Njila Jitanu naJiyedi Jikutukwasha Kuhetelamu haKutaña Bayibolu

“Bayibolu himukanda walandañawu chikupu kubadika nyikanda yidi yejima mukuhanda kwawantu nawa ayilandaña hachaaka hachaaka.” —MAGAZINE YATIME.

“Mpinji yikwawu natañaña Bayibolu, ilaña yantiyishaña wuudi hama hakuyitaña.”—KEITH, MUKAKWIMBA WAYA MPUHU WAKUENGLAND.

HICHUMA chakuhayamisha hakuwana neyi antu amavulu akweti Bayibolu ilaña hiyahetelañamu chikupuku muyuma yatañañawu. Hela chochu, amakwawu alemesha yuma yatañañawu muBayibolu. Chakutalilahu, mumbanda wejina daNancy wahosheli nindi: “Kufuma tuhu hinatachikili kutaña Bayibolu mafuku ejima nabudidi nikutoñojokahu chikupu, nekalaña wadiloñesha kushinda kukala kudi kwejima kunukuwana hanodu ifuku. Kwila mwenimu kwankwasha kubula kwikala nachineñi kubadika chuma chidi chejima chinelileña hayaaka 35 yinahituhu.”

Hela chakwila kanda mutañeñahu dehi Bayibolu, neyi mutiya nawu amakwawu yayikwasha, komana himwatiyaña kuwahaku? Neyi mwatañaña Bayibolu, kwila mukeña kuhetelamu chikupu chimukutañaña nehi? Neyi mwatañaña, esekenu kuzatisha njila jitanu najiyedi jinashimunuwu muchinu chibaaba.

Njila 1 Ilukenu chuma chimunakutañila

◼ Munateli kutaña Bayibolu muloña nenu himukanda wawuwahi hela kutaña hohu chintañila indi kwiji nayitoñojoka yakuwanamu nshimbi yikuyikwasha mukanu kaayi kakala. Hela chochu, munateli kuhetelamu chikupu neyi munakufwila kudiza chalala hadi Nzambi. Kubombelahu, akayikiswila chikupu neyi munakukeña kwiluka nsañu yamuBayibolu chiyinateli kuyikwasha muwumi wenu.

Nyikanda yashimuna kulema kwakwiluka chimunakutañila kuhitila mukwesekeja Bayibolu nachibanjilu nawu: ‘Muntu wakuminaña dakutiya  izu, ilaña kwilamu nehi, wudi neyi muntu nadimoni chamesu muchibanjilu; chanadimoniyi hakufumahu, nalalameni dehi chekalayi. Ilaña muntu wukutala munshimbi yawanina chikupu yaletaña kukasunuka hakukakelamu, hanekali mukwakutiya walalamenañaku, neli mukwakwilamu, yenowu muntu wakakooleka mwakwililayi.’—Yakoba 1:23-25.

Iwu muntu wamunichi chakutalilahu waditalili kumesu muchibanjilu ilaña wakañenyi kuwahisha hakeñekeleña. Hadaha waditalili swayi-swayi, indi kwiji wakeñeleña wanyi kudiwahisha. Chochimu, hitunateli kuhetelamuku neyi tukuminaña dakutaña Bayibolu chakubula kushaku muchima hela tukañanya kuzatisha yuma yitunakutaña. Kwambukaku, tukwikala namuzañalu waweni neyi tutañaña Bayibolu nakufwila kwikala “akwakwilamu” nikwilisha yitoñojoka yaNzambi yitulomboleña muyuma yitwelaña nikutoñojoka.

Njila 2 Keñenu Bayibolu yabalumunawu chachiwahi

◼ Hadaha mukweti maBayibolu amavulu imwatela kutondahu mwidimi denu. Hela chakwila Izu daNzambi dabalumunawu dinateli kuyihetesha, maBayibolu amakwawu azatisha mazu amakulu hela awantu ataña nankashi akala kutiyishisha. (Yililu 4:13) Amakwawu ayibalumuna nakuhimpa nsañu yalala yekala muBayibolu kuhitila mukushamu tushidikilu. Chakutalilahu, maBayibolu amakwawu afumishamu ijina daNzambi, Yehova nakuhiñishamu jinkumbu jidi neyi “Nzambi” hela “Mwanta.” Neyi munakutonda Bayibolu, keñenu yabalumunawu chachiwahi yaswayi kutiya nawa yikuyileñela mutwalekuhu kutaña.

