Yuma Yaletaña Muzañalu Muchisaka

Chakukulisha Anyana Chiwahi

George: * “Chuma chochimu chamwekeneña mpinji yejima namelela. Mwanami weyala Michael wudi nayaaka yiwana washileña napalañeshi yuma yahemesheleñayi mwitala dejima. Namulejeleña kuloñeja chiwahi yuma yahemesheleñayi henohu kanda yayi nakukama. Ilaña Michael wadiña nakuzuwa, kukaluka nikudila. Mpinji yikwawu nahilileña nakumuzuwila, ilaña chumichi chatutiyishileña kutama. Nakeñeleña nami tutiyeña kuwaha mpinji yakukama. Dichi nalekeli kumuleja nawa nadiña nakuwahisha ami aweni.”

Emily: “Kukala kwatachikili chelili mwanami wamumbanda Jenny wudi nayaaka 13 chimukalili kwiluka nshimbi jantañishi yindi kutalisha hanyidimu yakushikola. Jenny wadilili hadi ora yamukuma chafuminiyi kushikola. Namwilili nami yehuli mwakwilila kushikola ilaña Jenny wahosheli nindi ntañishi yindi wazuwa, dichi hadiña nawuswa wakuhosha ninduku. Nafwilileña kuya kushikola nakumushikena ntañishi. Natoñojokeleña nami kwosi wadiña nawuswa wakunkabishila mwanami!”

KOMANA mpinji yikwawu mwatiyaña neyi George niEmily? Kufwana awa anvwali, antu amavulu atiyaña kutama hakumona mwanawu nakuyanda hela naneñi. Kafwampi avwali ejima afwilaña kukiña anyanawu. Hela chochu, nsañu yinatenuwu hewulu yayinkeli awa anvwali kukooleka kwakudizisha anyanawu chuma chalema kulonda akuli chiwahi. Kafwampi chuma chinateli kudiza mwana wudi nayaaka 4 chinambuki nachikudiza mwana wudi nayaaka 13.

Kuhosha hohu mwalala himukukiñaña mwanenu mpinji yejima hakukala kwamwekanaña muchihandiluku. Nkumininaku mwana wukashiya tata yindi nimama yindi ‘nakudisendela chiteli chindi.’ (Aŋalija 6:5; Kutachika 2:24) Hakwila nawu akwashi anyana kudihemba aweni nikukula chiwahi, anvwali atela kushindamena hachikonkwanyi chakudizisha anyana  abuli kwikala nalwisu nawa akamenaña antu. Iwu himudimu wakala!

Hela chochu, avwali akweti chakutalilahu chachiwahi chayimikilayi Yesu nichazatileñayi nawatumbanji twindi. Yesu hadiña nanyanaku. Ilaña chikonkwanyi chindi chadiña chakutonda nikudizisha atumbanji twindi kulonda atwalekuhu kuzata nyidimu nihanyima yakuyishiya. (Matewu 28:19, 20) Chuma chakoñeliyi Yesu chinadifwani nachikonkwanyi chatela kwimikayi nvwali wejima wakeñaña kukulisha anyana chachiwahi. Shinshikenu yakutalilahu yisatu hohu yayimikilayi Yesu anvwali.

Mulejenu Mwanenu “Chuma Chakwimbujola” Henohu wudi kwakwihi nakufwa, Yesu wayilejeli atumbanji twindi nindi: “Ami nayileji chuma chakwimbujola, kulonda ninenu nawa mwilaña neyi munayilenu.” (Yowanu 13:15) Anvwali niwena atela kuleja anyanawu nikuyilumbulwila nachakutalilahu kulonda anyana akuli chiwahi.

Dihulenu nenu: ‘Komana navula kuhosha chiwahi kutalisha hakuzata nyidimu yami? Komana nahoshaña hakuwaha kunatiyaña hakuzatila amakwawu? Ntahindi naditoñeshaña nikudesekeja nawantu ahandaña chiwahi?’

Mwamweni, kwosi muntu wawanina. Wejima wetu twazeyaña mpinji yikwawu. Ilaña chakutalilahu chenu chinateli kuyikwasha anyanenu hama kulonda amoni kulema kwakwikala nayililu yayiwahi.

ESEKENU KUZATISHA IYI NJILA: Neyi chinatwesheki, mpinji yikwawu munateli kumusenda mwanenu kumudimu nakumuleja chimwelaña hakuwana mali akukwasha nachu chisaka. Neyi kudi muntu wunakukeña wukwashu, zatilenu hamu namwanenu. Kufumahu hanjekenu hamuzañalu wumwatiya hakuzata owu mudimu.—Yililu 20:35.

Bayi Mukuhwelela Yuma Yayivuluku Yesu welukili nindi hakahita mpinji hakwila nawu atumbanji twindi akashikuhu kuzata nyidimu yakeñeleñayi nindi azati. Wayilejeli nindi: “Nichidi nayuma yayivulu yakuyileja, ilaña katataka himukuyitweshaku.” (Yowanu 16:12) Yesu hayilejeli atumbanji twindi nindi azateña chuma chidi chejima hohenohu nkawawuku. Ilaña washakamini nawu mpinji yeneni nakuyidizisha yuma yayivulu. Yesu wayitemesheli atumbanji twindi chelukiliyi nindi atela kukalakala nkawawu.

Chochimu, anvwali hiyatela kuleja anyanawu kuzata nyidimu yawakulumpi henohu kanda ashikuhuku. Hela chochu, chikukulañawu anyana, anvwali atela kwiluka nyidimu yatela kuzatawu. Chakutalilahu anvwali atela kudizisha anyanawu chakwikala nawunyonji, kuwahisha mukapeka kawu, kunyakala kuzata nyidimu, nikuzatisha mali chiwahi. Neyi mwana natachiki kuya kushikola, anvwali atela kukuhwelela nawu mwanawu watela kumona nyidimu yakushikola nindi yalema.

