‘Wamonaña muMuchima’
Kundamenu Kwakwihi Nanzambi
‘Wamonaña muMuchima’
NMWEKENU yamuntu yinateli kudimbana. Chamwekanaña muntu kumesu hichamwekeshaña chekalayi mumuchimaku. Antu elaña chamonawu muntu hiyakukunkulula nawu wekala ñana. Ilaña, Yehova Nzambi wamonaña mumuchima. Chumichi achimwekesha mumazu asonekawu ha 1 Samweli 16:1-12.
Fwikijenu chuma chinakumwekena. Yehova keña yawayishi mwanta wamuha wamuza waIsarela. Nzambi hakumwila kaprofwetu Samweli nindi: “Nikutemeshi wuyi kudi Jesi wakuBetelemi. Muloña hadi anyanindi amayala namonuhu dehi mwanta.” (Vasi 1) Yehova hamuteneni ijinaku, ilaña wahosheli hohu nindi watondewa wakekala hakachi kawanyana kaJesi awamayala. Samweli chinakuyayi kuBetelemi hadaha nakujinooka nindi, ‘Nikwiluka ñahi mwana kaJesi wunatonduwu kudi Yehova hakachi kawanyanindi?’
Chashikiliyi kuBetelemi, Samweli wapompesheli Jesi nianyanindi kulonda adiili hamu kudya kwakulambula. Chineñiliyi wedi wawu Eliyabi, hohenohu Samweli hakumukomoka chinakumwekanayi. Samweli hakutoñojoka nindi Eliyabi watelela kwikala mwanta muloña wachiminu chindi, hakuhosha nindi: “Chalala wambala waYehova wawayishewa nashiki dehi kumesu indi.”—Vasi 6.
Hela chochu, Yehova namweni yuma mwacheñi. Hakumwila Samweli nindi: ‘Bayi wumutala chekalayi kumesu hela chatalukayuku; namukaani kwami.’ (Vasi 7) Yehova hakomokeli kutaluka kwaEliyabi hela kuwahaku. Yehova wamonaña yuma yejima hadi muntu nawa wamonaña kuwaha kwalala kwekala mumuchima.
Yehova hakumulumbulwila Samweli nindi: “Muloña Yehova hamonaña chamonañawu antuku; muloña antu atalaña kumesu hakwila Yehova watalaña kumuchima.” (Vasi 7) Mwamweni, chuma chalema kudi Yehova himuchima, wuntu wamukachi nsulu yayitoñojoka, niyililu yamuntu. ‘Mukwakweseka nyichima yawantu’ wamukaanini Eliyabi nianyana kaJesi amakwawu atanu nawumu aleteluwu kumesu aSamweli.—Yishimu 17:3.
Kunashali mwana kaJesi wumu kabinda, Davidi, wudi “nakuhemba nyikoku.” (Vasi 11) Dichi hiyakumutambika Davidi mumasaña mwadiñayi nawa hakwinza kudi Samweli. Kuhiñahu Yehova hakumuleja Samweli nindi: “Nyamukaku wumuwayishi manji; diyi yeniwu.” (Vasi 12) Hela chochu, Davidi ‘himukwenzi walubanji kumesu nawa wawutotombu.’ Ilaña, muchima windi diwunaleñeli kumwiteja kudi Nzambi.—1 Samweli 13:14.
Mukanu kaayi mwalemeshawu kuwaha kwakumesu, tunateli kukundejewa hakwiluka netu Yehova Nzambi hakuminaña dakutala kuwaha kwakumesuku. Nzambi hakamenaña chimwataluka hela chayimonañawu antu kuwahaku. Yehova walemesha chimwekala mukachi kamuchima wenu. Komana kwiluka chumichi hikwayisañumunaña kufwila kwikala nayililu yikuyiletesha mwikali amawahi kumesu aNzambuku?