Yuma Yaletaña Muzañalu Muchisaka

Chakumanisha Kukala Kwekala muMaluwi Chaaka chaKusambila

Iyala nindi: “Nahayamini hakuwana neyi twambuka chikupu nañodami! Chakutalilahu, nakeña kuhinduka swayi, ilaña yena wakeña kushala hakadidi. Nakañanyaña kwiluka chahimpañayi maanindi! Cheñi nawa, neyi inakuteleka wanzuwilaña sweje-e neyi inakukombwela kumakasa nehina dayeña.”

Mumbanda nindi: “Mfumwami hakeña kuhosha-hoshaku. Ilaña ami muchisaka chetu twenjilila kuhosha-hosha, sweje-e hampinji yakudya. Nawa mfumwami neyi nakuteleka wakeña kuzatisha ihina dodimu kukombwela nachu yeña nikumakasindi. Natiyaña kutama! Muloñadi amayala chiyakalilawu? Indi antu ashakamaña ñahi mumaluwi chachiwahi?”

NEYI munadisumbuli katataka, munakumona kukala kwokumu? Komana chinakumwekana neyi mwinikwenu nekali nayiluwa niyililu yamukunkulwayi yimwabulili kumona hampinji yimwadilukileña? Munateli kukeheshaku ñahi “yihuñu yamonañawu mafuku ejima antu adisumbula”?—1 Akorinda 7:28, Today’s English Version.

Chatachi, bayi mukuhwelela nenu muloña munadisumbuli, dikwila nawu muneluki dehi yuma yejima yamumaluwuku. Hadaha kudi yuma yimwelukili hampinji yimwadiña ajiki, hadaha mwayiwahishili hampinji yimwadiña nakudiluka. Hela chochu, yuma yimwelukili hadaha yikuzatika chiwahi wanyi mumaluwi, nawa mwatela kudiza yuma yikwawu yayiha. Komana mukuluwañeshaña? Eña. Munateli kudiza yuma yakeñekaña? Eñañi!

Njila yayiwahi yimwatela kuwahishilamu yuma yimwadizili yidi yakwihula muntu weluka iyi nsañu nikuzatisha kufumba kwahanañayi. Muntu wasweja kwiluka nsañu yamaluwi hiYehova Nzambi. Kafwampi diyi Watuleñeli nampwila yakukeña kusumbula hela kusumbuka. (Kutachika 2:22-24) Shinshikenu Izu dindi Bayibolu chiyinateli kuyikwasha kumanisha kukala nikwiluka yuma yakeñekaña hakwila nawu mutwalekuhu namaluwi enu kubadika chaaka chakusambila.

NJILA 1. DIHULENUÑA

Mukweti kukalanyi? Iyala wakuJapan wejina daKeiji, * mpinji yikwawu wadiña nakulalamena nindi yuma yafuukwileñayi yamutiyishileña iñodindi kutama. Wahosheli nindi, “Neyi anatutambiki  netejeleña chakadi kumwihula ñodami. Nkumininaku nelukileña nami hakweti mpinji yakuya kwatutambikileñawuku.” Allen iyala wakuAustralia wahosheli nindi: “Natoñojokeleña nami iyala hatela kumwihula iñodindi yuma yinakukeñayi kufuukulayuku.” Wadiña nakukala muloña wachitachi chindi. Dianne washakamaña kuBritain wadiña nakukala kwokumu. Wahosheli nindi: “Nadiñi nenjilila kwihula chisaka chami kunleja mwakwilila. Nasambilileña kuyihula chatela nihuli mfumwami neyi tunakufuukula mwakwilila.”

Chumanyi chatela kuyikwasha? Ilukenu nenu Yehova Nzambi wamonaña nindi antu adisumbula ekala “mujimba wumu.” (Matewu 19:3-6) Yehova wamonaña wulunda wekala hakachi keyala namumbanda nindi walema chikupu kubadika wulunda wekala nawantu ejima. Kuhanjeka chachiwahi kwalema hakwila nawu mukoleshi iwu wulunda.

