Yuma Yatama Yamba Kamana

NZAMBI watwinka Izu dindi donenewa dashimunaña muloña wakoñelañawu antu yuma yatama. Watwinka cheñi wuswa wakudifuukwila niwuswa wakudihemba, yumiyi yatukwashaña kutondahu kubula kwila yuma yatama. (Kuhituluka 30:15, 16, 19) Chineli tukweti wuswa weniwu, twatela kwiluka yaaku yatama yitukweti kulonda tuleki kukoña yumiyi. Neyi tuleka yuma yatama chikafumamu tukekala namuzañalu hamu nawantu itwashakamaña nawu.—Masamu 1:1.

Hela chakwila twazataña hakumina ñovu jetu kulonda tubuleña kwila yuma yatama, kaayi kenzala nayuma yatama yakoñañawu antu. Bayibolu yasoñamisha nawu: “Ilukaku chumichi, kumafuku akukuminina kwakenza nyaka yakala.” Hakumwekesha yuma yaleñela mafuku ‘kwikala akala,’ yatwalekahu  nawu: ‘Antu akekala akwakudikeña, akwakufwila mali, akwakudisamba, akwakudinka wanta, akwakutukana; akekala antu abulaña kwovwahila anvwali jawu, abulaña kusakilila, abula kujila, abulaña kukeñañana mwasemwakenawu, oma muchima, akwakutuñula akwawu, abulaña kudihemba, asweja kuzuwa, abulaña kukeña yayiwahi, anfukeji, achinchika, akwakuditohesha, antu akeñaña yakuditiyisha aweni kuwaha, kukeña Nzambi nehi. Kuyitala afwana neyi amwakama Nzambi, hakwinza kwiteja ñovu yindi kwonti kwawu. Ambukaku kudi antu adi chochochu.’—2 Timotewu 3:1-5.

Hamwaha munamoni mazu akwila nawu “mafuku akukuminina” munsañu yawuprofwetu wunasombololuwu hewulu. Indi iyi nsañu munayitiyili mudihi? Antu amavulu eluka nawu “mafuku akukuminina” alumbulula nawu kudi chuma chamba kakuma. Chumanyi chenichi? Talenu yuma yakanayi Nzambi Mwiizu dindi.

Antu atama amba kayifumishamu.

“Hakuleha chanti muntu watama hakekala nawa mwokuku; mwalala, wakakeñakeña hindi hadiñilañayi, hihakamwekanaku. Ilaña akwakudizoza akaswana ituña, akatiya kuwaha nankashi nakushakama chachiwahi chamwena.”—MASAMU 37:10, 11.

“Yehova wahembaña antu ejima amukeña, ilaña antu atama wukuyijilumuna.” —MASAMU 145:20.

Makabi amba kamana.

“Muloña wakamupulwisha wabula yuma hakadilayi, wakapulwisha nikazweñi wabula wakumukwashaku. Wakayikuula mwayidimbilañawu nimwayikabishilañawu; mashi awu wakayimona kulema.”—MASAMU 72:12, 14.

‘Kulonda kuleña kwakweni kufumi muwuduñu wakutoka kwiñili mukusubuka kwasweja kwalubanji lwakulema kwawanyana kaNzambi.’—AROMA 8:21.

Antu akekala nayuma yakeñañawu.

“Ilaña akashakama iwu mwishina damuvinyu windi, iwu mwishina dachikuyu chindi; kwosi wakayitiyisha womaku.”—MIKA 4:4.

“Akatuña matala, akashakamamu. Akadima matempa anyivinyu, akadya nyikabu yayu. Hiyakela atuña, mushakama acheñuku; adima, ayidya kudi acheñuku. Muloña mafuku awantu ami akekala neyi mafuku amutondu, antu ami inatonda akaluña luñe-e nanyidimu yamakasawu.”—ISAYA 65:21, 22.

Heseki hamba kekala wuñaji.

‘Komana Nzambi yabuli kumwekesha wuñaji kudi antu indi atondayi dehi, amubilelaña nimwaana niwufuku . . . ? Nukuyileja nami hakalaba kuyimwekeshela wuñajuku.’ —LUKA 18:7, 8.

“Yehova wakeña wuñaji, hashiyaña antu indi ajilaku, wayihembaña nyaka yejima.”—MASAMU 37:28.

Heseki hamba kekala kuloña.

“Akwakushakama munu mwishina akadiza kuloña.”—ISAYA 26:9.

“Hakwila etu twatalilaña mawulu amaha niiseki dadiha, mwakekala kuloña neyi chakaniniyi.”—2 PETULU 3:13.

Antu Anakuhimpa Makonu

Chakubula nikujina wejima wetu twatiyaña kuwaha nayikaninu yamuchidiwu. Chumanyi  chinakumwekesha nawu iyi yikaninu yikashikijewa? Kafwampi makonu tukweti wunsahu wamwekeshaña nawu yikaninu yaNzambi yamba kashikijewa. Wunsahwinyi weniwu? Hiwunsahu wakwila nawu antu amavulu mukaayi makonu anakuleka lwisu, wuvumbi, hela madombu, nawa anadizi kwikala antu ashinshika, awunda, nawa aluwi. Makonu aYinsahu jaYehova kubadika tununu tutanu natuyedi, hiyamana kwetu amukaayi kejima ashinda chaambu chedimi, ikowa, nyuza, niikañesha dafumaña kudi akajipolitiki nawa hiyelaña nawu iwu kazweñi iwu wahetaku, yumiyi yaletaña chaambu nikuhelañana nimadombu, nikupwekesha mashi mukuhanda kwawantu kwejima. * Antu chinakuhimpawu muniyi njila makonu hiwunsahu watuleñelaña kukuhwelela netu yikaninu yaNzambi yamba kashikijewa.

