji wazataña mudimu wakushimwina mpinji yejima namfumwindi.

Christine wajimbesheli mali indi Hetala daWanta dawaYinsahu jaYehova. Blaise welukili antu antesha enjili nakupompa, ilaña welukili nindi hiyana kwindi niahela akwaKristu afwilaña kwikala ashinshika mpinji yonsu.

Mweluka antu añahi afwilaña kwikala ashinshika chikupu mpinji yejima? Fwikijenu okuwaha kwakwikala nawantu akushika ku 50, 100, hela 200 ashinshika. Iwu dimuzañalu watiyañawu aYinsahu jaYehova haMatala awu aWanta. Komana kwila muya Hetala daWanta kulonda muyiluki aYinsahu jaYehova nehi?

[Mazu ekoku adi hefu 11]

“Kwikala nawanyana ashinshika hichuma chachiwahi kubadika maheta amavulu”—VICTORINE

[Chikasha chidi hefu 13]

Komana Yishimu 6:30 Yeteja Kwiya?

Mukanda waYishimu 6:30 wahosha nawu: “Antu hiyadiwulaña muntu wukwiya kulonda ekuti hanatiyiyi nzalaku.” Komana awa mazu eteja muntu kwiya? Kwakulehi. Mazu wenawa amwekesha nawu Nzambi wababeshaña ikombi hamuloña wunakoñiyi. Vasi yalondelahu yahosha nawu: “Hela chochu, neyi anamukwati wakafuta katanu nakayedi, wakakumina dakuhana yuma yejima yamwitala dindi.” (Yishimu 6:31) Hela chakwila ikombi wuneyili nzala hiyakumwinka muloña weneni neyi ikombi wuneyi hamuloña walwisu hela wunakufwila kutiyisha kutama muntu wuneyiliyuku, ilaña watela ‘kufuta.’ Antu afwilaña kwikala nawuselewa waNzambi hiyatela kwikala namuloña wawukombi wudi wejimaku.