‘Kunashali Ninwi Nchumpa Yimu Hohu’

ALLEN watachikili kunwa walwa henohu wudi nayaaka yakusemuka 11. * Ahemeneneña mumasaña nawamabwambu jindi nakwimbujola anhemi amujifilimu jatalileñawu. Allen nawamabwambu jindi embujolileña anhemi anwineña walwa wakulumbisha, ilaña wena adiña nakunwa walwa waweni.

Tony wadiñi nayaaka 40 hampinji yatachikiliyi kusweja kunwa walwa, wanwineña nchumpa yimu hela jiyedi kufumahu hakunwa jitanu hela jitanu nayimu mafuku ejima namelela. Nkumininaku, hatwesheleña kwiluka jinchumpa janwineñayi hefuku dimuku.

Allen wakeñeli wukwashu kulonda yomanishi kukala kwindi kwakusweja kunwa walwa. Tony wakaanini wukwashu wamukwashiluwu kudi amabwambu nichisaka chindi. Makonu Allen wuchidi wamumi hakwila yashimuni iyi nsañu; Tony wafwili dehi mumaposu ahamukwakwa namotoka hanyima yakusheta walwa.

Hela chakwila muntu washetaña nkawindi, yuma yafumañamu yaleñelaña antu amakwawu kuyandilamu, nawa mwavula kufuma yuma yatama. * Kakavulu kusheta dikwaleñelaña antu kuditukola nikudihumpula, kukatisha antu nikujahañana, maposu ahamukwakwa nikudikatisha hanyidimu, nawa kwaletaña yikatu yayivulu. Antu akisañanaña mali amavulu nankashi kuwalwa hachaaka hachaaka, nawa yisaka ninyana yamonaña ihuñu.

Hela chochu, mutayi wumu wahosha nawu, “Bayi neyi muntu wejima wanwaña walwa mpinji yejima wateñuka nawalwaku, nawa antu ejima ateñuka nawalwa hiyanwaña mafuku ejimaku.” (U.S. National Institutes of Health) Antu amavulu abula kuteñuka nawalwa eñijaña mutu muwalwa chakadi kwiluka. Antu amakwawu anwaña kazoku-kazoku, ilaña anwaña jinchumpa jakubadika hajitanu hampinji yimu.

Neyi mufuukulahu kunwa walwa, nchumpa jiñahi jimwatela kukumina? Hanu dinu munateli kwiluka ñahi nenu ‘hikunashali kunwa nchumpa yimu hohuku’? (Yishimu 23:29, 30, Contemporary English Version) Yibaaba yinalondeluhu yinakuhosha hansañu yinateli kukwashana kutalisha hakunwa walwa.

[Tumazu twaheshina]