Antu amavulu mukaayi kejima atiyaña kuwaha kutaña New World Translation muloña yaswayi kutiya. * Shinshikenu chuma chamwekeni kudi kashinakaji weyala mwituña daBulgaria. Wayili nakupompa nawaYinsahu jaYehova nawa amwinkeli Bayibolu yaNew World Translation. Nkumininaku wahosheli nindi, “Natañi Bayibolu hayaaka yayivulu, ilaña kanda nitañeñahu dehi Bayibolu yaswayi kutiya neyi iyuku, nawa yinanshiki hamuchima.”

Njila 3 Lombenu kudi Nzambi

◼ Munateli kutiyisha chikupu Bayibolu neyi mulomba wukwashu kudi yomweni Nsoneki neyi chalombeliyi ñimbi yamasamu nindi: ‘Ntoneshi mesu ami, nimoni yuma yakuhayamisha munshimbi yeyi.’ (Masamu 119:18) Mwenda mulomba kudi Nzambi mpinji yejima yimunakutaña Nyikanda, kulonda yayikwashi kutiya Izu dindi. Munateli cheñi kusakilila hakutwinka Bayibolu, muloña chakubula Bayibolu hitwadi kumwiluka Nzambuku.—Masamu 119:62.

Komana Nzambi watiyaña chalombañawu antu nawu ayikwashi? Shinshikenu chamwekeni kudi atunkaña ayedi evumu dimu akwituña daUruguay. Ahayamini chahosha Bayibolu haDanyeli 2:44 nawa alombeli kudi Nzambi nawu yayitemesheli muntu kulonda yayikwashi kutiyishisha iyi nsona. Henohu awa atunkaña achidi abakula Bayibolu yawu, kwenjili aYinsahu jaYehova ayedi nawa atañili yoyina vasi yakeñeleñawu kwiluka nawa ayilumbulwilili nawu yinakushimuna hanfulumendi yawantu yikasinsawu kudi Wanta waNzambi. * Awa atunkaña elukili chikupu nawu Nzambi nakuli kulomba kwawu.

NJILA 4 Tañenuña mafuku ejima

◼ Mukwakupulinta nyikanda wumu wahosheli nindi “antu atachikili kulanda chikupu jiBayibolu” hanyima yakwila akwakujahana nanyitenda nzumbu alukuki muUnited States haSeptember 11, 2001. Antu amavulu atañaña Izu daNzambi neyi adi mukukala. Hela chochu, Bayibolu yatukoleshaña kuyitaña mafuku ejima, yahosha nawu: “Weniwu mukanda wanshimbi bayi wakafuma mukanwa keyuku, chiña wakatoñojokañamu nimwaana niwufuku, kulonda wakashuku muchima wakwila mwejima mwanasonekuwu, dichi wakakooleka munjila yeyi, dichi wakamona kuwaha.”—Yoshuwa 1:8.

 Tunateli kulumbulula kulema kwakutaña Bayibolu namuntu wakata chikatu chamuchima nawa wakeñaña kudya yakudya yakwashaña mujimba. Komana neyi yadyaña hohu iyi yakudya hampinji yinatiyiyi muntulu ke-e, chikumukwasha? Inehi. Watela kudyaña mpinji yejima yakudya yakwashaña mujimba kulonda yahetelumu chikupu. Chochimu, kutaña Bayibolu mafuku ejima kukuyikwasha ‘kukooleka munjila yenu.’

Njila 5 Zatishenuña njila jashiyashana hakutaña

◼ Chachiwahi kutaña Bayibolu kufumisha kuKutachika nakushika kuChimwekeshu, ilaña kudi njila jikwawu jinateli kuyikwasha. Talenu iji njila jantesha.