Eyala namumbanda anateli kudiza yuma yayivulu kuhitila mukushinshika Yehova Nzambi chahanjekeliyi naAbarahama. Chakutalilahu, tañenu mpanji yasonekawu haKutachika 18:17-33. Ilukenu nenu Nzambi wamulemesheli Abarahama munjila jisatu. (1) Yehova wamulejeli chuma chakeñeleñayi kwila. (2) Hampinji yahosheleñayi Abarahama mwatoñojokeleñayi wamutiyililili. (3) Yehova wahimpili chuma chakeñeleñayi kwila kulonda yazati kwesekeja nachakeñeleñayi Abarahama. Munateli kuzatisha ñahi njila yoyimu neyi munakumwihula mwinikwenu?

ESEKENU KUZATISHA IYI NJILA: Neyi munakuhanjika hachuma chikumukundama mukwenu wamumaluwi, (1) lumbululenu chimukuzata oyu nsañu, ilaña shimunenu hohu neyi hinjila yimunakufwila kuzatisha bayi neyi hichuma chimunafuukuluhu dehi hela nenu chiña yovwahilumuku; (2) mwilenu mwinikwenu yashimuni chinakutoñojokayi nawa mwatela kutiyilila neyi nashimuni yitoñojoka yambukaku nayenu; nawa (3) “mwekeshenu kwovwaha kwenu” kuhitila mukwiteja yitoñojoka yamwinikwenu neyi chinatwesheki.—Afwilipi 4:5.

NJILA 2. HOSHENUÑA NAKUBUUBEKA

Mukweti kukalanyi? Kwesekeja nachitachi chenu hela chisaka chenu, hadaha mwekala nachaaku chakuhosha nakasawuntu. Chakutalilahu, Liam washakamaña kuEurope wahosheli nindi: “Kunafuma antu ekala nakasawuntu. Iñodami wahilaña muloña wanhoshelu yami yakasawuntu. Nadizili kwikala nakalemesha.”

Chumanyi chatela kuyikwasha? Bayi mutoñojoka nenu mwinikwenu wakeñaña kumuhoshesha munjila yimwenjililaku. (Afwilipi 2:3, 4) Kufumba kwamufumbiluwu mishonali kudi kapostolu Pawulu kukukwasha niantu  anadisumbuli katataka. Wasonekeli nindi: ‘Nduñu yaMwanta, chinjila kufwila ntaadi, chiña ekali wamwovu.’ MuchiGiriki chacheni, izu datuntululawu nawu “wamwovu” anateli cheñi kudilumbulula nawu “kubuubeka.” (2 Timotewu 2:24) Kubuubeka hikwikala nawuswa wakwiluka yuma chiyidi nikwikala ababala hakwila yuma munjila yayiwahi, chakubula kuhilisha muntu.

ESEKENU KUZATISHA IYI NJILA: Neyi mwinikwenu nayihilishi, fwikijenu neyi munakuhosha nebwambu denu imwakeña hela muntu wayiñija mudimu chatela kumona neyi munakuhanjeka namwinikwenu. Komana mukuhosha munjila yoyimu hela mukuhosha mazu wowamu? Dichi toñojokenu yuma yikuleñela muhosheña namwinikwenu nakalemesha nikubuubeka kubadika ibwambu denu hela muntu wayiñija mudimu.—Akolosi 4:6.

NJILA 3. ILUKENU NYIDIMU YENU YAYIHA

Mukweti kukalanyi? Hakusambila iyala nateli kuzatisha wumutu windi munjila yinateli kumutiyisha iñodindi kutama, indi kwiji mumbanda henjilila kuhosha nakubuubekaku. Chakutalilahu, Antonio iyala wakuItaly wahosheli nindi: “Tata hadiña nakumwihula mama hayuma yatela kufuukulawu muchisakaku. Hakusambila nalombweleña chisaka chami neyi mwanta.” Debbie mumbanda wakuCanada wahosheli nindi: “Namukanjikijileña mfumwami nami yekali wawunyonji chikupu. Ilaña njila yachibeñu yinamulejeleleñamu yamuleñeleli kusweja kuchinchika.”