Hanu dinu chumanyi chaleteshaña antu kuhimpa muniyi njila? Tunateli kuwana ñakwilu muyikaninu yikwawu yamuBayibolu yasonekawu kudi kaprofwetu Isaya. Wasonekeli nindi:

‘Kañwidi wakashakamaña hamu namwana kamukoku, chisumpa wakakamaña hamu namwana kampembi; nimwana kañombi nimwenzi wamutupa nichimuna wakudiisha chachiwahi akekalaña hamu; akayilombolaña kudi mwana wanyanya. . . . Mutupa wakadyaña nsaachi jatidiku neyi ñombi. Mwana wuchidi kwamwa wakahemenaña hawina wakabandanjila, mwana wasumuka dehi wakasha chikasa chindi kuwina wakapela kasweja kuzuwa. Kumpidi yami yajila yejima hikwakekala kudikatisha hela kudijilumunaku; muloña iseki dejima dakawanina kumwiluka Yehova, neyi chabutaña menji hakaluñalwiji.’—Isaya 11:6-9.

Dikwila nawu iwu wuprofwetu washimwineñahu dehi hohu mpinji yamba  kashakamawu anyama nawantu mukuwunda? Inehi, washimuna yuma yayivulu. Ilukenu nenu mazu akukumisha anakushimuna chuma chaleñelaña iku kuhimpa: “Iseki dejima dakawanina kumwiluka Yehova.” Komana kumwiluka Nzambi kwaleñelaña anyama kuhimpa yililu? Kwakulehi. Kwahimpaña antu. Iwu wuprofwetu washimwineñahu dehi nawu antu adiña nayililu neyi anyama akahimpa nakwikala nayililu neyi yaKristu muloña wakudiza nikuzatisha yuma yatañishaña Bayibolu.

Shinshikenu chakutalilahu chaPedro. * Hampinji yadiñiyi mwizanvu dawakwakujahana wakuhweleleli nindi nakufwila kuleta kuloña. Hanyima yakumudizisha, amulejeli nawu yakwochi mukala wawakapokola. Chadiloñesheleñayi kuya nakwocha mukala amukwatili. Pedro washakamini tukweji 18 mukaleya, nawa watwalekeluhu nanyidimu yindi yawubanji. Hampinji yadiñayi mukaleya, ñodindi watachikili kudiza Bayibolu nawaYinsahu jaYehova. Chamufumishiluwu mukaleya, Pedro watachikili kudiza Bayibolu, nawa yuma yadizileñayi hadi Yehova Nzambi yamuleñeleli kuhimpa chikupu yililu yindi nawa watachikili kulemesha wumi. Pedro wahosheli nindi, “Namusakililaña Yehova muloña najahiluhu muntu wanyi hampinji yinadiña mwizanvu dawakwakujahana. Ichi nazatishaña mpoku yakabali yaspiritu yaNzambi, Bayibolu, kushimwina antu nsañu  yakuwunda kwalala niwuñaji, nsañu yayiwahi yaWanta waNzambi.” Pedro wayili mumukala wawakapokola wakeñeleñayi kwocha kulonda ayishimwini nsañu yakuwunda niituña mwakabula madombu.

Ñovu yekala Mwiizu daNzambi yakuhimpa antu yatwileñelaña kukuhwelela chikaninu chaNzambi netu yuma yatama yejima yamba kamana. Eña, antu hiyamba kakoña cheñi yuma yatama haya nyakaku, akekala antu amawahi. Yehova keña yafumishuhu mukwakuleta yuma yatama, Satana Diyabolu wakojejaña yumiyi mukaayi. Bayibolu yahosha nawu: “Mpata yamunu mwishina yashakamaña mudi owu watama.” (1 Yowanu 5:19) Keña amujilumuni. Niantu ejima atwalekañahu kukoña yuma yatama amba kayijilumuna. Tukatiya kuwaha hama kushakama mwituña damuchidiwu!

Indi muntu watela kwiladi hakwila nawu akashakami mwituña denidi? Anukenu nenu “kumwiluka Yehova” dikunakuleñela antu kuhimpa yililu yawu makonu nawa dikwakaleñela kaayi kejima kuhimpa kumbidi. Kuhitila mukwiluka nsañu yalala yamuBayibolu nikuyizatisha neyi chayizatishiliyi Pedro, anenu nawa munateli kutalila kushakama mwituña “mwakekala kuloña.” (2 Petulu 3:13) Dichi tunayikoleshi kuzatisha iyi mpinji makonu kulonda mudizi chalala chaNzambi niYesu Kristu, chumichi chikayileñela kuheta wumi wahaya nyaka.—Yowanu 17:3.

[Tumazu twaheshina]

[Mazu ekoku adi hefu 9]

Anenu nawa munateli kutalila kushakama mwituña “mwakekala kuloña.”—2 PETULU 3:13