Yuma Yaletaña Muzañalu muChisaka

Kwikala naWulunda Wawuwahi naWatuwuku

Jenny * wahosheli nindi: Mama yaRyan wadiña nakunleja hatooka nindi wahela. Anvwali jami niwena adiña amuhela Ryan. Kafwampi kanda niyimoneñahu dehi anvwali jami kwila mwenimu namuntu wudi wejima! Wejima wetu twaneñeleña neyi tuya nakuhempula anvwali jetu.

Ryan wahosheli nindi: Mama watoñojokeleña nindi kwosi muntu watelela anyanindi, dichi wamuheleli Jenny kufuma tuhu hitwadilukili. Anvwali jaJenny niwena anheleli nawa ansekesheleña mpinji yejima nawu hinamutelela mwanawuku. Kukala kwafumineña hakwila ami niJenny twahakwilileñaku anvwali jetu nakudifwisha nanyiloña mulwetu.

KUTOBOKA nawatuwuku hichuma chamonañawu akwakusehesha antu nawu hikusenseka, ilaña muchihandilu chawantu hinsañu yakusehesha wanyi. Mumbanda wakwituña daIndia wejina daReena, wahosheli nindi, “Mukuwami wamumbanda wadiñijileña munsañu yamaluwi etu hadi yaaka yayivulu. Navulileña kumushikijila mfumwami ndulu muloña hinatwesheleña kubobola namama yinduku. Chamwekeni neyi wadiña nakufuukulahu mpinji yejima mwatela kwikalayi iyala wamuwahi nimwana wamuwahi.”

Muloñadi atuwuku amakwawu chadiñijilañawu munsañu yamaluwi yawanyanawu? Jenny, wahosheli mazu asombololawu hakutachika washimuna chuma chimu. Wahosheli nindi, “Hadaha chayikalilaña kumona muntu wuchidi kansi nawa wabula kukuluka yitembi hakwikala namudimu wakuhemba mwanawu wamumbanda hela weyala.” Dilip, mfumwa Reena, wabombeleluhu nindi, “Anvwali analeli mwanawu nikumukabakena anateli kutoñojoka nawu anakuyidiwula. Anateli kwakamena cheñi nawu mwanawu wamumbanda hela weyala hakweti maana atela kuhemba wuluku.”

Kuhosha hohu mwalala, mpinji yikwawu bayi neyi atuwuku diwu adiñijaña aweni munsañu jamaluwi awanyanawuku. Chakutalilahu, shinshikenu Michael naLeanne adisumbula akwituña daAustralia. Michael wahosheli nindi, “Leanne wafuma kuchisaka chadikunda hama nawa wejima wawu ekala akasunuka hakuhanjeka. Chitwadisumbwili, wayileña kudi tata yindi kulonda amuleji mwakwilila hansañu yitwakeñeleña  kufuukulahu. Tata yindi wadiña namaana chikupu, ilaña natiyileña kutama chayileñayi kudi tata yindi chatela yañihuli ami.”

Chakadi kujina, nsañu yakundama kudi atuwuku yinateli kuleta kukala muwulu. Anenu nawa mwamonaña kukala kwamuchidiwu? Mwatiyañanaña ñahi nawatuwuku twenu nawa iñodenu watiyañanaña ñahi nawatuwuku twindi? Shinshikenu kukala kuyedi kunateli kumwekana nichimwatela kukwimanisha.

KUKALA KWATACHI: Mwinikwenu nakumwekena neyi wayikeña nankashi anvwali jindi. Iyala wakuSpain wejina daLuis wahosheli nindi, “Iñodami watoñojokeleña nindi neyi tukubula kushakama kwakwihi nawanvwali jindi, wukuyitiyisha kutama. Ilaña chavwalikili mwanetu weyala anvwali jami enjileña nakuhempula mafuku ejima, chumichi chamuneñesheleña iñodami. Chumichi chaleteli kukala chikupu mukachi ketu.”