Chumanyi chinateli kumukwasha iyala? Amayala amakwawu eluka wanyi chahosha Bayibolu kutalisha hachaambu chekala hakachi kamumbanda chatela kwovwahilayi mfumwindi nimwana chatela kwovwahilayi anvwali jindi. (Akolosi 3:20; 1 Petulu 3:1) Hela chochu, Bayibolu yahosha nawu iyala “akakeli iñodindi, niwena ayedi akekali mujimba wumu”; hiyahosha muniyi njila hadi nvwali namwanaku. (Matewu 19:5)  Yehova wamulumbulula mumbanda nindi hinkwashi yeyala hela mulunda nindi. (Kutachika 2:18) Hatena mwana nindi hinkwashi yanvwali hela mulunda ninduku. Mukutoñojoka ñahi neyi iyala yamonaña iñodindi neyi chamonañayi mwana, komana nakulemesha ntanjikilu yamaluwi?

Kafwampi, Izu daNzambi dayikonkomwenaña kuhemba ñodenu neyi chahembañayi Yesu chipompelu chawakwaKristu. Chikumupelela ñodenu kuyimona nindi mudi mutu windi neyi (1) mubula kukuhwelela nenu yayovwahileña hohenohu nawa chakubula kuluwañesha nawa (2) neyi mwamukeña neyi chimwadikeña enu aweni hela kumwekana kukala.—Aefwesesa 5:25-29.

Chumanyi chinateli kumukwasha mumbanda? Ilukenu nenu ichi iyala diyi mutu wenu watondawu kudi Nzambi. (1 Akorinda 11:3) Neyi mulemesha mfumwenu mumulemesha Nzambi. Neyi mukaana wumutu windi himunakumwekesha chimwatoñojokaña hadi mfumwenu hohuku ilaña nichimwamumonaña Nzambi ninshimbi jindi.—Akolosi 3:18.

Neyi munakuhanjeka hansañu yakala, fwilenu kumanisha kukala bayi kumulukuka mfumwenuku. Chakutalilahu, Mwadi Esita wakeñeleña nindi mfumwindi Mwanta Ahasuwerusi yomanishi kutama. Chatela yamulukuki, wahosheli nindi nakubuubeka. Mfumwindi wetejeli mwafuukwiliyi nawa wakoñeli chuma chaloña. (Esita 7:1-4; 8:3-8) Mfumwenu wukuyikeña chikupu neyi (1) mumwinka mpinji yakwiluka mudimu windi wawuha wawumutu wachisaka ni (2) kumulemesha hela chakwila nakuluwañesha.—Aefwesesa 5:33.

ESEKENU KUZATISHA IYI NJILA: Chatela musoneki yuma yimunamoni nenu mwinikwenu watela kuhimpa, sonekenu yuma yimwatela kuhimpa enu aweni. Amayala: Neyi munamuhilishi mwinikwenu kwesekeja nanjila yimunazatishi hela yimunakañanyi kuzatisha wumutu wenu, mwihulenu yayileji chimwatela kuhimpa, kufumahu sonekenu munayilejiyi. Ambanda: Neyi mfumwenu yamona nindi munakumulemesha wanyi, mwilenu yayileji chimwatela kuhimpa nawa sonekenu munayilejiyi.

Bayi Mukuhwelela Yuma Yayivuluku

Kudiza chakwikala nawulunda wawuwahi mumaluwi kudi neyi kudiza nkinga. Mwatela kukuhwelela kudimbuka hampinji yimukudizaña nkinga. Chochimu, munateli kukuhwelela kwila yuma yikuyitiyisha nsonyi hampinji yimunakwinjilila chakushakama mumaluwi.

Ikalenu nayililu yayiwahi. Shenuku muchima kuyuma yinakwakamayi mwinikwenu, neyi muluwañesha bayi mutiya kutamaku. Keñakeñenu njila jakumuzañaleshelamu mwinikwenu muchaaka chakusambila mumaluwi enu. (Kuhituluka 24:5) Sweje-e dinu, itejenu Izu daNzambi diyilomboleña muwulunda wenu. Neyi mwila mwenimu, maluwi enu akukolaña chaaka nichaaka.

[Footnote]

DIHULENU NENU  . . .