Anvwali atela kwila yuma yayivulu kubadika kumwinka mwanawu nyidimu hohu. Atela cheñi kumukwashaku mwanawu kulonda yazati chiwahi. George tata yawantu atenawu hakusambila, nkumininaku welukili nindi Michael watiyileña kutama kuloñejeka yuma yindi yakuhemesha muloña wamweneña nindi himudimu wakala. George wahosheli nindi, “Chatela kumuzuwila Michael kulonda aloñejeki yuma yindi, nesekeleña kumudizisha mwakuzatila.”

Chumanyi cheliliyi? George wahosheli nindi: “Chatachi namwinkeli mpinji yakuloñejeka yuma yahemesheleñayi. Kuhiñahu twazatilileña hamu naMichael mukapeka kamu hampinji. Twadiñi nakudiluñisha hakuzata, twadimbecheleña kulonda tutali wukumanishañahu dehi. Chadiñi neyi hichaaku chitwelilaña mpinji yejima henohu kanda tukami. Namulejeli Michael nami neyi wukuzata swayi nikumutañila nsañu yikwawu henohu kanda yakami. Ilaña neyi yabula kumanisha swayi nsañu yikwikala yayihi.”

 ESEKENU KUZATISHA IYI NJILA: Esekenu kuyinka anyanenu ejima mudimu wumuneluki nenu anateli kuzata kulonda yuma yendeña chiwahi muchisaka. Dihulenu nenu, ‘Komana kudi nyidimu yinichidi kuzatila anyanami yatela kudizatilawu aweni?’ Neyi dimu, zatilenu hamu nawanyanenu sampu munamoni nenu anateli kudizatila aweni. Yilejenu chikupu nenu mwakafuma yuma yayiwahi hela yatama, kwesekeja nachinakuzatawu anyana nyidimu yawu. Dichi mwatela kuyibabesha neyi abula kuzata hela kuyinka wuloku neyi azata.

Yilejenu Nshimbi Jatela Kulondelawu Kufwana ntañishi wejima wamuwahi, Yesu welukili nindi njila yayiwahi yakudizilamu hikuzata chuma. Chakutalilahu, chelukiliyi Yesu nindi himpinji yatelela ‘wayitemesheleñahu dehi kumbidi [atumbanji twindi] ayedi ayedi, kwahita nyikala yamaneni yejima, nimwituña dejima mwakeñeleña kuyayi yomweni.’ (Luka 10:1) Hela chochu, hayilekeli chakubula kuyileja mwakwililaku. Henohu kanda yoyitemeshi, wayilejeli chikupu nshimbi jatiyakana. (Luka 10:2-12) Chelili atumbanji afunti nakumuleja nawu azata chiwahi, Yesu wayihamekeli nikuyikolesha. (Luka 10:17-24) Wayilejeli nindi wayikuhwelela nawa watiyili kuwaha.

Mwelaña ñahi neyi anyanenu anakuzata nyidimu yakala? Komana mwafwilaña kuyikiña kuyuma yatiyañawu woma nenu hadaha akukañanya? Hadaha mwasambilaña “kumwamwina” mwanenu hela kuzata owu mudimu enu aweni.

Ilaña toñojokenu chumiche: Mpinji yejima neyi mubimbaña “nakukwasha” anyanenu muniyi njila, munakuyileja chumanyi? Munakuyileja nenu mwayikuhwelela nawa akweti wuswa wakudizatila? Tahindi munakuyileja nenu achidi anyanya atela kushindamena hadenu muyuma yonsu?

Chakutalilahu, indi Emily atenawu hatachi welili ñahi nakukala kwamwanindi wamumbanda? Chatela yamuhakwiluku, wamulejeli Jenny kuya nakuhanjeka nantañishi yindi. Emily niJenny asonekeli malwihu kulonda Jenny yasendi kushikola. Kufumahu atondeli ifuku datela kuhanjekayi nantañishi. Ahitulukilumu chatela kuhanjekayi nantañishi. Emily wahosheli nindi, “Jenny hatiyili woma wakuhanjeka nantañishi yinduku, nawa ntañishi yindi wamuhamekeli hachuma cheliliyi. Jenny watiyili kuwaha hama, anami nawa nazañaleli.”

ESEKENU KUZATISHA IYI NJILA: Sonekenu kukala kukwetiyi mwanenu chakatataka. Kuhiñahu sonekenu yuma yimwatela kwila hakumukwasha mwanenu kumanisha kukala chakadi “kumwamwina.” Hitulukenu namwanenu njila jatela kuzatishayi hakwila yamanishi kukala. Mulejenu mwanenu nenu mwamukuhwelela.

Neyi mumwamwinaña mwanenu mpinji yejima yakumonayi kukala, mukukañesha wuswa wukwetiyi wakushinda kukala kwamwekanaña muchihandilu. Ilaña yikoleshenu anyanenu kuhitila mukuyinka nyidimu yakuzata. Neyi mwila mwenimu munakuyinka chawaana chasweja kulema.

[Tumazu twaheshina]

DIHULENU NENU  . . .

▪ Komana nakuhwelelaña anyanami kuzata mudimu watela kuzatawu?

▪ Komana nayileja nikwila chuma chatela kwilawu kulonda azati chiwahi?

▪ Ifukwinyi dinamukolesheli nikumuhameka mwanami?