Nsañu yalema: Hakulumbulula ntanjikilu yamaluwi Bayibolu yahosha nawu mpinji yimu ‘iyala wakushiya tata yindi nimama yindi nakumukakela iñodindi; niwena akekala mujimba wumu.’ (Kutachika 2:24) Kwikala “mujimba wumu” hikwatalisha mukushakama hamu hohuku. Chaya mukwila nawu eyala namumbanda akutuña chisaka chachiha chabadika chisaka chawu mwavwalikilawu. (1 Akorinda 11:3) Kafwampi eyala namumbanda atela kuyovwahila anvwali jawu, nawa kakavulu chumichi chakeñekaña kuyakamena chiwahi. (Aefwesesa 6:2) Mukwiladi neyi njila yakamenenañamu mfumwenu hela iñodenu anvwali jindi yaleteshaña mutoñojokeña nenu wayisekesha?

Chuma chimwatela kwila: Shinshikenu chachiwahi hanoyu nsañu. Komana mwinikwenu wayikeña nankashi anvwali jindi tahindi yenu mwabula kukeña kudikunda nawanvwali jenu? Neyi dimu, munateli komana ñahi iyi nsañu kwesekeja nachayikulishiluwu muchisaka chenu? Tahindi mudi nechima?—Yishimu 14:30; 1 Akorinda 13:4; Aŋalija 5:26.

Hakwila nawu mwakuli awa malwihu mwatela kudishinshika chiwahi. Ilaña chalema nankashi kwila mwenimu. Neyi chakwila atuwuku ayileñelaña kubobola namwinikwenu mpinji yejima, dikwila nawu mukweti kukala muwulu, bayi neyi nawatuwuku twenuku.

Kukala kwakuvulu muwulu kwamwekanaña hamuloña wakwila antu adisumbula atoñojokaña munjila yashiyashana. Kwila mutoñojoka hanoyu nsañu neyi chinakutoñojokayi mwinikwenu nehi? (Afwilipi 2:4; 4:5) Ichi dicheliliyi iyala wumu wasumbula wakuMexico wejina daAdrián. Wahosheli nindi, “Iñodami wakulilili muchisaka mwabulileñawu kuditiyilila, dichi hinakeñeleña kudikunda nankashi nawatuwuku twamuku. Kufumahu, nalekeli chikupu kutiyañana nawu hadi yaaka yayivulu. Chumichi chaleteli kubula kutiyañana muwulu wetu muloña iñodami wakeñeleña kudikunda nachisaka chindi, sweje-e mama yindi.”

Chimwahitili mpinji, Adrián watachikili kumona yuma munjila yayiwahi. Wahosheli nindi, “Hela chikwila, neluki nami kusweja kudikunda nawanvwali jindi kwamuleñelaña iñodami kutoñojoka mwaluwa, ilaña kubula kudikunda nawu kunateli kuleta cheñi kukala. Nafwilaña kwikala nawulunda wawuwahi nawatuwuku twami nikutwalekahu nawulunda wetu.” *

ESEKENU KUZATISHA IYI NJILA: Sonekenu yuma yimunamoni nenu diyi yinakuleta kukala chikupu nawatuwuku twenu. Neyi chinatwesheki, sonekenu nenu, “Natoñojoki nami . . .” Kuhiñahu dihimpenu yipapilu. Naspiritu yakutiyañana nikunuñañana toñojokenu njila jimwatela kumanishilamu kukala kumukweti.

KUKALA KWAMUCHIYEDI: Atuwuku twenu adiñijaña munsañu yamaluwi enu mpinji yejima nikuyikanjikija yuma yimunabuli kukeña. Mumbanda wasumbuka wejina daNelya wakwituña daKazakhstan wahosheli nindi, “Kufuma hitwadisumbwili twashakamini nachisaka chamfumwami hadi yaaka yitanu nayiyedi. Kukala kwafumineña kutalisha hanjila yitwahembeleleñamu anyanetu ninsañu yikwawu yidi neyi  kuteleka niwunyonji. Nahanjekeli namfumwami nimukuwami wamumbanda kutalisha hakukala kweniku, ilaña chumichi chabutwili kesi kamulañi!”

