Chakukwasha Ibwambu Wakata

KOMANA mwatoñojokahu dehi nenu mudana nsañu yakuhosha nebwambu denu wakata? Ilukenu nenu munateli kwiluka chakuhosha. Munjilanyi? Hikwekala nshimbi yahosha haniyi nsañuku. Chumichi chashindamena hakushiyashana kwayisemwa. Yililu yawantu niyena yekala yambuka hama. Dichi mazu anateli kuzañalesha muntu wumu wakata, mukwawu anateli kumuneñesha. Nawa yuma yahimpikaña ifuku niifuku.

Dichi chuma chalema nankashi chimwatela kwila hikudesekeja neyi iyenu mwakata nawa ihulenu chuma chinakukeñayi nindi mumwilili. Munateli kwila ñahi mwenimu? Zatishenu iji njila jantesha jashindamena hayishina yamuBayibolu.

Tiyililenu nakanañachima

YISHINA YAMUBAYIBOLU:

“Antu ejima anyakali kutiya, alabi kuhosha.”—YAKOBA 1:19.

‘Kwekala . . . mpinji yakumwena, nimpinji yakuhosha.’—MUKWAKUTAŊISHA 3:1, 7.

◼ Neyi munakuhempula ibwambu denu wakata, tiyililenu nakanañachima nawa mutiyilenu wushona. Bayi munyakala kumuleja mwakwilila hela kutoñojoka nenu mpinji yonsu chiña mumona mwakwililaku. Neyi munyakala kuhosha, munateli kuhosha chuma chikumukatisha kumuchima chakubula kwiluka. Ibwambu denu wakata hanakukeña kwakula malwihuku, nakukeña muntu wukumutiyilila nakanañachima.

Mulekenu mukwenu yahoshi jidi kumuchima. Neyi mukwenu nakuhosha bayi mumukwata hamazu, hela kusekesha yikatu yinduku. Emílio * wahosheli nindi, “Nakatili chikatu  chafungal meningitis chanleñeleli kuputa mesu. Mpinji yikwawu natiyaña kutama, nawa amabwambu afwilaña kunkundeja nawu: ‘Yeyi wudi nakukala nkaweyi wanyi. Kudi antu akata kubadika eyi.’ Hela chochu, eluka wanyi nawu kusekesha yikatu yami, kwankwashaña wanyi. Ilaña, chumichi channeñeshaña chikupu.”

Mulekenu ibwambu denu yashimuni yuma yidi kumuchima windi chakadi kumuhoshola. Neyi yayileja nindi nakutiya woma, itejenu mwanahoshiyi kubadika kumuleja nenu kuchiina nehi. Eliana wayekelaña nakansa wahosheli nindi, “Chinatiya woma hamuloña wayikatu yami nitachika nikudila, hichinayi mukwila nawu naleki kumukuhwelela Nzambuku.” Fwilenuña kumumona mukwenu nenu wakata, bayi chimunakukeña enuku. Ilukenu nenu mpinji yidiyi mukankati nateli kuhila swayi namazu imukuhosha kabadika chekalañayi mpinji yejima. Diwunjikenu. Tiyililenuña, hela chakwila wukufuntila-funtila hayuma yoyimu. (1 Anyanta 19:9, 10, 13, 14) Hadaha nakukeña kuyileja chinakutiyayi.

Mutiyilenu wushona

YISHINA YAMUBAYIBOLU:

“Zañalalenu nawakwakuzañalala; dilenu nawakwakudila.”—AROMA 12:15.

“Yejima yimunakeñi antu kuyililenu, ninenu nawa yililenu mwomumu.”—MATEWU 7:12.

◼ Fwikijenu neyi yenu mwakata. Neyi nakuhembelela kumuladika, nakunwa yitumbu, hela nakuhembelela amuleji yikatu yakatayi, nateli kwakamena nikuhila swayi. Mwatela kwiluka yumiyi nikwila chinakukeñayi. Himwatela kumwihula malwihu amavulu haniyi mpinjuku, sweje-e akundama hawumi windi.

Ana Katalifós wadiza chatoñojokañawu ayeji wahosheli nindi, “Mwatela kuyileka ayeji ayileji yikatu yakatawu neyi anakukeña kuyileja nawa bayi muyibimbishaku. Neyi anakukeña kuhanjeka, hanjekenu nawu nsañu yejima yinakeñuwu. Neyi anakukeña kuhosha wanyi munateli kumwena hohu, nawa anateli kutiya kuwaha neyi muyikwata kuchikasa. Hadaha anakukeña muntu wakuyikwashaku kudila.”