▪ Komana namukuhwelela mwinikwami chikupu, tahindi nakeñaña kwihula antu amakwawu?

▪ Chumanyi chineli ifuku dalelu chikumwekesha chikupu nawu namukeña nikumulemesha mwinikwami?

[Chikasha/Nyevulu yidi hefu 15]

Bayibolu Yatukwashili Kuhemba Maluwi Etu

Toru niAkiko adiña adikeña hampinji yadisumbwiluwu. Ilaña chimwahitili añondu atanu naasatu awa antu adisumbula akuJapan afuukwiluhu kudiseña. Anashimuni chuma chamwekeni.

Toru: “Nelukili nami twadiña aditelela wanyi nañodami neyi chinatoñojokeleña hakusambila. Chakutalilahu, neyi tunakutala TV, ami nakeñeleña yisela yakudibecha, ilaña yena wakeñeli yimwenu. Nakeñeli kwendujola, ilaña yena wakeñeli kushakama hetala.”

Akiko: “Toru welileña yuma yejima yamulejeleñawu kuchisaka chindi chakubula kunleja. Namwihwili nami, ‘Hadami namama yeyi, walema hinyi?’ Toru wanhayamishileña cheñi chadiñayi nakuhimpa nsañu. Namulejeli nami muntu chatwambayi kamu watwalekañahu nakutwamba nawa neyi yatwalekahu maluwi etu akamana.”

Toru: “Nahilili nawa nehwili mukulumpi mutwazatilileña kulonda yanleji mwakwilila nañodami. Wanlejeli nindi, ‘Wukumuleja hohu neyi mwena. Neyi yotwalekahu kuhosha, mutukuli.’ Ifuku dimu namwasili Akiko mbañala hamesu nihinuna nimesa. Twazuñili hama nawa wayili. Nayili nakumusenda kuhotelu muTokyo. Nkumininaku twafuukwiluhu kudiseña. Chinayili kumudimu nantetemena, namushili ñodami nakuloñeja yuma yindi.”

Akiko: “Chinelili nami nidiki iku nasendi mapakumuna ami, mpwambu yahachisu yavumini. Kuchisu kwemeni mumbanda. Wadiña Chinsahu chaYehova. Namwiñijili mwitala.”

Toru: “Chinashikili kumudimu, natachikili kutoñojoka chacheñi kutalisha hakudiseña, dichi nafuntili kwitala swayi-swayi. Chinashikili kwitala namuwanini Akiko nakuhanjeka nanona mumbanda. Ona mumbanda wanlejeli nindi: ‘Kudi chuma chimu chinakukeñeka chimwatela kuzatila hamu. Munakukeña kudiza Bayibolu?’ Netejeli nami, ‘Eña, inakukeña chuma chidi chejima chatela kutukwasha kuhemba maluwi etu!’”

Akiko: “Ona mumbanda watanjikili nsañu chiwahi kulonda tutachiki kudiza Bayibolu. Yuma yatachikili kuhimpa chitwatachikili kutaña chahosha Bayibolu hantanjikilu yamaluwi. Yahosha nawu: ‘Dichi chakushiyilayi iyala nitata yindi nimama yindi nakumukakela iñodindi; niwena akela mujimba wumu.’” —Kutachika 2:24.

Toru: “Nadizili chuma chalema hohenahana. Nayilejeli anvwali jami nami, ‘Ichi nukuhanjekaña nañodami henohu kanda nifuukuluhu mwakwilila.’ Nalekeli cheñi kusweja kunwa walwa. Nawa chinadizili nami Nzambi wahela kutwamba, nafwilileña kuhosha chalala hohu.”

Akiko: “Anami nawa nahimpili. Chakutalilahu, nadiña nakumwovwahila wanyi Toru. Ilaña chinamweni nami nakuzatisha nshimbi jamuBayibolu, natachikili kumwovwahila chikupu. (Aefwesesa 5:22-24) Kubadika hayaaka 28 yinahituhu, twekala amuzañalu mumaluwi etu. Twamanishili kukala kutwadiña naku kuhitila mukudiluka chiwahi nikuzatisha kufumba kwakuwahi kwekala muBayibolu.”