1 Muloñadi Chitwatelela Kulomba?

KULOMBA. MuBayibolu mwekala nsañu yantesha yakeñeshawu antu nawa yafwilañawu kwiluka. Shinshikenu hamalwihu atanu nayedi avula kwihulawu antu kutalisha hakulomba; nawa tukudiza Bayibolu chiyakulaña awa malwihu. Iyi yibaaba anayisoneki kulonda yiyikwashi mwiluki chakulomba, mutachiki kulomba hela mulombeña chachiwahi.

ANTU muyisemwa yejima nimunsakililu yamukaayi alombaña. Alombaña kwakankawawu; nimumazanvu. Alombelaña mumachaachi, mumatembeli, mumasinagogi, mumamosque awaMoslemu nikunyiyombu. Anateli kuzatisha mahina, wusaña, tufumbu, yifwikija, nyikanda mwasonekawu kulomba, hela mazu asonekawu habodi yakukudika hambañu.

Kulomba dikwaleñelaña antu kwikala ambukaku kuyuma yejima yikweti wumi heseki. Hela chochu, kudi yuma yitwakeñaña yadifwana nayakeñañawu atunyama. Twakeñaña yakudya, mpepela nimenji, neyi chochakeñañawu atunyama. Kufwana atunyama, ninetu twavwalikaña, twahandaña nawa twafwaña. (Mukwakutaŋisha 3:19) Ilaña antu hohu diwu alombaña. Muloñadi?

Muloña tukweti mpwila yakulomba. Antu atoñojokaña nawu kulomba hinjila yaleteshaña kushika kwajila hela kwahaya nyaka. Bayibolu yashimuna nawu atuleña nampwila yakulomba. (Mukwakutaŋisha 3:11) Yesu Kristu wahosheli nindi: ‘Akaankila kuspiritu anakooleki.’—Matewu 5:3.

‘Kukaankila kuspiritu’ dikwaleteshaña akwansakililu atuñeña matala akudifukwilamu niyifwikija, nikulomba mpinji yeneni. Antu amakwawu adishindamenaña hela kushindamena akwawu antu nawu diwu atela kuyinka yuma yakaankilañawu kuspiritu. Komana mweluka nenu antu hiyakweti wuswa wakukwasha akwawu antuku? Twekala azeya chikupu, wumi wetu wakampinji kantesha nawa hitwelukaña yuma yakumbiduku. Muntu wasweja maana, wukweti ñovu yabadika, washakamaña haya nyaka diyi watela kutwinka yuma yitwakaankilaña kuspiritu. Hiyumanyi yeniyi yakuspiritu yitwakaankilaña yatwileñelaña tulombeña?

Toñojokenu hayumiyi: Komana mwakeñaña wunlomboli, maana hela ñakwilu yamalwihu akañanyaña kwakulawu antu? Komana kudihu ifuku dimwakabakeni nawa mwakeñeleña kuyikundeja, nikuyikwasha hampinji yimwafuukwileña hachuma chakala, hela himwakeñeleña kuyanakena?

Kwesekeja nachahosha Bayibolu iyi diyuma yalema yitwatelela kulomba. Bayibolu dimukanda watela kutukwasha kutalisha hansañu yakulomba, nawa mwekala kulomba kwakuvulu kwalombeluwu ambanda niamayala ashinshika. Alombeli kulonda ayikundeji, ayilomboli, ayanakeni, nikwakula malwihu akala nankashi.—Masamu 23:3; 71:21; Danyeli 9:4, 5, 19; Habakuki 1:3.

Kulomba kwawu hela kwadiña kwashiyashana, ilaña mukulomba kwawu mudi chuma chadifwana. Muntu wejima walombeleña welukili chuma chalema chakeñekaña hakulomba, chabulaña kulondelawu hela chadiwulañawu antu mukaayi makonu. Elukili kwatela kulombawu.