Nsañu yalema: Neyi musumbula hela musumbuka, himukwikala cheñi mumakasa awanvwali jenuku. Nawa, Bayibolu yahosha nawu “mutu weyala diyi Kristu; mutu wamumbanda diyi iyala,” dikwila nawu mfumwindi. (1 Akorinda 11:3) Hela chochu, neyi chashimunawu dehi eyala namumbanda atela kulemesha anvwali jawu. Kafwampi, Yishimu 23:22 yatulejaña nawu: “Mutiyilili tata yeyi wakuvweli, bayi wakadiwula mama yeyi neyi nakuli dehuku.” Mukwila ñahi neyi atuwuku twenu adiwula mazu ahosha nawu iyala diyi mutu wachisaka nakuyikanjikija kwila mwanatoñojokuwu?

Chuma chimwatela kwila: Fwilenu kwiluka chuma chaleteshaña anvwali kudiñija munsañu yawanyanawu mumesu awunda. Ryan asombololawu hakutachika wahosheli nindi, “Mpinji yikwawu anvwali atela kwiluka nawu anyanawu achidi ayilemesha muchihandilu chawu.” Anvwali hiyadiñijaña munsañu yawulu mumushikilaku nawa tunateli kumanisha iku kukala kuhitila mukuzatisha nshimbi yamuBayibolu yakwila nawu ‘dovwahilenuña nakudanakena muntu namukwawu. Neyi kudi muntu wukweti muloña namukwawu amwanakeni.’ (Akolosi 3:13) Munateli kwila ñahi neyi chakwila atuwuku twenu anakudiñija munsañu yawulu nawa kukala kweniku kunasweji chakwila munakubobola namwinikwenu?

Antu amakwawu adisumbula afuukulahu mwakukumina hakuhanjeka nawanvwali jawu. Ichi hichinayi mukwila nawu mwatela kuyileja nshimbi jakulondela munjila yakasawuntuku. * Kakavulu mwatela kwila yuma yinakumwekesha nawu mwalemesha chikupu mwinikwenu muchihandilu chenu. Chakutalilahu, iyala wasumbula wakuJapan wejina daMasayuki wahosheli nindi: “Hela chakwila, anvwali akuyileja yuma yinafuukuluwu, bayi mushikena dakwiteja hohenohuku. Anukenu nenu, munakutuña chisaka chachiha. Dichi sambilenu kumwihula mwinikwenu chinakutoñojokayi hansañu yinayifumbuwu.”

ESEKENU KUZATISHA IYI NJILA: Hanjekenu namwinikwenu kukala kumwamonaña neyi anvwali adiñija munsañu yawulu wenu. Sonekelenu hamu mwakukumina nichimwatela kubula kumotoka nshimbi yimunatanjiki hampinji yoyimu nakulemesha anvwali jenu.

Munateli kukeheshaku kukala kwakuvulu kwamwekanaña nawatuwuku kuhitila mukwiluka yililu yawu nakubula kwiteja iku kukala kuleteña yikonkojola namwinikwenu. Muniyi nsañu, Jenny weteja nindi: “Mpinji yikwawu nsañu yitwahanjekeleña namfumwami kutalisha hadi anvwali jetu yashindameneni hayitoñojoka yetu, chamwekeni hatooka to-o nawu twatiyileña kutama neyi hitukuhosha hayiluwa yawanvwali jetu. Nkumininaku, twalekeli kuhosha hayiluwa yawatuwuku munjila yatama nikwiluka chakumanisha kukula kutukweti. Chafumamu twekala adikunda chikupu hamu neyi eyala namumbanda.”

[Tumazu twaheshina]

DIHULENU NENU . . .

▪ Yililwinyi yayiwahi yikwetuwu atuwuku twami?

▪ Nateli kuyilemesha ñahi anvwali jami hampinji yoyimu nakubula kudiwula mwinikwami?