Bayi mushimujolaña yikatu yamukwenuku. Nsoneki Rosanne Kalick wapulukili mapampa kayedi kuchikatu chakansa wasonekeli nindi: “Neyi muyeji yayileja yikatu yakatayi bayi muleja antuku. Neyi anayikunjiki mudimu wakuhoshela chisaka, dihumwatela kushimuna nsañu. Mwihulenu muyeji yuma yinakukeñayi kuleja antu.” Edson, wapulukili kuchikatu chakansa wahosheli nindi: “Ibwambu dami walejeleña antu nindi nakata chikatu chakansa nawa nindi nikuhanda wanyi. Nafumini hakunladika. Nelukili nami nadiña nakansa ilaña nahembeleleña ndotolu yanleji yikatu yinakatili. Kafwampi kansa hiyasambukilili mujimba wejimaku. Ilaña nsañu yatiyakesheliyi yankatili kumuchima. Malwihu amwihwileñawu ñodami niyuma yahosheleñawu antu yamuneñesheleña chikupu.”

Neyi ibwambu denu nakufuukulahu kutonda njila yakumukilamu, bayi munyakala kushimuna chimwatela kwila neyi iyenu mwakataku. Nsoneki Lori Hope wapulukili kuchikatu chakansa wahosheli nindi: “Henohu kanda mutwali nsañu yahosha hachikatu chakansa kudi muntu wakata kansa hela muntu wakatiluhu, chikuwaha neyi musambila kumwihula neyi wukutambwila iyi nsañu. Neyi nehi munateli kumuneñesha chikupu mukwenu hela chakwila mwafwilaña kumukwasha.” Bayi neyi antu ejima akeñaña kutambwila nsañu yayivulu yahosha hanjila jashiyashana jakuukilamuku.

Hela tuhu hiibwambu denu mwadikunda nindi, neyi munayi nakumuhempula bayi musweja kushimbulaku. Chalema kuhempula, ilaña hanoyu mpinji hadaha mukwenu hanakukeña kuhanjeka nanenuku. Hadaha nazeyi hela wudana ñovu yakuhosha hela kutiyilila chimukuhosha hampinji yayilehi. Hela chochu bayi mumwekana neyi munakukeña kuya swayi-swayuku. Ibwambu denu watela yeluki nindi mwamwakamenaña.

Kwakamena kwakeñekaña kwesekeja yuma nikutoñojoka chiwahi. Chakutalilahu, henohu kanda muloñeshi yakudya yebwambu denu wakata  hela kumwinka nkenu, mwatela kumwihula hadaha kudi yuma yamuleñelaña kukata. Neyi mwakata chipwembu chikuwaha neyi mukuya nakumuhempula ibwambu denu neyi munakoli dehi.

Hoshenu mazu akuyikolesha

YISHINA YAMUBAYIBOLU:

“Madimi awakwamaana akoleshaña antu.”—YISHIMU 12:18.

“Kuhosha kwenu kwikali naluwi, kwakutoweja namuñwa mafuku ejima.”—AKOLOSI 4:6.

◼ Mazu imukuhoshaña niyuma yimukwilaña yikumwekesha nawu mwamwakamena ibwambu denu wakata. Mumonenu ibwambu denu neyi himuntu yowumu nawa wudi nayililu yayileñeleli kudikunda nindi hatachi. Yikatu bayi yiyikañesha kubula kudikunda ninduku. Neyi muhoshaña nebwambu denu neyi chimwatela kuhosha namuntu wakata nankashi, niyena wukudimona munjila yoyimu. Roberta wakata chikatu chamumafwaha wahosheli nindi: “Ñakamenenu neyi muntu wakola. Nidi chifwayi, ilaña kudi yuma yinakeña niyinahela. Bayi musweja kuntiyila wushonaku. Bayi muñilaña neyi chisupuku.”

Ilukenu nenu yuma yimukuhosha hela njila yimukuhoshelamu yikumuzañalesha ibwambu denu hela kumuneñesha. Hela nhoshelu yenu yinateli kumuzañalesha chili kumuhilisha. Chelili Ernesto amukwati nakansa, ibwambu dindi wakwituña dacheñi wamutemesheleli nshiña nakumwila nindi: “Ami nahayami hama hakutiya nawu wudi nakansa!” Ernesto wanukaña nindi: “Izu debwambu dami chidatiyakeneña hakwila nindi ‘wudi nakansa’ dahayamishili nikunchiinisha.”

Nsoneki Lori Hope washimwini chakutalilahu chikwawu: “Kwimusha nenu ‘Mudi ñahi?’ kukuleñela muyeji kutoñojoka yuma yayivulu. Kwesekeja nanhoshelu yamuntu wunakwihula, wulunda windi namuyeji, nimpinji yinehwiluhu lwihu, yumiyi yinateli kumuzañalesha muyeji hela kumuhilisha.”

Hadaha mukwenu wakata nakukeña kumwakamena, mwiluki nenu wakata nikumulemesha. Dichi mwatela kumuleja muyeji nenu mwamulemesha nawa mukumukwashaña. Rosemary wakata brain-tumor (kalepa kakuwoñu) wahosheli nindi: “Chanlejeleñawu amabwambu jami nawu ankeña cheñi nawu akukwashaña hela kudi chuma chinamwekani dichuma chankolesheleña.”—Yishimu 15:23; 25:11.