Tañenu hadi muntu wumu wamuBayibolu. Tañenu tupetulu twejima hela nyikanda yahosha hadi mukwakudifukula wumu waNzambi, chidi neyi awa adi heshina:

• Yosefu: Kutachika 37-50.

• Luti: Luti 1-3.

• Yesu: Matewu 1-28; Maku 1-16; Luka 1-24; Yowanu 1-21. *

Shenu muchima hansañu yimunakutaña. Tañenu nyikanda yadifwana nanoyu nsañu. Chakutalilahu, sandujolenu nsañu yahosha hakulomba, nawa tañenu kufumba kwamuBayibolu kwahosha hansañu yakulomba hamu tuhu nikulomba kukwawu kwalombeluwu antu amavulu kwasonekawu muBayibolu. *

Tañenuña nezu datiyakana. Munateli kuhetelamu chikupu kuhitila mukutaña Bayibolu nezu datiyakana. (Chimwekeshu 1:3) Munateli kutaña nezu datiyakana hamu nachisaka nikudihimpa hakutaña maparakalafu hela kwinka amuchisaka kutaña hadi antu ashiyashana amuBayibolu. Amakwawu atiyaña kuwaha kutiyilila nsañu yamuBayibolu yakukwata mumazu. Mumbanda wumu wahosheli nindi, “Chadiña chankalila kutaña Bayibolu hakusambila, dichi natachikili kutiyilila nsañu yamuBayibolu yakukwata mumazu. Ichi dinu natiyaña kuwaha kutaña Bayibolu kubadika mukanda wawuwahi.”

Njila 6 Toñojokenu chikupu

◼ Yuma yamakonu yamuchihandilu yatuluwañeshaña yatuleñelaña kubula kutoñojoka chikupu hansañu yitwatañaña. Hela chochu, yakudya yitwadyaña hakwila nawu yitukwashi yatela kusuñunuka, chochimu, twatela kutoñojoka chikupu hayuma yitwatañaña muBayibolu kulonda tuhetelumu. Twelaña mwenimu kuhitila mukutoñojoka hayuma yitwatañaña nikudihula malwihu adi neyi awa: ‘Chumanyi chinnadizi hadi Yehova Nzambi? Indi chumichi chinakundami ñahi? Nateli kuchizatisha ñahi hakukwasha amakwawu?’

Kutoñojoka muniyi njila kukutuleñela nsañu yamuBayibolu kutushika hamuchima nikwikala namuzañalu wafumaña mukutaña Izu daNzambi. Mukanda waMasamu 119:97 wahosha nawu: “Nshimbi jeyi ochinajikeña! Najitoñojokaña mwaana wejima.” Ñimbi yamasamu washiluku muchima kuNyikanda kuhitila mukutoñojoka mwaana wejima. Kwila mwenimu kwamukwashili kukeña nankashi yuma yatañileñayi.

Njila 7 Keñenu muntu wakuyikwasha kutiyishisha Bayibolu

◼ Bayi neyi Nzambi wakeñaña nindi twiluki Izu dindi kanka wetuku. Bayibolu niyena yahosha nawu “mudi niyuma yikwawu yakala kwiluka.” (2 Petulu 3:16) Mukanda waYililu wahosha hadi kalama wakuEtiyopiya wahayamini hansañu yimu yatañiliyi muBayibolu. Nzambi watemesheli kambuñindi wumu kulonda yamukwashi, chafuminumu ona kaEtiyopiya ‘wayileña kwindi munjila yindi nakuzañalala.’—Yililu 8:26-39.

Anenu nawa munateli kuhetelamu chikupu kutaña Bayibolu neyi mukeña muntu wakuyikwasha kutiyishisha yuma yimunakutaña. Keñakeñenu aYinsahu jaYehova amwiluña denu, hela kuyisonekela kuzatisha keyala yidi hefu 4 muyinu magazini, kulonda ayidizisheña Bayibolu chawaana hetala.

[Tumazu twaheshina]