Muloñadi Antu Chakoñelañawu Yuma Yatama?

ANTU antesha ataadikaña chuma chimu chakwila nawu: Wejima wetu hitwawaninaku, dichi twelaña yiluwa nawa kutwala muna twaditoñeshaña. Hela chakwila hitwawaninaku, komana chumichi dichakojejaña antu kukoña yuma yasweja kutama yitwamonaña nikutiya mafuku ejima chili hayikuzulemba hela namesu kapu?

Chili antu akoñaña yuma yatama hamuloña wakubula kuwanina, antu eluka nawu kwekala nshimbi yatela kulondelawu nawa anateli kutondolwela kwila yuma yatama. Antu amavulu anateli kwiteja nawu hekala chaambu hakachi kakuhosha yuma yakutwamba chakadi kwiluka nikutwamba mumushikila. Hekala cheñi chaambu hakachi kakukatisha muntu mumaposu nikufuukwilahu chadimu kujaha muntu. Kakavulu antu itwamonaña netu ekala chiwahi muchituñilu diwu akoñaña yuma yekomwesha. Muloñadi antu chakoñelañawu yuma yatama?

 Bayibolu yahosha chiwahi haniyi nsañu. Yalumbulula chiwahi nyiloña yaleteshaña antu kukoña yuma yelukawu nawu yatama. Shinshikenu chiyahosha.

▪ ‘Makabisha asupishaña mukwamaana.’—MUKWAKUTAŊISHA 7:7.

Bayibolu yahosha nawu mpinji yikwawu antu akoñaña yuma yatela kutondolwelawu muloña wachihandilu chawu. Antu amakwawu akoñaña yuma yatama muloña atoñojokaña nawu anakufwila kumanisha makabi niyuma yatama. Mukanda watenañawu nawu Urban Terrorism wahosha nawu, “Kakavulu chuma chaleteshaña antu kujahañana, atiyaña kumuchima kukata hansañu yatama yinakukoñawu akapolitiki, antu, nikufwila maheta.”

▪ “Kufwila mali diwu muji wayuma yatama yejima.”—1 TIMOTEWU 6:10.

Antu amakwawu ahoshaña nawu antu amawahi anateli kufumpa nshimbi neyi ayinka mali amavulu. Antu amwekanaña neyi adi nayililu yayiwahi neyi yuma yinakuyendela chiwahi ahimpaña yililu yawu neyi ekala namali hela neyi mali hiyakumana muchisweku, ekalaña antu akasawuntu nawa antaadi. Toñojokenu hawubanji wunakukoñawu antu hamuloña walwisu, wupwapoki, kuwombolola antu nikujahañana.

▪ “Chabulañawu kubabesha swayi muntu nakoñi mudimu watama, dichi chakwatilañawu anyana kawantu munyichima yawu ñovu yakwila chatama.”—MUKWAKUTAŊISHA 8:11.

Nsona yinakuhosha hachaaku chikwetuwu antu chakutoñojoka nawu muntu nateli kwila chuma chidi chejima neyi kwosi nshimbi yakaanisha kukoñamu. Dimuloña wutwamwenaña antu kusweja kutemwisha motoka, kwiya nsañu yakweseka akashikola, kwiya mali anfulumendi niyuma yikwawu. Antu ovwahilaña nshimbi akoñaña yuma yatama neyi chakwila nshimbi hiyanakuyikoleshaku hela neyi antu aleka kuchiina nawu akuyikwata. Magazini yaArguments and Facts yahosha nawu, “Muloña wakwila ambanji ayibabeshaña wanyi, chumichi chakojejaña antu ekala chiwahi kukoña yuma yasweja kutama.”

▪ “Antu ejima ayesekaña nachayikokolañawu nakuyidimbeka nakufwila kwawu aweni kwatama. Dichi kufwila kwatama chikukubaaba ivumu hikukuvwala nshidi.”—YAKOBA 1:14, 15.

Antu ejima anateli kwikala nayitoñojoka yatama. Mafuku ejima atwesekaña chikupu kulonda twili yuma yatama. Mpinji yakunyima akwaKristu ayilejeli nawu: “Hikunayiwani kweseka kwabulaña kutweshawu antu ejimaku.” (1 Akorinda 10:13) Hakwila nawu muntu yeli chuma chatama chashindamena hachuma chinakutoñojokayi, kuleka kutoñojoka hayuma yatama hela kutwalekahu kutoñojoka. Nsona yidi hewulu yamukanda wonenawu waYakoba  yatusoñamisha nawu neyi muntu yeteja yitoñojoka yatama “kubaaba ivumu,” wukukoña yuma yatama.

▪ “Endaku nawakwamaana nineyi wakekala mukwamaana; ilaña wadikunda nawayisupi wakamwenamu jakala.”—YISHIMU 13:20.

Amabwambu jetu anateli kutuleñela kwikala nayililu yayiwahi hela yatama. Kakavulu antu akoñaña yuma yabula kufuukulawu hamuloña wekakeja dawakwawu hela amabwambu atama nawa mwafumaña yuma yatama. Kwesekeja nachahosha Bayibolu, “ayisupi” bayi neyi hiyantu abula maanaku, ilaña hiyantu adiwulaña kufumba kwakuwahi kwekala Mwiizu daNzambi. Chili tudi akulumpi hela atwansi, neyi tubula kutonda amabwambu jetu chiwahi kwesekeja nanshimbi jamuBayibolu, twatela kwiluka netu ‘tukamwenamu jakala.’

Awa mavasi nimavasi amakwawu amavulu amuBayibolu ashimuna hatooka to-o, chuma chaleteshaña antu ekala nayililu yayiwahi kukoña yuma yatama, nawa yekomwesha. Chachiwahi kwiluka chakojejaña antu kukoña yuma yatama, hanu dinu tunateli kukuhwelela netu yuma yatama yamba kamana? Eña, Bayibolu yalumbulula chaleteshaña antu kwila yuma yatama nawa yakana cheñi nawu yumiyi yamba kamana. Yikaninwinyi yeniyi? Komana yuma yatama yejima yidi mukaayi yamba kamana? Chibaaba chinalondeluhu chinakuli.