Yikwashenu

CHISHINA CHAMUBAYIBOLU:

“Bayi tukeña akwetu chamukanwa, hela chamukuhosha hohuku; chiña tuyikeñi chalala nakwila mutwahoshaña.”—1 YOWANU 3:18.

◼ Yuma yinateli kuhimpika neyi awana yikatu yakatayi ibwambu denu nikwiluka mwakumuukila. Iyi diyi mpinji yinateliyi kukeña wukwashu. Chatela mumwili hohu nenu “neyi kudi yuma yiwukukeña, wunkuleja,” mulejenu chuma chimunakukeña kumwilila. Munateli kumwekesha nenu mwamwakamena kuhitila mukumukwasha nyidimu yamafuku ejima yidi neyi kumuloñeshela yakudya, kukomba komba, kukosa, kukiisa yakuvwala, kumulandila yuma, nikumutwala kuchipatela hela kuya nakumusenda. Chiña munyakala kwila yumiyi mumpinji. Mwatela kwila chuma chimunakani.—Matewu 5:37.

Nsoneki Rosanne Kalick wahosheli nindi: “Yuma yejima yitwelaña chili yanyanya hela yamaneni, yikumuleñela muyeji kutiyaku chiwahi.” Sílvia wapulukili kapampa kayedi kuchikatu chakansa wetejeli nindi: “Natiyileña kuwaha kuntwala kudi amabwambu jami ambokamboka kumbaka yikwawu nakumpima mafuku ejima! Hakuya twahosheleña nsañu yashiyashana nawa hanyima yakunyinka yitumbu twadiña nakunwa koofi mulesitilanti mpinji yejima. Chumichi chantiyishileña kuwaha.”

Bayi mumona nenu muneluki chikupu yuma yinakukeña ibwambu denuku. Kalick wahosheli nindi, “Ihulenu, ihulenu, ihulenu.” Wabombeleluhu nindi, “Neyi munakukwashana bayi mumona  nenu yuma yejima yidi mumakasenuku. Chumichi chikumukwasha muyeji wanyi nawa chikumuhilisha. Neyi munkaanisha kwila chuma, nukutoñojoka nami kwosi chuma chinatela kuzata. Natela kudimona nami nikweti wuswa wakuzata. Hinatela kudimona nami nakataku. Nkwashenu nizati chuma chinatela kuzata.”

Ibwambu denu watela kwiluka nindi kudi chuma chatela kuzatayi. Adilson wakata kozomba (AIDS) wahosheli nindi: “Neyi wakata hiyatela kukudiwula neyi wudi wamukunkulwayuku. Watela kukwashana, hela chakwila wukuzata nyidimu yanyanya. Chachiwahi kwiluka neyi wukweti ñovu yakuzata mudimu! Chumichi chaleteshaña kutoñojoka neyi nichidi muntu. Nakeñaña antu anleki nidifuukwiluhu, nikulemesha yuma yinafuukuluhu. Neyi wakata hichaya mukwila nawu hitunatweshi kuzata mudimu wazataña tata yawantu, mama yawantu hela nyidimu yikwawuku.”

Twalekenuhu kuhanjeka nebwambu denu

CHISHINA CHAMUBAYIBOLU:

“Ibwambu damuntu wamukeñaña mukwawu mwahita mpinji jejima; mana kwamuntu wavwalikila yakala.”—YISHIMU 17:17.

◼ Neyi mukañanya kumuhempula ibwambu denu hamuloña wakushakama kwakulehi hela yuma yikwawu, mwatela kumutemeshela nshiña hela kumusonekela mukanda. Yumanyi yimunateli kusoneka? Alan D. Wolfelt, wafumbaña hansañu yachineñi, wahosheli nindi: “Munateli kusoneka yuma yayiwahi yimwadiluñishileña. Mulejenu nenu mwakamusonekela . . . cheñi, nawa chiña mumusonekela.”

Bayi muleka kumukolesha ibwambu denu wakata hamuloña wakuchiina nenu keña muhoshi yuma yatamaku. Kakavulu chuma chalema hikuya nakumuhempula ibwambu denu wakata nawa wukwiluka nindi munakukeña kumukwasha. Lori Hope wasonekeli mumukanda windi nindi: “Wejima wetu twakoñaña hela kuhosha yuma yinateli kuluwañesha hela kukatisha amakwawu kumuchima chakubula kwiluka. Kukala kwosi. Kukala kwenzaña hakwila neyi munakuchiina kumwendela mukwenu wunakukeña kumwakamena nenu mukwila chuma chikumutiyisha kutama.”

Ibwambu denu wakata nankashi hadaha nakukeña nindi mumukwashi chikupu. Ikalenu ‘ibwambu dindi’ chikupu. Bayi neyi chimukuzata nañovu hakumukwasha chikuletesha yakoluku, ilaña neyi mumukwasha mukwenu imwakeña wukutiyaku chiwahi.

[Tumazu twaheshina]